Akasabi lad si Elias so balita: Inatey lay Arin Ahab. Naimadyin tayoy masiken lan propeta ya aaplosen toy balbas to, akanengneng ed arawi legan ton iisipen iray dinalan to ed sayan mauges ya ari diad inlabas na saray dekada. Agaylay impananos nen Elias! Sikatoy aminpigan tinaktakot ya ipapatey nen Arin Ahab tan say reyna ton si Jezebel. Dawdawit ya inatey si Elias! Anggapo labat so ginawa na ari pian pigilan so ganggan nen Jezebel ya ipapatey so amin ya propeta nen Jehova. Lapud inkasamel na sayan sanasawa, nankomplot iran ipapatey so inosenti tan matunong ya toon si Nabot, tan adamay pati ananak to. Kanian imbaki nen Jehova si Elias pian ipasabi so mensahe na panangukom To ed si Ahab tan ed interon pamilya to. Natan, tinmua so salita na Dios. Inatey si Ahab ed paraan ya imbaga nen Jehova.—1 Arari 18:4; 21:1-26; 22:37, 38; 2 Arari 9:26.

Balet, amta nen Elias ya kaukolan to nin siansia so mansungdo. Mabilay ni Jezebel tan maksil ni impluensya tod pamilya to tan ed interon bansa. Dakel ni subok ya dalanen nen Elias, tan kaukolan to met ya ibangat so kaiba to, si Eliseo, say propetan onsublay ed sikato. Amtaen tayo sirin so talora ed saray sampot ya asainmin nen Elias. Legan tayon nenengnengen no panon ya akatulong so pananisia to pian makapansungdo, mas natalosan tayo met no panon tayon pabiskegen so mismon pananisia tayo diad sayan mairap a panaon.

Si Ahazias ya anak nen Ahab tan Jezebel so sinmublay ya ari ed Israel. Imbes ya akaaral komon ed lingo na atateng to, inalig toy mauges ya kagagawa ra. (1 Arari 22:52) Nandayew met ed dios ya si Baal. Say Baalismo et sakey a relihyon nensaman ya pakiwasen to ray totoo ya manggawa na kaugsan, singa say prostitusyon ed templo tan pangibagat ni ingen ed saray ugugaw. Wala kasi so makakombinse ed si Ahazias ya umanen so kagagawa to tan idaulo to ray sakop to ya taynan da lay mauges ya kagagawa ra?

Biglan arisgo iyan malastog ya ugaw nin ari​—naplag ed sinakoban ya abot diad tagey a kuarto to. Anggaman dawdawit ya inatey, agto nin siansia pinmawil ed si Jehova. Imbes, angibaki na mensahero ya onlad Ekron ed Filistia, say kalaban dan syudad, pian onkonsulta ed dios ya si Baal-zebub no kasin onabig ni. Ag-iya agustoan nen Jehova. Imbaki toy sakey ya anghel pian ibagad si Elias ya amperen iray mensahero na ari. Pinapawil ira nen Elias ed ari pian ibaga so ambelat ya mensahe. Alabas so kasalanan nen Ahazias ta impasen ton singa anggapoy Dios na Israel. Impaamta nen Jehova ya aglan balot makaalis ed dukolan si Ahazias.​—2 Arari 1:2-4.

Agnin siansia nagbabawi si Ahazias, intepet to: “Antoy itsura to may lakin angabet ed sikayo tan angibagad satan?” Indeskribe na saray mensahero so simplin kawes na propeta, tan imbagan tampol nen Ahazias: “Si Elias a Tisbita man.” (2 Arari 1:7, 8) Naaralan tayo ya simpli labat so bilay nen Elias tan akapokus ed panaglingkor ed Dios, kanian main-inomay ya abidbir anggan diad impandeskribe labat ed kawes to. Arawi itan ed kabibilay nen Ahazias tan na atateng to, ya masyadon materyalistiko. Ipapanonot ed sikatayo na alimbawa nen Elias so bilin nen Jesus ya pansiansiaen ya simpli so bilay tayo, ya ipokus iray mata tayo ed saray talagan importante.—Mateo 6:22-24.

