Menli dɔɔnwo die di kɛ nɔhalɛ Nyamenle ne a di ewiade ɛhye azo tumi a. Noko saa ɔle zɔ a, anrɛɛ amaneɛnwunlɛ ɛbu azɛlɛ ye azo ɔ? (Mɛla ne 32:4, 5) Baebolo ne kile kɛ, ɛtanevolɛ bie a ɛlɛdi ewiade ɛhye azo tumi a.​—Kenga 1 Dwɔn 5:19.

Kɛzi ɛtanevolɛ bie nyianle adenle lile alesama anwo zo tumi ɛ? Wɔ alesama tetedwɛkɛ mɔlebɛbo ne, anwumabɔvolɛ bie dele atua tiale Nyamenle na ɔmanle alesama nwiɔ mɔɔ lumua la noko dele atua. (Mɔlebɛbo 3:1-6) Bɛ mu nwiɔ bɛdiele anwumabɔvolɛ ne mɔɔ dele atua, mɔɔ le Seetan la, na bɛmanle ɔlile bɛ nwo zo. Tumivolɛ Bedevinli Nyamenle ne a le Tumivolɛ mɔɔ fɛta a, noko ɔkulo kɛ menli kpa ye tumililɛ ne ɔluakɛ bɛkulo ye la ati. (Mɛla ne 6:6; 30:16, 19) Ɔyɛ alɔbɔlɛ kɛ, bɛbɛlɛbɛla alesama dɔɔnwo bɛmaa bɛzi kpɔkɛ ɛtane kɛ alesama nwiɔ ne mɔɔ lumua la.​—Kenga Yekile 12:9.

Asoo Nyamenle bamaa Seetan ahɔ zo ali ye tumi ɛtane ne ɔ? Kyɛkyɛ! Nyamenle bamaa Gyisɛse azɛkye gyima mɔɔ Seetan ɛli la.​—Kenga 1 Dwɔn 3:8.

Gyisɛse balua tumi mɔɔ Nyamenle ɛva ɛmaa ye la azo azɛkye Seetan. (Wulomuma 16:20) Akee, Nyamenle bali alesama anwo zo tumi na yeamaa alesama azia anyia asetɛnla mɔɔ anyelielɛ nee anzondwolɛ wɔ nu kɛmɔ ɛnee ɔkulo kɛ bɛnyia wɔ mɔlebɛbo ne la.​—Kenga Yekile 21:3-5.