Дӕ лӕварӕй, хуыздӕр куыд у, афтӕ пайда кӕн
«Кӕмӕн у йӕ бон афтӕ бакӕнын, уый афтӕ бакӕнӕд» (МАТФ. 19:12).
1, 2. а) Адӕймагӕн бинонтӕ куы нӕ уа, уымӕ Чырысти ӕмӕ Павел цы цӕстӕй кастысты, иннӕтӕ та? ӕ) Иуӕй-иутӕ уыцы хъуыддаг Хуыцауы лӕварыл цӕуылнӕ нымайынц?
ДЗЫРД дӕр ыл нӕй, бинонты цард у Хуыцауы зынаргъ лӕвар (Ӕмб. 19:14). Фӕлӕ бинонтӕ кӕмӕн нӕй, уыцы чырыстӕттӕй дӕр бирӕтӕ сты тынг амондджын ӕмӕ сӕ цардӕй райгонд. Иу ӕфсымӕрӕн, Харолд, зӕгъгӕ, цӕуы йыл 95 азы, ус никуы уыди, ӕмӕ афтӕ зӕгъы: «Кӕд иннӕтимӕ мӕ рӕстӕг арӕх ӕрвитын ӕмӕ мӕм уазджытӕ дӕр арӕх вӕййы, уӕддӕр иунӕгӕй куы вӕййын, уӕд мӕхи иунӕг никуы фӕхатын. Мӕ бон фидарӕй у зӕгъын, бинонтӕ мын кӕй нӕй, уый Хуыцауы лӕвар кӕй у».
2 Йесо Чырысти ӕмӕ апостол Павел дзырдтой, адӕймагӕн бинонтӕ куы нӕ уа, уӕд уый дӕр бинонты цардау Хуыцауы лӕвар кӕй у. (Бакӕс Матфейы 19:11, 12; 1 Коринфӕгтӕм 7:7.) Фӕлӕ бинонтӕ кӕмӕн нӕй, уыдонӕй алчидӕр йӕхӕдӕг нӕ равзӕрста ахӕм цард. Зӕгъӕм, кӕмӕндӕр зын у йӕхицӕн аккаг цардӕмбал ссарын. Чидӕр та ӕнӕнхъӕлӕджы иунӕгӕй баззад, йӕ цардӕмбалӕй кӕй ахицӕн кӕнӕ йын кӕй амард, уый тыххӕй. Уӕдӕ, адӕймагӕн бинонтӕ куы нӕ уа, уӕд уый куыд ис Хуыцауы лӕвар схонӕн? Ӕмӕ уыцы лӕварӕй куыд ис хуыздӕр пайда кӕнӕн?
Диссаджы лӕвар
3. Бинонтӕ кӕмӕн нӕй, уыцы чырыстӕттӕн цавӕр диссаджы фадӕттӕ вӕййы?
3 Бинонтӕ кӕмӕн нӕй, ахӕм адӕймагӕн вӕййы фылдӕр рӕстӕг ӕмӕ фылдӕр сӕрибардзинад (1 Кор. 7:32–35). Вӕййы йын диссаджы фадӕттӕ, цӕмӕй фылдӕр хъусын кӕна, йӕ зӕрдӕйы хъармӕй фылдӕр адӕмы рӕвдауа ӕмӕ Йегъовӕмӕ ӕввахсӕй-ӕввахсдӕр кӕна. Бирӕ чырыстӕттӕ хорз зонынц, адӕймагӕн бинонтӕ куы нӕ уа, уӕд уый цы пайда ӕрхӕссы. Ӕмӕ сфӕнд кодтой, уыцы хъуыддаг цасдӕр рӕстӕгмӕ аргъӕвын. Чидӕртӕ та кӕд нӕ хъавыдысты иунӕгӕй цӕрын, фӕлӕ сӕ уавӕртӕ куы фӕивтой, уӕд сӕ цардыл дзӕбӕх ахъуыды кодтой ӕмӕ загътой, Йегъовӕйы фӕрцы уыдонӕн дӕр сӕ бон кӕй суыдзӕни ӕнӕ цардӕмбалӕй цӕрын. Ӕмӕ сӕ нал бафӕндыд сӕ царды исты фӕивын (1 Кор. 7:37, 38).
