1, 2. (a) Duzu a Dwona manle ɔdole ɔ nee melikavolɛma ne a? (b) Kɛzi Dwona edwɛkɛ ne baboa yɛ ɛ?

ƐNEE Dwona akunlu a anrɛɛ yemaa dede ne ɛgyakyi. Tɛ anwoma ne mɔɔ ɛnee ɛlɛbɔ nyɛma mɔɔ sosɔ meli ne anu la; yɛɛ tɛ azɛlɛkye mgbole ne mɔɔ ɛlɛbɔ meli ne foa ko nee ye foa ko yeamaa yeayɛ dede la a gyegyele ye a. Mɔɔ gyegyele Dwona kpole la a le dede mɔɔ ɛnee melikavolɛma nee menli mɔɔ wɔ nu la ɛlɛyɛ wɔ mekɛ mɔɔ bɛlɛbɔ mɔdenle kɛ bɛnrɛmaa ɛlɛne ne ɛnrɛbutu la. Dwona nwunle ye wienyi kɛ ɔdaye ti menli mɔɔ wɔ meli ne anu la amuala bawu!

² Duzu a manle Dwona hɔle tɛnlabelɛ ɛsesebɛ ɛhye anu a? Ɔyɛle nvonleɛ kpole bie, yeandie ye Nyamenle, Gyihova ne. Duzu a ɔyɛle a? Asoo ɛnee ɔnrɛhola ɔnrɛyɛ tɛnlabelɛ ne anwo ɛhwee ɔ? Yɛbahola yɛazukoa ninyɛne dɔɔnwo yɛavi mualɛ ne mɔ anu. Kɛ neazo la, Dwona edwɛkɛ ne maa yɛnwu kɛzi menli mɔɔ lɛ diedi kpole bɔbɔ la kola yɛ nvonleɛ nee kɛzi bɛkola bɛyɛ nzenzaleɛ la.

3-5. (a) Saa Dwona duma ba menli adwenle nu a, duzu a bɛta bɛkakye a? (b) Duzu a yɛze ye wɔ Dwona anwo a? (Eza nea ɔ bo ɛkɛ edwɛkɛ ne.) (d) Duzu ati a ɛnee gyima mɔɔ Dwona yɛ kɛ ngapezonli la ɛnla aze ɛ?

³ Saa Dwona duma ba menli adwenle nu a, mɔɔ bɛta bɛkakye la a le tieyɛ mɔɔ yeanyɛ anzɛɛ ye anzosesebɛ ne. Noko Dwona yɛle ninyɛne dɔɔnwo mɔɔ le kpalɛ a. Kakye kɛ Gyihova Nyamenle kpale ye ɔmanle ɔzonlenle kɛ ye ngapezonli. Saa Dwona ɛnli nɔhalɛ anzɛɛ ɔnle tenlenenli a, anrɛɛ Gyihova ɛnrɛva gyima kpole ɛhye ɛnrɛwula ɔ sa.

 ⁴ Baebolo ne ka ɛleka mɔɔ Dwona vi nee ye abusua ne anwo edwɛkɛ ekyii bie mɔɔ baboa yɛ la ala. (Bɛgenga 2 Arelemgbunli 14:25.) Dwona vi Gate Hifa, ɔvi ɛkɛ ne mɔɔ kɔ Nazalɛte la le mayɛlɛ nwiɔ nee foa, ɛleka mɔɔ ɛvolɛ ɛya mɔtwɛ anzi bɛwole Gyisɛse la. * Dwona zonlenle kɛ ngapezonli wɔ mekɛ mɔɔ ɛnee Belemgbunli Gyɛlɔbowam II a di Yizilayɛ mbusua-bulu belemgbunlililɛ ne azo la. Ɛnee Yilaegya mekɛ ɛdeɛ ne ɛze ɛhɔ dɛbadɛba; yɛɛ ye koliagya Yilaehya noko wule wɔ Gyɛlɔbowam ɔ ze mekɛ zo. Ɔwɔ nuhua kɛ Gyihova luale menli ɛhye mɔ anwo zo dule Beeyale ɛzonlenlɛ bo ɛdeɛ, noko Yizilayɛma anye fuu yɛle anzosesebɛ bieko. Bɛ muala bɛlile belemgbunli mɔɔ ɔhɔle zo ‘ɔyɛle ɛtane ɔtiale Gyihova’ la anzi. (2 Arl. 14:24) Yemɔti ɛnee Dwona gyima ne ɛnla aze. Noko akee ɔvale nɔhalɛlilɛ ɔyɛle.

