1. Ka kɛzi Maata dele nganeɛ la, na duzu ati ɔ?

MAATA arɛle ɛtɛfile ɔ diema ne nla ne mɔɔ bɛvale bolɛ bɛnyinle ɔ nloa la. Ɔlile nyane kpole kpalɛ. Ɛnee ɔnlie ɔnli kɛ ɔ diema Lazalɛse mɔɔ ɔkulo ye edwɛkɛ la ɛwu amgba. Wɔ kenle nna ne mɔɔ bɛ diema ne wule la anu, ɛzunlɛ, nyɛvolɛ, nee nyanelilɛ yile bɛ sua nu.

2, 3. (a) Maata nwunle Gyisɛse la, duzu nganeɛ a ɔdele a? (b) Duzu a Maata edwɛkɛ ne mɔɔ ɔhanle la maa ɔda ali wɔ ɔ nwo a?

² Noko, kɛkala Lazalɛse agɔnwo kpalɛ ne a gyi Maata anyunlu ɛkɛ a. Ɔbayɛ kɛ ɔnwunle Gyisɛse la, ye alɔbɔlɛ ne yɛle kpole ɔluakɛ ɔ ngomekye a ɔwɔ ewiade mɔɔ anrɛɛ ɔbahola yealie ɔ diema nrenya ne ngoane a. Noko akee, Gyisɛse mɔɔ ɔnwunle ye wɔ Bɛtani la kyekyele ɔ rɛle. Gyisɛse atiakunlukɛnlɛma nee ye anwunvɔnezelɛ ne manle Maata nyianle arɛlekyekyelɛ nee anwosesebɛ. Ɔbizale Maata kpuyia mɔɔ ɔboale ye ɔmanle ɔvale ye adwenle ɔziele ye diedi nee ewudwazo ne azo la. Adawu ne manle Maata hanle edwɛkɛ ɛhye mɔɔ anwo hyia la: “Medie medi kɛ wɔmɔ a ɛle Mɛzaya ne, Nyamenle Ara ne mɔɔ ɔwɔ kɛ ba ewiade la.”—Dwɔn 11:27.

³ Kɛmɔ zɔhane edwɛkɛ ne mɔ kile la, ɛnee Maata le raalɛ mɔɔ lɛ diedi kpole. Baebolo ne ka ɔ nwo edwɛkɛ ekyii bie ala noko yɛbahola yɛazukoa debie mɔɔ baboa yɛ yeamaa yɛ diedi nu amia la yɛavi ye ɛkɛ. Amaa yɛanwu kɛ ɔle nɔhalɛ la, bɛmaa yɛzuzu Maata anwo edwɛkɛ mɔɔ lumua wɔ Baebolo ne anu la anwo.

4. Adenle boni azo a ɛnee Maata abusua ne le ngakyile ɛ, na agɔnwolɛvalɛ boni a ɛnee wɔ abusua ne nee Gyisɛse avinli a?

⁴ Siane dɔɔnwo anzi mɔɔ ɛnee Lazalɛse de aze na ɔte kpɔkɛ la, ye sua nu mɔɔ wɔ Bɛtani la a ɛnee ɛyɛvolɛ kpole bie, Gyisɛse Kelaese ɛlɛba a. Ɛnee Lazalɛse, Maata nee Mɛle abusua ne le ngakyile—mediema nsa mɔɔ bɛnyi na bɛwɔ aako ko anu. Menli mɔɔ yɛ neɛnleanu la bie mɔ ka kɛ, ɔbayɛ kɛ Maata a le kpanyinli a  ɔluakɛ ɔdaye a ɛnee ɔdie nyɛvolɛ na bɛdumua bɛbɔ ye duma fane dɔɔnwo a. (Dwɔn 11:5) Yɛngola yɛnnwu ye saa bɛ nuhua bie gyale a. Kɛ ɔde ye biala la, ɛnee bɛ gɔnwo kpalɛ a le Gyisɛse. Gyisɛse yɛ ye ɛzonlenlɛ gyima ne wɔ Dwudiya, ɛleka mɔɔ ɔyiale dwazotia nee ɛkpɔlɛ la, ɛnee bɛ sua nu ɛkɛ a ɔkɔtɛnla a. Nɔhalɛ nu, ɔ nye liele anzondwolɛ nee moalɛ zɔhane mɔɔ ɔnyianle la anwo kpalɛ.

