1, 2. Duzu a zile wɔ kenle titile bie wɔ Yilaegya ɛbɛlabɔlɛ nu a?

MƆƆ maanle nu ɛlɛyɛ awozinli kpole la, Yilaegya nriandile luale ezule ne anu. Ɛnee adenle mɔɔ ɛha na yeadwu Gyɛzɛlii la wale, na ɛnee yeyɛ kpanyinli. Noko ɔnriandile ɛsesebɛ, ɔluakɛ ɛnee ‘Gyihova sunsum ne wɔ ɔ nwo zo.’ Ɔda ali kɛ ɛnee ɔtɛnyianle anwosesebɛ zɔhane mɔɔ ɔnyianle la bie ɛlɛ. Nea, ɔhɔzenle mgbɔnwɔ ne mɔ mɔɔ ɛnee bɛlɛtwe Belemgbunli Ehabe ehwili ne la anwo ɔhɔle teatea!—Bɛgenga 1 Arelemgbunli 18:46.

² Akee adenle ne ɛdenrɛ zo ɛmaa Yilaegya. Pɛ Yilaegya mɔɔ ɔlɛnriandi na ɔlɛbɔ ɔ nye yeamaa nzule mɔɔ ɛgua ɔ nyunlu apepe na eza ɔlɛdwenle ninyɛne mɔɔ sisile alehyenlɛ ne anu anwo la anwo nvoninli nea. Nɔhalɛ nu, ɛnee ɔle konimlilɛ kpole ɔmaa Yilaegya Nyamenle Gyihova nee nɔhalɛ ɛzonlenlɛ. Ɔlua anwoma kpole ne mɔɔ ɛlɛtu la ati, yeannwu Kamɛle Boka ne mɔɔ Gyihova manle ɔbɔle Beeyale ɛzonlenlɛ anyiemgba wɔ zo la. Bɛkpale Beeyale ngapezoma dɔɔnwo anwo ɛdanlɛ kɛ bɛle adalɛ na bɛhunle bɛ. Akee Yilaegya zɛlɛle Gyihova kɛ ɔmaa ezule ɛdɔ na wawaa ne mɔɔ ɛli ɛvolɛ nsa siane nsia la ɛpɛ nu. Na ezule dɔle!—1 Arl. 18:18-45.

3, 4. (a) Duzu ati a Yilaegya ɛlɛkɔ Gyɛzɛlii la, ye anyelazo ne yɛle kpole ɛ? (b) Kpuyia boni mɔ a yɛbazuzu nwo a?

³ Mɔɔ Yilaegya lua ezule ne anu ɔlɛpɛ mayɛlɛ 19 adenle ne yeahɔ Gyɛzɛlii la, bie a ɔnyianle adwenle kɛ ye ngyegyelɛ ne abo ɛpɛ na akee ninyɛne bayɛ kpalɛ. Ɛnee ɔwɔ kɛ Ehabe kakyi ye adwenle! Ɔlua mɔɔ ɔnwunle ye la ati, ɛnee ɔwɔ kɛ ɔkpo Beeyale ɛzonlenlɛ; ɔmaa ye belemgbunli raalɛ Gyɛzɛbɛle ka ɔ nloa to nu; na ɔgyakyi Gyihova azonvolɛ ɛkpɔlɛ.

⁴ Saa ninyɛne ɛlɛkɔ boɛ amaa yɛ a, yɛ anyelazo yɛ kpole. Bie a yɛbade nganeɛ kɛ yɛlɛnyia anyuhɔlɛ, na yɛ ngyegyelɛ ne mɔ abo ɛpɛ. Saa Yilaegya nyianle adwenle zɔhane bie a, ɔnyɛ nwanwane, ɔluakɛ ɛnee ɔle “sonla kɛ yɛdayɛ ala la.” (Gye. 5:17) Noko ɛnee Yilaegya ngyegyelɛ ne abo ɛtɛpɛle. Nɔhalɛ nu, ɛnee ɔnrɛhyɛ fee na Yilaegya ahonle adu bieko, mɔɔ ɔ kunlu a anrɛɛ yewu bɔbɔ a. Duzu  a zile a, na kɛzi Gyihova boale ye ngapezonli ne ɔmanle ɔnyianle diedi nee akɛnrasesebɛ fofolɛ ɛ? Bɛmaa yɛnlea.

