Маргджын газ фенӕн куыд нӕй, афтӕ фенӕн нӕй Хӕйрӕджы дӕр ӕмӕ адӕмӕн у тынг тӕссаг. Фӕлӕ нӕ Хуыцау ӕнӕ ӕххуысӕй нӕ ныууагъта, цы нын дӕтты, уыдӕттӕй куы пайда кӕнӕм, уӕд нӕ Хӕйрӕгӕй тӕрсын нӕ хъӕудзӕн.

Дӕхицӕй бирӕ кӕнгӕ у. Иаковы 4:7 стихы фыст ис: «Хӕйрӕгӕн... йӕ ныхмӕ слӕуут, ӕмӕ уӕ алидздзӕн». Кӕд Хӕйрӕг тынг тыхджын у, уӕддӕр йӕ бон нӕу, цӕмӕй, дӕхи цы нӕ фӕнды, уый дын тыхӕй бакӕнын кӕна. Куыд бакӕндзынӕ, уый дӕхицӕй кӕнгӕ у. 1 Петры 5:9 стихы кӕсӕм: «[Хӕйрӕджы] ныхмӕ фӕлӕуут, уырнындзинады фидар ут, афтӕмӕй». Рох дӕ ма уӕд, Чырысти ӕртӕ фӕлварӕны Хӕйрӕджы ныхмӕ фидар куы фӕлӕууыд, уӕд ӕй Хӕйрӕг иу ран ныууагъта (Матфейы 4:11). Уӕдӕ дӕуӕн дӕр дӕхицӕй кӕнгӕ у, Хӕйрӕджы ныхмӕ фӕлӕудзынӕ ӕви нӕ.

Хӕлардзинад Хуыцауимӕ. Иаковы 4:8 стихы фыст ис, «баввахс ут Хуыцаумӕ», зӕгъгӕ. Йегъовӕ сӕрмагондӕй дӕуӕн дзуры, цӕмӕй йе ’ввахс ӕмбал суай. Уый тыххӕй дӕ цы саразын хъӕуы? Ӕппӕты фыццаг, Библи ахуыр кӕнын райдай, ӕмӕ афтӕмӕй Хуыцауы хуыздӕр базон (Иоанны 17:3). Йегъовӕ цавӕр Хуыцау у, уый куы базонай, уӕд ӕй ӕнӕмӕнгӕй бауарздзынӕ, ӕмӕ йӕ куы бауарзай, уӕд та дӕ бафӕнддзӕн йӕ фӕндон ӕххӕст кӕнын (1 Иоанны 5:3). Ӕмӕ ды дӕ уӕларвон Фыдмӕ куы баввахсдӕр уай, уӕд уый та? Иаков дарддӕр фыссы: «Ӕмӕ уӕм [Хуыцау] дӕр ӕрбаввахс уыдзӕн».

Хъахъхъӕндзӕн нӕ. Ӕмбисӕндтӕ 18:10 стихы кӕсӕм: «Йегъовӕйы ном у фидар мӕсыг. Рӕстгӕнӕг уырдӕм балидзы ӕмӕ йын тӕссаг ницӕмӕйуал вӕййы». Кӕй зӕгъын ӕй хъӕуы, уый ууыл дзурӕг нӕу, ӕмӕ Хуыцауы ном, фыдбылызӕй чи хъахъхъӕны, ахӕм талисманы хуызӕн у. Уый нӕ, фӕлӕ Хуыцауы номӕн ӕцӕгдӕр чи аргъ кӕны, уыдонӕн дзы сӕ бон у ӕххуыс кӕдфӕнды дӕр курын.

Цӕвиттон. Ефесы цӕрджытӕй чырыстон дин чи райста, уыдоны тыххӕй Хъуыддӕгтӕ 19:19  стихы фыст ис иу цымыдисаг хабар: «Кӕлӕнгӕнджытӕй та бирӕтӕ сӕ чингуытӕ ӕрӕмбырд кодтой ӕмӕ сӕ се ’ппӕты раз басыгътой. Сӕ аргъ сын куы банымадтой, уӕд рауад фӕндзай мин ӕвзист ӕхцайы» *. Уыцы чырыстӕттӕ сӕ къух систой, спиритизмимӕ цыдӕриддӕр баст уыд, уыдӕттыл, кӕд тынг зынаргъ уыдысты, уӕддӕр. Уыцы хабарӕй бирӕ цыдӕртӕ у нӕ бон базонын. Ацы дуне йедзаг у хинтӕ-кӕлӕнтӕй ӕмӕ спиритизмӕй. Спиритизмимӕ баст дзауматы ӕмӕ хъуыддӕгты ӕвзӕрӕй ӕппындӕр куы ницы уынӕм, уӕддӕр ныл уыдӕтты уылты хӕйрӕджытӕ ӕндавдзысты. Уымӕ гӕсгӕ ахсджиаг у, цӕмӕй уыдӕттӕй дӕхи хизай, цыфӕнды зынаргъ дын ма слӕууой, уӕд дӕр (Дыккаг закъон 18:10–12).

Рохелиойы, фыццаг статьяйы кӕй кой кодтам, уыцы нӕлгоймаджы, 50 азы онг нӕ уырныдта, Хӕйрӕг кӕй ис, уый. Фӕлӕ стӕй йӕ хъуыды аивта. Цӕмӕн? Рохелио загъта: «Уымӕй размӕ Библи мӕ къухы никуы уыд. Фыстадӕй цы базыдтон, уый фӕрцы мӕ бауырныдта, Хӕйрӕг кӕй ис. Ныр мӕ уыцы зонындзинӕдтӕ хъахъхъӕнынц, цӕмӕй Хӕйрӕджы зондыл ма ацӕуон».

Хӕйрӕг куы нал уыдзӕн, уыцы бон дӕ дӕхи цӕстӕй фенын нӕ фӕнды? Ахӕм фадат дын ис. Хуыцауы Ныхасы фыст ис, Хӕйрӕг, бирӕты чи сайы, уый, фидӕны «ӕппӕрст [кӕй] ӕрцӕудзӕн судзгӕ сондоны цады» (Раргомад 20:10). Кӕй зӕгъын ӕй хъӕуы, ӕнӕуи арт ӕмӕ сондон ӕнӕуынгӕ уӕларвон удгоймагӕн ницы зиан ӕрхӕсдзысты. Уымӕ гӕсгӕ сондоны цад, ӕвӕццӕгӕн, амоны, ӕнустӕм кӕй фесӕфдзӕн, уымӕ. Хӕйрӕгӕн йӕ кой ӕппындӕр никуыуал уыдзӕн. Цӕй диссаджы рӕстӕг скӕндзӕн уӕд, Хуыцауы чи уарзы, уыдонӕн!

Цалынмӕ уыцы рӕстӕг не ’рцыд, уӕдмӕ уал Йегъовӕйы ӕмӕ йӕ фӕндӕгты тыххӕй дӕ бон цыдӕриддӕр у, уый базон. Дӕ цӕстытыл-ма ауайын кӕн, дӕ бон фидарӕй зӕгъын куы уа: «Хӕйрӕг нал ис!»