Lapud labay nen Ahazias so ombawi, angibaki na 50 sundalo a kaibay pangulo ra pian ipaerel si Elias. Nen aromog day Elias ya “manyudyurong ed toktok na palandey,” * matangas ya ingganggan na pangulo na saray sundalo si Elias ya ‘onlasur’​—nayarin pian awiten tan pateyen da. Imadyin yo pa! Anta amta da lan si Elias et “too na tuan Dios,” siansian inisip da ya ayos labat ya taktakoten da. Alingolingo ra! Imbaga nen Elias ed samay pangulo: “No sakey ak a too na Dios, ompelag komon manlapud tawen so apoy a mangupot ed sika tan say 50 sundalom.” Insan walay ginawa na Dios! “Pinmelag so apoy manlapud tawen ya angupot ed sikato tan say 50 sundalo to.” (2 Arari 1:9, 10) Mapuersan panonot so impatey na sarayan sundalo ya ag-ibabaliwala nen Jehova no memelmelagen odino agrerespetoen na totoo iray lingkor to.—1 Awaran 16:21, 22.

Angibaki lamet si Ahazias na sananey nin pangulo ya kaibay 50 sundalo. Mas paweg yay komadua nen samay unaan. Akaaral la komon ed impatey na saramay 51 ya lalaki ta posiblin anengneng to ni dapol na saraman ya sundalo diad saman a palandey. Aglabat inulit na sayan pangulo so ginawa na unonan pangulo ya palasuren si Elias, imbaga to nin “apuram”! Atapis yan pangulo! Kanian inatey met pati amin ya kaiba to, ya singa agawa ed samay akaunan grupo. Balet mas atapis so ari ta ag-aderya! Angibaki lamet na komatlon grupo na sundalo. Maong labat ta marunong so pangulo na komatlon grupo na sundalo. Mapaabeban inmasingger ed si Elias tan akikasin agkomon ompatey pati saray sundalo to. Lapud si Elias et too na Dios, inalig toy panangasi nen Jehova kanian dinengel to iyan mapaabeban pangulo. Ingganggan na anghel nen Jehova si Elias ya mila ed saraman ya sundalo. Inmunor si Elias tan inulit toy mensahe na panangukom nen Jehova ed sayan mauges ya ari. Tinmua so imbaga na Dios, inatey si Ahazias tan duaran taon labat kalamor so impanuley to.—2 Arari 1:11-17.

Akin et asarag nen Elias so mansungdo anta benger tan rebelde iray totoo? Makaaral tayo ed saya. Asalim lay sinmyodot lapud agdinengel na toon imamalasakit mo so maar-aron panonot mo, tan intuloy to nin siansia so makapuy ya gagawaen to? Panon mon nasungdoan so ontan ey? Makaaral tayo ed abitlan lugar ya kawalaan nen Elias nen sikatoy aromog na saray sundalo—diad “toktok na palandey.” Agtayo segurado no anton talagay gagawaen nen Elias diman, balet amta tayon sikatoy mapikasin too kanian seguradon wadman ed saman ya pasen pian makapanpikasi tan mas lalon onapit ed inar-aro ton Dios. (Santiago 5:16-18) Ontan met, makatulong so pambukbukor pian nawalaan tayoy panaon ya mitongtong ed Dios, ya tawagen tayod ngaran to tan ibaga iray problema tan pakakaaburidoan tayo. Ontulong iya pian nasarag tayoy mansungdo anggano makapuy so gagawaen na totoo ed paliber tayo.