5. Asoo ninyɛne mɔɔ zile Kamɛle Boka ne azo la manle Ehabe bule Gyihova, duzu a maa yɛnwu ye zɔ a?

⁵ Mekɛ mɔɔ Ehabe dwule Gyɛzɛlii la, asoo ɔlale ye ali kɛ yenlu ɔ nwo? Yɛkenga kɛ: “Belemgbunli Ehabe hanle nyɛleɛ mɔɔ Yilaegya yɛle la amuala hilele Gyɛzɛbɛle, nee kɛ ɔzile ɔhunle ahɔmenle ne mɔ la.” (1 Arl. 19:1) Yɛ ye nzonlɛ kɛ Ehabe ambɔ Yilaegya Nyamenle, Gyihova ne duma wɔ ye amaneɛ ne anu. Kɛmɔ sunsum nu ninyɛne ɛngyia ye la ati, ɔnwunle kɛ nwanwane ninyɛne “mɔɔ Yilaegya yɛle la” vi sonla ala. Nɔhalɛ nu, yeangile ɛbulɛ yeammaa Gyihova Nyamenle. Na duzu ɔ ye ne mɔɔ ɔdi nzenralɛ la yɛle a?

6. Edwɛkɛ boni a Gyɛzɛbɛle zoanle manle bɛhɔhanle bɛhilele Yilaegya a, na duzu a ɛnee ɔkile a?

⁶ Gyɛzɛbɛle vale ɛya kpole! Ɛhye ati, ɔzoanle ɔmanle bɛhɔzele Yilaegya kɛ: “Ɛhunlɛ mɔɔ wɔhu ahɔmenle ne mɔ la, saa ɛhyema bekezɛ ɛnee metɛkunle ɛdawɔ noko a awozonle ne mɔ ɛdua me kakɛ ɛgua me bie zo.” (1 Arl. 19:2) Ɛnee ɛhye le ewule nwo ɛnwunlonwunlanlɛ mɔɔ tɛla biala. Ɛhye kile kɛ, ɔhanle ndane kɛ saa yeangu Yilaegya wɔ kenle ko ne yeanva yeanli Beeyale ngapezoma ne ati nzenralɛ a, bɛhu ye. Pɛ Yilaegya mɔɔ bɛdunwue ye bɛvi nafelɛ nu wɔ nɔe mɔɔ anwoma ɛlɛtu wɔ Gyɛzɛlii, na bɛlɛka belemgbunli raalɛ ne edwɛkɛ ne bahile ye la anwo nvoninli nea. Kɛzi edwɛkɛ ne hanle ye ɛ?

7. Kɛzi Gyɛzɛbɛle ɛnwunlonwunlanlɛ ne hanle Yilaegya ɛ, na duzu a ɔyɛle a?

⁷ Yilaegya adwenle yɛle ye kɛ yeli konim wɔ ɔ nee Beeyale ɛzonlenlɛma ne konle ne anu, noko yeangyɛ biala ɔnwunle kɛ ɔnle zɔ. Ɛnee Gyɛzɛbɛle anye ɛbolo kpalɛ. Ɛnee yelumua yemaa bɛhu Yilaegya agɔnwo mɔ mɔɔ bɛdi nɔhalɛ la anu dɔɔnwo, na kɛkala ɔzɔho kɛ yedwu Yilaegya anwo zo. Kɛzi Gyɛzɛbɛle ɛnwunlonwunlanlɛ ne hanle Yilaegya ɛ? Baebolo ne ka kile yɛ kɛ: ‘Ɛzulolɛ hanle ye.’ Asoo Yilaegya pɛle kɛzi Gyɛzɛbɛle bahu ye atisesebɛ nu la anwo nvoninli wɔ ye adwenle nu? Saa ɔdwenlenle edwɛkɛ zɔhane anwo ɛdeɛ a, ɛnee ɔnyɛ nwanwane kɛ ɔ sa nu dole la. Kɛ ɔde ye biala la, Yilaegya ‘nriandile.’—1 Arl. 18:4; 19:3.