⁵ Kenle ko bie, Dwona asetɛnla ne hakyile bɔkɔɔ. Gyihova manle ye gyima bie mɔɔ ɔdele nganeɛ kɛ ɔyɛ se somaa la. Duzu a ɛnee Gyihova kpondɛ kɛ ɔyɛ a?

6. Duzu gyima a Gyihova vale manle Dwona a, na duzu ati a ɔbayɛ kɛ ɛnee gyima ne yɛ se ɛ?

⁶ Gyihova hanle hilele Dwona kɛ: “Kɔ suakpole Nenɛvɛ mɔɔ ɛlie duma kpole la azo na kɔbɔ nolo, bɔ bɛ ɛrele zo kɛ menwu bɛ amumuyɛ mɔɔ bɛyɛ la amuala.” (Dwn. 1:2) Ɔnyɛ se kɛ yɛbanwu deɛmɔti Dwona dele nganeɛ kɛ gyima ne bayɛ se la. Nenɛvɛ mɔɔ wɔ aduduleɛ la tendenle kɛyɛ mayɛlɛ 500, adenle mɔɔ bɛfa asɛɛ siane ko a bɛtia la. Noko akee, ɛnee ninyɛne bie mɔ gyegye Dwona tɛla adenle ne mɔɔ ɔbadia la. Ɛnee ɔwɔ kɛ Dwona kɔka Gyihova ndɛnebualɛ nrɛlaleɛ ne kile Nenɛvɛma mɔɔ bɛwɔ Aselea maanle nu mɔɔ bɛze bɛ kɛ bɛ ti yɛ se na bɛku menli la. Saa Dwona nwunle kɛ Nyamenle menli ne anu dɔɔnwo anlie ye anli a, ɛnee duzu a menli mɔɔ bɛnze Nyamenle la bayɛ a? Duzu a bado Gyihova sonvolɛ kokye mɔɔ wɔ Nenɛvɛ mɔɔ bɛravɛlɛle ye kɛ ‘suakpole mɔɔ ahɔdiawu ɛyi ye tɔ’ la azo a?—Nah. 3:1, 7.

7, 8. (a) Kɛzi Dwona bɔle kpɔkɛ kɛ ɔnrɛyɛ gyima mɔɔ Gyihova vale manle ye la ɛ? (b) Duzu ati a ɔnle kɛ yɛka kɛ Dwona le foanvoanle ɛ?

⁷ Bie a Dwona dwenlenle ɛhye anwo. Yɛnze. Mɔɔ yɛze la a le kɛ ɔnriandile. Gyihova hanle hilele ye kɛ ɔhɔ aduduleɛ; noko Dwona hɔle adɔleɛ, na ɔhɔle moa kpalɛ. Ɔhɔle meli agyinlaleɛ bie mɔɔ  wɔ suakpole Dwɔpa azo la, na ɔnyianle meli bie mɔɔ ɛlɛkɔ Tahyehye la. Mbɔlɔba bie mɔ kile kɛ Tahyehye wɔ Sepeen. Saa ɔle zɔ a, ɛnee ɔkile kɛ Dwona ɛlɛnriandi ahɔ maanle mɔɔ ɔvi Nenɛvɛ mɔɔ kɔ ɛkɛ la le kɛyɛ mayɛlɛ 2,200 la. Adenle ɛhye mɔɔ anrɛɛ ɔtu yeahɔ Nyevile Kpole ne anzi moɔmoa la bali asɛɛ ɛvolɛ ko. Noko ɛnee Dwona ɛbɔ kpɔkɛ kɛ ɔbayɛ ɛhye amaa yeanriandi yeavi gyima mɔɔ Gyihova ɛva ɛwula ɔ sa la anwo!—Bɛgenga Dwona 1:3.