4. Бинонтӕ кӕмӕн нӕй, уыцы чырыстӕттӕн сӕ бон цӕмӕн у Хуыцауӕн ӕппӕт зӕрдӕйӕ лӕггад кӕнын?
4 Цардӕмбал кӕмӕн нӕй, уыцы чырыстӕттӕ зонынц, цӕмӕй сын ӕмбырды ӕмӕ Йегъовӕйы цӕсты дӕр кад уа, уый тыххӕй сӕ ӕнӕмӕнг бинонтӕ скӕнын кӕй нӕ хъӕуы. Хуыцау махӕй алкӕй дӕр уарзы (Матф. 10:29–31). Мах Хуыцауы уарзтӕй ничи ӕмӕ ницы фӕхицӕн кӕндзӕн (Ром. 8:38, 39). Уӕдӕ нын бинонтӕ ис ӕви нӕ, уӕддӕр нӕ бон у Хуыцауӕн ӕппӕт зӕрдӕйӕ лӕггад кӕнын.
5. Цы хъӕуы аразын, цӕмӕй нӕ лӕварӕй, хуыздӕр куыд у, афтӕ пайда кӕнӕм?
5 Фӕлӕ бинонтӕ кӕмӕн нӕй, уыцы адӕймаг хъуамӕ йӕ рӕстӕгӕй, хуыздӕр куыд у, афтӕ пайда кӕна. Уӕдӕ ӕнӕ цардӕмбалӕй чи цӕры, уыцы чырыстонӕн – ӕфсымӕр уа ӕви хо, ӕрыгон ӕви ацӕргӕ, йӕхӕдӕг равзӕрста ахӕм цард ӕви нӕ – йӕ бон цы у аразын, цӕмӕй йӕ лӕварӕй, хуыздӕр куыд у, афтӕ пайда кӕна? Ӕркӕсӕм фыццаг ӕнусы чырыстӕтты хабӕрттӕм ӕмӕ ахъуыды кӕнӕм, нӕхицӕн дзы зондӕн цы райсӕм, ууыл.
Ӕрыгонӕй
6, 7. а) Филиппы чызджытӕ цавӕр лӕварӕй уыдысты хайджын? ӕ) Тимофей йӕ лӕварӕй хорз куыд пайда кодта ӕмӕ уый тыххӕй арфӕгонд куыд ӕрцыд?
6 Хорз хабар хъусынгӕнӕг Филиппӕн уыди цыппар ӕнӕцыд чызджы. Уыдон дӕр сӕ фыдау хорз хабар зынгзӕрдӕйӕ хъусын кодтой (Хъуыд. 21:8, 9). Пехуымпариуӕг кӕнын нымад уыд Хуыцауы сыгъдӕг тыхы диссаджы лӕварыл. Ӕмӕ Филиппы чызджытӕ дӕр хайджын уыдысты уыцы лӕварӕй, ӕмӕ афтӕмӕй ӕххӕст кодтой Иоилы 2:28, 29 фыст ныхӕстӕ.