8. (a) Kɛzi Pita ngyegyelɛ ne ɛnee le kɛ Yilaegya ɛdeɛ ne ɛ? (b) Duzu a yɛsukoa yɛfi Yilaegya nee Pita ɛkɛ a?

⁸ Tɛ Yilaegya angomekye a le diedinli mɔɔ ɛzulolɛ hanle ye a.  Nzinlii, edwɛkɛ ɛhye bie dole ɛzoanvolɛ Pita. Kɛ neazo la, mekɛ mɔɔ Gyisɛse manle Pita adenle kɛ ɔdia azule ne anye la, Pita bɔle ɔ bo nleanle ‘anwoma ne mɔɔ anloa yɛ se la.’ Akee ye ahonle dule, na ɔbɔle ɔ bo kɛ ɔnoma. (Bɛgenga Mateyu 14:30.) Yilaegya nee Pita neazo ne maa yɛnwu ɛzukoalɛdeɛ mɔɔ anwo hyia la. Saa yɛkpondɛ kɛ yɛgyinla kpundii a, ɔnle kɛ yɛfa yɛ adwenle yɛsie ninyɛne mɔɔ ka yɛ ɛzulolɛ la azo. Ɔwɔ kɛ yɛfa yɛ adwenle yɛsie Ahenle mɔɔ maa yɛ anyelazo nee anwosesebɛ la anwo zo.

9. Ka Yilaegya ɛnriandilɛ ne nee kɛzi ɔdele nganeɛ la anwo edwɛkɛ.

⁹ Kɛmɔ ɛzulolɛ hanle Yilaegya la ati, ɔnriandile ɔvale nyiakɛ adɔleɛ afoa nu ɔpɛle adenle mayɛlɛ 95 ɔhɔle Biyɛhyiba mɔɔ bikye Dwuda ɛweɛne zo la. Ɔgyakyile ye sonvolɛ ne ɛkɛ na ɔ ngome ɔhɔle fienemgbole ne anu lɔ. Kɛlɛtokɛ ne ka kɛ ɔdiale “kenle ko adenle,” yemɔti bie a yɛbapɛ ye nvoninli kɛ ɔbɔle ɔ bo nwonlomɔ, mɔɔ ɔda ali kɛ yeanva aleɛ biala a. Arɛlebɔlɛ nee ɛzulolɛ manle ɔpelele kpɔkɛ ne anu wɔ ewia ketekete ne anu. Mekɛ mɔɔ ewia ne hɔdɔle na maanle nu ɛlɛmua la, Yilaegya anwosesebɛ wiele mɔɔ ɛnee ɔngola tia. Kɛmɔ ɛnee yevɛ la ati, ɔdɛnlanle baka bie abo—ɛnee ɛkɛ ne ala a ɔbahola yeala a.—1 Arl. 19:4.

10, 11. (a) Duzu a ɛnee Yilaegya nzɛlɛlɛ ne kile a? (b) Gyinla ngɛlɛlera ne mɔ azo na ka kɛzi Nyamenle azonvolɛ bie mɔ arɛle bɔle la anwo edwɛkɛ.

¹⁰ Yilaegya vale nyanelilɛ yɛle nzɛlɛlɛ. Ɔzɛlɛle kɛ Nyamenle ɛmaa ɔwu. Ɔhanle kɛ: “Menle kpalɛ mendɛla egya mɔ.” Ɛnee ɔze kɛ ɔ nlenya mɔ ɛhakyi ndɛtɛlɛ nee mbowule wɔ ɛbolɔ, na bɛngola bɛmboa awie biala. (Nolo. 9:10) Yilaegya dele nganeɛ kɛ ɔnfɛta. Ɔnyɛ nwanwane kɛ ɔhanle kɛ: “Yeyɛ boɛ!” Duzu ati a ɔwɔ kɛ ɔtɛnla ngoane nu a?

