Ewiade ye anu menli mgbe dɔɔnwo dua adwenle ngakyile zo di Bolonyia. Bie mɔ nee bɛ gɔnwo mɔ yɛɛ bɛ mbusua die bɛ nye. Bie mɔ dwenle Nyamenle anwo anzɛɛ nyia mekɛ boa ehyiavolɛma. Ɔda ali kɛ ninyɛne ɛhye mɔ fɛta. Noko akee, debie mɔɔ ɛnle kpalɛ wɔ ɛvolɛlilɛ ɛhye anwo la maa ninyɛne ɛhye mɔ yɛ mgbane.

Mɔɔ lumua la, menli dɔɔnwo mɔɔ di Bolonyia la die di kɛ bɛlɛdi Gyisɛse awolɛkenle. Noko, tetedwɛkɛ kɛlɛvolɛma kile kɛ bɛnze kenle mɔɔ bɛwole ye a. Buluku bie ka kɛ “alumua Keleseɛnema kpole kɛ bɛbaye kenle bɛazie ɛkɛ kɛ ɔle Gyisɛse awolɛkenle” ɔluakɛ ɛnee bɛkulo kɛ “bɛtwe bɛ nwo bɛfi awozonle nyɛleɛ biala anwo.” (The Christian Book of Why) Yɛnwu kɛ, Baebolo ne angile kɛ Gyisɛse lile ye awolɛkenle anzɛɛ awie gyɛne ɛdeɛ. Emomu, ɔhanle kɛ ye ɛdoavolɛma ɛhakye ye ewule ne.—Luku 22:19.

Mɔɔ tɔ zo nwiɔ, nwomama dɔɔnwo die to nu kɛ Bolonyia nyɛleɛ dɔɔnwo vi menli mɔɔ bɛnle Keleseɛnema nee awozonlezonlenlɛ nu. Ɛhye mɔ bie a le Santa Claus, felawɔse yɛɛ Bolonyia baka ne, ninyɛne mɔɔ bɛkyɛ, kyɛnɛlɛ mɔɔ bɛsɔ, ninyɛne ngɛnlɛma mɔɔ bɛkyekye bɛkenda nee nwolɛ edwɛne. Buluku bie hanle nyɛleɛ ɛhye mɔ anwo edwɛkɛ kɛ: “Saa yɛkyɛ Bolonyia debie anzɛɛ yɛdie bie, na yɛfa ninyɛne ngɛnlɛma yɛkenda yɛ sua nu nee asɔnesua nu a, ɛnee yɛ nuhua nyɛ a ze kɛ yɛlɛyɛ awozonlezonlenlɛ nyɛleɛ a?”—The Externals of the Catholic Church.

Noko, bie a ɛbabiza kɛ, saa yɛyɛ nyɛleɛ ɛhye mɔ a duzu a le ɛtane wɔ nwolɛ a? Suzu edwɛkɛ ɛhye mɔɔ tɔ zo nsa la anwo na bua. Nyamenle ɛnlie ɛndo nu kɛ bɛkɛva awozonlezonlenlɛ nyɛleɛ bɛkɛboka nɔhalɛ ɛzonlenlɛ nwo. Gyihova Nyamenle luale Ye Ngapezonli Emɔso anwo zo hanle hilele Ye menli anzosesebɛma mɔɔ ɛnee bɛsonle ye wɔ tete Yizilayɛ la kɛ: ‘Mekyi yɛɛ mekpo bɛ nyamenlezonlenlɛ ɛvoyia ne mɔ. Bɛva bɛ edwɛne dede ne mɔ mɔɔ bɛlɛto la bɛhɔ nehane.’—Emɔso 5:21, 23.

Kɛmɔti a ɔhanle edwɛkɛ ɛhye mɔɔ yɛ nyane la ɛ? Suzu ninyɛne mɔɔ ɛnee menli mɔɔ wɔ tete Yizilayɛ sɔlɔ belemgbunlililɛ ne anu ɛlɛyɛ la anwo nea. Bɛ belemgbunli mɔɔ lumua, Gyɛlɔbowam, yɛle nvutuke nlankɛ mralɛ ziele Dan nee Bɛtɛle azua ne mɔ azo, na ɔmanle menli ne zonlenle ninyɛne ɛhye mɔ tɛla kɛ bɛkɛzonle Gyihova Nyamenle wɔ adenle kpalɛ zo wɔ Gyɛlusalɛm asɔnesua ne anu la. Belemgbunli ne eza hyehyɛle ɛvolɛlilɛ ngakyile na ɔkpale ɛsɔfoma mɔɔ baboa menli ne bɛamaa bɛali la.—1 Arelemgbunli 12:26-33.

Bie a ɔzɔho kɛ mɔɔ zɔhane Yizilayɛma ne yɛle la le kpalɛ. Asoo tɛ Nyamenle ɛzonlenlɛ duma nu a bɛlɛyɛ ɛhye bɛava bɛazɔ ɔ nye a? Edwɛkɛ mɔɔ yɛ nyane mɔɔ Nyamenle luale Emɔso nee ngapezoma gyɛne anwo zo hanle la maa yɛnwu kɛzi Nyamenle te nganeɛ wɔ ninyɛne ɛhye mɔ anwo la wienyi. Nyamenle luale ngapezonli Malakae anwo zo hanle kɛ: ‘Medame a mele Gyihova; mengakyi.’ (Malakae 3:6) Asoo ɛhye ɛmmaa yɛnnwu kɛzi Nyamenle te nganeɛ wɔ Bolonyia ɛvolɛlilɛ dɔɔnwo anwo ɛnɛ la?

Menli mgbe dɔɔnwo mɔɔ ɛzuzu edwɛkɛ mɔɔ yɛha anwo la ɛzi kpɔkɛ kɛ bɛnrɛli Bolonyia. Emomu, bɛ nye die yɛɛ bɛ kunlu dwo kɛ bɛbanyia mekɛ bɛamaa bɛ gɔnwo mɔ nee bɛ mbusua na bɛaboa ehyiavolɛma mekɛ biala wɔ ɛvolɛ ne anu.