Menyinle wɔ Los Angeles, California mɔɔ wɔ U.S.A, wɔ ɛleka ngakyile mɔɔ bɛlie duma ɛtane wɔ basabasayɛlɛ nu na bɛno nyiletane la azo. Me awovolɛ lɛ ngakula nsia, na medame a metɔ zolɛ nwiɔ a.

Me mame tetele yɛ wɔ asɔne bie anu. Noko, melɛnyi la ɛnee mebɔ ɛbɛlatane mefea. Ɔdwu Molɛ a, me nee asɔne edwɛndovo eku ne bɔ nu to edwɛne. Wɔ dapɛne ne anu, medie me nye, meno nyiletane, na mebɔ adwɔmane ɛbɛla.

Ɛnee melɛ ahonle ɛtane. Mefa debie biala meko medi konim. Mɔɔ menzukoale wɔ asɔne ne anu la amboa me. Meta meka kɛ, “Nzenralɛ le Awulae ɛdeɛ—na ɔdua me nwo zo a ɔyɛ zɔ a!” Mekɛ mɔɔ mewɔ sukunwiɔ wɔ 1960 anu la, me nye liele Black Panthers, mɔɔ le maanyɛlɛ eku bie mɔɔ bɛdua konle zo bɛpele bɛmaa bɛ maanlema boɛyɛlɛ la anwo. Membokale sukoavoma ekpunli bie mɔɔ bɛpele bɛ boɛyɛlɛ nwo la anwo. Fane dɔɔnwo ne ala yɛte atua na bɛto sukulu ne anu mekɛ ekyi.

Ɔbayɛ kɛ atuadelɛ ammaa me kunlu andwo me nwo. Yemɔti membokale bɛdabɛ mɔɔ bɛkyi ɛtanelilɛ la anwo. Kɛ neazo la, mekɛ bie me nee me gɔnwo mɔ nleanle vidio mɔɔ fane kɛzi Abibilema mɔɔ ɛnee bɛle ahanra nwunle amaneɛ wɔ United States la anwo. Ɔlua zɔhane nzisi ne ati, yɛvale ɛya kpole na yɛbole alɔfolɛ ngakula mɔɔ ɛnee wɔ sini sua ne anu la. Akee yɛhɔle alɔfolɛ ne mɔ azua nu kɛ yɛkakpondɛ menli dɔɔnwo yɛabo bɛ.

Menyɛle kpanyinli la, ɛnee me nee me mediema mrenyia ne mɔ di ɛtane kpole. Ɛnee yɛ nee mgbanyima ne mɔ nyia edwɛkɛ. Me diema ekyi ko ɛnee boka basabasayɛlɛ eku bie anwo, na membokale bɛ nwo. Ɛnee me ɛbɛlabɔlɛ ne ɛlɛsɛkye bɔkɔɔ.

Ɛnee me gɔnwo bie awovolɛ le Gyihova Alasevolɛ. Bɛzele me kɛ memaa yɛhɔ debiezukoalɛ na mengɔle. Mɔlebɛbo ne ala, menwunle kɛzi Alasevolɛ ne mɔ le ngakyile la. Awie biala lɛ Baebolo mɔɔ ɔnea nuhua wɔ debiezukoalɛ ne abo a. Mgbavolɛ nee mbɛlɛra maa mualɛ wɔ gyimalilɛ ne abo! Me nye liele kɛ Nyamenle duma a le Gyihova na ɛnee mete kɛ bɛbɔ. (Edwɛndolɛ 83:18) Menli ngakyile dɔɔnwo wɔ asafo ne anu, noko ɔda ali kɛ mgbakyemgbakyenu ɛnle bɛ avinli.

Alimoa ne, ɛnee mengulo kɛ Alasevolɛ ne mɔ nee me sukoa Baebolo  ne, noko ɛnee me nye die kɛ mebahɔ bɛ debiezukoalɛ ne bie. Kenle ko nɔsolɛ bie, mɔɔ ɛnee mewɔ Alasevolɛ ne mɔ debiezukoalɛ ne abo la, me gɔnwo mɔ bie hɔle kɔnsɛte bo. Bɛbole kakula bie bɛmaanle ɔwule kɛmɔ yeanva ye jacket kɛnlɛma ne yeamaa bɛ la ati. Aleɛ hyenle la, bɛdule bɛ nloa anu wɔ bɛ kɔdiawu ɛbɛla ne anwo. Mekɛ mɔɔ ɛnee bɛlɛdi bɛ edwɛkɛ wɔ kɔɔto bɔbɔ la bɛambu mɔɔ bɛyɛle la kɛ ɔle ɛtane kpole. Bɛguale bɛ nuhua dɔɔnwo efiade mɔɔ bɛanye bɛ bieko a. Noko, me nye liele kɛ ɛnee memboka bɛ nwo wɔ nɔsolɛ zɔhane la. Menzile kpɔkɛ kɛ mekakyi me ɛbɛlabɔlɛ na meazukoa Baebolo ne.

