Ɛvolɛ 1942 ne mɔlebɛbo, mekɛ mɔɔ United States vale ɔ nwo wulale Ewiade Konle II anu anzi mekɛ ekyi bie anu la, ɛnee mewɔ me ɛvolɛ nnu ne azo wɔ kɔlegyi nu na ɛnee ɔka siane ekyi na meanyia digilii wɔ suazilɛ nwo gyimayɛlɛ nu. Ɛnee me nee me gɔnwo mɔ nwiɔ a wɔ sua bie anu a. Nuhua ko zuzule hilele me kɛ me nee ahenle mɔɔ “bakpɔla ngakula mrenya wɔ azɛlɛ nwo ɛkɛ” la ɛdendɛ. Ɛkɛ ne yɛɛ me nee John O. (Johnny) Brehmer, mɔɔ le Gyihova Dasevolɛ la yiale a. Ɔzinle me nwo kɛ asɛɛ ɔkola ɔfa Baebolo ne ɔbua kpuyia biala la. Me nye liele nwolɛ, yemɔti membɔle ɔ bo me nee Johnny zukoale Baebolo ne dahuu na akee me nee ye hɔle edwɛkɛhanlɛ wɔ mekɛ biala mɔɔ ɔkɛyɛ boɛ la.

Ɛnee Johnny papa, Otto, ɛrayɛ Dasevolɛ wɔ mekɛ mɔɔ ɔle bange kpanyinli wɔ Walnut, Iowa la. Otto gyakyile zɔhane gyima ne na ɔvale ɔ nwo ɔwulale dahuu ɛzonlenlɛ gyima ne anu. Mekɛ hɔle bie la, ye neazo kɛnlɛma ne, yɛɛ mɔɔ ye abusua ne noko yɛle la manle menzile kpɔkɛ mɔɔ hyia la.

Kenle ko, yunivɛsiti kpanyinli ne hanle hilele me kɛ me mɔdenlebɔlɛ ne ɛlɛka aze yemɔti bɛnrɛhola bɛnrɛnlea mɔɔ meyɛ ye dɛba la azo kɛ mengɔ me nyunlu. Mekakye kɛ menzɛlɛle Gyihova Nyamenle kpalɛ kɛ ɔhile me adenle. Yeangyɛ, bɛvɛlɛle me kɛ mbulalɛ gyima nwo benleravolɛ ne kulo kɛ ɔnwu me. Ɔhanle ɔhilele me kɛ awie se ɔkpondɛ engyinea na yeha yehile ye kɛ mebayɛ gyima ne. Menyɛle benleravolɛ ne mo noko menganle deɛmɔti mekulo kɛ meyɛ Gyihova ɛzonlenlɛ gyima ne la mengilele ye. Wɔ June 17, 1942, bɛzɔnenle me na yeangyɛ biala bɛkpale me kɛ adekpakyelɛnli, kɛmɔ bɛfa bɛfɛlɛ Gyihova Alasevolɛ mɔɔ yɛ dahuu ɛzonlenlɛ gyima ne la.

Mekɛ bie anzi wɔ 1942 ne anu, bɛhanle kɛ ɔwɔ kɛ meyɛ sogya gyima yemɔti mengɔle menli mɔɔ nea zolɛ la anyunlu, na menganle deɛmɔti ɔgyegye me adwenle kɛ mebahɔ konle la mengilele bɛ. Menliele kɛlata menvile kɔlegyi ne anu kilehilevolɛma ɛkɛ mɔɔ kile kɛ melɛ subane kpalɛ na eza mele engyinea mɔɔ bɔ mɔdenle la. Noko akee, ɔnva nwo kɛ bɛlile me nwo daselɛ kɛnlɛma zɛhae la, bɛbɔle me kakɛ $10,000 (U.S.) na bɛdole me efiade ɛvolɛ nnu wɔ Leavenworth, Kansas, mɔɔ wɔ U.S. la.

Ɛnee bɛva Alasevolɛ ngakula mɔɔ bo 230 la bɛhɔ Leavenworth ɛya ne anu, ɛleka bie mɔɔ Leavenworth efiade ne a nea zolɛ la. Ɛya ɛhye anu a ɛnee  menli dɔɔnwo nea yɛ nwo zo maa yɛyɛ gyima wɔ ɛkɛ a. Ɛnee bɛ nuhua bie mɔ ze afoa biala mɔɔ yɛnle kɛ Keleseɛnema la na ɛnee yɛ kpɔkɛzilɛ ne ɛngyegye bɛ.

Sinzavolɛma ekyi dele mɔdenle mɔɔ yɛlɛbɔ kɛ yɛbayia nu yɛazukoa Baebolo ne la abo. Bɛboale yɛ noko bɛmanle yɛnyianle Baebolo mbuluku wɔ efiade ɛkɛ ne. Ahenle mɔɔ nea efiade ɛkɛ ne bɔbɔ la ɛnee die Consolation (ɛnɛ Awake!) magazine ne bie!