Asabi lay panaon pian iter nen Elias so kimey to ed arum. Imanoen no antoy ginawa to. Legan ya paalis la ra nen Eliseo ed Gilgal, binagaan nen Elias si Eliseo ya ontilak la, ta onlay Elias ed Bethel, ya manga 11 kilometro so kaarawi to. Balet mapekder so ebat nen Eliseo: “Unong a mabilay si Jehova tan unong a mabilay ka, agak onsian ed sika.” Kasabi dan dua ed Bethel, imbaga lamet nen Elias ya sikatoy onlan bukor paarap ed Jerico, manga 22 a kilometro so kaarawi to. Onman lamet so inyebat nen Eliseo ed si Elias. Diad komatlon pankanawnawa, diad Jerico, onman la lamet so agawa antis iran inmarap ed Ilog Jordan ya manga 8 kilometro so kaarawi to. Tan mapekder nin siansia so imbaga nen Eliseo ya agto taynan si Elias!—2 Arari 2:1-6.

Balibali so impanengneng nen Elias ya kualidad​—say matoor ya panangaro. Saya may klase na panangaro ya impanengneng nen Ruth ed si Noemi​—say klase na aro ya malmalet tan ag-oniikban. (Ruth 1:15, 16) Kakkaukolan na amin ya lingkor na Dios iyan kualidad, lalo la natan. Kasin nalilikna tayon importantin maong iya, a singa alikna nen Eliseo?

Seguradon apaseseg ya maong si Elias ed matoor a panangaro na sayan kaiba to. Kanian awalaan na pribilehyo si Eliseo ya nanengneng so sampot ya milagro nen Elias. Diad gilig na Ilog Jordan, inusar nen Elias so kawes to pian paspasen so maples ya agus tan aralem a danum na ilog. Insan biglan apaldua so danum! Manbabantay met ed sayan milagro so “50 ed saray ananak na propeta,” a mapatnag ya kabiangan na ondarakel a bilang na lalaki ya ipapasal pian mangidaulo ed dugan panagdayew diad interon nasyon. (2 Arari 2:7, 8) Mapatnag ya si Elias so angidaulo ed sayan panagpasal. Wala may panaon ya pakalikna nen Elias et sikato labat lay akeran matoor diad interon nasyon. Manlapu lad saman, benendisyonan nen Jehova so impansungdo nen Elias, tan anengneng ton mismo so inyaligwas na panagdayew ed si Jehova.​—1 Arari 19:10.

Kayari imbaliw dad Jordan, imbaga nen Elias ed si Eliseo: “Ibagam no antoy labay mon gawaen ko parad sika antis ak ya alaen ed sika.” Amta nen Elias ya kaukolan to lay manpatanir. Ag-asakitan o nanimon si Elias ya onla so pribilehyo tan kagalangan ed mas ugaw ya kaaro to. Imbes, maar-aro ton tinulongan si Eliseo. Oniay alenleneg ya kerew nen Eliseo: “Komon ta naawat koy mamiduan kabiangan na espiritum.” (2 Arari 2:9) Agto labay ya ibagan labay toy nawalaan na doblin karakel na masanton espiritu ya walad si Elias. Imbes, say kekerewen to et singa tawir na saray panguloan ya anak a laki, ya makakaawat na sankabalegan, o mamiduan tawir pian nagawaan day balon responsabilidad da bilang ulo na pamilya. (Deuteronomio 21:17) Bilang propeta ya onsublay ed si Elias, atalosan nen Eliseo ya kaukolan toy nawalaan na pakpel ya singa si Elias pian nasumpal toy asainmin to.

Mapaabeban impalima nen Elias ed si Jehova so ebat ed kerew nen Eliseo. No onabuloy si Jehova ya nanengneng nen Eliseo si Elias ya laen o awiten na Dios, labay ton ibaga et ‘On’ so ebat ed kerew nen Eliseo. Ag-abayag, nen manaakar irayan sankaaro “legan iran mantotongtong,” walay makapakelaw ya agawa!​—2 Arari 2:​10, 11.

Biglan walay maliwawan bengatla ya manasingger lan manasingger ed sikara. Naimadyin tayoy manungol, manbanesbes, tan makmaksil ya dagem legan ya onaarap itan ed sikaran dua. Tan lapud satan et akapansian ira tan ompan apaatras ni ra lapud pankelkelaw da. Sayan anengneng da et karwahe ya mandarlang! Amta nen Elias ya asabi lay panaon. Kasin linmugan ed satan ya karwahe? Anggapoy ibabaga na Biblia. Balet alikna ton sikatoy iyaatagey tan isesegep panamegley na maksil a dagem!

