Левиттӕй саугинтӕ ка н’ адтӕй, уонӕбӕл берӕ ихӕстӕ адтӕй. Еци ихӕстӕй еу рабарӕн ес пъӕлицӕгти кусти хӕццӕ. Дзиуиттаг финсӕг Александрийаг Филон, ци ихӕстӕ сӕбӕл адтӕй, уой туххӕй ниффинста: «[Левиттӕй] еуетӕ лӕуунцӕ, ковӕндони тургъӕмӕ ка кӕнуй, еци колдуӕртти рази. Иннетӕ ба лӕуунцӕ ковӕндони рази, цӕмӕй барӕ кӕмӕн нӕййес, уонӕй медӕмӕ маке бацӕуа – нӕдӕр зонгӕ-зонгӕй, нӕдӕр ӕнӕбари. Кадӕртӕ ба си рацо-бацо кӕнунцӕ тургъи, ковӕндони алливарс ӕма ’й кӕрӕдзей ӕййевгӕй, ӕхсӕвӕй-бонӕй гъӕуай кӕнунцӕ».

Еци гъӕуайгӕнгутӕ адтӕнцӕ дзиуиттӕгти Сӕйраг тӕрхондони дӕлбарӕ. Роми хецауадӕ дзиуиттӕгтӕй ӕрмӕстдӕр еци къуарӕн лӕвардта хуӕцӕнгарз даруни барӕ.

Библи ӕртасӕг Иоаким Иеремиас загъта: «Йесой ку ниййахӕстонцӕ, уӕд ӕй, ка ниййахӕста, уонӕн бауайдзӕф кодта, алли бон уӕ Ковӕндони ку ахур кодтон, ӕма мӕ уӕд ку нӕ ахӕстайтӕ, зӕгъгӕ (Матф. 26:55). Ӕма, ӕвӕдзи, етӕ адтӕнцӕ ковӕндонӕ гъӕуайгӕнгутӕ, ӕндӕра син уотӕ нӕ загътайдӕ». Иоакими гъудимӕ гӕсгӕ, уой размӕ Йесой ниййахӕссунмӕ ке рарвистонцӕ, етӕ дӕр ковӕндонӕ гъӕуайгӕнгутӕ адтӕнцӕ (Иоан. 7:32, 45, 46). Цӕйбӕрцӕдӕр рӕстӕги фӕсте, Сӕйраг тӕрхондони ка адтӕй, етӕ гъӕуайгӕнгути ӕма сӕ хестӕри рарвистонцӕ, цӕмӕй сӕмӕ апостолти ӕрбакодтайуонцӕ. Удта апостол Павели дӕр ковӕндонӕй, ӕвӕдзи, гъӕуайгӕнгутӕ ракодтонцӕ (Гъуд. 4:1–3; 5:17–27; 21:27–30).