Menlile ɛvolɛ nsa wɔ efiade ɛkɛ la bɛyele me wɔ February 16, 1946, Ewiade Konle II rale awieleɛ la anzi mekɛ ekyi bie anu. Ndɛndɛ ne ala, membɔle dahuu ɛzonlenlɛ gyima ne abo bieko kɛ adekpakyelɛnli. Bɛhanle kɛ menzia mengɔ Leavenworth, Kansas, na menyɛ gyima wɔ ɛkɛ. Ɛzulolɛ hanle me ɔluakɛ ɛnee bɛngulo Gyihova Alasevolɛ edwɛkɛ wɔ ɛkɛ ne fee. Ɛnee ɔyɛ se kɛ mebanyia gyima meayɛ, na bɔbɔ meanyia ɛleka meadɛnla.

Mekakye kɛ me nee sinzavolɛ bie yiale na ɔdeanle me nu kɛ, “Fi me sua nu ɛke kɔ!” Mekɛ mɔɔ menwunle kɛ ɔlɛ baseball baka ne ɔ sa nu la, me ahonle dule na menvile ɛkɛ ne ndɛndɛ. Wɔ sua fofolɛ nu, raalɛ bie hanle kɛ, “Kendɛ ekyii,” na ɔdole anlenkɛ ne anu. Megyi ɛkɛ toonwo arɛlevilɛ nu ɔdole nzule evinli ɔvile anwuma nvɛnzɛlɛ bie anu ɔguale me nwo. Noko akee, menyianle nyilalɛ wɔ me ɛzonlenlɛ gyima ne anu. Nzinlii mendele kɛ menli mɔɔ liele Baebolo mbuluku wɔ me ɛkɛ la bie mɔ rayɛle Alasevolɛ.

Wɔ 1943 bɛbukele sukulu fofolɛ bɛmanle edwɛkpatɛlɛvolɛma wɔ New York. Bɛvɛlɛle me kɛ mengɔ bie, yɛdayɛ a yɛle ekpunli ne mɔɔ tɔ zo bulu a, na yɛwiele wɔ February 8, 1948. Bɛdonle sukulu ne duma Ɛzinzalɛ Arane Gilead Baebolo Sukulu. Yɛwiele la bɛvale me bɛhɔle Gold Coast, mɔɔ ɛnɛ bɛfɛlɛ ye Ghana la.

Mekɛ mɔɔ mendwule Gold Coast la, ɛnee ɔwɔ kɛ meka edwɛkɛ ne mekile arane mgbanyima nee menli mɔɔ vi Europe la. Ɔdwu dapɛne awieleɛ a me nee Gyihova Alasevolɛ asafo bie yɛ gyima na meboa menli mɔɔ wɔ nu la wɔ azua nu daselɛlilɛ nu. Eza mengɔle ɛleka mɔɔ Alasevolɛ bie mɔ wɔ la na mengilele bɛ daselɛlilɛ gyima ne anye zo. Bieko, menyɛle maanzinli zo neavolɛ wɔ Ivory Coast, mɔɔ bikye ɛkɛ na ɛnɛ bɛfɛlɛ ye Côte d’Ivoire la.

Mekɛ mɔɔ ɛnee melɛsonle wɔ ɛleka ɛhye mɔ la, menyɛle me nwo kɛ menli mɔɔ wɔ Africa la—ɛnee meda ndɛtɛlɛ sua nu, mefa me sa medi aleɛ na mesɔho ‘me gyakɛ’ kɛmɔ Yizilayɛma yɛle wɔ ɛsɛlɛ ne azo la. (Mɛla ne 23:12-14) Zɔhane mɔɔ me nee me gɔnwo mɔ edwɛkpatɛlɛvolɛma yɛle la manle bɛbɔle yɛ  duma kpalɛ. Maanle mgbanyima bie mɔ aye bɔle ɔ bo kɛ bɛ nee yɛ sukoa Baebolo ne. Yemɔti mekɛ mɔɔ dwazotiama bie gyegyele yɛ na bɛnyianle tumi mɔɔ bɛfa bɛazɛkye yɛ visa ne la, mgbanyima ɛhye mɔ aye mɔ hɔle bɛ hu mɔ anwo zo na bɛhakyile bɛ adwenle!

Kɛmɔ ɔto edwɛkpatɛlɛvolɛma dɔɔnwo mɔɔ wɔ Africa la, menyianle malaria. Ɛyɛlɛyɛlɛ nee anwolɔlɛ manle me adwenle nee me ɛdendɛlɛ yɛle basaa. Ɔdwu mekɛ ne bie a ɛnee ɔwɔ kɛ mefa me sa mesɔ me awudwelɛ na yeanwozo. Noko ɛnee menyia anyelielɛ nee ahunlundwolɛ wɔ me ɛzonlenlɛ ne anu.