5, 6. (a) Duzu ati a ɛnee Maata anye ɛbolo wɔ mekɛ mɔɔ Gyisɛse rale bɛ ɛkpɔlalɛ la ɛ? (b) Duzu a Mɛle noko yɛle a?

⁵ Ɛnee ɔwɔ kɛ Maata nea toto ninyɛne boɛ na ɔdie nyɛvolɛ. Ɔle sonla mɔɔ ɔ nwo yɛ se na ɔyɛ gyima anyebolo zo a. Zɔhane ala a ɛnee ɔbayɛ wɔ Gyisɛse ɛkpɔlalɛ ne anwo a. Ɔyɛle ye adwenle kɛ ɔsiezie aleɛ ngakyile yeado ye ɛyɛvolɛ titile ne nee menli mɔɔ ɔ nee bɛ lua la ɛkponle. Wɔ zɔhane mekɛ ne, ɛnee ɛyɛvolɛyɛlɛ nwo hyia kpalɛ. Saa ɛyɛvolɛ ba wɔ sua nu a, ɛfo ɔ nvoka anwo, ɛye ye mgbɔlaboa, ɛnrinzi ɔ gyakɛ anwo na ɛfa nwole evuanlɛ ɛkpokpa ɔ ti zo. (Bɛgenga Luku 7:44-47.) Ɛnee ɔle amaamuo kɛ ɛbanlea ɛyɛvolɛ ne kpalɛ na wɔamaa ye ɛleka kpalɛ yeala.

⁶ Ɛnee Maata nee Mɛle anye ɛbolo ɛlɛboɔboa bɛ nwo ahendɛ Gyisɛse. Ɔwɔ nuhua kɛ ɛnee menli dɔɔnwo suzu kɛ Mɛle a ɛnee ɔ nye bolo debie ɛzukoalɛ nwo ɛdeɛ, noko akee, ɔboale Maata wɔ sua nu. Noko Gyisɛse rale la, ninyɛne hakyile. Gyisɛse nwunle kɛ ɔle mekɛ mɔɔ ɔbahola yeahilehile menli mɔɔ bɛwɔ ɛkɛ la, na ɔyɛle ye zɔ! Ɛnee ɛzonlenlɛ nu mgbanyima ɛmbu mraalɛ wɔ zɔhane mekɛ ne, noko Gyisɛse bule bɛ na ɔhilehilele bɛ Nyamenle Belemgbunlililɛ ne mɔɔ ɛnee ɔle ye ɛzonlenlɛ gyima ne edwɛkɛtile la anwo debie. Mɛle mɔɔ anye liele zɔhane mekɛ ne la dɛnlanle Gyisɛse anwo ɛkɛ na ɔdiele edwɛkɛ biala mɔɔ ɔhanle la kpalɛ.

7, 8. Duzu ati a ninyɛne gyegyele Maata wɔ ye ahonle nu a, na awieleɛ kolaa ne kɛzi ɔlale ye ali ɛ?

⁷ Yɛbahola yɛayɛ kɛzi ninyɛne gyegyele Maata wɔ ye ahonle nu la anwo nvoninli. Aleɛ dɔɔnwo mɔɔ ɛnee ɔwɔ kɛ ɔto nee gyima ngakyile mɔɔ ɛnee ɔwɔ kɛ ɔyɛ ɔsiezie ye ɛyɛvolɛ ne la manle ɔ nwo hyelele ye. Mekɛ mɔɔ ɛnee ɔlɛdi akɔneaba na ɔnwunle ɔ diema raalɛ ne kɛ ɔde ɛkɛ mɔɔ ɔnyɛ ɛhwee ɔmboa ye la, asoo ɔmunlanle? Saa ɔyɛle ye zɔ a ɛnee ɔnyɛ nwanwane. Ɛnee ɔ ngome ɔnrɛhola gyima ɛhye amuala yɛ!

⁸ Awieleɛ kolaa ne, Maata angola angomo ɔ nwo zo. Ɔpɛle Gyisɛse anloa zo na ɔzele ye kɛ: “Awulae, wɔnwu kɛ me diema raalɛ ye ɛgyakyi gyima ye ɛkpolo me ngome la? Ka kile ye maa ɔrazɔ me nu.” (Luku 10:40) Edwɛkɛ ɛhye anu yɛ se. Baebolo  ngilebɛbo bie mɔ ka kɛzi ɔbizale ye kpuyia ɛhye la kɛ: “Awulae, asoo ɔngyegye wɔ kɛ . . . ?” Ɔhanle ɔhilele Gyisɛse kɛ ɔmaa Mɛle ɛrayɛ gyima ne bie.

