Asoo ɛnwu kɛzi Gyihova Alasevolɛ siezie bɛ nwo kɛnlɛma kɔ debiezukoalɛ la anwo nvoninli wɔ brohyua ɛhye anu? Kɛmɔti a yɛnea yɛ tɛladeɛ nee yɛ anwoziezielɛ boɛ ɛ?

Ɔmaa yɛkile kɛ yɛbu yɛ Nyamenle ne. Ɔle nɔhalɛ kɛ Nyamenle ɛnnea kɛzi yɛ nwo de la. (1 Samoɛle 16:7) Noko saa yɛyia nu kɛ yɛsonle ye a, yɛkulo kɛ yɛkile kɛ yɛbu ye nee yɛ gɔnwo mɔ azonvolɛ. Saa yɛlɛkɔ ndɛnebuavolɛ bie anyunlu a, ɔda ali kɛ ɛbulɛ mɔɔ yɛlɛ yɛmaa ye gyinlabelɛ ne la ati, yɛbanlea yɛ anwoziezielɛ ne boɛ. Zɔhane ala a kɛzi yɛsiezie yɛ nwo yɛkɔ debiezukoalɛ la kile kɛzi yɛbu “azɛlɛ ye kɔsɔɔti Ndɛnebuavolɛ ne,” Gyihova Nyamenle, nee ɛleka mɔɔ yɛsonle ye la a.​—Gyɛnɛsese 18:25.

Ɔkile ngyinlazo mɔɔ yɛfa yɛbɔ yɛ ɛbɛla la. Baebolo ne maa Kilisienema anwosesebɛ kɛ bɛva “mɛlɛbɛnwoaze nee adwenle mɔɔ anu la ɛkɛ la” bɛziezie bɛ nwo. (1 Timote 2:9, 10) “Mɛlɛbɛnwoaze” mɔɔ yɛfa yɛaziezie yɛ nwo la kile kɛ yɛnrɛwula tɛladeɛ mɔɔ bahwe menli adwenle ara yɛ nwo zo, ɔluakɛ yɛkulo kɛ bɛnwu yɛ, ɔtwehwe adwenle ɔkɔ nla zo anzɛɛ ɔmaa yɛ nwo gua ɛkɛ la ati. Bieko, “adwenle mɔɔ anu la ɛkɛ la” boa yɛ maa yɛwula tɛladeɛ kɛnlɛma mɔɔ edwɛkɛ biala ɛnle nwolɛ la. Ngyinlazo ɛhye mɔ maa awie biala nyia adenle wula tɛladeɛ mɔɔ ɔkulo la. Saa yɛsiezie yɛ nwo kpalɛ na yɛandendɛ bɔbɔ a, ɔbamaa ‘bɛahanvo yɛ Ngoanedievolɛ ne ngilehilelɛ ne’ na “bɛawula Nyamenle anyunlunyia.” (Taetɛse 2:10; 1 Pita 2:12) Saa yɛsiezie yɛ nwo kpalɛ yɛkɔ debiezukoalɛ a, yɛmaa awie mɔ nwu kɛzi ɔwɔ kɛ bɛbu Gyihova ɛzonlenlɛ ne la.

Mmaka kɛ ɛnlɛ tɛladeɛ kpalɛ la ati ɛnrɛhɔ Belemgbunlililɛ Asalo ɛkɛ. Ɔngyia kɛ yɛwula tɛladeɛ mɔɔ ye bolɛ yɛ se anzɛɛ ɛdwu zo la na yɛahola yɛaziezie yɛ nwo kɛnlɛma.

• Yɛlɛsonle Nyamenle a, kɛzi adenle mɔɔ yɛdua zo yɛsiezie yɛ nwo la anwo hyia ɛ?

• Ngyinlazo boni azo a yɛgyinla yɛkpa yɛ adɛladeɛ na yɛsiezie yɛ nwo a?