7 Тимофей уыди ӕрыгон лӕппу ӕмӕ йын бинонтӕ кӕй нӕ уыд, уымӕ гӕсгӕ йӕ лӕварӕй хорз пайда кодта. Йӕ гыццылӕй фӕстӕмӕ йӕ йӕ мад Евникӕ ӕмӕ йӕ мадымад Лоидӕ «сыгъдӕг Фыстытыл» ахуыр кодтой (2 Тим. 1:5; 3:14, 15). Фӕлӕ, ӕвӕццӕгӕн, чырыстӕттӕ систы н. э. 47 азмӕ хӕстӕг, Павел горӕт Листрӕйы фыццаг хатт куы уыд, уӕд. Дыууӕ азы фӕстӕ, Павел дыккаг хатт Листрӕмӕ куы ӕрцыд, уӕд Тимофейыл, ӕвӕццӕгӕн, иу-20 азы бӕрц цыд. Ӕмӕ кӕд ӕрыгон уыд ӕмӕ рӕстдзинады фӕндагыл ӕрӕджы ӕрлӕууыд, уӕддӕр дзы Листрӕйы ӕмӕ Иконийы хистӕр нӕлгоймӕгтӕ «тынг ӕппӕлыдысты» (Хъуыд. 16:1, 2). Ӕмӕ йӕ Павел йемӕ ракодта, цӕмӕй йын ӕххуыс кодтаид (1 Тим. 1:18; 4:14). Тимофейӕн бинойнаг уыд ӕви нӕ, уый нӕ зонӕм. Фӕлӕ йӕ Павел куы фӕхуыдта, уӕд ӕхсызгонӕй йемӕ ацыд, ӕмӕ бирӕ азты дӕргъы ӕнӕ усӕй миссионерӕй ӕмӕ цӕстдарӕгӕй фӕлӕггад кодта (Фил. 2:20–22).
8. Иоанн Марк йӕ разы хорз нысӕнттӕ цӕй фӕрцы ӕвӕрдта ӕмӕ уый тыххӕй цавӕр арфӕдзинӕдтӕй уыд хайджын?
8 Иоанн Марк дӕр ӕрыгонӕй йӕ лӕварӕй раст пайда кодта. Марк, йӕ мад Марийӕ ӕмӕ йе ’мхӕрӕфырт Варнавӕ уыдысты, Иерусалимы ӕмбырдмӕ фыццаг чи райдыдта цӕуын, уыдонӕй. Марчы бинонтӕ, ӕвӕццӕгӕн, хъӕздыг уыдысты, уымӕн ӕмӕ сын горӕты уыд хӕдзар, стӕй ма сын уыди лӕггадгӕнӕг дӕр (Хъуыд. 12:12, 13). Фӕлӕ кӕд Марк хъӕздыг уыди, уӕддӕр хиуарзон адӕймаг нӕ уыд, стӕй нӕ архайдта, йӕ рӕстӕг йӕ удыдзӕбӕхӕн куыд арвыстаид, ууыл. Апостолтимӕ-иу арӕх кӕй уыд, уымӕ гӕсгӕ йӕ бафӕндыд миссионерӕй лӕггад кӕнын. Гъемӕ Павел ӕмӕ Варнавӕ уацамындон балцы куы цыдысты, уӕд Марк дӕр семӕ ацыд ӕмӕ сын зӕрдиагӕй ӕххуыс кодта (Хъуыд. 13:5). Фӕстӕдӕр та Варнавӕимӕ иумӕ цыдысты балцы ӕмӕ хъусын кодтой. Уый фӕстӕ та Петримӕ лӕггад кодта Вавилоны (Хъуыд. 15:39; 1 Пет. 5:13). Бӕрӕг нӕу, Марк бинонты хъуыддаг кӕдмӕ нӕ бакодта, уый. Фӕлӕ иууылдӕр зыдтой, иннӕтӕн ӕмӕ Хуыцауӕн лӕггад кӕнгӕйӕ йӕхиуыл кӕй нӕ ауӕрста, уый.
9, 10. Ӕрыгон чырыстӕттӕн цавӕр фадӕттӕ ис фылдӕр лӕггад кӕнынӕн? Ӕрхӕсс цӕвиттон.