¹¹ Asoo ɔwɔ kɛ ɔsi yɛ nwo kɛ Nyamenle sonvolɛ noko arɛle bɔle la ɔ? Kyɛkyɛ. Bɛha mrenya nee mraalɛ nɔhavoma dɔɔnwo anwo edwɛkɛ wɔ Baebolo ne anu kɛ bɛlile nyane mɔɔ ɛnee bɛ kunlu a anrɛɛ bɛwu bɔbɔ a, bɛ nuhua bie mɔ a le Relɛbɛka, Gyekɔbo, Mosisi nee Dwobu.—Mɔl. 25:22; 37:35; Ɛdi. 11:13-15; Dwo. 14:13.

12. Saa ɛ rɛle bɔ a, kɛzi ɔwɔ kɛ ɛdi Yilaegya neazo ne anzi ɛ?

¹² Ɛnɛ, yɛde “anwongyelelɛ” mekɛ nu, yemɔti ɔnyɛ nwanwane kɛ ɔdwu mekɛ ne bie a menli dɔɔnwo, bɔbɔ Nyamenle nɔhalɛ  azonvolɛ arɛle bɔ la. (2 Tem. 3:1) Saa ɛkɔ tɛnlabelɛ ɛtane ɛhye bie anu a, di Yilaegya neazo ne anzi wɔ adenle ɛhye anu: Fi ahonle nu ka wɔ edwɛkɛ kile Nyamenle wɔ nzɛlɛlɛ nu. Ɔluakɛ, Gyihova le “arɛlekyekyelɛ Nyamenle.” (Bɛgenga 2 Kɔlentema 1:3, 4.) Asoo ɔkyekyele Yilaegya arɛle?

13, 14. (a) Kɛzi Gyihova luale anwumabɔvolɛ nwo zo lale ye ali kɛ ɔdwenle Ye ngapezonli ne mɔɔ ɔ rɛle ɛbɔ la anwo ɛ? (b) Duzu ati a Gyihova mɔɔ ze yɛ nwo edwɛkɛ biala, mɔɔ yɛ sinlidɔlɛ boka nwo bɔbɔ la le arɛlekyekyelɛ maa yɛ ɛ?

¹³ Ɛnea a kɛzi Gyihova dele nganeɛ wɔ mekɛ mɔɔ ɔnwunle kɛ ye sonvolɛ ne mɔɔ ɔkulo ye la la baka zɔhane abo wɔ fienemgbole ne anu na ɔlɛsɛlɛ kɛ ɔmaa ɔwu la ɛ? Ɔnle kɛ yɛbɔ yɛ ti anu yɛbua. Mɔɔ nafelɛ vale Yilaegya la, Gyihova zoanle anwumabɔvolɛ wɔ ɔ nwo ɛkɛ. Anwumabɔvolɛ ne dunwuele ye na ɔzele ye kɛ: “Dwazo na di debie.” Yilaegya manle ɔ ti zo la ɔnwunle kɛ tata nee nzule dwora ko gyi ɔ ti sɔlɔ ɛkɛ. Asoo ɔyɛle anwumabɔvolɛ ne mo? Kɛlɛtokɛ ne ka kɛ ngapezonli ne lile debie, ɔnlonle nzule ne na ɔdole ɔ ti ɛkɛ ne ɔlafele bieko. Asoo ɔ sa nu dole somaa mɔɔ ɛnee ɔngola tendɛ ɔ? Kɛ ɔde ye biala la, Nyamenle soanvolɛ ne dunwuele ye bieko, bie a aleɛbahye ne, na ɔzele ye kɛ, “Dwazo na di debie na anrɛɛ adenle ne kɛde wɔ somaa.”—1 Arl. 19:5-7.

