EDWƐKƐ TITILE | ADALƐ MƆƆ MAA BƐDWENLE KƐ NYAMENLE ƐNLƐ ƐLƆLƐ LA
Ɔyɛ Se Ɔmaa Menli Kɛ Bɛbahulo Nyamenle
“Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne. Ɛhye a le mɛla titile kpalɛ mɔɔ hyia a.”—Gyisɛse Kelaese, 33 Y.M. *
Ɔyɛ se ɔmaa menli bie mɔ kɛ bɛbahulo Nyamenle. Wɔ bɛ afoa nu, Nyamenle ɛndwenle yɛ nwo, ɔwɔ moa anzɛɛ ɔ ti yɛ se. Suzu edwɛkɛ ɛhye mɔ mɔɔ doɔdoa zo la anwo:
-
“Menzɛlɛle Nyamenle moalɛ, noko mekɛ ko ne ala, ɛnee mete nganeɛ kɛ ɔwɔ moa, kɛ asɛɛ menrɛhola menrɛbikye ye la. Ɛnee menzuzu kɛ Nyamenle te nganeɛ.”—Marco, Italy.
-
“Ɛnee mekulo kɛ mesonle Nyamenle nɔhalɛ nu ɛdeɛ, noko ɛnee ɔyɛ me kɛ ɔwɔ moa somaa. Ɛnee mesuzu kɛ ɔle Nyamenle mɔɔ le kyengye mɔɔ twe yɛ nzo ala a. Ɛnee menlie menli kɛ ɔlɛ ɛlɔlɛ.”—Rosa, Guatemala.
-
“Mekɛ mɔɔ mele kakula la, ɛnee medie medi kɛ Nyamenle nea yɛ ɛtane na ɔtwe yɛ nzo wɔ nwolɛ kɛ mɔɔ fɛta yɛ la ɛne. Nzinlii mendele nganeɛ kɛ ɔndwenle yɛ nwo. Ɛnee mebu Nyamenle kɛ maanle sonvolɛ mɔɔ di ye menli ne anyunlu wɔ bɛ edwɛkɛ nwo, noko bɛ nwo edwɛkɛ ɛngyia ye la.”—Raymonde, Canada.
Kɛzi ɛdwenle nwo ɛ? Asoo Nyamenle ɛnlɛ ɛlɔlɛ? Keleseɛnema ɛbiza zɔhane edwɛkɛ ne wɔ ɛvoya dɔɔnwo anu. Nɔhalɛ nu, wɔ ɛvolɛ 500-1500 Y.M. ne anu, ɛnee Keleseɛnemaanle ne anu amra dɔɔnwo ɛnzɛlɛ Tumivolɛ Bedevinli ne bɔbɔ. Duzu ati ɔ? Ɛnee menli sulo ye kpalɛ. Tetedwɛkɛ kɛlɛvolɛ Will Durant ka ye zɛhae kɛ: “Kɛ ɔkɛyɛ na awie mɔɔ ɛyɛ ɛtane la ahola ava ye asɔneyɛlɛ ahɔ Nyamenle mɔɔ anwo yɛ ɛzulolɛ la anyunlu ɛ?”
Kɛ ɔyɛle mɔɔ bɛbule Nyamenle kɛ ɔ nwo yɛ “ɛzulolɛ na ɔwɔ moa” ɛ? Duzu a Baebolo ne kilehile amgba wɔ Nyamenle anwo a? Ɛsukoa Nyamenle anwo nɔhalɛ ne a ɔbaboa yeamaa wɔanyia ɔ nwo ɛlɔlɛ ɔ?
