Nyamenle duma a le Gyihova na ɔkile kɛ “Ɔmaa Ɔyɛ Ɛkɛ.” Gyihova le Nyamenle tumivolɛ bedevinli, na ɔdaye a ɔbɔle debie biala a. Ɔlɛ tumi mɔɔ ɔfa ɔyɛ debie biala mɔɔ yebɔ kpɔkɛ kɛ ɔyɛ la.

Wɔ Hibulu nu, ɛnee bɛfa ngɛlɛleramgbɔkɛ nna bie a bɛkɛlɛ Nyamenle duma ne a. Bɛfa YHWH anzɛɛ JHVH a bɛgyinla ɛkɛ bɛmaa Nyamenle duma ne wɔ Nrelenza nu a. Nyamenle duma ne finde fane kɛyɛ 7,000 wɔ alimoa Hibulu Baebolo ne anu. Menli mɔɔ wɔ ewiade amuala la kɛlɛ duma Gyihova ne ngakyile, na bɛbɔ ye kɛ mɔɔ bɛ aneɛ ne de la.

▸ Tile 1, ɛden. 15

Baebolo ne Amenle a le Nyamenle, noko menli a ɔmaanle bɛhɛlɛle a. Ɔle kɛ gyimamenle bie mɔɔ se ye kɛlɛhɛlɛvolɛ ne ɛhɛlɛ ye kɛlata ɛmaa ye la. Nyamenle vale ye sunsum nwuanzanwuanza ne hilele Baebolo kɛlɛvoma ne adenle ɔmaanle bɛhɛlɛle ye nzuzulɛ. Nyamenle sunsum ne hilele bɛ adenle wɔ ndenle ngakyile zo, ɔyɛ a ɔmaa bɛnwu yekile ngakyile anzɛɛ ɔmaa bɛka ɛlalɛ na bɛahɛlɛ mɔɔ bɛnwunle ye la.

▸ Tile 2, ɛden. 5

Ngyinlazo a le Baebolo nu ngilehilelɛ mɔɔ maa yɛnwu nɔhalɛ titili bie mɔ la. Kɛ neazo la, ngyinlazo ne mɔɔ se “agɔnwolɛ ɛtane sɛkye ɛbɛla kpalɛ” la kilehile yɛ kɛ menli mɔɔ yɛfa bɛ agɔnwolɛ la bahola amaa yɛayɛ mɔɔ le kpalɛ anzɛɛ ɛtane. (1 Kɔlentema 15:33) Yɛɛ ngyinlazo ne mɔɔ se “mɔɔ sonla kɛlua la yɛɛ ɔbu a” kilehile yɛ kɛ yɛnrɛhola  yɛnrɛhoati mɔɔ vi yɛ nyɛleɛ nu ba la ɛlɛ.​—Galeehyeama 6:7.

▸ Tile 2, ɛden. 12

Ɛhye le edwɛkɛ mɔɔ vi Nyamenle ɛkɛ. Ɔmaa yɛnwu Nyamenle ɛhulolɛdeɛ, ɛbɛla kpalɛ ɛbɔlɛ, mɛla anzɛɛ ndɛnebualɛ bie. Eza ɔbahola yeayɛ edwɛkɛ bie mɔɔ bazi kenle bie la. Baebolo ne anu ngapezo dɔɔnwo ɛra nuhua dɛbadɛba.

▸ Tile 2, ɛden. 13

Mɛzaya ne anwo ngapezo ne mɔ mɔɔ wɔ Baebolo ne anu la rale nu wɔ Gyisɛse anwo zo. Nea ɛlɛka “ Mɛzaya Ne Anwo Ngapezo Bie Mɔ.”

▸ Tile 2, ɛden. 17, ɔ bo ɛkɛ edwɛkɛ

Gyihova bɔle azɛlɛ ye kɛ ɔyɛ paladaese awuke ɔmaa alesama mɔɔ kulo ye la. Ye bodane ne ɛtɛkakyile. Ɔnrɛhyɛ, Nyamenle baye amumuyɛyɛlɛ avi ɛkɛ na yeamaa ye menli anyia dahuu ngoane.

▸ Tile 3, ɛden. 1

Seetan a le anwumabɔvolɛ ne mɔɔ limoale dele atua tiale Nyamenle la. Bɛfɛlɛ ye Seetan, mɔɔ kile “Dwazotiavolɛ,” ɔluakɛ ɔko ɔtia Gyihova. Eza bɛfɛlɛ ye Abɔnsam, mɔɔ kile “Dumasɛkyevo.” Ɔnyianle duma ɛhye ɔluakɛ ɔka Nyamenle anwo adalɛ edwɛkɛ na ɔbɛlɛbɛla menli.