¹⁴ Yɛyɛ Nyamenle mo kɛ ɔmaa yɛnwu ninyɛne nu la, ɛnee anwumabɔvolɛ ne ze ɛleka mɔɔ Yilaegya ɛlɛkɔ la. Eza ɔnwunle kɛ Yilaegya angomekye ɛnrɛnyia anwosesebɛ ɛnrɛpɛ adenle ne. Nea kɛzi ɔyɛ arɛlekyekyelɛ kɛ yɛbazonle Nyamenle ne mɔɔ ze yɛ bodane nee yɛ sinlidɔlɛ ne mɔ kpalɛ ɔtɛla yɛ la! (Bɛgenga Edwɛndolɛ 103:13, 14.) Kɛzi aleɛ zɔhane boale Yilaegya ɛ?

15, 16. (a) Duzu a aleɛ mɔɔ Gyihova vale manle Yilaegya la manle ɔyɛle a? (b) Duzu ati a ɔwɔ kɛ yɛ nye die adenle mɔɔ Gyihova dua zo boa ye azonvolɛ ɛnɛ la anwo ɛ?

¹⁵ Yɛkenga kɛ: “Yilaegya dwazole, ɔlile debie na ɔnlonle nzule; aleɛ zɔhane manle ye anwosesebɛ manle ɔdiale nɔɔzo nee ewiazo kenle abulanla ɔhɔdwule Nyamenle Boka ne mɔɔ bɛfɛlɛ ye Saenae [Hɔlɛbe] la azo.” (1 Arl. 19:8) Yilaegya hyele ɛhɔne alehyenlɛ nee aledwolɛ kenle 40, kɛmɔ Mosisi mɔɔ ɛnee li ɔ nyunlu wɔ ɛvolɛ kɛyɛ ɛya nsia anu la yɛle la. Gyisɛse noko yɛle zɔ wɔ ɛvolɛ kɛyɛ apenle ko anzi. (Ade. 34:28; Luku 4:1, 2) Aleɛ ko zɔhane ammaa ye ngyegyelɛ kɔsɔɔti anvi ɛkɛ, noko ɔboale ye wɔ nwanwane adenle zo. Pɛ nrenya kpanyinli ne mɔɔ lua fienemgbole ne mɔɔ adenle biala ɛnla nu la anu toonwu kɛyɛ siane ko nee foa la anwo nvoninli wɔ wɔ adwenle nu nea!

¹⁶ Ɛnɛ noko Gyihova boa ye azonvolɛ, ɔmmaa bɛ nwonane nu  aleɛ wɔ nwanwane adenle zo, emomu ɔmaa bɛ sunsum nu aleɛ. (Mat. 4:4) Saa yɛsukoa Nyamenle anwo debie wɔ ye Edwɛkɛ ne nee mbuluku mɔɔ gyi Baebolo ne azo la anu a, ɔboa yɛ wɔ sunsum nu. Bie a sunsum nu aleɛ ɛhye mɔ mɔɔ yɛdi la ɛnrɛmaa yɛ ngyegyelɛ kɔsɔɔti ɛnrɛvi ɛkɛ, noko ɔbaboa yɛ yeamaa yɛagyinla tɛnlabelɛ mɔɔ anu yɛ se la anloa. Eza ɔkile yɛ adenle ɔkɔ “ngoane mɔɔ ɛnlɛ awieleɛ la” anu.—Dwɔn 17:3.

17. Nienwu a Yilaegya hɔle a, na duzu ati a ɛnee ɛkɛ ne le ɛleka titile ɛ?

¹⁷ Yilaegya diale asɛɛ mayɛlɛ 200 kolaa na yeadwu Hɔlɛbe Boka ne azo. Ɛnee ɔle ɛleka titile, ɔluakɛ ɛkɛ ne a Gyihova Nyamenle luale anwumabɔvolɛ nwo zo yele ɔ nwo hilele Mosisi wɔ kpɔkɛ ne mɔɔ ɛnee ɔlɛsɔ la anu a. Eza ɛkɛ ne a nzinlii ɔ nee Yizilayɛma yɛle Mɛla ngyekyeleɛ ne a. Yilaegya hɔveale bolɛ bɔne nu.