9, 10. (a) Kɛzi Gyisɛse buale Maata edwɛkɛ ne ɛ? (b) Kɛzi yɛnwu kɛ ɛnee Gyisɛse ɛngile kɛ mɔdenle mɔɔ Maata ɛlɛbɔ ado aleɛ ne la ɛngyia ɛ?

⁹ Bie a Gyisɛse mualɛ ne zinle Maata anwo kɛmɔ ɔsi Baebolo kengavoma dɔɔnwo anwo la. Ɔbuale ye kɛnlɛma nu kɛ: “Maata, Maata! Ninyɛne dɔɔnwo gyegye wɔ sɛkye wɔ adwenle. Debie ko ala a hyia a, na Mɛle ɛkpa nu ɛva mɔɔ le kpalɛ la, na bɛnrɛlie ye ɔ sa nu ɛlɛ.” (Luku 10:41, 42) Duzu a ɛnee Gyisɛse kpondɛ ahile a? Asoo ɛnee ɔlɛka kɛ Maata anye bolo nwonane afoa nu ninyɛne tɛla Nyamenle? Asoo ɔhanle kɛ mɔdenle mɔɔ ɔlɛbɔ yeado aleɛ ne la anwo ɛngyia?

¹⁰ Kyɛkyɛ. Gyisɛse nwunle kɛ ɛnee Maata lɛ adwenle kpalɛ mɔɔ anu te. Bieko, yeanga kɛ ɛyɛvolɛyɛlɛ mɔɔ vi ahonle nu la ɛngyia. Ɛnee yelumua yehɔ “ɛkponle kpole bie” mɔɔ Mateyu dole manle ye la abo. (Luku 5:29) Tɛ Maata aleɛ ɛdonlɛ ne a ɛnee ɔlɛka nwolɛ edwɛkɛ a, emomu, ninyɛne mɔɔ hyia ye la. Maata vale ye adwenle ziele aleɛ ɛdonlɛ ne azo somaa ɔmanle ɔ rɛle vile debie mɔɔ hyia kpalɛ la. Duzu ɔ?

11, 12. Kɛzi Gyisɛse denrɛle Maata wɔ adenle kɛnlɛma zo ɛ?

¹¹ Gyisɛse, Gyihova Nyamenle Ara kokye ne ɛnee wɔ Maata sua nu ɛlɛkilehile nɔhalɛ ne. Aleɛ ne mɔɔ ɛnee Maata ɛlɛto nee debie biala anwo ɛngyia ɛndɛla ɛhye. Noko akee, ɛnee Maata ɛlɛminli nwolɛ adenle mɔɔ ɔnyianle kɛ ɔbamia ye diedi ne anu la na ɛhye gyegyele Gyisɛse, noko ɔmanle Maata kpale mɔɔ ɔkulo la. * Ɛnee Maata lɛ adenle kɛ ɔbakpa mɔɔ hyia ye wɔ ɛbɛlabɔlɛ nu la. Noko akee ɛnee ɔnlɛ adenle ɔnzi Mɛle adenle kɛ ɔmmatie Gyisɛse.

¹² Yemɔti ɔdenrɛle ye wɔ adenle kɛnlɛma zo, ɔbɔle ye duma fane nwiɔ amaa ye ɛya ne aha aze, na ɔmanle ye anwosesebɛ kɛ ɔngyia kɛ ɔmaa ‘ninyɛne dɔɔnwo gyegye ye sɛkye ye adwenle.’ Ɛnee ɔngyia kɛ ɔbaziezie aleɛ ngakyile, titile wɔ mekɛ mɔɔ sunsum nu aleɛ dɔɔnwo wɔ ɛkɛ la. Ɛnee Gyisɛse ɛnrɛlie ‘debie mɔɔ hyia’ mɔɔ Mɛle ɛkpa—kɛ ɔbazukoa debie yeavi Gyisɛse ɛkɛ la ɛnrɛvi ɔ sa nu!