▸ Tile 3, ɛden. 4

Gyihova bɔle anwumabɔvolɛ ne mɔ mekɛ tendenle kolaa na yeabɔ azɛlɛ ye. Ɔbɔle bɛ kɛ bɛdɛnla anwuma. Anwumabɔvolɛma mɔɔ bo mgbe ɛya ko la a wɔ ɛkɛ a. (Daneɛle 7:10) Bɛlɛ aluma nee subane ngakyile, yɛɛ anwumabɔvolɛ nɔhavoma ne ɛngulo kɛ alesama sonle bɛ. Bɛlɛ dibilɛ ngakyile yɛɛ bɛyɛ gyima ngakyile. Gyima mɔɔ bɛyɛ la bie ɛne: bɛsonle wɔ Gyihova belemgbunli ebia ne anyunlu, bɛka Nyamenle nrɛlaleɛ, bɛbɔ Nyamenle azonvolɛ mɔɔ wɔ azɛlɛ ye azo la anwo bane na bɛkile bɛ adenle, bɛdi Gyihova ndɛnebualɛ nwo gyima na bɛboa wɔ edwɛkɛhanlɛ gyima ne anu. (Edwɛne 34:7; Yekile 14:6; 22:8, 9) Kenle bie, bɛbaboka Gyisɛse anwo baho wɔ Amagɛdɔn konle ne anu.​—Yekile 16:14, 16; 19:14, 15.

▸ Tile 3, ɛden. 5; Tile 10, ɛden.1

Kɛzi yɛte nganeɛ wɔ debie nwo yɛɛ debie biala mɔɔ yɛdwenle nwo anzɛɛ yɛyɛ mɔɔ tia Gyihova anzɛɛ ye ɛhulolɛdeɛ la le ɛtane. Kɛmɔ ɛtane sɛkye agɔnwolɛvalɛ mɔɔ yɛ nee Nyamenle lɛ la ati, yemaa yɛ mɛla nee ngyinlazo mɔɔ boa yɛ amaa yɛ nye fuu yɛanyɛ ɛtane la. Mɔlebɛbo ne, ɛnee debie biala di munli, noko mekɛ mɔɔ Adam nee Yive anye fuu yɛle Gyihova anwo anzosesebɛ la, bɛyɛle ɛtane na bɛanli munli bieko. Bɛyɛle mgbanyinli na bɛwule, na kɛmɔ Adam vale ɛtane wole yɛ la ati, yɛdayɛ noko yɛyɛ mgbanyinli na yɛwu.

▸ Tile 3, ɛden. 7; Tile 5, ɛden. 3

Ɛhye a le Nyamenle konle mɔɔ ɔbava yeazɛkye Seetan ewiade ne nee amumuyɛyɛlɛ kɔsɔɔti la.

▸ Tile 3, ɛden. 13; Tile 8, ɛden. 18

Nyamenle Belemgbunlililɛ ne le arane mɔɔ Gyihova ɛhyehyɛ wɔ anwuma a. Gyisɛse Kelaese a le zolɛ Belemgbunli a. Kenle bie, Gyihova balua ye Belemgbunlililɛ ne azo aye ɛtaneyɛlɛ avi ɛkɛ. Nyamenle Belemgbunlililɛ ne bali azɛlɛ ye azo tumi.

▸ Tile 3, ɛden. 14

Nyamenle bɔle Gyisɛse kolaa na yeabɔ debie biala mɔɔ ɛha la. Gyihova zoanle Gyisɛse wɔ azɛlɛ ye azo kɛ ɔrawu ɔmaa alesama amuala. Bɛhunle Gyisɛse la, Gyihova dwazole ye. Kɛkala Gyisɛse ɛlɛdi tumi kɛ Nyamenle Belemgbunlililɛ ne azo Belemgbunli.

▸ Tile 4, ɛden. 2

Baebolo ne hanle mekɛ mɔɔ Mɛzaya ne bala ɔ nwo ali la anwo edwɛkɛ dole ɛkɛ. Ɛhye bazi wɔ mekɛ bie mɔɔ bɛfɛlɛ ye dapɛne 69 la awieleɛ, mekɛ ɛhye bɔle ɔ bo wɔ ɛvolɛ 455 K.Y.M. yɛɛ ɔrale awieleɛ wɔ ɛvolɛ 29 Y.M.