Ɛnee mede menli mɔɔ bɛlɛ menli nwo adwenletane la avinli ɛdeɛ, noko mɔɔ menwunle ye wɔ Alasevolɛ ne mɔ anwo la zinle me nwo. Kɛ neazo la, saa Dasevolɛ bolɔfolɛ bie ɛlɛtu adenle a, ɔgyakyi ɔ mra ne mɔ ɔmaa abibile abusua kɛ bɛnlea bɛ. Eza ɛnee bolɔfolɛ abusua fa abibile mgbavolɛ nee mbɛlɛra mɔɔ bɛnlɛ dabelɛ la maa bɛtɛnla bɛ nwo ɛkɛ. Menliele mendole nu kɛ Gyisɛse edwɛkɛ ne mɔɔ wɔ Dwɔn 13:35 la fane Gyihova Alasevolɛ ne mɔ anwo: “Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.” Ɛnee meze kɛ menwu nɔhalɛ mediemayɛlɛ ne.

Baebolo ne mɔɔ menzukoale la maanle menwunle kɛ ɔwɔ kɛ mekakyi kɛzi medwenle la. Ɛnee ɔwɔ kɛ mekakyi me adwenle bɔkɔɔ, tɛ kɛ mekpondɛ anzodwolɛ ala emomu menwunle kɛ ɔle ɛbɛlabɔlɛ adenle mɔɔ tɛla biala. (Wulomuma 12:2) Ngyikyingyikyi, menyianle anyuhɔlɛ. Wɔ January 1974, bɛzɔnenle me kɛ Gyihova Dasevolɛ.

Noko, bɛzɔnenle me bɛwiele la, ɛnee ɔwɔ kɛ medi me ahonle kpole ne anwo gyima. Kɛ neazo la, mekɛ bie mɔɔ ɛnee yɛlɛyɛ azua nu daselɛlilɛ la, menriandile mendoale awule bie mɔɔ wuale riledio wɔ me kale nu la. Mɔɔ membikyele ye la, ɔdole riledio ne aze na ɔhɔle. Menganle kɛzi me sa hanle me riledio ne anwo edwɛkɛ mengilele awie mɔ. Kpanyinli ko bizale me kɛ, “Stephen, saa ɛhyele ye a, anrɛɛ duzu a ɛbayɛ a?” Kpuya ɛhye maanle mendwenlenle na menwunle kɛ ɔwɔ kɛ mebɔ mɔdenle mekpondɛ anzodwolɛ.

Membɔle ɔ bo menyɛle mekɛ kɔsɔɔti ɛzonlenlɛ gyima ne wɔ October 1974 na ɛnee mefa dɔnehwele 100 siane biala mekilehile awie mɔ Baebolo ne. Nzinlii, menyianle nwolɛ adenle menyɛle gyima wɔ Gyihova Alasevolɛ ewiade amuala gyima ne ati mɔɔ wɔ Brooklyn, New York la. Membale Los Angeles kɛ mebanlea me mame mɔɔ ɛnde kpɔkɛ la wɔ 1978. Ye ɛvolɛ nwiɔ anzi mengyale me ye, Aarhonda. Ɔboale me kpalɛ ɔmaanle meneanle me mame too ɔwule. Amozii, me nee Aarhonda hɔle Ɛzinzalɛ Arane Geleade Baebolo Sukulu na bɛmaanle yɛhɔle Panama. Yɛtɛsonle kɛ edwɛkpatɛlɛvolɛma wɔ ɛkɛ.

Ɔvi mekɛ mɔɔ bɛzɔnenle me la, mehɔ ngyegyelɛ dɔɔnwo anu. Mezukoa kɛ mebahwe me nwo meavi bɛdabɛ mɔɔ bɛbɔ mɔdenle kɛ bɛka me ɛya la anwo anzɛɛ mesɔ me nwo. Menli dɔɔnwo mɔɔ me ye boka nwo la ɛhanvo me wɔ kɛzi meli tɛnlabelɛ ɛhye mɔ anwo gyima la. Ɔsi me nwo bɔbɔ! Menganvo me nwo wɔ nzenzaleɛ ɛhye mɔ mɔɔ meyɛ la anwo. Emomu, medie medi kɛ ɛhye le daselɛ mɔɔ kile kɛ Baebolo ne kola kakyi sonla.—Hibuluma 4:12.

Baebolo ne ɛmaa menyia bodane kpalɛ wɔ me ɛbɛlabɔlɛ nu na yehile me kɛzi bɛkpondɛ anzodwolɛ la. Membo awie mɔ bieko; emomu, meyɛ bɛ ayile wɔ sunsum nu. Me nee me gɔnwo bie bɔbɔ mɔɔ ɛnee le me kpɔvolɛ wɔ sukunwiɔ la ɛzukoa Baebolo ne! Mekɛ mɔɔ bɛzɔnenle ye la, me nee ye dɛnlanle sua ko anu wɔ mekɛ bie anu. Yɛtɛde agɔnwolɛma kpalɛ. Badwu ɛnɛ, yɛ nee menli mɔɔ bo 80 la ɛzukoa Baebolo ne na bɛrayɛ Gyihova Alasevolɛ.

Meyɛ Gyihova mo kɛ yemaa menyia bodane nee anyelielɛ wɔ nɔhalɛ mediemayɛlɛ ne avinli la.