Faarfannaa 18:1-50
Geggeessaa muuziqaatiif. Faarfannaa tajaajilaa Yihowaa kan taʼe Daawit guyyaa Yihowaan harka diinota isaa hundumaa fi harka Saaʼol jalaa isa oolchetti Yihowaadhaaf faarfate. Akkana jedhe:+
18 Jabina koo kan taate yaa Yihowaa,+ ani sin jaalladha.
2 Yihowaan kattaa koo, dahoo koo fi isa na oolchu dha.+
Waaqni koo, qarsaa koo+ isan kooluu itti galu dha;Inni gaachana koo, gaanfa* fayyinaa koo* fi iddoo amansiisaa ani kooluu itti galu* dha.+
3 Yihowaa isa jajamuun isaaf malu nan waammadha,Diinota koo jalaas nan oola.+
4 Wadaroon duʼaa natti marame,+Lolaan namoonni gatii hin qabne gadhiisanis na naasise.+
5 Wadaroon Awwaalaa* natti marame,Kiyyoon duʼaas na dura dhaabbate.+
6 Yeroo dhiphina kootti Yihowaa nan waammadhe,Gargaarsa argachuufis irra deddeebiʼee gara Waaqa kootti nan iyyadhe.
Innis mana qulqullummaa isaa keessa taʼee sagalee koo dhagaʼe,+Iyyi ani gargaarsa argachuuf dhageessises gurra isaa ni gaʼe.+
7 Achiis lafti raafamuu fi hurgufamuu jalqabde,+Buʼuurawwan gaarotaas ni hollatan,Inni waan dheekkameef isaan asii fi achi raafaman.+
8 Funyaan isaa keessaa aarri ni baʼe,Ibiddi nyaatu afaan isaa keessaa ni baʼe;+Barbadaanis* isa keessaa burqe.
9 Inni yommuu gad buʼu samiin akka gad jedhu godhe,+Duumessi gurraachis miila isaa jala ture.+
10 Inni kiruubel irra taaʼee barrisaa dhufe.+
Qoochoowwan uumama hafuuraa* irra taaʼees saffisaan gad buʼe.+
11 Achiis dukkanaan of golge,+Naannoo isaas akkuma dunkaanaatti,Bishaan gurraachii fi duumessi cimaan jira ture.+
12 Ifa isa dura jiru keessaaCabbiinii fi barbadaan ibiddaa duumessa uranii baʼan.
13 Achiis Yihowaan samii keessaa kakawweessaʼuu jalqabe;+Inni Hundaa Oliis cabbii guguddaa fi barbadaadhaanSagaleen isaa akka dhagaʼamu godhe.+
14 Xiyya isaa darbatee isaan bittinneesse;+Bakakkaa isaa buusees isaan burjaajesse.+
15 Yaa Yihowaa, dheekkamsa keetiin, hafuura cimaa funyaan kee keessaa baʼuunis,+Hundeen lageenii* ni mulʼate;+Buʼuurawwan lafaas ni saaxilaman.