Kɛzi yɛkola yɛka kɛ ɔrale awieleɛ wɔ ɛvolɛ 29 Y.M. ɛ? Dapɛne 69 ne bɔle ɔ bo wɔ ɛvolɛ 455 K.Y.M. wɔ mekɛ mɔɔ Nihɛmaya hɔdwule Gyɛlusalɛm na ɔbɔle ɔ bo kɛ ɔkyekye suakpole ne bieko la. (Daneɛle 9:25; Nihɛmaya 2:1, 5-8) Saa yɛte edwɛkɛkpɔkɛ “dapɛne” a, kenle nsuu a ta ba yɛ ti anu a. Edwɛkɛkpɔkɛ dapɛne mɔɔ wɔ ngapezo ɛhye anu la ɛngile kenle nsuu emomu ɔkile ɛvolɛ nsuu kɛ mɔɔ ngapezo ne mɔɔ se “kenle ko bayɛ ɛvolɛ ko” kile la. (Nɔmbɛse 14:34; Yizikeɛle 4:6) Ɛhye kile kɛ dapɛne ko biala le ɛvolɛ nsuu, ɔti dapɛne 69 ne dodo le ɛvolɛ 483 (69 x 7). Saa yɛtia ɛvolɛ 483 yɛfi ɛvolɛ 455 K.Y.M. a, ɔbava yɛ  yeahɔ ɛvolɛ 29 Y.M. Ɛhye a le ɛvolɛ mɔɔ bɛzɔnenle Gyisɛse na ɔrayɛle Mɛzaya ne la!​—Luku 3:1, 2, 21, 22.

Ngapezo ko ne ala hanle dapɛne gyɛne, mɔɔ le ɛvolɛ nsuu bieko la anwo edwɛkɛ. Wɔ mekɛ ɛhye anu, wɔ ɛvolɛ 33 Y.M., bɛbahu Mɛzaya ne, na wɔ ɛvolɛ 36 Y.M., bɛbabɔ Nyamenle Belemgbunlililɛ ne anwo edwɛkpa ne nolo bɛahile ewiade amra amuala na tɛ Dwuuma angomekye.​—Daneɛle 9:24-27.

▸ Tile 4, ɛden. 7

Baebolo ne kilehile kɛ Gyihova Nyamenle a le Bɔvolɛ ne a, na ɔlimoale ɔbɔle Gyisɛse kolaa na yeabɔ debie gyɛne biala. (Kɔlɔsaema 1:15, 16) Tɛ Gyisɛse a le Nyamenle Tumivolɛ Bedevinli ne a. Yeanga ye ɛlɛ kɛ ɔ nee Nyamenle sɛ. Nɔhalɛ nu, ɔhanle kɛ: “Selɛ ne le kpole tɛla me.” (Dwɔn 14:28; 1 Kɔlentema 15:28) Noko ɛzonlenlɛ bie mɔ kilehile kɛ Nyamenle le ko mɔɔ wɔ nu nsa: Selɛ ne, Ralɛ ne nee sunsum nwuanzanwuanza ne. Edwɛkɛ “Nsa-Ko Nyamenle” ɛnle Baebolo ne anu. Ɛhye le adalɛ ngilehilelɛ.

Sunsum nwuanzanwuanza ne le Nyamenle gyimayɛlɛ tumi, ye tumi mɔɔ ɛnyelɛ ɛnnwu ye mɔɔ ɔfa ɔyɛ ye ɛhulolɛdeɛ la. Ɔnle sonla. Kɛ neazo la, “sunsum nwuanzanwuanza ne yile” alimoa Kilisienema tetɛkɛɛ, yɛɛ Gyihova hanle kɛ: “Mebawola me sunsum ne bie meagua nwonane biala anwo zo.”​—Gyima ne 2:1-4, 17.

▸ Tile 4, ɛden. 12; Tile 15, ɛden. 17

Nɔhalɛ Kilisienema ɛnva meanubaka ɛnli gyima wɔ bɛ ɛzonlenlɛ nu. Duzu ati ɔ?

1.  Bɛva meanubaka bɛli gyima wɔ adalɛ ɛzonlenlɛ nu mekɛ tendenle. Tete ne, ɛnee bɛfa bɛdi gyima wɔ abɔdeɛ ɛzonlenlɛ nee awozonle ɛzonlenlɛma nla nwo amaamuo nu. Gyisɛse wule la, Kilisienema anva meanubaka anli gyima wɔ bɛ ɛzonlenlɛ nu wɔ ɛvolɛ 300 mɔɔ limoa la anu. Mekɛ bie anzi yɛɛ Wulomu Amɛnlado Constantine yɛle meanubaka ne Kilisiene ɛzonlenlɛ nu sɛkɛlɛneɛ a. Bɛvale sɛkɛlɛneɛ ne bɛlile gyima amaa menli dɔɔnwo anye alie Kilisiene ɛzonlenlɛ nwo. Noko meanubaka ne ɛnvale Gyisɛse Kelaese ewule ne anwo kolaa. New Catholic Encyclopedia ne kilehile nu kɛ: “Bɛvale meanubaka ne bɛlile gyima kolaa na Kilisiene ɛzonlenlɛ abɔ ɔ bo yɛɛ menli mɔɔ bɛnle Kilisienema la noko vale lile gyima.”