18, 19. (a) Duzu edwɛkɛ a anwumabɔvolɛ ne bizale Yilaegya a, na kɛzi ɔbuale ɛ? (b) Ninyɛne nsa boni a manle Yilaegya arɛle bɔle a?

¹⁸ Mɔɔ Yilaegya wɔ Hɔlɛbe la, anwumabɔvolɛ bie hanle Gyihova “edwɛkɛ” ne hilele ye na ɔbizale ye kpuyia sikalɛ ɛhye: “Yilaegya, duzu yɛɛ ɛyɛ ye ɛke a?” Ɔbayɛ kɛ ɔbizale kpuyia ne wɔ adenle kɛnlɛma zo, ɔluakɛ Yilaegya nwunle kɛ yenyia adenle kɛ ɔbaha mɔɔ gyegye ye la amuala. Na ɔyɛle ye zɔ! Ɔbuale kɛ: “Melɛtwe ɛdawɔ Tumivolɛ [Gyihova] Nyamenle ɛ ti nungule, ɔluakɛ Yizilayɛma ɛgyakyi wɔ edwɛkɛ ne anzi ɛlilɛ, bɛbubu wɔ azukponle ne mɔ, na bɛhu wɔ kpɔmanvolɛma ne mɔ amuala; me ngomekye ala yɛɛ meha a, yɛɛ eza bɛlɛkpondɛ medame noko bɛahu me.” (1 Arl. 19:9, 10) Yeanyɛ boɛ fee la, Yilaegya edwɛkɛ ne maa yɛnwu ninyɛne nsa mɔɔ ɔti ɔ rɛle bɔle la.

¹⁹ Mɔɔ lumua la, Yilaegya dele nganeɛ kɛ ye gyima ne ɛyɛ mgbane. Ɔnva nwo kɛ ɔvale ɛvolɛ dɔɔnwo hwenle Gyihova ɛzonlenlɛ nwo “nungule” na ɔkpogyale Nyamenle duma nwuanzanwuanza ne nee ye ɛzonlenlɛ zo la, ɔnwunle kɛ tɛnlabelɛ ne anu ɛlɛyɛ se. Menli ne anla diedi ali yɛɛ bɛdele atua na adalɛ ɛzonlenlɛ hɔle ɔ nyunlu. Mɔɔ tɔ zo nwiɔ, Yilaegya dele nganeɛ kɛ yeha ɔ ngomekye. Ɔhanle kɛ, “me ngomekye ala yɛɛ meha a,” kɛ asɛɛ ɔ ngomekye ala a ɔtɛsonle Gyihova wɔ maanle zɔhane anu a. Mɔɔ tɔ zo nsa, ɛzulolɛ hanle Yilaegya. Ɛnee bɛhu ɔ gɔnwo mɔ ngapezoma dɔɔnwo, na ɛnee ɔdie ɔdi kɛ yedwu ɔ nwo zo. Bie a ɛnee ɔnla aze kɛ Yilaegya balie nganeɛdelɛ zɔhane mɔ ado nu, noko yeammaa anwomemaazo nee bɛsanudolɛ anzi ye adenle. Ɔluale ye ahonle nu mɔɔ ɔvile ɔzɛlɛle Nyamenle la azo ɔyɛle neazo kpalɛ ɔmanle nɔhavoma kɔsɔɔti.—Edw. 62:8.

20, 21. (a) Ka ninyɛne mɔɔ Yilaegya nwunle ye wɔ bolɛ bɔne ne anloa la anwo edwɛkɛ. (b) Duzu a Gyihova tumi ne mɔɔ ɔlale ye ali la manle Yilaegya nwunle ye a?

