Zakkaariyaas 13:1-9
13 “Guyyaa sanatti cubbuu fi xuraaʼummaa irraa qulqulleessuuf mana Daawitii fi jiraattota Yerusaalemiif boolli bishaanii tokko ni qotama.+
2 Yihowaan Gooftaan Raayyaa akkana jedha: “Guyyaa sanatti ani maqaa waaqolii tolfamoo biyyattii keessaa nan balleessa,+ isaanis sana booda hin yaadataman; raajotaa fi hafuura xuraaʼummaas biyyattii keessaa haxaaʼee nan balleessa.+
3 Namni tokko ammas yoo raajii dubbate abbaan isa dhalchee fi haati isa deesse, ‘Ati maqaa Yihowaatiin soba waan dubbatteef, lubbuudhaan hin jiraattu’ isaan jedhu. Abbaan isa dhalchee fi haati isa deesse raajii dubbachuu isaatiin kan kaʼe isa ni waraanu.+
4 “Guyyaa sanatti tokkoon tokkoon raajii yommuu raajii dubbatu mulʼata isaatti ni qaanaʼa; gowwoomsuudhaafis uffata isa rifeensa irraa tolfame hin uffatu.+
5 Akkasumas inni, ‘Ani raajii miti. Ani qotee bulaa dha; namicha tokkotu ijoollummaa kootti na bitate’ jedha.
6 Namni tokko, ‘Madaan gateettii* kee gidduu jiru kun maali dha ree?’ jedhee yeroo isa gaafatu, inni, ‘Mana michoota koo* utuun jiruun madaaʼe’ jedhee deebisa.”
7 Yihowaan Gooftaan Raayyaa akkana jedha: “Yaa goraadee nana, tiksee koo irratti,+Namicha isa michuu koo taʼe irratti kaʼi.
Tiksee sana rukuti, hoolonnis haa bittinnaaʼan;+Anis warra xixinnoo taʼan irratti harka koo nan kaasa.”
8 Yihowaan akkana jedha: “Guutummaa biyyattii keessatti,Ishii keessaa harka sadii keessaa harki lama ni kutama, ni badas;*Harki inni sadaffaan immoo ishii keessatti ni hafa.
9 Harka isa sadaffaa ibidda keessa nan dabarsa;Akkuma meetiin qulqulleeffamutti isaan nan qulqulleessa,Akkuma warqiin qoramuttis isaan nan qora.+
Isaan maqaa koo ni waammatu,Anis isaaniif nan deebisa.
Ani, ‘Isaan saba koo ti’ nan jedha,+Isaan immoo, ‘Yihowaan Waaqa keenya dha’ jedhu.”
Miiljaleewwan
^ Kal., “harka.” Jechuunis, qoma irra ykn dugda irra.
^ Ykn., “warra na jaallatanii.”
^ Ykn., “ni duʼas.”