⁸ Asoo ɛhye kile kɛ Dwona le foanvoanle ɔ? Ɔnle kɛ yɛka ye ndɛndɛ kɛ ɔle foanvoanle. Kɛmɔ yɛbanwu ye la, ɛnee ɔle sonla mɔɔ ɔlɛ akɛnrasesebɛ kpole a. Ɛnee Dwona le kɛ yɛdayɛ ala la, ɔtɔ sinli na ɛnee ɔlɛbɔ mɔdenle yeali ye sinlidɔlɛ dɔɔnwo anwo gyima. (Edw. 51:5) Yɛ nuhua boni a ɛzulolɛ ɛtɛkanle ye ɛlɛ a?

9. Ɔdwu mekɛ ne bie a, kɛzi yɛte nganeɛ wɔ gyima mɔɔ Gyihova ɛva ɛmaa yɛ la anwo ɛ, na nɔhalɛ edwɛkɛ boni a ɔhyia kɛ yɛkakye a?

⁹ Ɔdwu mekɛ ne bie a, yɛte nganeɛ kɛ gyima mɔɔ Nyamenle ɛva ɛmaa yɛ la yɛ se anzɛɛ yɛnrɛhola ye yɛ bɔbɔ. Bie a ɛzulolɛ bɔbɔ ka yɛ kɛ yɛbabɔ Nyamenle Belemgbunlililɛ edwɛkpa ne nolo kɛmɔ ɔwɔ kɛ Keleseɛnema yɛ la. (Mat. 24:14) Ɔnrɛyɛ se kɛ yɛ rɛle bavi nɔhalɛ edwɛkɛ ɛhye mɔɔ Gyisɛse hanle la: “Nyamenle kola yɛ debie biala.” (Mak. 10:27) Kɛmɔ ɔdwu mekɛ ne bie a yɛte nganeɛ kɛ yɛnrɛhola yɛnrɛyɛ gyima bie mɔ la ati, bie a yɛbade Dwona tɛnlabelɛ ne abo kpalɛ. Noko akee, duzu a vile Dwona ɛnriandilɛ ne anu rale a?

10, 11. (a) Mekɛ mɔɔ meli ne dule la, anyelazo boni a Dwona nyianle a? (b) Esiane boni a dole meli ne nee menli mɔɔ wɔ nu la ɛ?

¹⁰ Yɛbahola yɛapɛ Dwona mɔɔ de meli ne anu, bie a Fonehyeama gualilɛ meli nu la anwo nvoninli wɔ yɛ adwenle nu. Mekɛ mɔɔ melikavolɛma kpanyinli ne nee ye menli ne ɛlɛboɔboa bɛ nwo adɔ adenle zo, nee mekɛ mɔɔ bɛdule bɛ bo la, ɛnee Dwona ɛlɛnea bɛ. Ɔbayɛ kɛ mekɛ mɔɔ bɛhɔle nyevile ne akunlu lɔ ekyii la, Dwona nyianle anyelazo kɛ yenriandi esiane ne mɔɔ ɛnee ɔsulo ye la yewie. Noko arɛlevilɛ nu ala, maanle nu hakyile.