 ²⁰ Kɛzi Gyihova lile Yilaegya ɛzulolɛ nee ye ngyianlɛ nwo gyima ɛ? Anwumabɔvolɛ ne zele Yilaegya kɛ ɔhɔgyinla bolɛ bɔne ne anloa. Ɔyɛle ye zɔ noko ɛnee ɔnze mɔɔ bazi a. Ahumu kpole bie dule! Ɔbayɛ kɛ ɔyɛle dede kpalɛ, ɔluakɛ ɔ nloa ɛsesebɛ ne manle awolɛ kpukekpukele. Pɛ Yilaegya mɔɔ ɔlɛfa ɔ sa yeawa ɔ nye na mekɛ ko ne ala ɔlɛsɔ ye tɛladeɛ ɛnlomboɛ ne mɔɔ bɛva enrinli bɛnwo mɔɔ anwoma ɛlɛbɔ nu la anwo nvoninli nea. Akee ɔwɔ kɛ ɔbɔ mɔdenle ɔgyinla ɔ gyakɛ azo, ɔluakɛ azɛlɛ ne kpusule! Yeangyɛ biala senle vindele azɛlɛkpusulɛ ne anzi, senle ne wuluwulu ne manle ɔziale ɔhɔveale bolɛ bɔne ne anu bieko.—1 Arl. 19:11, 12.

²¹ Edwɛkɛ ne maa yɛnwu kɛ ɛnee Gyihova ɛnle nwanwane ninyɛne mɔɔ ɔsisile la anu. Ɛnee Yilaegya ze kɛ Gyihova ɛnle nwɔra nu nyamenle kɛ Beeyale mɔɔ ye azonvolɛ adalɛma ne dwenlenle kɛ ɔdaye a “ɔnea amungu” ne azo anzɛɛ ɔmaa ezule tɔ la. Tumi mɔɔ wɔ ewiade kɔsɔɔti la vi Gyihova na eza ɔle kpole ɔtɛla debie biala. Anwuma nehane bɔbɔ le ekyi maa ye! (1 Arl. 8:27) Kɛzi ɛhye mɔ amuala boale Yilaegya ɛ? Kakye kɛzi ɛzulolɛ hanle ye la. Kɛmɔ ɛnee Gyihova, Nyamenle mɔɔ Ye tumi ne bo debie biala azo la wɔ Yilaegya afoa la ati, ɛnee ɔnle kɛ Yilaegya sulo Ehabe nee Gyɛzɛbɛle!—Bɛgenga Edwɛndolɛ 118:6.

22. (a) Kɛzi “ɛnelɛ nretee” ne manle Yilaegya anwosesebɛ kɛ ɔ nwo hyia ɛ? (b) Nwane a ɔzɔho kɛ “ɛnelɛ nretee” ne vi ye a? (Nea ɔ bo ɛkɛ edwɛkɛ ne.)

²² Senle ne nlunle la, ɛkɛ ne yɛle diinyi, na Yilaegya dele “ɛnelɛ nretee bie.” Ɔhanle ye bieko kɛ Yilaegya ɛha mɔɔ ɛlɛgyegye ye la, na ɔyɛle ye zɔ. * Ɔbayɛ kɛ ɛhye manle ye ahonle dɔle ye azule nu bieko. Nɔhalɛ nu, edwɛkɛ mɔɔ doa zo mɔɔ “ɛnelɛ nretee” ne hanle la kyekyele Yilaegya arɛle. Gyihova manle Yilaegya nwunle ye kɛ ɔ nye die ɔ nwo kɛ ye sonvolɛ. Wɔ adenle boni azo? Nyamenle lale bodane dɔɔnwo mɔɔ ɔlɛ ye mɔɔ fane konle mɔɔ ɔbava yeadoa Beeyale ɛzonlenlɛma mɔɔ bɛwɔ Yizilayɛ la ali. Ɔda ali kɛ gyima ɛsesebɛ mɔɔ Yilaegya yɛle la anyɛ mgbane, ɔluakɛ ɛnee Nyamenle bodane ɛlɛba  nu. Bieko, Gyihova vale Yilaegya lile gyima kɛ ngapezonli na ɔmanle ye adehilelɛ titile bie mɔ.—1 Arl. 19:12-17.