13. Duzu a yɛsukoa yɛfi adenle mɔɔ Gyisɛse luale zo denrɛle Maata la anu a?

 ¹³ Kelaese ɛdoavolɛma bahola azukoa ninyɛne dɔɔnwo avi kɛlɛtokɛ ɛhye anu ɛnɛ. Ɔnle kɛ yɛmaa debie biala kyia yɛ tɛla yɛ “sunsum” nu ngyianlɛ. (Mat. 5:3) Mekɛ mɔɔ yɛkpondɛ kɛ yɛsukoa Maata ahunlunyele nee ye mɔdenlebɔlɛ ne la, yɛmkpondɛ kɛ yɛmaa ɛyɛvolɛyɛlɛ nwo ninyɛne ngyikyi bie mɔ ‘gyegye yɛ sɛkye yɛ adwenle’ na yɛ rɛle fi ninyɛne mɔɔ hyia kpalɛ la. Yɛ nee yɛ mediema diedima yia, tɛ kɛ yɛsonle bɛ anzɛɛ yɛkpondɛ aleɛ kpalɛ yɛavi bɛ ɛkɛ, emomu amaa yɛamaa yɛ nwo anwosesebɛ na yɛanyi sunsum nu. (Bɛgenga Wulomuma 1:11, 12.) Aleɛ ekyi bie ala bɔbɔ bahola amaa ɛkpɔlalɛ ne amaa anwosesebɛ.

14. Duzu a maa yɛkola yɛnwu kɛ Maata yɛle neazo kpalɛ wɔ folɛdulɛ mɔɔ ɔliele ɔdole nu la anu ɛ?

¹⁴ Asoo Maata diele Gyisɛse folɛdulɛ kɛnlɛma ne na ɔzukoale debie ɔvile nu? Yɛze kɛ ɔyɛle ye zɔ. Ɛzoanvolɛ Dwɔn ka Maata adiema nrenya ne anwo edwɛkɛ la, ɔmanle yɛnwunle kɛ: “Gyisɛse kulo Maata nee ɔ diema Mɛle nee Lazalɛse edwɛkɛ kpole.” (Dwɔn 11:5) Kɛmɔ yɛlumua yɛnwu ye la, Gyisɛse rakpɔlale bɛ wɔ Bɛtani la ɛhyɛ kpalɛ. Ɔda ali kɛ, Maata anva ɛya wɔ Gyisɛse folɛdulɛ kɛnlɛma ne anwo. Ɔliele ɔdole nu. Ɔyɛle neazo kɛnlɛma ɔmanle yɛ wɔ edwɛkɛ ɛhye anu ɔluakɛ, ɔdwu mekɛ ne bie a, yɛ muala yɛhyia folɛdulɛ.

15, 16. (a) Duzu a Maata yɛle wɔ mekɛ mɔɔ ɔ diema ne anwo dole ye la ɛ? (b) Duzu ati a Maata nee Mɛle anyelazo ne yɛle mgbane ɛ?

¹⁵ Maata adiema nrenya ne anwo dole ye la, ɔ nye bolole ɔnleanle ye. Ɔyɛle mɔɔ ɔbahola biala la kɛ ɔbakyekye ɔ rɛle na yeaboa ye yeamaa yeade kpɔkɛ. Noko akee, Lazalɛse anwodolɛ ne anu mianle. Wɔ ye anwodolɛ ne anu, ɔ mediema mraalɛ ne mɔ dɛnlanle ɔ nwo ɛkɛ ne dahuu. Nea kɛzi ɔbayɛ kɛ Maata nleanle ɔ diema ne mɔɔ ɔ nyunlu ɛhwe la anyunlu fane dɔɔnwo na ɔhakyehakyele mekɛ dɔɔnwo mɔɔ bɛvale bɛliele bɛ nye nee mɔɔ bɛvale bɛlile nyane la!

¹⁶ Mekɛ mɔɔ bɛnwunle kɛ Lazalɛse bawu la, Maata nee Mɛle dole Gyisɛse nrɛlaleɛ. Ɛnee ɛleka mɔɔ Gyisɛse ɛlɛbɔ edwɛkpa ne nolo nee ɛleka mɔɔ bɛwɔ la bayɛ kenle nwiɔ adenle. Maata nee Mɛle edwɛkɛ ne le sikalɛ: “Awulae, ɛ gɔnwo kpalɛ ne ɛnde kpɔkɛ.” (Dwɔn 11:1, 3) Ɛnee bɛze kɛ Gyisɛse kulo bɛ diema ne edwɛkɛ na eza bɛlɛ diedi kɛ ɔbayɛ debie biala mɔɔ ɔbahola la yeaboa ɔ gɔnwo ne. Asoo bɛnyianle anyelazo kɛ Gyisɛse bara kolaa na bɛ diema ne awu? Saa zɔhane a ɔde a, ɛnee bɛ anyelazo ne yɛle mgbane. Lazalɛse wule.

