Nen Enero 12, 2020, say Taal volcano ed Batangas diad Pilipinas et angibuga na dapol ya manga labin-apat kilometro so kaatagey to. Tampol ya pinasakbayan na saray autoridad iray totoo ed posiblin ‘iputok na satan ya mameligro ed bilay da.’ Ingganggan na saray autoridad ya man-evacuate so nilibon manaayam ed abay na bulkan, sakey ed saray sankaaktiboan ya bulkan ed bansa.

Natan et manga 500 ya agagi so nan-evacuate la ed ligtas iran pasen, pati diad saray Kingdom Hall tan abung na arum ya agagi. Anggapoy arisgo ed saray agagi tayo. Nambuo so Branch Committee na Disaster Relief Committee pian nitarya iray pankaukolan na saray agagin nan-evacuate.

Ipikasi tayo iray agagi tayo diad Pilipinas ya komon et tuloytuloy iran manmatalek ed si Jehova, “say salimbengan tan biskeg tayo.”​—Salmo 46:1-3.