9 Абон дӕр ӕмбырдты бирӕ ӕрыгон чырыстӕттӕ сӕ лӕварӕй раст пайда кӕнынц – архайынц, цӕмӕй Хуыцауӕн ноджы фылдӕр лӕггад кӕной. Марк ӕмӕ Тимофейау уыдон дӕр цин кӕнынц, сӕ бон кӕй у «ӕдзухдӕр Хицауӕн лӕггад кӕнын, мацы сӕ хъыгдара, афтӕмӕй» (1 Кор. 7:35). Ӕмӕ сын уый фӕрцы бирӕ фӕндӕгтӕ сты гом. Зӕгъӕм, сӕ бон у пионерӕй лӕггад кӕнын, хъусынгӕнджытӕ кӕм нӕ фаг кӕны, уырдӕм ацӕуын, ӕндӕр ӕвзаг ахуыр кӕнын, Паддзахады залтӕ йе та филиалтӕ аразын, Лӕггад фӕхуыздӕр кӕныны скъоламӕ ацӕуын ӕмӕ Вефилы лӕггад кӕнын. Кӕд нырма ӕрыгон дӕ ӕмӕ дын бинонтӕ нӕй, уӕд цымӕ дӕ бон у дӕ рӕстӕгӕй, хуыздӕр куыд у, афтӕ пайда кӕнын?
10 Иу ӕфсымӕр, Марк, зӕгъгӕ, ӕвзонгӕй райдыдта пионерӕй лӕггад кӕнын, каст фӕци Лӕггад фӕхуыздӕр кӕныны скъола ӕмӕ фӕлӕггад кодта бирӕ бӕстӕты. Марк ӕххӕстрӕстӕг лӕггад кӕны 25 азы, ӕмӕ зӕгъы: «Архайдтон, цӕмӕй ӕмбырды алкӕмӕндӕр ӕххуыс кодтаин, семӕ уацамынды цыдаин, бӕрӕг сӕ кодтаин, уазӕгуаты сӕ хуыдтаин. Бацӕттӕ ма-иу кодтон, иннӕтӕн сӕ уырнындзинад чи бафидар кӕндзӕн, ахӕм фембӕлдтӕ. Уыцы хъуыддӕгтӕ мын иууылдӕр хастой стыр циндзинад». Марчы ныхӕстӕй куыд зыны, афтӕмӕй адӕймаг иннӕтӕн хорзы куы фӕцӕуы, уӕд ын уый ӕппӕты стырдӕр циндзинад кӕй ӕрхӕссы. Ӕмӕ йӕ хъарутӕ иууылдӕр Хуыцауы хъуыддагмӕ куы саразы, уӕд ын фӕзыны бирӕ фадӕттӕ иннӕтӕн хорзы цӕуынӕн (Хъуыд. 20:35). Ӕрыгӕттӕ цӕмӕфӕнды ма тырной, цавӕрфӕнды курдиӕттӕ сӕм ма уа ӕмӕ цасфӕнды фӕлтӕрд ма уой, уӕддӕр сӕ бон у «Хицауӕн лӕггадгӕнгӕйӕ» бирӕ аразын (1 Кор. 15:58).
11. Ӕрыгӕттӕ бинонтӕ скӕныныл куы нӕ тагъд кӕной, уӕд сын уый цы пайда ӕрхӕссы?
11 Кӕд ӕрыгӕттӕй бирӕтӕ фӕнд кӕнынц бинонтӕ скӕнын, уӕддӕр хорз уаид, куы нӕ тагъд кӕниккой. Павел фӕсивӕды разӕнгард кӕны, цӕмӕй «ӕгӕр ӕрыгонӕй», сӕ буары монцтӕ сыл куы фӕтых кӕнынц, уӕд-иу ус ма ракурой кӕнӕ чындзы ма ацӕуой (1 Кор. 7:36). Хъӕуы ма сӕ рӕстӕг, цӕмӕй бамбарой, царды сӕ цы хъӕуы, уый ӕмӕ сфӕлтӕрой, цӕмӕй сӕхицӕн аккаг цардӕмбӕлттӕ равзарой. Адӕймаг бинонтӕ иу бонмӕ не скӕны, фӕлӕ цӕрӕнбонтӕм (Еккл. 5:2–5).