¹¹ Ahumu kpole bie dule manle nyevile ne bule azɛlɛkye mgbole. Meli mɔɔ bɛyɛ bɛ ɛnɛ bɔbɔ la ɛnrɛhola ɔ nloa gyinla, na fane nyɛ a ɛlɛne mɔɔ bɛvale ndaboa bɛyɛle wɔ zɔhane mekɛ ne anu la? Nzinlii, Dwona hɛlɛle kɛ, “[Gyihova] manle anwoma kpole bie dwazole nyevile ne anye,” noko asoo ɔnwunle ɛhye wɔ zɔhane mekɛ ne? Yɛnze. Mɔɔ ɔnwunle ye la a le kɛ, melikavolɛma ne bɔle ɔ bo deɛdeanle nu vɛlɛle bɛ nyamenle ne mɔ, noko ɛnee ɔze kɛ bɛ nyamenle ne mɔ ɛnrɛhola bɛ boa. (Sɛlɛ. 19:4) Ye kɛlɛtokɛ ne ka kɛ: “Ɛnee asɛɛ azudulɛ ne ɛbubu meli ne ɛwie.” (Dwn. 1:4) Kɛ ɔkɛyɛ na Dwona azɛlɛ Nyamenle ne mɔɔ ɔlɛnriandi ye la ɛ?

12. (a) Duzu ati a ɔnle kɛ yɛbua Dwona ndɛne kɛ ahumu ne ɛlɛtu na ɔlafele la ɛ? (Eza nea ɔ bo ɛkɛ edwɛkɛ ne.) (b) Kɛzi Gyihova manle bɛnwunle ɛleka mɔɔ ngyegyelɛ ne vi la ɛ?

 ¹² Kɛmɔ Dwona nwunle kɛ ɔnrɛhola ɔnrɛboa bɛ la ati, ɔwolole ɔhɔle meli ne abo lɔ na ɔlale. Ɔlafele botoo. * Melikavolɛma kpanyinli ne hɔdunwuele ye na ɔzele ye kɛ ɔvɛlɛ ye nyamenle ne mɔɔ ɔsonle ye la kɛmɔ awie biala ɛlɛyɛ la. Kɛmɔ ɛnee bɛdie bɛdi kɛ nyamenle bie a ɛlɛmaa ahumu ne adu la ati, bɛguale nzeleba kɛ bɛkpondɛ sonla holɛ ko ne mɔɔ ɔlua ɔ ti munzule kpole ɛhye ɛdo bɛ la. Bie a ɛzulolɛ hanle Dwona wɔ mekɛ mɔɔ nzeleba ne ambɔ awie biala la. Yeangyɛ, nɔhalɛ ne lale ali. Ɛnee Gyihova a ɛlɛmaa ahumu ne adu a, na ɔmanle nzeleba ne bɔle Dwona!—Bɛgenga Dwona 1:5-7.

13. (a) Duzu edwɛkɛ a Dwona hanle hilele melikavolɛma ne a? (b) Duzu a Dwona hanle kɛ melikavolɛma ne ɛyɛ a, na duzu ati ɔ?

¹³ Dwona hanle edwɛkɛ ne amuala hilele melikavolɛma ne. Ɛnee ɔle Gyihova, Nyamenle tumivolɛ bedevinli ne sonvolɛ. Nyamenle ɛhye a yevo ye na ɔlɛnriandi yeavi ɔ nyunlu mɔɔ ɔti yeva menli ne kɔsɔɔti ngoane yedo esiane nu la. Ɛzulolɛ hanle menli ne; na Dwona nwunle ɛhye. Bɛbizale debie mɔɔ ɔwɔ kɛ bɛyɛ amaa bɛalie meli ne na bɛanyia ngoane la. Duzu a ɔhanle a? Ɔbayɛ kɛ Dwona anwo wozole ye wɔ mekɛ mɔɔ ɔdwenlenle nyevile kpole ne mɔɔ ɛyɛ yɔlɔkɔkɔ mɔɔ bɛbavuandi ye bɛado nu la anwo. Noko akee, duzu ati a ɔwɔ kɛ ɔmaa menli ne kɔsɔɔti wu wɔ mekɛ mɔɔ ɔze kɛ ɔbahola yealie bɛ ngoane la ɛ? Yemɔti ɔzele bɛ kɛ: “Bɛmaa me zo, bɛvuandi me bɛdo nyevile nu na nyevile ne bagua amaa bɛ, ɔluakɛ meze kɛ medame me ti yɛɛ ahumu kpole ɛhye ɛdwazo a.”—Dwn. 1:12.