17. Duzu a gyegyele Maata a, na ɔdele kɛ Gyisɛse ɛlɛbikye sua ne azo la, kɛzi ɔyɛle ye nyɛleɛ ɛ?

¹⁷ Maata nee Mɛle zunle bɛ diema nrenya ne, bɛzieziele bɛ nwo bɛmanle ye ɛzielɛ, na bɛliele nyɛvolɛ mɔɔ vi Bɛtani nee azua mɔɔ bikye ye la. Noko ɛnee bɛnde Gyisɛse nganeɛ. Mɔɔ ɛnee mekɛ ne ɛlɛkɔ na Gyisɛse ɛmba la, bie a ɔgyegyele Maata. Awieleɛ kolaa ne mɔɔ ɛnee Lazalɛse ɛwu ɛli kenle nna la, Maata dele kɛ Gyisɛse ɛlɛbikye sua ne azo. Kɛmɔ Maata bɔ mɔdenle dɛba la ati, wɔ zɔhane nyanelilɛ mekɛ ne anu bɔbɔ, ɔdwazole ɔhɔyiale Gyisɛse mɔɔ yeambɔ Mɛle amaneɛ a.—Bɛgenga Dwɔn 11:18-20.

18, 19. Duzu anyelazo a Maata nyianle a, na kɛzi ye diedi ne yɛ nwanwane ɛ?

 ¹⁸ Maata nwunle ɔ Menle ne la, ɔhanle edwɛkɛ mɔɔ ɛnee ɛgyegye ye nee Mɛle mekɛ dɔɔnwo la ɔhilele ye: “Awulae, saa ɛwɔ ɛke a, anrɛɛ me diema nrenya ne anwu!” Noko ɛnee Maata anyelazo ɛtɛwiele yɛɛ ye diedi ɛtɛkanle aze. Ɔdoale zo kɛ: “Kɛkala bɔbɔ, debie biala mɔɔ ɛkɛbiza Nyamenle la, ɔkɛyɛ ɔkɛmaa wɔ.” Ndɛndɛ ne ala Gyisɛse hanle edwɛkɛ manle ye diedi ne anu mianle: “Ɛ diema nrenya ne badwazo ara ngoane nu.”—Dwɔn 11:21-23.

¹⁹ Ɛnee Maata dwenle kɛ Gyisɛse ɛlɛka kenlebie ewudwazo nwo edwɛkɛ yemɔti ɔbuale ye kɛ: “Meze kɛ ɔbadwazo yeara ngoane nu wɔ mekɛ ne mɔɔ li awieleɛ la anu.” (Dwɔn 11:24) Ɛnee diedi mɔɔ ɔlɛ ye wɔ zɔhane ngilehilelɛ ne anu la yɛ nwanwane. Dwuu ɛzonlenlɛ nu mgbanyima mɔɔ bɛfɛlɛ bɛ Sadusiima la anlie ewudwazo ne anli ɔnva nwo kɛ ɛnee ɔle ngilehilelɛ mɔɔ nuhua la ɛkɛ wɔ Ngɛlɛlera ne anu la. (Dan. 12:13; Mak. 12:18) Noko  akee, Maata nwunle kɛ Gyisɛse hilehilele ewudwazo nwo edwɛkɛ na ɔdunwuele menli mɔɔ ɛwu la bie mɔ bɔbɔ—ɔwɔ nuhua kɛ ɛnee ɔtɛtunwuele awie mɔɔ yewu yehyɛ kɛ Lazalɛse la. Ɛnee ɔnze mɔɔ bazi a.