2.    Gyisɛse anwu wɔ meanubaka zo. Giliki edwɛkɛ agbɔkɛ mɔɔ bɛhile ɔ bo “meanubaka” la kile “baka mɔɔ bɛkpɔnla,” “mgbunla,” anzɛɛ “baka kpole.” The Companion Bible ne kilehile nu kɛ: “Debie biala ɛnle Giliki [Ngyekyeleɛ Fofolɛ] ne anu mɔɔ kile mbaka nwiɔ a.” Gyisɛse wule wɔ baka mɔɔ bɛkpɔnla la azo.

3.  Gyihova ɛngulo kɛ yɛfa ananze anzɛɛ sɛkɛlɛneɛ biala yɛdi gyima wɔ yɛ ɛzonlenlɛ nu.​—Ɛzɛdɔso 20:4, 5; 1 Kɔlentema 10:14.

▸ Tile 5, ɛden. 12

Gyisɛse hanle hilele ye ɛdoavolɛma ne kɛ bɛhakye ye ewule ne. Bɛyɛ ɛhye ɛvolɛ biala wɔ Naesan 14, mekɛ mɔɔ ɛnee Yizilayɛma di Akpabɛnwo ɛvoyia ne la. Bɛfa paano nee nwanye, mɔɔ gyi ɛkɛ ne maa Gyisɛse sonlabaka ne nee ye mogya ne la bɛse awie biala mɔɔ wɔ Ngakyelɛlilɛ ne abo la anyunlu. Menli mɔɔ bɛ nee Gyisɛse bali tumi wɔ anwuma la di paano ne na bɛno nwanye ne bie. Bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo la fi ɛbulɛ nu kɔ Ngakyelɛlilɛ ne abo, noko bɛnli paano ne bie yɛɛ bɛnlo nwanye ne bie.

▸ Tile 5, ɛden. 21

Wɔ Nzema Ewiade Fofolɛ Ngilebɛbo Baebolo ne anu, edwɛkɛkpɔkɛ “ɛkɛla” kile (1) sonla, (2) nane, anzɛɛ (3) sonla anzɛɛ nane ngoane. Neazo bie mɔ ɛne:

• Sonla. “Wɔ Nowa mekɛ zo . . . bɛliele menli ekyi bie, mɔɔ bɛle ɛkɛla mɔtwɛ ngoane wɔ nzule ne anu.” (1 Pita 3:20) Edwɛkɛkpɔkɛ “ɛkɛla” mɔɔ bɛvale bɛlile gyima wɔ ɛke la kile menli​—Nowa nee ɔ ye, ɔ mra mrenyia nsa ne nee bɛ ye mɔ.

• Nane. “Nyamenle hanle kɛ: ‘Anyewɔzo abɔdeɛ [“ɛkɛla,”  ɔbodwɛkɛ] dɔɔnwo ɛrɛla azule nu, na abɔdeɛ mɔɔ tu la ɛdu ɛluolua azɛlɛ ne azo wɔ anwomanyunlu.’ Akee Nyamenle hanle kɛ: ‘Anyewɔzo abɔdeɛ [“ɛkɛla,” ɔbodwɛkɛ] ɛrɛla azɛlɛ ne azo, ko biala kɛ mɔɔ ye ɛsaso de la, sua zo nyɛmoa nee nane mɔɔ twenle bɛ nwo aze yɛɛ ɛbɔ nu nane, ko biala kɛ mɔɔ ye ɛsaso de la.’ Na ɔyɛle zɔ.”​—Gyɛnɛsese 1:20, 24.

• Sonla anzɛɛ nane ngoane. Gyihova zele Mosisi kɛ: “Menli mɔɔ ɛlɛkpondɛ wɔ ahu wɔ [“ɛlɛkpondɛ wɔ ɛkɛla,” ɔbodwɛkɛ] la amuala ɛwu.” (Ɛzɛdɔso 4:19) Mɔɔ Gyisɛse wɔ azɛlɛ ye azo la ɔhanle kɛ: “Mame a mele mboaneneavolɛ kpalɛ ne a; mboaneneavolɛ kpalɛ ne fa ye ngoane [“ɛkɛla,” ɔbodwɛkɛ] bɔ afɔle maa mboane ne.”​—Dwɔn 10:11.