14, 15. (a) Kɛ ɔkɛyɛ na yɛazukoa Dwona diedi ne ɛ? (b) Kɛzi melikavolɛma ne yɛle bɛ nyɛleɛ wɔ Dwona edwɛkɛ na anwo ɛ?

¹⁴ Sonla mɔɔ le foanvoanle la ɛnrɛha edwɛkɛ ɛhye, ɔnle zɔ ɔ? Bie a Gyihova nwunle Dwona akɛnrasesebɛ nee ye tunwomaa sunsum ne wɔ mekɛ ɛtane zɔhane anu la, ɔ nye liele. Ɛhye maa yɛnwu Dwona diedi ne mɔɔ anu yɛ se la. Yɛbahola yɛazukoa ye ɛnɛ ɔlua awie mɔ boɛyɛlɛ mɔɔ yɛbava yɛalumua yɛ ɛdeɛ nyunlu la azo. (Dwɔn 13:34, 35) Saa yɛnwu awie mɔ kɛ bɛhyia nwonane nu, nganeɛdelɛ nu, anzɛɛ sunsum nu moalɛ a, asoo yɛtu yɛ nwo yɛmaa yɛboa bɛ? Yɛyɛ ɛhye a, nea kɛzi Gyihova anye balie a!

 ¹⁵ Ɔbayɛ kɛ edwɛkɛ ne hanle melikavolɛma ne, ɔluakɛ mɔlebɛbo ne bɛanlie bɛando nu! Emomu, bɛbɔle mɔdenle kɛ bɛka meli ne bɛahɔ aze, noko yeanyɛ boɛ, ɔluakɛ ɛnee akee ahumu ne anu ɛza na ɔtia bɛ. Ahumu ne ɛdulɛ ne yɛle kpole. Awieleɛ bɔkɔɔ ne bɛnwunle kɛ ɔwɔ kɛ bɛfuandi ye bɛto nyevile ne anu. Yemɔti bɛzɛlɛle Gyihova, Dwona Nyamenle ne kɛ ɔnwu bɛ anwunvɔne, na bɛmanle Dwona zo bɛvuandinle ye bɛdole nyevile ne anu.—Dwn. 1:13-15.

16, 17. Ka mɔɔ dole Dwona wɔ mekɛ mɔɔ bɛvuandinle ye bɛdole nyevile ne anu la anwo edwɛkɛ. (Eza nea nvoninli ne mɔ.)

¹⁶ Dwona dɔle azɛlɛkye ne mɔɔ ɛlɛbu la anu. Bie a ɔpelele kɛ ɔbatulu nyevile ne anye ekyii, na ɔnwunle awube mɔɔ kile kɛ meli ne ɛlɛkɔ ndɛndɛ a. Noko azɛlɛkye ne bule guale ɔ nwo zo manle ɔnlomanle. Ɔlɛnoma ɔkɔ ɔ bo kpalɛ la, ɔnwunle kɛ ye anyelazo kɔsɔɔti ɛwie.

¹⁷ Nzinlii Dwona hanle kɛzi ɔdele nganeɛ wɔ mekɛ ɛhye anu la anwo edwɛkɛ. Ɔdwenledwenlenle ninyɛne dɔɔnwo anwo. Ɔlile nyane kɛ ɔnrɛnwu Gyihova ɛzonlenlɛ sua kɛnlɛma ne mɔɔ wɔ Gyɛlusalɛm  la bieko. Azule ne monlanle ye, ɔminlinle buma ne anu bɔkɔɔ wɔ awoka ne mɔ abo lɔ, na nyevile bo ndile bɛkɛbɛkale ye. Ɛnee ɔzɔho kɛ ɛke a bayɛ ye ɛbolɔ a.—Bɛgenga Dwona 2:2-6.

