Edwɛkɛ ta ba mbusua mɔɔ dɔmaba wɔ nu nee menli mɔɔ bɛnle sua nu ɛkɛ la avinli. * Saa ɔhyia kɛ bɛkɔkpɔla kakula bie, bɛtea ye na bɛmaa ye ezukoa a ɔwɔ kɛ awovolɛ mɔɔ bɛlɛ dɔmaba la nee ye awovolɛ ne mɔɔ ɛha la tendɛ. Ɔyɛ se ɔmaa agɔnwolɛma nee bɛ nwo amra noko kɛ bɛ nee abusua fofolɛ ne anu amra badɛnla. Suzu kɛzi Baebolo ne anu folɛdulɛ bahola aboa wɔ abusua ne mɔɔ dɔmaba wɔ nu yeamaa yeagyinla zɔhane ngyegyelɛ ne anloa la.

Ɛrɛladane bie mɔɔ bɛfɛlɛ ye Judith, mɔɔ lɛ dɔmaba na ɔwɔ Namibia la ka kɛ: “Mekɛ bie, ngakula ne mɔ mame hanle hilele bɛ kɛ mele bɛ papa aye fofolɛ ala na ngakula biala mɔɔ yɛbawo bɛ la ɛnle bɛ mediema. Ye edwɛkɛ ne gyegyele me ɔluakɛ  mekulo ngakula ne mɔ edwɛkɛ kɛ me kunlu mralɛ la.”

Benlerama kile kɛ ɔyɛ se kɛ ngitanwolilɛ bala bɛ nee kakula ne awovolɛ ɛhendeɛ ne avinli, na ɛhye le edwɛkɛ mɔɔ gyegye abusua mɔɔ dɔmaba wɔ nu la. Fane dɔɔnwo ne ala, kakula ne mame nee yelɛ fofolɛ ne a edwɛkɛ ne gyegye bɛ a. Duzu a baboa bɛ a?

Mɔɔ baboa la: Maa ɔnwu mɔɔ ɔwɔ kɛ ɔyɛ la. Saa ɛbɔ mɔdenle kɛ ɛnrɛmaa awovolɛ ɛhendeɛ ne adenle a ɔbaha ngakula ne mɔ nganeɛdelɛ. * Kakula awovolɛ ‘mɔɔ wole ye la’ hyia titile wɔ ye ɛbɛlabɔlɛ nu. (Mrɛlɛbulɛ 23:22, 25) Noko akee, saa ɛmaa wɔ bokavolɛ dɛba ne nyia adenle dɔɔnwo wɔ sua nu ɛkɛ a, ɔbagyegye wɔ bokavolɛ fofolɛ ne na yeava ɛya. Maa awovolɛ ko ne adenle noko mmamaa ɔtɛla ɛweɛne ne na yɛanzɛkye agyalɛ ne.

MƆƆ BABOA AWOVOLƐ

• Saa ɛ nee wɔ bokavolɛ dɛba ne ɛlɛtendɛ a, ka ngakula ne mɔ anwo edwɛkɛ na gyakyi ninyɛne mɔɔ ɛha la. Kɛ neazo la, ɛbahola wɔalua nrɛlɛbɛ adenle zo wɔabiza saa bɛbahola bɛalua moba zo bɛadendɛ dahuu wɔ alehyenlɛ ne anu a. Yemɔ boa tɛla kɛ bɛbavɛlɛ bɛ nwo mekɛ biala anzɛɛ nɔɔzo la.
• Saa ngakula ne mɔ ɛnle ɛ nwo ɛkɛ a, bie a ɛbahola wɔalua moba, ngɛlata, text anzɛɛ Intanɛte zo ɛ nee bɛ adendɛ dahuu. (Mɛla ne 6:6, 7) Bie mɔ bɔbɔ fɛlɛ na bɛ muala bɛtendɛ mɔɔ bɛnwu bɛ nwo la. Ɛbahola wɔade ngakula ne mɔ edwɛkɛ bo kpalɛ—na wɔaboa bɛ wɔ adenle kpalɛ zo—wɔadɛla kɛmɔ bie a ɛdwenle la.

MƆƆ BABOA ƐRƐLADANE MƆƆ LƐ DƆMABA

• Te ngakula ne mɔ mame “nyane bo” maa ɔnwu ye wienyi kɛ ɛmbɔ mɔdenle kɛ ɛfa awie wɔazie ɔ gyakɛ anu. (1 Pita 3:8) Ka kɛzi ngakula ne mɔ anwo de la anwo edwɛkɛ kile ye, ka bɛ nwo edwɛkɛ kpalɛ. (Mrɛlɛbulɛ 16:24) Biza ye saa ɔlɛ nzuzulɛ bie a, saa ɔmaa wɔ bie a yɛ ye mo.
• Saa ngakula ne mɔ mame wɔ ɛkɛ a mmamaa ɛ nye die bɛ nwo somaa. Beverly, ɛrɛladane mɔɔ lɛ dɔmaba wɔ United States la, ka kɛ: “Ɛnee ngakula ne mɔ kulo kɛ bɛfɛlɛ me Mame. Yɛliele yɛdole nu kɛ saa yɛwɔ sua nu a bɛbahola bɛavɛlɛ me zɔ, noko saa bɛ mame, Jane, anzɛɛ ye abusua ne boka yɛ nwo a bɛnrɛvɛlɛ me zɔ. Ɛhye anzi me nee Jane luale kɛnlɛma. Nɔhalɛ nu, nzinlii me nee ye bɔle nu yɛle gyima dɔɔnwo yɛvale yɛboale ngakula ne mɔ wɔ sukulu.”