20. Kilehile Gyisɛse edwɛkɛ ne mɔɔ yɛ rɛle ɛnrɛvi mɔɔ ɔwɔ Dwɔn 11:25-27 nee mɔɔ Maata hanle la anu.

²⁰ Akee Gyisɛse hanle edwɛkɛ mɔɔ yɛ rɛle ɛnrɛvi ye ɛlɛ la: “Mame a mele ewudwazo ne nee ngoane ne a.” Nɔhalɛ nu, Gyihova Nyamenle ɛmaa ɔ Ra ne tumi kɛ ɔdunwue mɔwuamra wɔ ewiade amuala kenlebie. Gyisɛse bizale Maata kɛ: “Ɛdie ɛhye ɛdi ɔ?” Akee ɔvale mualɛ mɔɔ yɛzuzule nwolɛ wɔ tile ɛhye mɔlebɛbo la ɔmanle. Ɔnyianle diedi kɛ Gyisɛse a le Kelaese anzɛɛ Mɛzaya, Gyihova Nyamenle Ara ne mɔɔ bɛha ɔ nwo edwɛkɛ kɛ ɔbara ewiade la.—Dwɔn 5:28, 29; bɛgenga Dwɔn 11:25-27.

21, 22. (a) Kɛzi Gyisɛse lale ye ali kɛ ɔte nganeɛ ɔmaa menli mɔɔ bɛdi nyane la ɛ? (b) Ka Lazalɛse ewudwazo ne anwo edwɛkɛ.

²¹ Asoo Gyihova Nyamenle nee ɔ Ra Gyisɛse Kelaese anye die diedi mɔɔ le kɛ Maata ɛdeɛ ne la anwo? Ninyɛne mɔɔ sisile bieko wɔ Maata anye zo la maa yɛnwu nyelebɛnloa ne. Ɔyɛle ye ndɛ ɔhɔvɛlɛle ɔ diema raalɛ ne. Ɛhye anzi, ɔnwunle Gyisɛse kɛ ɔlɛdi nyane wɔ mekɛ mɔɔ ɛnee ɔlɛtendɛ yeahile Mɛle nee menli dɔɔnwo ne mɔɔ ɛnee bɛ nee ye ɛlɛdi nyane la. Ɔnwunle kɛ Gyisɛse anye ɛgyinlegyinla monle na ɔlɛdi nyane wɔ mɔɔ ewule fa ba la anwo. Ɔdele kɛ Gyisɛse ɛlɛka kɛ bɛye bolɛ ne bɛvi ɔ diema ne nla ne anloa.—Dwɔn 11:28-39.

²² Maata mɔɔ dwenle ninyɛne nwo la hanle kɛ funli ne ɛnyia kenle nna yemɔti yebɔ. Gyisɛse bizale ye kɛ: “Metɛkanle metɛkilele wɔ kɛ saa ɛdie ɛdi a ɛkɛnwu kɛ Nyamenle anyunlunyia ne si de la ɔ?” Ɔliele ɔlile na ɔnwunle Gyihova Nyamenle anyunlunyia ne. Ɛkɛ ne ala, Gyihova manle ɔ Ra ne tumi kɛ ɔmaa Lazalɛse ɛzia ɛrɛla ngoane nu! Suzu kɛzi Maata arɛle ɛnrɛvi mɔɔ zile zɔhane mekɛ ne wɔ ye ɛbɛlabɔlɛ nu la anwo nea: Gyisɛse deanle nu kɛ, “Lazalɛse, dwazo bɛla!”; dede ekyi vi nla ne mɔɔ bɛziele Lazalɛse wɔ nu la anu rale, nrenya ne dwazole na ɛnee ndanlɛ mɔɔ bɛvale bɛkyekyele ye la tɛbɔ ɔ nwo, ɔdudule ɔ gyakɛ ngyikyi ngyikyi ɔvindele; Gyisɛse hanle kɛ “bɛzianyizianyi ye na bɛmaa ɔhɔ”; Maata nee Mɛle nriandile hɔyɛle bɛ diema ne atuu. (Bɛgenga Dwɔn 11:40-44.) Nyane mɔɔ ɛnee Maata ɛlɛdi la vile ɛkɛ!

23. Duzu a Gyihova nee Gyisɛse kpondɛ kɛ bɛyɛ bɛmaa wɔ a, na duzu a ɔwɔ kɛ ɛdawɔ noko ɛyɛ a?

²³ Kɛlɛtokɛ ɛhye kile kɛ ewudwazo ne ɛnle adwenle nzuzulɛ mgbane ala; ɔle Baebolo nu ngilehilelɛ mɔɔ ka ahonle, na tetedwɛkɛ  da ye ali kɛ ɔle nɔhalɛ. (Dwo. 14:14, 15) Gyihova nee ɔ Ra ne bayila menli mɔɔ bɛlɛ diedi zɛhae la kɛmɔ ɔyilale Maata, Mɛle nee Lazalɛse la. Saa ɛnyia diedi mɔɔ anu yɛ se a, ɛbanyia zɔhane nyilalɛ ne bie.