  Bieko, saa awie fa ye “ɛkɛla muala” yɛ debie a, ɔkile kɛ ɔfi ye ɛhulolɛ nu ɔfa ye anwosesebɛ muala ɔyɛ deɛ ne. (Mateyu 22:37; Ditilɔnomi 6:5) Edwɛkɛkpɔkɛ “ɛkɛla” kola kile debie mɔɔ abɔdeɛ bie kulo anzɛɛ ɔ ti akunlu wɔ zo la. Bɛkola bɛfɛlɛ awie mɔɔ ɛwu la kɛ ɛkɛla mɔɔ ɛwu.​—Nɔmbɛse 6:6; Mrɛlɛbulɛ 23:2; Ayezaya 56:11; Hagae 2:13.

▸ Tile 6, ɛden. 5; Tile 15, ɛden. 17

Hibulu nee Giliki edwɛkɛ agbɔkɛ mɔɔ bɛhile ɔ bo “sunsum” wɔ Nzema Ewiade Fofolɛ Ngilebɛbo Baebolo ne anu la kola kile ninyɛne ngakyile. Noko dahuu ɔkile debie mɔɔ ɛnyelɛ ɛnnwu ye mɔɔ le kɛ anwoma anzɛɛ ɛnwomenle mɔɔ alesama nee nane nane die la. Eza edwɛkɛ agbɔkɛ ɛhye mɔ kola kile sunsum abɔdeɛ anzɛɛ sunsum nwuanzanwuanza ne, mɔɔ le Nyamenle gyimayɛlɛ tumi ne. Baebolo ne ɛngilehile kɛ debie bie wɔ sonla nu mɔɔ saa sonla wu a ɔkɔ zo ɔtɛnla ngoane nu a.​—Ɛzɛdɔso 35:21; Edwɛne 104:29; Mateyu 12:43; Luku 11:13.

▸ Tile 6, ɛden. 5; Tile 15, ɛden. 17

Gehenna le bɔnza bie mɔɔ bikye Gyɛlusalɛm mɔɔ ɛnee bɛyela ewula wɔ ɛkɛ la duma. Daselɛ biala ɛnle ɛkɛ mɔɔ kile kɛ wɔ Gyisɛse mekɛ zo ɛnee bɛkile nane anzɛɛ menli nyane anzɛɛ bɛyela bɛ anyewɔzo wɔ bɔnza ɛhye anu. Yemɔti Gehenna ɛngile ɛleka bie mɔɔ ɛnyelɛ ɛnnwu ye mɔɔ bɛkile menli mɔɔ kɛwu la nyane na bɛyela bɛ mekɛ mɔɔ ɛnlɛ awieleɛ a. Mekɛ mɔɔ Gyisɛse hanle menli mɔɔ bɛbavuandi bɛ bɛagua Gehenna la anwo edwɛkɛ la, ɛnee ɔlɛkile kɛ bɛbazɛkye bɛ bɔkɔɔ.​—Mateyu 5:22; 10:28.

▸ Tile 7, ɛden. 20

Ɛhye le asɔneyɛlɛ nwo neazo mɔɔ Gyisɛse yɛle wɔ mekɛ mɔɔ ɔlɛkilehile ye ɛdoavolɛma kɛzi bɛyɛ asɔne la. Eza bɛfɛlɛ ye Yɛ Ze Mɔɔ Wɔ Anwuma nzɛlɛlɛ anzɛɛ asɔneyɛlɛ nwo neazo ne. Kɛ neazo la, Gyisɛse hanle kɛ yɛyɛ asɔne kɛ:

• “Wɔ duma nwo ɛde”

  Yɛyɛ asɔne kɛ Gyihova ɛye adalɛ biala mɔɔ ɛgua ye duma nwo evinli la ɛvi ɛkɛ. Yɛkpondɛ kɛ ɔyɛ zɔ amaa awie biala mɔɔ wɔ anwuma anzɛɛ azɛlɛ ye azo la ali ye duma ne eni.

• “Wɔ Belemgbunlililɛ ɛrɛla”

  Yɛyɛ asɔne kɛ Nyamenle arane ne ɛzɛkye Seetan ɛtane ewiade ne, ɔli azɛlɛ ye azo tumi na ɔyɛ azɛlɛ ye paladaese.

• “Wɔ ɛhulolɛdeɛ ɛyɛ ɛkɛ wɔ azɛlɛ ye azo”

  Yɛyɛ asɔne kɛ Nyamenle ɛmaa bodane mɔɔ ɔlɛ ɔmaa azɛlɛ ye la ɛrɛla nu amaa alesama mɔɔ yɛ tieyɛ na bɛdi munli la adɛnla Paladaese dahuu kɛ mɔɔ ɛnee Gyihova kpondɛ kɛ ɔyɛ wɔ mɔlebɛbo ne la.

