ƐZUKOALƐDEƐ 2
Ɛnee Relɛbɛka Kulo Kɛ Ɔmaa Gyihova Anye Die
Relɛbɛka le raalɛ mɔɔ ɛnee ɔkulo Gyihova. Bɛfɛlɛ ɔ hu Ayezeke. Ɛnee ɔdaye noko ɔkulo Gyihova. Kɛzi Relɛbɛka nwunle Ayezeke ɛ? Duzu a ɔyɛle kɛ ɔmaa Gyihova anye alie a? Maa yɛzukoa ɔ nwo debie dɔɔnwo.
Ayezeke awovolɛ a le Ebileham nee Sɛla. Ɛnee bɛwɔ Keena, na ɛnee ɛkɛ ne amra ɛnzonle Gyihova. Noko ɛnee Ebileham kpondɛ kɛ ɔ ra ne gya raalɛ mɔɔ sonle Gyihova la. Yemɔti ɔzoanle ye sonvolɛ Ɛleyizɛ kɛ ɔhɔgya raalɛ wɔ Hɛlan ɔmaa Ayezeke, ɔluakɛ Ebileham anwo amra wɔ ɛkɛ.
Ɛnee Relɛbɛka kulo kɛ ɔyɛ gyima ɛsesebɛ ɔsa nzule ɔmaa afunlumu ne mɔ
Ɛleyizɛ nee Ebileham sonvolɛma gyɛne a hɔle a. Adenle ne wale kpalɛ. Bɛvale afunlumu bulu, aleɛ yɛɛ ahyɛlɛdeɛ dɔɔnwo bɛhɔle. Kɛ ɔkɛyɛ na Ɛleyizɛ anwu raalɛ mɔɔ ɔwɔ kɛ ɔgya ye ɔmaa Ayezeke ɛ? Ɛleyizɛ nee sonvolɛma gyɛne ne mɔ dwule Hɛlan la, bɛgyinlanle bula bie anwo, ɔluakɛ Ɛleyizɛ ze kɛ menli baraza nzule wɔ ɛkɛ. Ɔzɛlɛle Gyihova na ɔhanle kɛ: ‘Saa meka mekile bɛlɛra bie kɛ ɔmaa me nzule meno na ɔmaa me nee me afunlumu ne mɔ nzule a, mebanwu kɛ raalɛ ɛhye a wɔkpa nu wɔye ye a.’
Yeangyɛ yɛɛ Relɛbɛka rale bula ne azo a. Baebolo ne ka kɛ ɔ nwo yɛ fɛ kpalɛ. Ɛleyizɛ hanle kɛ ɔmaa ye nzule ne bie ɔnlo, na ɔhanle kɛ: ‘No bie. Mekaza nzule ne bie mearɛlɛ wɔ afunlumu ne mɔ noko.’ Dwenle nwolɛ nea! Nzuhɔne ɛlɛku afunlumu a bɛno nzule dɔɔnwo, yemɔti ɛnee ɔwɔ kɛ Relɛbɛka sia kɔ bula ne azo fane dɔɔnwo. Ɛnwu gyima ɛsesebɛ mɔɔ ɔlɛyɛ la wɔ nvoninli ne anu ɔ?— Kɛzi Gyihova buale Ɛleyizɛ asɔneyɛlɛ ne la zinle ɔ nwo.
Ɛleyizɛ vale ninyɛne ngɛnlɛma dɔɔnwo manle Relɛbɛka. Ɔvale Ɛleyizɛ nee sonvolɛ mɔɔ ɛha la ɔhɔle ye abusua sua nu. Ɛleyizɛ hanle deɛmɔti Ebileham zoanle ye wɔ ɛkɛ nee kɛzi Gyihova ɛbua ye asɔneyɛlɛ ne la hilele bɛ. Ɔyɛle Relɛbɛka abusua ne fɛ kɛ bɛbamaa Ayezeke agya ye.
Relɛbɛka nee Ɛleyizɛ hɔle Keena na Ayezeke gyale ye
Noko asoo ɛdwenle kɛ ɛnee Relɛbɛka kulo kɛ ɔgya Ayezeke?— Ɛnee Relɛbɛka ze kɛ Gyihova a ɛzoa Ɛleyizɛ a. Yemɔti mekɛ mɔɔ Relɛbɛka abusua ne bizale ye kɛ ɔbahɔ Keena na Ayezeke agya ye la, ɔhanle kɛ: ‘Ɛhɛe, mebahɔ.’ Ɛkɛ ne ala, ɔ nee Ɛleyizɛ hɔle. Mekɛ mɔɔ bɛdwule Keena la, Ayezeke gyale ye.
Kɛmɔ Relɛbɛka yɛle mɔɔ Gyihova kulo kɛ ɔyɛ la ati, Gyihova yilale ye. Ɛvolɛ dɔɔnwo anzi, bɛwole Gyisɛse wɔ ye abusua ne anu! Saa ɛyɛ kɛ Relɛbɛka la na ɛmaa Gyihova anye die a, ɔbayila ɛdawɔ noko.