MƆƆ BABOA AGYALƐMA MƆƆ BƐLƐ DƆMABA NEE DƆMABA NE MƆ AWOVOLƐ

• Mmaka awovolɛ mɔɔ ɔnle ɛkɛ anzɛɛ awovolɛ mɔɔ lɛ dɔmaba la anwo edwɛkɛ ɛtane mɔɔ ngakula ne mɔ bade la. Ɔnyɛ se kɛ awie baha edwɛkɛ ɛtane zɛhae mɔ, noko ɔgyegye ngakula. Ɛnze kɛzi anzɛɛ mekɛ mɔɔ bɛbaha wɔ edwɛkɛ ne bie la. (Nolobɔvo ne 10:20) Saa kakula ka kɛ awovolɛ ɛhendeɛ ne anzɛɛ awovolɛ mɔɔ lɛ dɔmaba la ɛha ɛ nwo edwɛkɛ ɛtane a dwenle kakula ne nganeɛdelɛ nwo. Ɛbahola  wɔaha kɛ: “Ɔyɛ me nyane kɛ ɛdele zɔhane edwɛkɛ ne la. Wɔ Mame ɛva me nwo ɛya, ɔyɛ na menli fa ɛya a bɛka edwɛkɛ mɔɔ ɔnfɛta la.”
• Maa mɛla nee ndeanlɛ ɛhɔ zo wɔ aako nwiɔ ne anu. Saa ɛhye ɛnrɛyɛ boɛ a, kile ngakyile mɔɔ wɔ nu la, noko mmayɛ awovolɛ ɛhendeɛ ne aholoba. Suzu edwɛkɛ ɛhye mɔ anwo:Ɛrɛladane mɔɔ nee kakula de: Kofi, fa wɔ tohulu ne kɔrɛlɛ.Kofi: Me Mame sua nu ɛkɛ, yɛgua ye aze na yearɛlɛ yeamaa yɛ.Ɛrɛladane mɔɔ nee kakula de (la ka ye ɛya zo kɛ): Ɛnee ɔlɛmaa bɛayɛ mgbovonle.Ɔhanle ɛhye a se anrɛɛ ɔle kpalɛ?Ɛrɛladane mɔɔ nee kakula de (la ka ye bɛtɛɛ kɛ): Yoo, Mede. Ɛke mɔɔ yɛdayɛ a yɛrɛlɛ a.
• Mmamaa ngakula ne mɔ yɛ gyima wɔ mekɛ mɔɔ bɛbahɔ bɛ awovolɛ ɛhendeɛ ne ɛkɛ la. (Mateyu 7:12) Saa ɛkakyi a ɔnyɛ boɛ a, sɛlɛ adenle fi awovolɛ ɛhendeɛ ne ɛkɛ kolaa na wɔaha ngyehyɛleɛ mɔɔ wɔyɛ la wɔahile ngakula ne mɔ.

Buluku ne mɔɔ se Step Wars la ka raalɛ bie mɔɔ tendɛ ɔ nzo abo kɛ ɔ hu gyinla ɔ mra mɔɔ bɛnyi la anzi na ɔnlie ɔndo nu kɛ bɛnli ye eni la anwo edwɛkɛ. Ɔka kɛ: “Ɔngyɛ na meava ɛya.” Kɛ ɔkɛyɛ na ɛ nee ngakula mɔɔ bɛnyi la avinli edwɛkɛ anzɛkye wɔ agyalɛ ne ɛ?

Mɔɔ baboa la: Kile kɛ ɛdwenle bɛ nwo. Baebolo ne ka kɛ: “Awie biala mmadwenle ɔ ngome ye boɛyɛlɛ nwo. Bɛdwenle bɛ gɔnwo mɔ ɛdeɛ nwo.” (1 Kɔlentema 10:24) Bɔ mɔdenle nwu mɔɔ ahenle ɛlɛkile la na te ye edwɛkɛ bo. Bie a dɔmaba ngakula mɔɔ bɛnyi la bazulo kɛ bɛ mame anwo ɛlɔlɛ bavi ɛkɛ. Bie noko a bɛbade nganeɛ kɛ bɛ nye die awovolɛ gyɛne nwo a ɔnrɛhile nɔhalɛlilɛ ɔnrɛmaa bɛ abusua dɛba ne. Mekɛ ko ne ala, awovolɛ bahola ade nganeɛ kɛ bɛtendɛ bɛtia bɛ mra a ɔnrɛmaa bɛ nye ɛnrɛha sua nu.