Адӕймаг куы сфӕлтӕры, уӕд
12. а) Аннӕ йӕ лӕджы мӕлӕты фӕстӕ йӕ хъарутӕ цӕмӕ сарӕзта? ӕ) Цавӕр кад ӕм ӕрхауд?
12 Лукайы Евангели цы Аннӕйы кой кӕны, уымӕн йӕ лӕг куы амард, уӕд, ӕвӕццӕгӕн, тынг маст кодта. Аннӕ йӕ лӕгимӕ фӕцард ӕрмӕстдӕр авд азы. Стӕй йын сывӕллӕттӕ уыди кӕнӕ искуы хъуыды кодта, цӕмӕй ногӕй смой кодтаид, уый тыххӕй никуы ницы ис фыст. Фӕлӕ Библи куыд зӕгъы, афтӕмӕй Аннӕ 84-аздзыдӕй дӕр уыди идӕдз. Библийы Аннӕйы тыххӕй цы фыст ис, уымӕ гӕсгӕ зӕгъӕн ис, ӕмӕ йӕ лӕджы мӕлӕты фӕстӕ йӕ хъарутӕ сарӕзта, цӕмӕй Йегъовӕмӕ баввахсдӕр уыдаид. Аннӕ «ӕдзух уыд кувӕндоны – ӕхсӕвӕй-бонӕй лӕггад кодта Хуыцауӕн, ком даргӕйӕ ӕмӕ зӕрдиагӕй кувгӕйӕ» (Лук. 2:36, 37). Царды йын фыццаг бынаты уыди Хуыцау. Уымӕ гӕсгӕ йӕ хъуыди бирӕ хъарутӕ ӕмӕ тыхтӕ, ӕмӕ уый тыххӕй арфӕгонд ӕрцыд. Аннӕмӕ ӕрхауд стыр кад – федта ноггуырд Йесойы ӕмӕ иннӕтӕн хъусын кодта, тагъд Мессийӕ адӕмӕн ирвӕзындзинад кӕй ӕрхӕсдзӕн (Лук. 2:38).
13. а) Доркӕ ӕмбырды иннӕтӕн тынг кӕй лӕггад кодта, уый цӕмӕй бӕрӕг у? ӕ) Доркӕ йӕ хӕларзӕрдӕдзинады тыххӕй арфӕгонд куыд ӕрцыд?
13 Рагон горӕт Иоппийы цард иу сылгоймаг Доркӕ, хуыдтой ма йӕ Тавифӕ дӕр. Иоппи та уыди Иерусалимӕн йӕ цӕгат-ныгуылӕн фарс денджызы был. Лӕг ын уыди ӕви нӕ, уый тыххӕй Библи ницы дзуры. Доркӕйӕ «иннӕтӕ бирӕ хорздзинӕдтӕ зыдтой, стӕй тынг ӕххуыс кодта мӕгуыртӕн дӕр». Ӕвӕццӕгӕн, мӕгуыр идӕдз устытӕн ӕмӕ иннӕтӕн бирӕ дзаумӕттӕ бахуыдта, ӕмӕ йӕ уый тыххӕй тынг уарзтой. Иуафон куы ӕрбарынчын ӕмӕ куы амард, уӕд ӕгас ӕмбырд дӕр Петрмӕ арвыста, цӕмӕй ӕрбацыдаид, ӕмӕ сын сӕ зынаргъ хойы райгас кодтаид. Доркӕ кӕй райгас, уыцы хабар Иоппийыл куы айхъуыст, уӕд бирӕтӕ уырнджытӕ систы (Хъуыд. 9:36–42). Доркӕ тынг хӕларзӕрдӕ адӕймаг кӕй уыди, уымӕ гӕсгӕ дзы кӕмӕндӕрты ӕххуыс кодта.
14. Цардӕмбал кӕмӕн нӕй, уыцы чырыстӕтты цы разӕнгард кӕны, цӕмӕй Хуыцаумӕ ӕввахсдӕр кӕной?