24. Maata anwo edwɛkɛ mɔɔ li awieleɛ la boni a Baebolo ne ka a?

²⁴ Baebolo kɛlɛtokɛ ne eza ka Maata anwo edwɛkɛ bieko. Ɛnee ɔle dapɛne mɔɔ li awieleɛ wɔ Gyisɛse ngoane mekɛ nu wɔ azɛlɛ ye azo la mɔlebɛbo. Ɛnee Gyisɛse ze kɛ ɔbanwu amaneɛ wɔ dapɛne ne awieleɛ, yemɔti ɔziale ɔhɔle ɔ gɔnwo mɔ sua nu wɔ Bɛtani. Ɔvi ɛkɛ a ɔbadia mayɛlɛ nwiɔ adenle yeahɔ Gyɛlusalɛm. Mɔɔ Gyisɛse nee Lazalɛse ɛlɛkpula bɛ sa wɔ kokobɛvolɛ Saemɔn sua nu la, yɛɛ bɛhanle Maata anwo edwɛkɛ ɛhye mɔɔ li awieleɛ la a: “Maata boka bɛdabɛ mɔɔ bɛzonlenle la anwo.”—Dwɔn 12:2.

25. Duzu ati a Keleseɛne asafo mɔɔ wɔ ɛkɛ ɛnɛ la ɛnyia nyilalɛ kɛ bɛnyia mraalɛ mɔɔ le kɛ Maata la ɛ?

²⁵ Nea kɛzi raalɛ zɔhane mɔɔ bɔ mɔdenle la le ngakyile a! Mekɛ mɔɔ yɛlumuale yɛnwunle ɔ nwo edwɛkɛ wɔ Baebolo ne anu la, ɛnee ɔlɛyɛ gyima; yɛkawie noko la ɛnee ɔtɛyɛ gyima, na ɔlɛbɔ mɔdenle yeayɛ mɔɔ ɔbahola biala la yeaboa menli mɔɔ ɔ nee bɛ de la. Keleseɛne asafo mɔɔ wɔ ɛkɛ ɛnɛ la ɛnyia nyilalɛ kɛ bɛlɛ mraalɛ mɔɔ bɛle kɛ Maata—mɔɔ dahuu bɛyɛ gyima ɛsesebɛ bɛda bɛ diedi mɔɔ bɛlɛ wɔ Gyihova anu la ali na bɛboa bɛ mediema a. Asoo Maata hɔle zolɛ yɛle zɔhane ala? Ɔbayɛ zɔ. Ɔyɛle nrɛlɛbɛvolɛ ɔluakɛ zɔhane diedi ne baboa ye yeamaa yeagyinla ngyegyelɛ mɔɔ la ɔ nyunlu la anloa.

26. Duzu a Maata diedi ne boale ye manle ɔyɛle a?

²⁶ Mekɛ ekyi anzi, ɛnee ɔwɔ kɛ Maata gyinla ɔ Menle Gyisɛse mɔɔ ɔkulo ye edwɛkɛ la ewule nloa. Bieko, nabalabama ahɔdiawu ne mɔ mɔɔ bɛhunle Gyisɛse la bɔle mɔdenle kɛ bɛku ɔ diema Lazalɛse ɔluakɛ ye ewudwazo ne manle menli dɔɔnwo nyianle diedi. (Bɛgenga Dwɔn 12:9-11.) Nɔhalɛ nu, awieleɛ kolaa ne ewule tetele Maata nee ɔ mediema ne mɔ avinli. Yɛnze kɛzi anzɛɛ mekɛ mɔɔ zɔhane deɛ ne zile a, noko yɛdie yɛdi kɛ: Maata diedi ne boale ye manle ɔgyinlanle kpundii ɔhɔle awieleɛ. Ɛhye ati a ɔwɔ kɛ Keleseɛnema mɔɔ bɛwɔ ɛkɛ ɛnɛ la bɔ mɔdenle sukoa Maata diedi ne la.