Bɛwole me wɔ Poland sua ekyi bie mɔɔ ɔ nee Germany ɛweɛne zo anwa la azo. Egyinli dɔɔnwo nee kpɔkɛ ɛbɔ yɛ ɛyia na ɛnee me nzo nu dwo me. Me awovolɛ maanle me anwosesebɛ kɛ membɔ ɛbɛla kpalɛ, membɔ mɔdenle wɔ sukulu na meanyia gyima kpalɛ.

Me ngyegyelɛ ne bɔle ɔ bo wɔ mekɛ mɔɔ ɛnee melɛsukoa mɛla wɔ yunivɛsiti ne mɔɔ wɔ Wrocław sua ne azo la. Menvile me awovolɛ anwo la, menvale agɔnwolɛ ɛtane. Ɛnee mekulo bɔlo ɛnleanlɛ kpalɛ, noko me gɔnwo ɛhye mɔ maanle bɔlo ɛnleanlɛ gyale me bɔkɔɔ. Team mɔɔ me nye die bɛ nwo kpalɛ la a le Warsaw, na Folɛ anzɛɛ Molɛ biala me nee bɛ kɔ ɛleka biala mɔɔ bɛlɛbɔ bɔlo la. Mɔɔ nee adendulɛ ɛhye mɔ lua la a le nzabolɛ, nyiletane ɛnlonlɛ na ɔyɛ a yɛ nee bɛdabɛ mɔɔ bɛgyi bɔlobɔlɛ eku gyɛne nzi la ko. Membule ɛhye ɛyɛlɛ kɛ ɔmaa mekoati dahuu ɛbɛlabɔlɛ nu adwenleadwenle, noko ɛnee meze kɛ saa kpolisima kye me a menrɛhola menrɛyɛ me lɔya gyima ne.

Me nee me gɔnwo mɔ kɔ anyelielɛ ɛleka. Saa yɛkɔ ɛleka ɛhye mɔ a, ɔyɛ a yɛ nee awie mɔ ko wɔ gua zo. Kpolisima hyele me fane dɔɔnwo, noko mengulo kɛ mɛla kɛhye me la ati—ɔyɛ a memaa belaebo. Ɛnee medwenle kɛ melɛdie me nye kpalɛ wɔ ɛbɛlabɔlɛ nu. Ɛhye mɔ anzi, ɛnee meze ye wienyi kɛ mɔɔ melɛyɛ la ɛnle kpalɛ. Molɛ biala mekɔ asɔne amaa me adwenle ambua me fɔlɛ.

Wɔ 2004, Gyihova Alasevolɛ ne mɔ nwiɔ rale me nwo ɛkɛ, na menliele mendole nu kɛ bɛ nee me ɛzukoa Baebolo ne. Menzukoale mɔɔ maa awie yɛ nɔhalɛ Kilisienenli kpalɛ la anwo debie dɔɔnwo la, me adwenle buale me fɔlɛ. Ɛnee meze kɛ ɔwɔ kɛ megyakyi nzabolɛ, nyiletane ɛnlonlɛ, nee menli mɔɔ bɛnva Baebolo ngyinlazo bɛmbɔ bɔ ɛbɛla la agɔnwolɛvalɛ. Eza menwunle kɛ ɔwɔ kɛ megyakyi konle anzɛɛ basabasayɛlɛ. Menwunle kɛ ɔwɔ kɛ mekakyi, noko ɛnee metɛyɛle nzenzaleɛ biala.

Menyɛle nzenzaleɛ wɔ mekɛ mɔɔ kenle ko nɔsolɛ bie me nee menli mɔtwɛ bie honle la. Mekakye kɛ ɛnee mela gua ne azo na bɛlɛbo me eza bɛlɛsisi me ti anwo. Ɛnee meze kɛ me ewule nu ala ɛne, yemɔti menzɛlɛle kɛ: “Gyihova, meanyɛ ye boɛ kɛ meanva wɔ  Edwɛkɛ ne anyebolo zo la. Saa meanwu a, mebɔ wɔ ɛwɔkɛ kɛ me nee Alasevolɛ ne mɔ bazukoa Baebolo ne na meahakyi me ɛbɛlabɔlɛ.” Ɔsi me nwo kɛ meanwu la. Menlile me ɛwɔkɛ zo na menzukoale Baebolo ne.