18, 19. Duzu a dole Dwona wɔ nyevile ne abo a, duzu a menle ye a, na nwane a manle ɛhye zile a? (Eza nea ɔ bo ɛkɛ edwɛkɛ ne.)

¹⁸ Noko nea! Debie ɛlɛba ɔ nwo ɛkɛ—fɛlɛ kpole anwo bile bie. Ɔbikyele ye. Ɔbukele ɔ nloa anu wanaanwo, na ɔhyele ye ɔmenle!

¹⁹ Bie a Dwona adwenle yɛle ye kɛ ye awieleɛ ala ɛne. Noko Dwona nwunle debie mɔɔ yɛ azibɛnwo. Ɔtɛte ngoane nu! Yeambubu, yeamkpɔlɔ, yɛɛ ye ɛbolɛ amkpu. Kyɛkyɛ, ɛnee ɔtɛte ngoane nu, ɔnva nwo kɛ ɛnee ɔwɔ ɛleka mɔɔ ɔwɔ kɛ ɔwu la. Ɔyɛle Dwona azibɛnwo. Nɔhalɛ nu, ye Nyamenle, Gyihova ne “manle fɛlɛ kpole bie ramenle Dwona.” *—Dwn. 1:17.

20. Duzu a yɛsukoa yɛfi Dwona nzɛlɛlɛ ne mɔɔ ɔyɛle wɔ fɛlɛ kpole ne akunlu la anu a?

²⁰ Mekɛ dɔɔnwo guale nu. Mɔɔ Dwona wɔ awozinli kabii ɛhye anu la, ɔnyianle mekɛ ɔdwenledwenlenle ninyɛne nwo na ɔzɛlɛle Gyihova Nyamenle. Yɛbahola yɛazukoa Dwona anwo edwɛkɛ dɔɔnwo wɔ nzɛlɛlɛ mɔɔ ɔyɛle mɔɔ wɔ ye buluku ne tile nwiɔ ne anu la anu. Ɔda ali kɛ ɛnee Dwona lɛ Ngɛlɛlera ne anwo nrɛlɛbɛ kpole, ɔluakɛ wɔ nzɛlɛlɛ ne anu, ɛnee ɔta ɔka Edwɛndolɛ ne anu edwɛkɛ. Eza ɔmaa yɛnwu ye subane mɔɔ yɛ anyelielɛ la: anyezɔlɛ. Dwona dwulale ye edwɛkɛ ne kɛ: “Na mame, mebado edwɛne meaye wɔ ayɛlɛ, mebabɔ [afɔle] meamaa wɔ na meali me ɛwɔkɛ mɔɔ mebɔ la azo. Wɔmɔ [Gyihova] ala a ɛdie ngoane a.”—Dwn. 2:9.

21. Duzu a Dwona zukoale wɔ ngoanelielɛ nwo a, na ɛzukoalɛdeɛ boni a ɔwɔ kɛ yɛkakye a?

²¹ “Wɔ fɛlɛ ne akunlu,” Dwona nwunle kɛ Gyihova kola die awie biala, wɔ ɛleka biala nee mekɛ biala anu. Wɔ fɛlɛ ne akunlu bɔbɔ, Gyihova nwunle ye sonvolɛ ne mɔɔ ɛlɛyia ngyegyelɛ la na ɔliele ye. (Dwn. 1:17) Gyihova angomekye a kola maa awie tɛnla ngoane nu kenle nsa alehyenlɛ nee aledwolɛ  wɔ fɛlɛ kpole kunlu a. Ɔle kpalɛ kɛ yɛbahakye kɛ Gyihova a le ‘Nyamenle ne mɔɔ yɛ ngoane wɔ ɔ sa nu la.’ (Dan. 5:23) Ɔdaye ti a yɛde aze a. Asoo yɛ nye sɔ ɛhye? Asoo ɔnle kɛ yɛtie Gyihova ɔ?

22, 23. (a) Kɛzi bɛzɔle Dwona anyezɔlɛ ne bɛnleanle ɛ? (b) Duzu a yɛsukoa yɛfi Dwona ɛkɛ wɔ nvonleɛ mɔɔ yɛyɛ la anwo a?