23. Ndenle nwiɔ boni azo a Gyihova lile nganeɛ mɔɔ Yilaegya dele kɛ yeha ɔ ngomekye la anwo gyima a?

²³ Na nganeɛ mɔɔ Yilaegya dele kɛ yeha ɔ ngomekye la noko ɛ? Gyihova yɛle ninyɛne nwiɔ wɔ nwolɛ. Mɔɔ lumua la, ɔzele Yilaegya kɛ ɔkpokpa Yilaehya kɛ ngapezonli mɔɔ ɔbali ye agya a. Ɛnee kpavolɛ ɛhye baboka Yilaegya anwo na yeaboa ye wɔ ɛvolɛ dɔɔnwo anu. Nea kɛzi ɛhye kyekyele Yilaegya arɛle a! Mɔɔ tɔ zo nwiɔ, Gyihova lale edwɛkɛ kɛnlɛma ɛhye ali: “Mebagyakyi menli apenle nsuu mɔɔ wɔ Yizilayɛ maanle ne anu mɔɔ ɛtɛsonlenle bozonle Beeyale ɛlɛ la.” (1 Arl. 19:18) Ɛnee ɔtɛkale Yilaegya angomekye. Bie a ɔdele kɛ menli apenle dɔɔnwo zɔhane mɔɔ bɛdi nɔhalɛ la anzonle Beeyale la, ɔ nye liele. Ɛnee Yilaegya mɔɔ ɔbava nɔhalɛlilɛ yeazonle yeava yeayɛ nɔhalɛ mɔɔ bɛdi bɛmaa Gyihova la anwo neazo wɔ mekɛ ɛtane zɔhane anu la anwo hyia. Ɔbayɛ kɛ Yilaegya dele edwɛkɛ ne vile Gyihova soanvolɛ, “ɛnelɛ nretee” ne ɛkɛ ne la, ɔ nye liele kpole.

24, 25. (a) Adenle boni azo a yɛtie “ɛnelɛ nretee” ne mɔɔ vi Gyihova la ɛnɛ a? (b) Duzu a maa yɛnwu ye bɔkɔɔ kɛ Yilaegya liele arɛlekyekyelɛ mɔɔ vi Gyihova ɛkɛ la dole nu ɛ?

²⁴ Kɛmɔ Yilaegya yɛle la, bie a tumi kpole ne mɔɔ wɔ abɔdeɛ nu la bayɛ yɛ azibɛnwo kpole, na ɔwɔ kɛ ɔba ye zɔ. Abɔdeɛ maa yɛnwu tumi mɔɔ Bɔvolɛ ne lɛ la wienyi. (Wulo. 1:20) Gyihova ɛlɛkɔ zo ava ye tumi kpole ne aboa ye nɔhalɛ azonvolɛ. (2 Edk. 16:9) Noko akee, Nyamenle dua ye Edwɛkɛ Baebolo ne azo a tendɛ kile yɛ a. (Bɛgenga Ayezaya 30:21.) Wɔ adenle bie azo, Baebolo ne le kɛ zɔhane “ɛnelɛ nretee” ne, saa yɛmaa ɔkile yɛ adenle ɛnɛ a. Gyihova dua edwɛkɛ mɔɔ ɔsonle bolɛ mɔɔ ɔwɔ nu la azo ɔtenrɛdenrɛ yɛ, ɔmaa yɛ anwosesebɛ na ɔmaa yɛnwu kɛ ɔkulo yɛ.

²⁵ Asoo Yilaegya liele arɛlekyekyelɛ mɔɔ Gyihova vale manle ye wɔ Hɔlɛbe Boka ne azo la ɔdole nu? Ɛhɛe! Ngapezonli ɛhye mɔɔ di nɔhalɛ la nyianle akɛnrasesebɛ bieko dwazole tiale ɛtaneyɛlɛ nee adalɛ ɛzonlenlɛ. Saa yɛtie Nyamenle edwɛkɛ mɔɔ bɛvale sunsum ne bɛhɛlɛle, “mɔɔ Nyamenle Edwɛkɛ ne fa maa yɛ” anzɛɛ mɔɔ kyekye yɛ rɛle la a, yɛbahola yɛazukoa Yilaegya diedi ne.—Wulo. 15:4.