▸ Tile 8, ɛden. 2

Gyihova vale ɛkpɔnedeɛ ne maanle amaa yealie alesama yeavi ɛtane nee ewule nu. Ɛkpɔnedeɛ ne a le debie mɔɔ  ɛnee ɔwɔ kɛ bɛtua na bɛazia bɛalie sonla ngoane mɔɔ di munli mɔɔ vile Adam asa la na bɛalua zo bɛaziezie agɔnwolɛvalɛ kpalɛ mɔɔ ɛnee menli nee Gyihova lɛ mɔɔ zɛkyele la. Nyamenle zoanle Gyisɛse wɔ azɛlɛ ye zo amaa yeawu yeamaa ɛtanevolɛma kɔsɔɔti. Ɔlua Gyisɛse ewule ne ati, alesama amuala ɛnyia nwolɛ adenle kɛ bɛbadɛnla aze dahuu na bɛali munli.

▸ Tile 8, ɛden. 21; Tile 9, ɛden. 13

Ngapezo ne mɔɔ wɔ Daneɛle tile 4 la maa yɛnwu kɛ Nyamenle bava ye Belemgbunlililɛ ne azie ɛkɛ wɔ 1914.

Ngapezo ne: Gyihova maanle Belemgbunli Nɛbuka- denɛza hanle ɛlalɛ bie mɔɔ fale baka kpole bie mɔɔ bɛpɛle ye bɛdole aze la anwo. Wɔ ɛlalɛ ne anu, bɛvale bulalɛ nee kɔbele bɛkpolole ye dosinli ne amaa yeagyakyi ɛnyilɛ too “mekɛ nsuu.” Yemɔ anzi akee baka ne banyi bieko.​—Daneɛle 4:1, 10-16.

Mɔɔ ngapezo ne kile la: Baka ne gyi ɛkɛ ne maa Nyamenle tumililɛ ne. Gyihova maanle arelemgbunli mɔɔ wɔ Gyɛlusalɛm la nleanle Yizilayɛ maanle ne azo wɔ ɛvolɛ dɔɔnwo anu. (1 Edwɛkɛsisilɛ 29:23) Noko arelemgbunli zɔhane mɔ anli nɔhalɛ na bɛ tumililɛ ne rale awieleɛ. Bɛzɛkyele Gyɛlusalɛm wɔ ɛvolɛ 607 K.Y.M. Yemɔ a bɔle “mekɛ nsuu” ne abo a. (2 Arelemgbunli 25:1, 8-10; Yizikeɛle 21:25-27) Mekɛ mɔɔ Gyisɛse hanle kɛ “maanle maanle ne mɔ batietia Gyɛlusalɛm azo kɔkpula kɛ maanle maanle ne mɔ mekɛ ne kɛdwu la,” ɛnee ɔlɛka “mekɛ nsuu” ne anwo edwɛkɛ. (Luku 21:24) Yemɔti “mekɛ nsuu” ne amba awieleɛ wɔ mekɛ mɔɔ Gyisɛse wɔ azɛlɛ ye azo la. Gyihova bɔle ɛwɔkɛ kɛ ɔbakpa Belemgbunli bie wɔ “mekɛ nsuu” ne awieleɛ. Gyisɛse mɔɔ le Belemgbunli fofolɛ ɛhye la tumililɛ ne bamaa Nyamenle menli mɔɔ wɔ azɛlɛ ye azo amuala la anyia nyilalɛ dahuu.​—Luku 1:30-33.

 “Mekɛ nsuu” ne tendenle: “Mekɛ nsuu” ne tendenle le ɛvolɛ 2,520. Saa yɛtia ɛvolɛ 2,520 yɛfi ɛvolɛ 607 K.Y.M. a, ɔbava yɛ yearadwu ɛvolɛ 1914. Mekɛ zɔhane a Gyihova yɛle Gyisɛse mɔɔ le Mɛzaya ne la Nyamenle Belemgbunlililɛ ne azo Belemgbunli wɔ anwuma a.

Kɛzi yɛnyianle ɛvolɛ 2,520 ne ɛ? Baebolo ne ka kɛ mekɛ nsa nee foa tendenle le kenle 1,260. (Yekile 12:6, 14) Yemɔti “mekɛ nsuu” ne le kenle 1,260 mɔnwo nwiɔ anzɛɛ kenle 2,520. Kenle 2,520 ne le ɛvolɛ 2,520 ɔlua ngapezo ne mɔɔ se “kenle ko bayɛ ɛvolɛ ko” la ati.​—Nɔmbɛse 14:34; Yizikeɛle 4:6.

▸ Tile 8, ɛden. 23

Baebolo ne ka anwumabɔvolɛ kpanyinli ko ala anwo edwɛkɛ, na ye duma a le Maekeɛle.​—Daneɛle 12:1; Dwuudu 9.