14 Абон дӕр ӕмбырдты бирӕ ис, Аннӕ ӕмӕ Доркӕйау цардӕмбӕлттӕ кӕмӕн нӕй, ахӕм хотӕ. Кӕмӕндӕрты йӕ бон не сси аккаг цардӕмбал ссарын. Чидӕр та ахицӕн ис кӕнӕ идӕдзӕй баззад. Сӕ зӕрдӕбын ныхӕстӕ кӕмӕн зӕгъой, ахӕм адӕймӕгтӕ сын кӕй нӕй, уый тыххӕй сахуыр сты сӕ ныфс ӕгасӕй дӕр Йегъовӕйыл дарын (Ӕмб. 16:3). Иу хо, Сильвия, зӕгъгӕ, 38 азӕй фылдӕр лӕггад кӕны Вефилы, ӕмӕ уыцы хъуыддаг йӕхицӕн нымайы стыр кадыл. Сильвия афтӕ загъта: «Иннӕты фидар кӕнынӕй хатт афтӕ тынг бафӕллайын, ӕмӕ фӕзӕгъын, тӕхуды, дӕхи дӕр дын исчи куы бафидар кӕнид». Стӕй йӕ ныхасмӕ бафтыдта: «Цы мӕ хъӕуы, уый Йегъовӕ хуыздӕр кӕй зоны, ууыл ӕппындӕр нӕ дызӕрдыг кӕнын. Ӕмӕ мын уый ӕххуыс кӕны, цӕмӕй йемӕ ноджы ӕнгомдӕр уон. Ӕмӕ алы хатт дӕр мӕ зӕрдӕ фӕфидардӕр вӕййы, хаттӕй-хатт ӕнхъӕл куыд нӕ вӕййын, афтӕ». Йегъовӕмӕ ӕввахсӕй-ӕввахсдӕр куы фӕкӕнӕм, уӕд нӕ алы хатт дӕр йӕ фӕлмӕн уарзтӕй батавы ӕмӕ нӕ зӕрдӕтӕ ӕрсабыр вӕййынц.
15. Бинонтӕ кӕмӕн нӕй, уыцы чырыстӕттӕй бирӕтӕ сӕ зӕрдӕтӕ уӕрӕх куыд байгом кодтой?
15 Адӕймагӕн бинонтӕ куы нӕ вӕййы, уӕд ын фылдӕр гӕнӕнтӕ вӕййы иннӕтӕн йӕ зӕрдӕ «уӕрӕх байгом кӕнынӕн». (Бакӕс 2 Коринфӕгтӕм 6:11–13.) Иу хо Джолин 34 азы ӕххӕстрӕстӕг лӕггад кӕны, ӕмӕ афтӕ зӕгъы: «Ӕз алкӕддӕр зӕрдиагӕй архайдтон, цӕмӕй мын хорз ӕмбӕлттӕ уыдаид канд мӕхи карӕнты ’хсӕн нӕ, фӕлӕ алы кары адӕмы ’хсӕн дӕр. Цардӕмбал кӕмӕн нӕй, уымӕн фылдӕр фадат вӕййы лӕггад кӕнын Йегъовӕйӕн, йӕ бинонтӕн, йӕ хотӕн ӕмӕ йе ’фсымӕртӕн, афтӕ ма йӕ сыхӕгтӕн дӕр. Рӕстӕг куыд цӕуы, афтӕ ноджы амондджындӕр дӕн, цардӕмбал мын кӕй нӕй, уый тыххӕй». Ӕмбырды иууылдӕр – ацӕргӕтӕ, кӕстӕртӕ, рынчынтӕ, йӕ сывӕллӕтты иунӕгӕй чи хъомыл кӕны, уыдон ӕмӕ иннӕтӕ – стыр аргъ кӕнынц, бинонтӕ кӕмӕн нӕй, уыдон сын удуӕлдайӕ кӕй лӕггад кӕнынц, уымӕн. Ӕмӕ сӕ мах дӕр нӕ зӕрдӕйы хъармӕй куы рӕвдауӕм, уӕд нӕхицӕн дӕр ӕхсызгон уыдзӕн. Дӕуӕн дӕр дӕ бон у дӕ зӕрдӕ «уӕрӕх байгом кӕнын»?