Mengɔle England wɔ 2006. Ɛnee me bodane a le kɛ mebanyia ezukoa dɔɔnwo meazia meahɔ Poland na meanyia digilii kpole wɔ mɛla nu. Megua zo melɛsukoa Baebolo ne la, ngɛlɛlera bie hanle me ahonle kpalɛ. Ɛzoanvolɛ Pɔɔlo hɛlɛle kɛ: “Ɛnwunlɛ mumua ne mɔɔ menwu Awulae Gyisɛse Kelaese la sonle bolɛ maa me tɛla debie biala. Ɔlua ɔ ti mevuandi debie biala megua; mebu bɛ kɛ fovolɛ zo ewula la, amaa Kelaese ayɛ me ɛdeɛ.” (Felepaema 3:8) Mele kɛ ɛzoanvolɛ Pɔɔlo mɔɔ hɔle mɛla nwo sukulu—ɛnee ɔdaye noko ɔkulo basabasayɛlɛ. (Gyima ne 8:3) Noko ɔnwunle kɛ adenle kpalɛ bie wɔ ɛkɛ mɔɔ ɔbava zo yeabɔ ye ɛbɛla a: ɔsonle Nyamenle na yeabɔ mɔdenle yeazukoa Gyisɛse. Mendwenlenle mɔɔ Pɔɔlo yɛle la anwo la, menwunle kɛ tɛ gyima kpalɛ nee basabasayɛlɛ a maa awie anye die a. Menwunle kɛ saa Pɔɔlo holale hakyile a ɛnee medame noko mebahola. Yemɔti menzile kpɔkɛ kɛ menrɛdoa mɛla nwo digilii ne azo, ɛhye ati mendɛnlanle England.

Melɛsukoa Gyihova anwo debie dɔɔnwo la, ɛnee melɛbikye ye kpalɛ. Ye ɛwɔkɛ mɔɔ yebɔ kɛ ɔbava bɛdabɛ mɔɔ bɛkulo kɛ bɛkakyi la ɛtane yeahyɛ bɛ la hanle me ahonle. (Gyima ne 2:38) Mekɛ mɔɔ melɛdwenle 1 Dwɔn 4:16 mɔɔ se “Nyamenle le ɛhulolɛ” anwo la, mendele deɛmɔti Nyamenle kyi konle la abo.

Eza me nye liele Alasevolɛ ne mɔ subane ne anwo. Menwunle ye wienyi kɛ bɛbɔ mɔdenle bɛfa Baebolo ngyinlazo mɔɔ kpogya la bɛbɔ bɛ ɛbɛla. Ɛnee mekulo kɛ menyia anyelielɛ ne mɔɔ wɔ mediemayɛlɛ ɛhye anu la bie. Mempelele kpalɛ na menyɛle nzenzaleɛ dɔɔnwo wɔ me ɛbɛlabɔlɛ nu. Na bɛzɔnenle me wɔ 2008 kɛ Gyihova Dasevolɛ.

Baebolo ne ɛhakyi medame mɔɔ mekulo anyunlunyia, konle, nyiletane ɛnlonlɛ, nzabolɛ, na bɔlo ɛnleanlɛ ɛgya me la ɛmaa meyɛ Nyamenle sonvolɛ mɔɔ me nye die kɛ mebava Baebolo ne meahilehile awie mɔ. Me nye tɛdie bɔlo ɛnleanlɛ nwo, noko melɛ mekɛ mɔɔ mefa meyɛ ɛhye a.

Kɛkala megya Esther, Gyihova sonvolɛ mɔɔ anwo yɛ fɛ la. Yɛ nye die kpalɛ kɛ yɛbava Baebolo ne yɛahilehile menli mɔɔ ka Poland aneɛ la wɔ England sɔlɔ adɔleɛ. Ɛhye le mekɛ mɔɔ limoa mɔɔ menwu kɛ menyia ahunlundwolɛ kpalɛ a. Melɛ adwenle mɔɔ anu te nee asetɛnla kpalɛ.