Ɛvolɛ nna mɔɔ lumua mɔɔ menlile ye wɔ Africa la anu, ɛnee me nee Eva Hallquist, mɔɔ me nee ye yiale kolaa na meavi United States la kɛlɛ yɛ nwo kɛlata. Mendele kɛ ɔboka sukoavoma mɔɔ tɔ zo 21 mɔɔ bawie Gilead Sukulu ne wɔ July 19, 1953, wɔ Gyihova Alasevolɛ maanle maanle avinli nyianu mɔɔ bɛbayɛ ye wɔ New York Yankee Stadium la abo. Me nee melikavolɛ bie yɛle ngyehyɛleɛ kɛ mebayɛ gyima wɔ ye meli ne anu meava meadua United States mɔɔ melɛkɔ la anwo kakɛ.

Yɛlile kenle 22, mɔɔ ɔdwu mekɛ ne bie a ɛnee nyevile ne ɛlɛtu la anzi, mendwule nehane na me nee Eva hɔyiale wɔ Gyihova Alasevolɛ gyimayɛlɛ ne ati wɔ Brooklyn. Wɔ anwuma ɛleka bie mɔɔ ɛgyi a ɛnwu New York habɔ nee sua ne azo la, menganle kɛ mebagya ye. Nzinlii, Eva rale Gold Coast, na ɔ nee me yɛle gyima.

Me nee Eva zonlenle wɔ Africa wɔ ɛvolɛ dɔɔnwo anu la, me mame hɛlɛle me kɛlata na ɔhanle kɛ me Papa ɛnyia kansa na ɔlɛwu. Mekɛ mɔɔ yɛzɛlɛle adenle wɔ gyima nu la, me nee Eva ziale hɔle United States. Me papa ewule ne hɔle ɔ nyunlu ndɛndɛ, na yeangyɛ biala ɔwule.

Nzinlii yɛziale yɛrale Ghana, na ye ɛvolɛ nna anzi, yɛdele kɛ me Mame ɛnde kpɔkɛ fee. Yɛ gɔnwo mɔ bie hanle hilele me nee Eva kɛ yɛzia yɛrɛla sua nu na yɛranlea ye. Ɛnee ɔle kpɔkɛ ɛsesebɛ mɔɔ ɔwɔ kɛ yɛsi a. Mekɛ mɔɔ menyɛle edwɛkpatɛlɛvolɛ gyima ɛvolɛ 15, mɔɔ nuhua ɛvolɛ 11 me nee me ye a yɛle la, yɛziale yɛhɔle United States.

Wɔ ɛvolɛ dɔɔnwo anu, yɛbɔle nu yɛnleanle me Mame, saa ɔkɛhola a yɛboa ye yɛmaa ɔkɔ debiezukoalɛ. Wɔ January 17, 1976, ɔwule wɔ mekɛ mɔɔ ɛnee yeli ɛvolɛ 86 la. Noko ye ɛvolɛ ngɔnla anzi edwɛkɛ mɔɔ yɛ nyane kpole la zile. Bɛnwunle kɛ Eva ɛnyia kansa. Yɛ nee ewule ne honle wɔ adenle biala azo, noko yeangola yeangyinla ɔ nloa na ɔwule wɔ June 4, 1985, wɔ mekɛ mɔɔ ɛnee yeli ɛvolɛ 70 la.

Wɔ 1988, bɛdole ɛsalɛ bɛvɛlɛle me na mengɔle Ghana ɔfese ne mɔɔ bɛbukele nu na bɛlɛyila zolɛ la bie. Nea kɛzi ɔhakyele me dɛba ne la! Kɛyɛ ɛvolɛ 40 mɔɔ menwiele Gilead na mengɔle Ghana la, ɛnee Alasevolɛ mɔɔ bɛndwu apenle la a wɔ ɛkɛ a. Ɔkadwu 1988 la, ɛnee bɛbo 34,000, na kɛkala asɛɛ bɛdwu 114,000!

Membale Ghana la, ye ɛvolɛ nwiɔ anzi, mengyale Eva agɔnwo kpalɛ Betty Miller wɔ August 6, 1990. Yɛlɛbɔ nu yɛadoa zo yɛayɛ Gyihova gyima ne. Yɛ nye la kenle mɔɔ yɛbanwu yɛ nana mɔ, yɛ awovolɛ yɛɛ Eva wɔ azɛlɛ ye azo bieko wɔ ewudwazo ne anu wɔ Paladaese la.—Gyima ne 24:15.

Saa medwenle nwolɛ adenle kɛnlɛma mɔɔ bo ɛvolɛ 70 mɔɔ Gyihova ɛva me ɛli gyima wɔ ye ɛzonlenlɛ nu la anwo a, ɛnee monle ɛgyinlegyinla me nye zo. Meda ye ase fane dɔɔnwo kɛ ɔhilele me adenle ɔmanle menyɛle ye ɛzonlenlɛ gyima ne la. Mebo ɛvolɛ 90 ɛdeɛ, noko Gyihova, aleɛabo suazilɛ nwo engyinea kpole kpalɛ ne, ɛhɔ zo ɛmaa me anwosesebɛ nee akɛnrasesebɛ kɛ mengɔ zo menyɛ ye gyima ne mɔɔ gyi me nye zo la.