Бинонтӕ скӕнын сӕ нӕ фӕнды
16. а) Йесойӕн бинонтӕ цӕуылнӕ уыди? ӕ) Павелӕн цардӕмбал кӕй нӕ уыд, уымӕй куыд пайда кодта?
16 Йесойӕн ус нӕ уыди. Хуыцау ын цы хъуыддаг бабар кодта, уымӕ йӕ хъуыди йӕхи цӕттӕ кӕнын ӕмӕ йӕ ӕххӕст кӕнын. Хъуыди йӕ бирӕ рацу-бацу кӕнын. Райсомӕй суанг ӕмбисӕхсӕвтӕм ӕнцой нӕ зыдта. Ӕмӕ ӕппынфӕстаг йӕхи нывондӕн ӕрхаста. Бинонтӕ йын кӕй нӕ уыди, уымӕ гӕсгӕ йӕ бон уыд йӕ хӕслӕвӕрд сӕххӕст кӕнын. Апостол Павел дӕр бирӕ километртӕ фӕцыди ӕмӕ бирӕ фыдӕвзарӕнты бахауд (2 Кор. 11:23–27). Ӕмӕ йын кӕд кӕддӕр ус уыди, уӕддӕр, апостол куы сси, уӕд сфӕнд кодта ӕнӕ усӕй баззайын (1 Кор. 7:7, 8; 9:5). Йесо дӕр ӕмӕ Павел дӕр иннӕты разӕнгард кодтой, цӕмӕй, йӕ бон кӕмӕн уыд, уыдон сӕ бафӕзмыдтаиккой. Фӕлӕ афтӕ никуы загътой, зӕгъгӕ, Хуыцауӕн лӕггад кӕнын кӕй фӕнды, уыдон бинонтӕ макуы скӕнӕнт (1 Тим. 4:1–3).
17. Абон бирӕтӕ Йесойы ӕмӕ Павелы куыд фӕзмынц, ӕмӕ сын Йегъовӕ куыд арфӕ кӕны?
17 Абон дӕр иуӕй-иутӕ сӕхицӕн фидарӕй загътой, бинонтӕ кӕй не скӕндзысты, цӕмӕй сӕ бон уа Хуыцауӕн фылдӕр лӕггад кӕнын. Уӕлдӕр цы Харолды кой кодтам, уый 56 азӕй фылдӕр Вефилы лӕггад кӕны, ӕмӕ афтӕ зӕгъы: «Вефилы фыццаг дӕс азы куы лӕггад кодтон, уыцы рӕстӕг бирӕ къӕйттӕ Вефилӕй ацыдысты се ’нӕниздзинады тыххӕй кӕнӕ сӕ сӕ ацӕргӕ ныййарджытӕм кӕсын кӕй хъуыди, уый тыххӕй. Мӕнӕн мӕ ныййарджытӕ раджы амардысты. Ӕз Вефил афтӕ тынг уарзтон, ӕмӕ мӕ нӕ фӕндыд ус курын, цӕмӕй уыцы кад ма фесӕфтаин». Маргарет рагӕй лӕггад кӕны пионерӕй, ӕмӕ уый дӕр афтӕ хъуыды кӕны, ӕмӕ загъта: «Дзурджытӕ мыл уыди, фӕлӕ уӕддӕр не смой кодтон. Уый фӕрцы мӕ бон у фылдӕр хъусын кӕнын, ӕмӕ мӕ цардӕй ма зӕрдӕ тынг райы». Кӕй зӕгъын ӕй хъӕуы, Йегъовӕйӕн иузӕрдионӕй чи лӕггад кӕны, уыдоны никуы ферох кӕндзӕн. (Бакӕс Исай 56:4, 5.)
