EDWƐKƐ TITILE | ƐBAHOLA WƆABIKYE NYAMENLE
Ɛte Nganeɛ Kɛ Ɛbikye Nyamenle Ɔ?
“Saa ɛfa Gyihova agɔnwolɛ kpalɛ a, ɔmaa ɛte nganeɛ kɛ ɛlɛ banebɔlɛ, yewie wɔ boɛ yɛɛ ɛgyi kpundii. Ɛte nganeɛ kɛ Nyamenle ɛlɛnea kɛ dahuu ninyɛne bahɔ boa amaa wɔ.”
—CHRISTOPHER, KPAVOLƐ BIE MƆƆ WƆ GHANA.
“Nyamenle nwu wɔ ngyegyelɛ biala, ɔkulo wɔ edwɛkɛ kpole na ɔnea wɔ kpalɛ.”
—HANNAH MƆƆ ƐLI ƐVOLƐ 13, MƆƆ WƆ ALASKA, U.S.A.
“Ɔsonle bolɛ yɛɛ ɔyɛ ahunlundwolɛ kɛ ɛbade nganeɛ kɛ Nyamenle le ɛ gɔnwo kpalɛ!”
—GINA, JAMAICA RAALƐ MƆƆ ƐBO ƐVOLƐ 40.
Tɛ Christopher, Hannah, yɛɛ Gina ala a te nganeɛ zɛhae a. Menli dɔɔnwo mɔɔ wɔ ewiade la die di kɛ Nyamenle bu bɛ kɛ bɛle ɔ gɔnwo mɔ. Na ɛdawɔ ɛ? Asoo ɛte nganeɛ kɛ ɛbikye Nyamenle? Anzɛɛ ɛkulo kɛ ɛbikye ye kpalɛ? Bie a ɛbabiza kɛ: ‘Asoo sonla bahola ayɛ Tumivolɛ Bedevinli Nyamenle ne agɔnwo kpalɛ? Saa ɔle zɔ a, adenle boni azo?’
YƐKOLA YƐBIKYE NYAMENLE
Kɛmɔ Baebolo ne kile la, sonla kola yɛ Nyamenle agɔnwo kpalɛ. Baebolo ne ka kɛ Nyamenle vɛlɛle tete selɛ Ebileham kɛ “me gɔnwo.” (Ayezaya 41:8) Yɛ edwɛkɛ noko mɔɔ wɔ Gyemise 4:8 la nzonlɛ: “Bɛbikye Nyamenle, na ɔdaye noko ɔkɛbikye bɛ.” Ɛhye ati, ɔda ali wienyi kɛ yɛkola yɛfa Nyamenle agɔnwolɛ. Noko, kɛmɔ ɛnnwu Nyamenle la, kɛ ɔkɛyɛ na wɔabikye ye na wɔava ye agɔnwolɛ kpalɛ ɛ?
Amaa yɛabua zɔhane kpuyia ne la, suzu kɛzi menli fa bɛ nwo agɔnwolɛ la anwo nea. Menli nwiɔ ne nwu bɛ duma. Akee mekɛ mɔɔ bɛlɛkɔ zo bɛadendɛ dahuu, bɛazuzu edwɛkɛ nee bɛ nganeɛdelɛ nwo la, ɛnee bɛ agɔnwolɛvalɛ ne ɛlɛyɛ kpole. Saa bɛbɔ mɔdenle bɛboa bɛ nwo a, bɛ agɔnwolɛvalɛ ne anu mia. Yɛbahola yɛaha edwɛkɛ ko ne ala wɔ yɛ nee Nyamenle agɔnwolɛvalɛ nwo. Bɛmaa yɛnlea kɛzi ɛhye le zɔ la.
Bie A Eza Ɛ Nye Balie
ƐZINZALƐ ARANE
Ɛze Nyamenle Duma Yɛɛ Ɛbɔ Ɔ?
Nyamenle ɛmaa yɛnwu ye, ɔse: ‘Medame a mele Gyihova a, me duma ɛne.’