Maekeɛle a li Nyamenle anwumabɔvolɛ nɔhavoma ne ati a. Yekile 12:7 ka kɛ: ‘Maekeɛle nee ye anwuma- bɔvolɛma nee ɛwɔlɛ ne nee ye anwumabɔvolɛma honle.’ Yekile buluku ne ka kɛ Gyisɛse a li Nyamenle ɛlɔnema ne ati a, yemɔti Gyisɛse duma bieko a le Maekeɛle.​—Yekile 19:14-16.

▸ Tile 9, ɛden. 4

Ɛhye kile mekɛ mɔɔ ninyɛne titili bie mɔ basisi azɛlɛ ye azo kolaa na Nyamenle Belemgbunlililɛ ne arazɛkye Seetan ewiade ne la. Eza bɛfa edwɛkɛ mɔɔ le kɛ ‘mekɛ ɛhye awieleɛ’ nee “sonla Ra ne ɛralɛ” bɛdi gyima wɔ Baebolo ngapezo nu bɛkile mekɛ ko ne ala. (Mateyu 24:3, 27, 37) “Mekɛ mɔɔ li awieleɛ” la bɔle ɔ bo wɔ mekɛ mɔɔ Nyamenle Belemgbunlililɛ ne bɔle ɔ bo kɛ ɔdi tumi wɔ anwuma wɔ 1914 la, na ɔbara awieleɛ wɔ mekɛ mɔɔ  bɛbazɛkye Seetan ewiade ne wɔ Amagɛdɔn la.​—2 Timote 3:1; 2 Pita 3:3.

▸ Tile 9, ɛden. 5

Saa Nyamenle dwazo awie mɔɔ ɛwu la a, bɛfɛlɛ ye ewudwazo. Bɛha ewudwazo ngɔnla anwo edwɛkɛ wɔ Baebolo ne anu. Yilaegya, Yilaehya, Gyisɛse, Pita nee Pɔɔlo amuala dwazole menli mɔɔ ɛwu la. Nyamenle tumi ne a maanle bɛholale bɛyɛle nwanwane ninyɛne ɛhye mɔ a. Gyihova ɛbɔ ɛwɔkɛ kɛ ɔbadwazo “tenlenema nee bɛdabɛ mɔɔ bɛnle tenlenema la” yeara ngoane nu wɔ azɛlɛ ye azo. (Gyima ne 24:15) Eza Baebolo ne ka kɛ bɛbadwazo menli bɛahɔ anwuma. Ɛhye bazi wɔ mekɛ mɔɔ bɛbadwazo menli mɔɔ Nyamenle ɛkpa bɛ anzɛɛ ɛkpokpa bɛ la bɛahɔ anwuma kɛ bɛ nee Gyisɛse ɛhɔdɛnla la.​—Dwɔn 5:28, 29; 11:25; Felepaema 3:11; Yekile 20:5, 6.

▸ Tile 9, ɛden. 13

Ɛhye le nyɛleɛ ɛtane mɔɔ awie dua zo bɔ mɔdenle kɛ ɔ nee sunsum ɛtane ne mɔ mumua ne badendɛ anzɛɛ ɔdua menli mɔɔ tendɛ sunsum ɛtane ne mɔ anloa zo la anwo zo ɔ nee bɛ ali adwelie la. Menli mɔɔ fa bɛ nwo wula sunsum ɛtane nyɛleɛ nu la die adalɛ ngilehilelɛ ne mɔɔ se menli wu a bɛ sunsum kɔ zo tɛnla ngoane nu na bɛkakyi nwomenle mɔɔ bɛlɛ tumi la di. Sunsum ɛtane ne mɔ eza bɔ mɔdenle kɛ bɛbabɛlɛbɛla menli bɛamaa bɛayɛ Nyamenle anwo anzosesebɛ. Nyɛleɛ ɛhye mɔ bie a le abisadeɛ, ngonyia, ayɛne ɛbɛla, nee awie mɔɔ nea nwɔlɔra nu ka kenle bie edwɛkɛ la. Mbuluku, vidio, edwɛne, nwɔhoalilɛ ninyɛne nee ngɛlata dɔɔnwo anu ninyɛne maa ɔyɛ kɛ asɛɛ nvonleɛ biala ɛnle ngonyia anzɛɛ sunsum ɛtane nyɛleɛ nwo na anyelielɛ wɔ nu. Sunsum ɛtane nyɛleɛ wɔ ɛzɛneyɛlɛ nu amaamuo le kɛ awie mɔɔ  ɛwu mɔɔ bɛkakye ye ɛvolɛ biala, afɔle mɔɔ bɛbɔ bɛmaa mowuamra, kunlanehyilɛ nee epezilɛ nu. Menli dɔɔnwo ta no nyiletane amaa bɛahola bɛava sunsum ɛtane ne mɔ tumi bɛali gyima.​—Galeehyeama 5:20; Yekile 21:8.