16 Bakka ol kaʼaa irraa harka isaa diriirse;Inni na qabee bishaanota gad fagoo keessaa harkisee na baase.+
17 Diina koo isa cimaa jalaa,Namoota na jibban, warra na caalaa ciccimoo taʼan jalaas na oolche.+
18 Isaan guyyaa rakkina kootti natti dhufan,+Yihowaan garuu na gargaare.
19 Inni gara bakka balaa irraa walaba* taʼeetti na geesse;Waan natti gammadeefis na oolche.+
20 Yihowaan akka qajeelummaa kootti na kiisa;+Akka qulqullummaa harka koottis naaf deebisa.+
21 Ani daandiiwwan Yihowaa eegeera,Waaqa koo dhiisuudhaanis hammina hin raawwanne.
22 Murtiiwwan isaa hundi fuula koo dura jiru;Dambiiwwan isaa hin tuffadhu.
23 Isa duratti balleessaa malee nan jiraadha,+Dogoggora irraas of nan eega.+
24 Yihowaan akka qajeelummaa kootti,Akkuma harki koo isa duratti qulqulluu taʼettis naaf haa deebisu.+
25 Nama amanamaa taʼeef amanamaa ni taata,+Nama balleessaa hin qabneefis balleessaa kan hin qabne taʼuu kee ni argisiista;+
26 Nama qulqulluudhaaf qulqulluu ni taata,+Isa jalʼaatti garuu gamna taʼuu kee ni argisiista.+
27 Ati warra rakkatan ni oolchita,+Warra of tuulan* garuu ni salphista.+
28 Yaa Yihowaa, ibsaa koo kan ibsu,Waaqni koo inni dukkana koo ibsu siʼi.+
29 Gargaarsa keetiin tuuta weerartootaa dura dhaabbachuu nan dandaʼa;+Humna Waaqayyootiin dallaa utaaluu nan dandaʼa.+
30 Daandiin Waaqa dhugaa mudaa kan hin qabne dha;+Dubbiin Yihowaas kan qulqullaaʼe dha.+
Inni warra isatti kooluu galan hundumaatiif gaachana.+
31 Yihowaa malee Waaqni eenyu?+
Waaqa keenya malee qarsaan eenyu?+
32 Waaqni dhugaan isa jabina natti uwwisu dha,+Inni daandii koo wal naaf qixxeessa.+
33 Miila koo akka miila gadamsaa ni godha;Iddoowwan ol kaʼoo taʼan irra akkan dhaabbadhu ni godha.+
34 Harka koo waraanaaf ni leenjisa;Irreen koos iddaa sibiila diimaa dabsuu ni dandaʼa.
35 Ati gaachana fayyinaa naaf kennita,+Harki kee mirgaa na deggera,Gad of qabuun kees guddaa na godha.+
36 Daandii tarkaanfii kootii naaf balʼista;Miilli* koos hin mucucaatu.+
37 Diinota koo duukaa buʼee isaan nan dhaqqaba;Hanga isaan haxaaʼamanii badanittis biraa hin deebiʼu.
38 Akka isaan ol kaʼuu hin dandeenyetti isaan nan caccabsa;+Isaan miila koo jalatti kufu.
39 Waraanaaf jabina na hidhachiista;Diinonni koo na jalatti akka kukkufan goota.+
40 Diinonni koo ana irraa akka baqatan ni goota;*Anis warra na jibban nan balleessa.*+
41 Isaan gargaarsaaf ni iyyatu, garuu kan isaan oolchu tokko illee hin jiru;Yihowaatti illee ni iyyatu, inni garuu isaaniif hin deebisu.
42 Akka awwaara bubbeen fudhatutti tumee isaan nan bulleessa;Akka dhoqqee karaa irra jiruuttis alatti isaan nan darbadha.
43 Saba dogoggora funaanu irraa na oolchita.+
Mataa sabootaa gootee na muudda.+
Namoonni ani hin beeknes na tajaajilu.+
44 Isaan oduu dhagaʼaniin qofa anaaf ni ajajamu;Namoonni biyya ormaa hollachaa na duratti dhihaatu;+
45 Namoonni biyya ormaa ni sodaatu;*Hollachaas dahoo isaanii keessaa ni baʼu.
46 Yihowaan jiraataa dha! Qarsaan koo haa jajamu!+
Waaqni fayyisaa koo taʼe ol haa qabamu.+
47 Waaqni dhugaan anaaf haaloo ni baʼa;+Namoonnis akka anaaf bitaman ni godha.
48 Inni diinota koo warra aaran irraa na oolcha;Ati warra na miidhan gararraatti ol na kaasta;+Nama hamaa jalaas na oolchita.
49 Yaa Yihowaa, saboota gidduutti ulfina kanan siif kennu kanaafi,+Maqaa keetiifis faarfannaa galataa nan faarfadha.*+
50 Inni mootii isaatiif gochawwan fayyinaa* guguddaa ni raawwata;+Isa dibe sanatti,Daawitii fi sanyii isaatti bara baraaf+ jaalala amanamaa ni argisiisa.+
Miiljaleewwan
^ Ibsa Jechootaa ilaali.
^ Ykn., “fayyisaa koo isa humna qabeessaa.”
^ Ykn., “ol kaʼaa taʼe.”
^ Ykn., “Siʼool,” jechuunis, bakka ilmaan namootaa hundi itti awwaalaman. Ibsa Jechootaa ilaali.
^ Ykn., “Mukukkullis.”
^ Ykn., “Qoochoowwan bubbee.”
^ Ykn., “boʼoowwan bishaanii.”
^ Ykn., “iddoo balʼaa.”
^ Kal., “Ijoota of tuulan.”
^ Ykn., “Gulubiin; Koronyoon.”
^ Ykn., “Ati dugda diinota kootii naaf kennita.”
^ Kal., “callisiisa.”
^ Ykn., “ni bututu.”
^ Ykn., “muuziqaa nan qopheessa.”
^ Ykn., “injifannoowwan.”