Kɛ anrɛɛ ɛbayɛ ye kyengye kɛ bɛva wɔ agɔnwolɛ la, maa ngakula ne mɔ ɛvi bɛ ahonle nu ɛva wɔ agɔnwolɛ. Mekɛ dɔɔnwo ne ala, nrɛlɛbɛ ɛnle nu kɛ yɛbayɛ ye kyengye kɛ awie ɛhulo yɛ (Sɔlɔmɔn Edwɛne 8:4) Yemɔti, saa ɛkulo kɛ wɔ dɔmaba ne mɔ fa wɔ agɔnwolɛ kpalɛ a nyia nwolɛ adwenle mɔɔ fɛta la.

Saa bɛyɛ wɔ ɛtane bɔbɔ a, mmaka edwɛkɛ biala mɔɔ ɛsuzu anzɛɛ ɛte nganeɛ kɛ ɔwɔ kɛ ɛka la. (Mrɛlɛbulɛ 29:11) Saa ɔyɛ wɔ ɛse kpalɛ kɛ ɛbavea edwɛkɛ zo titile a, yɛ asɔne kɛmɔ Belemgbunli Devidi mɔɔ wɔ Yizilayɛ yɛle la kɛ: “O [Gyihova], maa sinzavolɛ ɛzinza me nloa, na ɔzinza me nloa babonle ye.”—Edwɛndolɛ 141:3.

Saa ɛsi kpɔkɛ kɛ ɛbadɛnla sua ne mɔɔ bɛtetele ngakula ne mɔ wɔ nu la anu a, kɛzi bɛ nye die ɛkɛ la bazi ɛ nwo. Bɔ mɔdenle kɛ ɛnrɛhakyi ninyɛne  dɔɔnwo, titile ɛleka mɔɔ ɛnee bɛda la. Ɛbahola noko wɔazuzu nwo na bɛadu bɛahɔ sua fofolɛ nu.

Ɛrɛladane mɔɔ lɛ dɔmaba mɔɔ wɔ Canada, mɔɔ bɛfɛlɛ ye Marion la ka kɛ: “Ɛnee me awovolɛ ta kyɛ me ra nrenya ne debie noko bɛmmaa me hu amra ne mɔ. Yɛbɔ mɔdenle kɛ yɛbadɔ bie yeamaa bɛ, noko tɛ dahuu biala a yɛkola yɛyɛ zɔ a.”

Mɔɔ baboa la: Dumua dwenle wɔ abusua fofolɛ ne anwo. Ka kɛzi ɛkulo wɔ abusua fofolɛ ne la anwo edwɛkɛ kile ɛ nwo amra nee ɛ gɔnwo mɔ. (1 Temɔte 5:8) Ɛnrɛhola ɛnrɛmaa ɛ nye ɛnrɛla kɛ ɛ nwo amra nee ɛ gɔnwo mɔ bahulo wɔ abusua fofolɛ ne ɛdeɛ, noko ɛbahola wɔaha wɔahile bɛ kɛ bɛbu bɛ na bɛyɛ bɛ kɛnlɛma. Kilehile nuhua kɛ saa bɛandɛne ngakula ne mɔ zo anzɛɛ bɛbɔ bɛ abokɛ a bɛbava ɛya.

Bɔ mɔdenle maa wɔ bokavolɛ dɛba ne awovolɛ ɛnlea ngakula ne mɔ bie. Ɛrɛladane bie mɔɔ wɔ England mɔɔ bɛfɛlɛ ye Susan la ka kɛ: “Me hu wule la ye siane 18 anzi yɛ mengɔle agyalɛ bieko a, na ɔhyɛle na ye awovolɛ alie me hu fofolɛ ne ado nu. Ninyɛne yɛle kpalɛ wɔ mekɛ mɔɔ yɛmanle bɛ adenle kɛ bɛboa yɛ, yɛmanle ngakula ne mɔ vɛlɛle bɛ na yɛyɛle bɛ mo wɔ bɛ moalɛ ne anwo la.”

Agɔnwolɛvalɛ mɔɔ la wɔ nee menli mɔɔ bɛnle wɔ aako ne anu avinli la bahola agyegye wɔ abusua ne mɔɔ dɔmaba wɔ nu la. Noko, saa ɛfa Ngɛlɛlera ne anu folɛdulɛ ɛbɔ wɔ ɛbɛla a ɛbanyia nyilalɛ ɛhye mɔɔ Baebolo ne bɔ nwolɛ ɛwɔkɛ la: “Bɛfa nrɛlɛbɛ a bɛsi sua a, bɛfa ndelebɛbo a bɛkyekye awuke a.”—Mrɛlɛbulɛ 24:3.