Дзуттӕгтӕ-иу сӕ марды уӕлӕуыл бирӕ нӕ ныууагътой, арӕхдӕр-иу ӕй бавӕрдтой, цы бон-иу амард, уыцы бон. Афтӕ тагъд-иу ӕй цӕмӕн бавӕрдтой? Фыццаджы дӕр уымӕн, ӕмӕ Ӕввахс Скӕсӕны тӕвд кӕй у, уымӕ гӕсгӕ-иу мард уайтагъд ӕмбийын райдыдта. Дыккаджы та уымӕн, ӕмӕ уӕды заманы адӕмы хъуыдымӕ гӕсгӕ, марды уӕлӕуыл цалдӕр боны ныууадзын ууыл дзурӕг уыд, ӕмӕ, чи амард, уымӕн дӕр ӕмӕ йын йӕ бинонтӕн дӕр кӕй нӕ аргъ кодтой.

Евангелиты ӕмӕ Хъуыддӕгты чиныджы фыст ис, йӕ мӕлӕты боны-иу кӕй бавӕрдтой, цыппар ахӕм адӕймаджы хабары (Матфейы 27:57–60; Хъуыддӕгтӕ 5:5–10; 7:60–8:2). Чырыстийы заманӕй бирӕ ӕнустӕ раздӕр амард Иаковы уарзон цардӕмбал Рахил, Иаков ӕд бинонтӕ фӕндагыл куы уыд, уӕд. Иаков Рахилӕн йӕ мард йӕ бинонты уӕлмӕрдмӕ нӕ аласта, фӕлӕ йӕ «Вифлееммӕ... фӕндагыл» баныгӕдта (Райдиан 35:19, 20, 27–29).

Библийы зианы ӕгъдӕутты тыххӕй цы фыст ис, уымӕй бӕрӕг у, дзуттӕгтӕ-иу марды ныгӕнынмӕ бӕстон кӕй ӕрцӕттӕ кодтой. Бинонтӕ ӕмӕ-иу ӕмбӕлттӕ марды ныннадтой, хӕрздӕфгӕнаг кӕрдӕджытӕ ӕмӕ-иу ӕй зынаргъ сойӕ байсӕрстой ӕмӕ-иу ӕй стӕй хӕцъилты батыхтой (Иоанны 19:39, 40; Хъуыддӕгтӕ 9:36–41). Сыхӕгтӕ ӕмӕ-иу иннӕ адӕм ӕрбацыдысты, цӕмӕй-иу зианджытимӕ фӕхъыг кодтаиккой ӕмӕ-иу сын ныфсытӕ бавӕрдтаиккой (Марчы 5:38, 39).

Израилы бирӕ рӕтты уыд ӕнцонкъахӕн къӕдзӕхтӕ, ӕмӕ-иу дзуттӕгтӕй бирӕ бинонтӕ уыцы къӕдзӕхты лӕгӕттӕ кӕнӕ зӕппӕдзтӕ бакъахтой, цӕмӕй-иу дзы сӕ мӕрдты бавӕрдтаиккой. Ахӕм ӕгъдау сӕм баззад сӕ рагфыдӕлтӕй. Зӕгъӕм, Авраамы, Саррӕйы, Исахъы, Иаковы, стӕй ма кӕйдӕрты бавӕрдтой Махпелӕйы лӕгӕты Хевроны раз (Райдиан 23:19; 25:8, 9; 49:29–31; 50:13).

Чырыстийы бавӕрдтой къӕдзӕхы къахт зӕппадзы (Марчы 15:46). Ахӕм зӕппӕдзтӕн-иу сӕ бахизӕн арӕхдӕр уыд нарӕг. Мидӕгӕй та-иу къултӕ афтӕ бакъахтой, цӕмӕй-иу дзы тӕрхӕджытӕ рауадаид, ӕмӕ-иу сӕ мӕрдты уыдоныл ӕрӕвӕрдтаиккой. Йесо Чырыстийы заман дзуттӕгтӕм ахӕм ӕгъдау уыд, ӕмӕ-иу мардӕн йӕ буар куы бамбыд, уӕд-иу ын йе стджытӕ ӕрӕмбырд кодтой ӕмӕ-иу сӕ чырыны нывӕрдтой. Афтӕмӕй-иу фӕстӕдӕр бинонтӕй исчи куы амард, уӕд-иу ын йӕ мард бавӕрынӕн зӕппадзы бынат уыди.

Моисейы закъонмӕ гӕсгӕ, дзуттӕгтӕн сабаты зианы хъуыддӕгты архайӕн нӕ уыд. Чырысти амард, сабатмӕ ма ӕртӕ сахаты бӕрц куы хъуыд, уӕд. Ӕмӕ йӕ аримафейаг Иосиф кӕимӕдӕрты зӕппадзы бавӕрдта, бавӕрыны размӕ марды ӕрцӕттӕ кӕнынӕн цы хъуыд, уыдӕттӕ йын иууылдӕр не скодтой, афтӕмӕй (Лукайы 23:50–56). Уымӕ гӕсгӕ дыккаг бон цалдӕр сылгоймаджы Чырыстийы зӕппадзмӕ бацыдысты, цӕмӕй кӕронмӕ скодтаиккой, мардӕн ма цы хъуыд скӕнын, уыдӕттӕ (Марчы 16:1; Лукайы 24:1).