Дӕ лӕварӕй, хуыздӕр куыд у, афтӕ пайда кӕн
18. Чырыстӕттӕн сӕ бон куыд у, бинонтӕ кӕмӕн нӕй, уыдонӕн кад кӕнын ӕмӕ сын ӕххуыс кӕнын?
18 Бинонтӕ кӕмӕн нӕй ӕмӕ Йегъовӕйӕн лӕггадгӕнгӕйӕ йӕ удӕй арт чи цӕгъды, уыцы чырыстӕттӕ сты раппӕлинаг ӕмӕ кады аккаг. Хорз миниуджытӕ сӕм кӕй ис ӕмӕ ӕмбырдтӕн удуӕлдайӕ кӕй ӕххуыс кӕнынц, уый тыххӕй сӕ мах тынг бирӕ уарзӕм. Мах сын «ӕфсымӕртӕ, хотӕ, мадӕлтӕ, сывӕллӕттӕ» куы суӕм, уӕд сӕхи иунӕг никуы хатдзысты. (Бакӕс Марчы 10:28–30.)
19. Дӕ лӕварӕй, хуыздӕр куыд у, афтӕ дӕ бон куыд у пайда кӕнын?
19 Кӕд дӕхицӕн аккаг цардӕмбал не ссардтай кӕнӕ дын ӕндӕр цӕйдӕр тыххӕй нӕй цардӕмбал, уӕддӕр дӕ бон у, ӕмӕ амондджын уай. Уый хорз зыны рагон ӕмӕ абоны лӕггадгӕнджыты цӕвиттонтӕй. Адӕймагӕн цардӕмбал куы нӕ вӕййы, уый абарӕн ис, тынг кӕмӕ фенхъӕлмӕ кӕсы кӕнӕ, ӕнӕнхъӕлӕджы кӕй райсы, ахӕм лӕваримӕ. Иуӕй-иу лӕвӕрттыл адӕймаг уыцы тӕккӕ бацин кӕны, иннӕтӕн та фӕстӕдӕр райдайы аргъ кӕнын. Фӕлӕ сӕм цы цӕстӕй кӕсдзыстӕм, уый нӕхицӕй кӕнгӕ у. Уӕдӕ дӕ лӕварӕй, хуыздӕр куыд у, афтӕ дӕ бон куыд у пайда кӕнын? Баввахс у Йегъовӕмӕ, зӕрдӕбынӕй йын лӕггад кӕн ӕмӕ иннӕтӕн дӕ зӕрдӕ уӕрӕх байгом кӕн. Бинонтӕ кӕмӕн нӕй, уыдонӕн дӕр сӕ цард циндзинад хӕсдзӕн, бинонтӕ кӕмӕн ис, уыдонау уыцы хъуыддагмӕ Хуыцауы цӕстӕй куы кӕсой ӕмӕ сӕ лӕварӕй раст куы пайда кӕной, уӕд.
Бахъуыды кодтай?
• Бинонтӕ кӕмӕн нӕй, уыдон уый лӕварыл цӕмӕн нымайынц?
• Бинонтӕ кӕмӕн нӕй, уыцы ӕрыгӕттӕ цавӕр арфӕдзинӕдтӕй сты хайджын?
• Бинонтӕ кӕмӕн нӕй, уыцы чырыстӕттӕн цавӕр фадӕттӕ ис Хуыцаумӕ ӕввахс кӕнынӕн ӕмӕ сӕ зӕрдӕтӕ иннӕтӕн уӕрӕх байгом кӕнынӕн?
[Фарстатӕ ахуыр кӕнынӕн]
[Нывтӕ 18 фарсыл]
Хуыцауӕн лӕггадгӕнгӕйӕ дӕ лӕварӕй, хуыздӕр куыд у, афтӕ пайда кӕныс?