²² Na Dwona noko ɛ? Asoo ɔyɛle tieyɛ ɔvale ɔhilele kɛ ɔ nye sɔ mɔɔ Gyihova ɛyɛ ɛmaa ye la ɔ? Ɛhɛe. Kenle nsa anzi, “fɛlɛ ne hɔkpule Dwona dole file zo.” (Dwn. 2:10) Dwenle nwolɛ nea, Dwona anweɛ azule bɔbɔ na yeadwu file zo! Noko ɛnee ɔwɔ kɛ ɔkpondɛ adenle mɔɔ ɔbava zo na yeadwu sua ne azo la. Yeangyɛ, ɔyiale ye anyezɔlɛ ne anwo sɔnea. Dwona 3:1, 2 ka kɛ: “Eza [Gyihova] edwɛkɛ ne dwule Dwona anwo zo bieko na ɔzele ye kɛ, ‘Dwona, dwazo kɔ Nenɛvɛ, suakpole ne mɔɔ ɛlie duma kpole la azo, na kɔbɔ me edwɛkɛ ne mɔɔ meva mewula ɛ nloa la nolo.’” Duzu a Dwona bayɛ a?

²³ Dwona andwehwenle ɔ bo aze. Yɛkenga kɛ: “Na Dwona hɔle Nenɛvɛ, kɛmɔ [Gyihova] hanle hilele ye la.” (Dwn. 3:3) Ɛhɛe, ɔdiele. Ɔda ali kɛ, ɔzukoale debie ɔvile ye nvonleɛ ne mɔ anu. Ɔwɔ kɛ yɛsukoa Dwona diedi ne wɔ ɛhye anu. Yɛ kɔsɔɔti yɛyɛ ɛtane; yɛ kɔsɔɔti yɛfo. (Wulo. 3:23) Noko asoo yɛmaa yɛ sa nu to anzɛɛ yɛsukoa debie yɛfi yɛ nvonleɛ ne mɔ anu na yɛyɛ tieyɛ yɛsonle Gyihova?

24, 25. (a) Nyilalɛ boni a Dwona nyianle wɔ mekɛ mɔɔ ɛnee ɔde aze la ɛ? (b) Duzu nyilalɛ a Dwona banyia ye kenlebie a?

²⁴ Asoo Gyihova yilale Dwona wɔ ye tieyɛ ne anwo? Ɛhɛe. Bie a nyilalɛ ko mɔɔ ɔnyianle la a le kɛ, nzinlii ɔdele kɛ menli mɔɔ bɛwɔ meli ne anu la anwu. Bɛvuandinle Dwona bɛdole nyevile ne anu ala la yɛɛ nyevile ne guale diinyi a, menli ne mɔ ‘zulole Gyihova kpole’ na bɛbɔle afɔle bɛmanle ye. Bɛambɔ bie bɛammaa bɛ adalɛ nyamenle ne mɔ.—Dwn. 1:15, 16.

²⁵ Nzinlii ɔnyianle nyilalɛ mɔɔ tɛla ɛhye la. Gyisɛse vale mekɛ mɔɔ Dwona lile wɔ fɛlɛ kpole ne akunlu la yɛle ngapezo mɔɔ fane mekɛ mɔɔ ɔbali ye wɔ ɛbolɔ la anwo nvoninli. (Bɛgenga Mateyu 12:38-40.) Saa bɛdwazo Dwona bɛba ngoane nu na ɔte nyilalɛ ɛhye a, nea kɛzi ɔ nye balie a! (Dwɔn 5:28, 29) Gyihova kpondɛ kɛ ɔyila ɛdawɔ noko. Asoo ɛbazukoa debie wɔavi wɔ nvonleɛ ne mɔ anu, wɔadie Gyihova na wɔala ɛlɔlɛ ali wɔahile awie mɔ kɛmɔ Dwona yɛle la?