Agmakapanisia si Eliseo! Lapud anengneng ton mismo iyan makapakelaw ya agawa, naebatan so kerew ton sikatoy ikdan nen Jehova na “mamiduan kabiangan” na inkakpel nen Elias. Pero agto ni naisip itan ta naermenan met ed agawa. Agto amta no iner so nakar na matatken lan kaaro to, ompan naisip to met ya agto la napinengnengan si Elias. Manak-akis ton inyeyag: “Ama, ama! Say karwahe na Israel tan saray de-kabayoan a sundalo to!” Anengneng ton naandipat lay maaron managbangat to; insan pinilat toy kawes to lapud ermen.​—2 Arari 2:12.

Legan ya iyaatagey si Elias, kasin sankarengel toy panakis na kaaro to tan ompan akaakis met? Agtayo nibaga, pero seguradon akatulong iyan kaaro to pian nasungdoan to ray mairap ya situasyon. Makaaral tayod alimbawa nen Elias ya say nepeg tayon pikaaroan et saramay totoon inaro day Dios tan gagawaen day panlabayan to.

Iner so nakar nen Elias? Ibabangat na arum ya relihyon ya sikatoy inawit ed tawen pian nakaiba na Dios. Pero imposible itan. Kayari nilasus a taon, imbaga nen Jesu-Kristo ya anggapoy toon sinmegep ed tawen antis na insegep to. (Juan 3:​13) Kanian no nabasa tayon “si Elias et sinmegep ed tawen diad panamegley na maksil a dagem,” nitepet tayo, Anton tawen sirin ey? (2 Arari 2:​11) Diad Biblia, say “tawen” et aglabat ontutukoy ed lugar ya kawalaan nen Jehova, noagta, ontutukoy met ed atmospera ya kawalaan na saray lurem ya titikyaban na saray manok. (Salmo 147:8) Diad satan ya tawen so sinegepan nen Elias. Antoy sinmublay ya agawa?

Inikdan nen Jehova iyan propeta na balon asainmin​—diad panarian na Juda. Ipapanengneng na Biblia ya nanlingkor ditan si Elias bilang propeta, nayarin diad masulok ya pitoran taon. Diad saman, say manuuley ed Juda et say mauges ya Arin Jehoram. Inasawa to so anak nen Ahab tan Jezebel kanian mauges nin siansia so nagagawa ed Juda. Ingganggan nen Jehova si Elias ya mansulat pian iyabawag so panangukom ed si Jehoram. Asumpal may propesiya ya aliwliway ipatey nen Jehoram. Say mas aliwliwa ni, ibabaga na salaysay ya: “Anggapoy nanermen sanen inatey.”​—2 Awaran 21:12-20.

Arawin dalin si Elias ed saman ya mauges a too! Agtayo amta no panon o kapigan inatey si Elias. Pero segurado tayon aliwan onman ed si Jehoram so impatey to ya anggapo labat kalamor so nanermen. Il-iliwen nen Eliseo so kaaro to, tan seguradon ontan met so alikna na arum nin matoor ya propeta. Manga 1,000 taon lay linmabas, siansia ya papablien nen Jehova si Elias ta inusar to iyan inar-aro ton propeta diad sakey ya pasingawey. (Mateo 17:​1-9) Kasin labay mon aligen si Elias ya nawalaay pananisia tan nasarag ya sungdoan iray mairap ya situasyon? Agmon balot sirin lilingwanan so mikaaro ed saray totoon mangaaro ed Dios, manpokus ed panaglingkor ed si Jehova, tan lanang a manpikasi ya manlapud puso. Komon ta itultuloy mo met so mansungdo tan pansiansiam so maapit ya relasyon mod si Jehova anggad angga!