▸ Tile 10, ɛden. 10; Tile 16, ɛden. 4

Gyihova le Nyamenle Tumivolɛ Bedevinli, na ɔdaye a ɔbɔle anwuma nee aze a. (Yekile 15:3) Ɛhye ati a debie biala le ye ɛdeɛ na ɔlɛ tumi kɛ ɔdi ye abɔdeɛ kɔsɔɔti azo la. (Edwɛne 24:1; Ayezaya 40:21-23; Yekile 4:11) Yeli mɛla yemaa debie biala mɔɔ yebɔ la. Eza Gyihova lɛ tumi kpa awie mɔ kɛ bɛli tumi. Saa yɛkulo Nyamenle na yɛtie ye a, ɔkile kɛ yɛgyi ye tumililɛ ne anzi.​—1 Edwɛkɛsisilɛ 29:11.

▸ Tile 11, ɛden. 10

Ɛkolɛyelɛ a le kakula mɔɔ la bɛ kunlu mɔɔ bɛ nye fuu bɛku ye la. Ɛhye ɛnle esiane anzɛɛ sonlabaka ne anu nzenzaleɛ bie mɔɔ maa kakula ne kpɔne la. Kakula mɔɔ bɛkɛnrenzɛ ye la ɛnle ye mame sonlabaka ne foa bie ala. Kakula ne le awie gyɛne.

▸ Tile 13, ɛden. 5

Ɛhye le ayileyɛlɛ adenle mɔɔ bɛdua zo bɛfa mogya anzɛɛ mogya nu ninyɛne titili nna ne anu ko anzɛɛ awie mogya mɔɔ bɛhwe bɛzie ɛkɛ dɛba la bɛmaa awie gyɛne la. Mogya nu ninyɛne titili nna ne a le mogya nu nzule, mogya nu ngoane ngɛkɛba kɔkɔlɛ, mogya nu ngoane ngɛkɛba fufule nee mogya nu ngoane ngɛkɛba ndɛbandɛba.

▸ Tile 13, ɛden. 13

Wɔ Baebolo ne anu, edwɛkɛkpɔkɛ “ɛdenrɛdenrɛlɛ” ɛngile anzohwenlɛ ala. Saa bɛtenrɛdenrɛ yɛ a, ɔkile kɛ bɛhilehile yɛ anzɛɛ bɛmaa yɛ adehilelɛ. Gyihova ɛndenrɛdenrɛ menli wɔ ɛya zo anzɛɛ atisesebɛ nu. (Mrɛlɛbulɛ 4:1, 2) Gyihova yɛ neazo kɛnlɛma maa awovolɛ. Kɛzi ɔtenrɛdenrɛ la boa awie kpalɛ na ɔmaa ahenle bɔbɔ anye die ɛdenrɛdenrɛlɛ nwo. (Mrɛlɛbulɛ 12:1) Gyihova kulo ye menli, na ɔtete bɛ. Ɔmaa bɛ adehilelɛ mɔɔ maa bɛye nzuzulɛ ɛtane mɔɔ bɛlɛ la bɛfi ɛkɛ na ɔboa bɛ ɔmaa bɛsukoa kɛ bɛbadwenle na bɛayɛ bɛ ninyɛne wɔ adenle mɔɔ sɔ Gyihova anye la azo. Wɔ awovolɛ afoa nu, bɛ mra mɔɔ bɛboa bɛ bɛamaa bɛade deɛmɔti ɔwɔ kɛ bɛyɛ tieyɛ la boka ɛdenrɛdenrɛlɛ nwo. Eza ɔkile kɛ ɔwɔ kɛ bɛkilehile bɛ mra bɛmaa bɛkulo Gyihova, bɛkulo ye Edwɛkɛ Baebolo ne na bɛte ye ngyinlazo ne mɔ abo.

▸ Tile 14, ɛden. 13

Bɛle sunsum nu abɔdeɛ atisesebɛma mɔɔ ɛnyelɛ ɛnnwu bɛ mɔɔ bɛlɛ tumi bɛtɛla menli la. Bɛle anwumabɔvolɛma amumuyɛma kpalɛ. Bɛyɛle atisesebɛma wɔ mekɛ mɔɔ bɛyɛle Nyamenle anwo anzosesebɛ na bɛyɛle ye agbɔvolɛ la. (Gyɛnɛsese 6:2; Dwuudu 6) Bɛrabokale Seetan anwo na bɛdwazole bɛtiale Gyihova.​—Ditilɔnomi 32:17; Luku 8:30; Gyima ne 16:16; Gyemise 2:19.

▸ Tile 16, ɛden. 4