Say panamerdona et kabaliksan toy palampasen na sakey so kasalanan na arum. Diad Biblia, say Griegon salitan nipatalos ya “panamerdona” et literal ya mankabaliksan na “paulyanan la,” a singa say agla pansingil ed utang. Inusar nen Jesus iyan panagkompara nen imbangat to ray patumbok to ya manpikasi: “Perdonam iray kasalanan mi, ta peperdonaen mi met so amin ya akautang ed sikami.” (Lucas 11:4, paimanod leksab) Ontan met, nen inistorya toy nipaakar ed anggapoy panangasin aripen, impanengneng to a say panamerdona et singa say gagawaen na sakey ya agto la pabayaran so utang.​—Mateo 18:23-​35.

 Peperdonaen tayoy arum no agtayo la manem-em na sakit na linawa tan agtayo la onkerew na antokaman a bayar ed agawad sikatayo odino sakit ya alikna tayo. Ibabangat na Biblia a say aro so basiyan na tuan panamerdona, ta “ag-itan manbibilang na impakasakitan.”​—1 Corinto 13:​4, 5.

No antoy agkabaliksan na panamerdona

•   Konsintien so kasalanan. Kokondenaen na Biblia iramay mangibabagan aliwan mauges so panggaway makapuy.​—Isaias 5:​20.

•   Isipen ya singa anggapoy agawa. Pinerdona na Dios iray ambelat a kasalanan nen Arin David, balet inabuloyan ton anien nen David iray resulta na ginawa to. Impaisulat ni ingen na Dios ed Biblia iray kasalanan nen David pian nanonotan tayo natan.​—2 Samuel 12:​9-​13.

•   Abuloyan ya agrabiadoen ka na arum. Singa bilang, walay pinautang moy kuarta, balet pinerdi to itan tan agla makabayar ed sika. Agaylay pagbabawi to tan kinmerew na perdona ed sika. Sarag mon perdonaen, ya agka la manem-em na sakit na linawa tan agla ipanonot so ginawa to, tan nayarin agmo met la pabayaran so utang to. Nayari met ya agmo la pautangen.​—Salmo 37:21; Uliran 14:15; 22:3; Galacia 6:7.

•   Mamerdona ya anggapoy makatunongan a rason. Agpeperdonaen na Dios iray totoon gagagalaen day manggaway ambelat a kasalanan tan agda bidbiren iray ginawa ra, agmanguman, tan ag-onkerew na perdona ed saramay asakitan da. (Uliran 28:13; Gawa 26:20; Hebreos 10:26) Saratan ya agmagbabawin totoo et nagmaliw lan kalaban na Dios, tan agto kekerewen ed sikatayon perdonaen iray agto pinerdona.​—Salmo 139:21, 22.

   Panon to no walay graben ginawad sika na sakey, insan ag-onkerew na perdona tan agto ni ingen bidbiren so ginawa to? Oniay bilin na Biblia: “Tundaan mo so petang na ulo, tan ikaindan mo so sanok.” (Salmo 37:8) Anggaman agmo kokonsintien so kasalanan, sarag moy agla manpaapektod naliliknam. Ipalimam la itan ed Dios ta sikato lay akauley. (Hebreos 10:30, 31) Makatulong met no naamtaan mon insipan na Dios ya onsabi panaon, agtayo lan balot naliknay ansakisakit ya agawad sikatayo ya pakakabelatan tayo natan.​—Isaias 65:17; Apocalipsis 21:4.

•   “Pamerdona” ed kada iisipen tayon lingo na arum. No maminsan, imbes ya perdonaen tayo imay iisipen tayon akagaway aliwa ed sikatayo, ompan kaukolan tayon aminen ya anggapo met so rason ya nasakitan tayo. Ibabaga na Biblia: “Agka komon mainomay a nasakitan, ta say panem-em na sakit na linawa et walad pagew na saray makulangkulang.”​—Eclesiastes 7:9, New World Translation.

No panon mon naperdonay arum

1.   Nonoten no antoy kabaliksan na panamerdona. Agmo met kokonsintien so kasalanan odino iisipen ya singa anggapoy agawa​—papalampasen mo labat itan.

2.   Amtaen no anto ray maabig ya epekto na pamerdona. No agka la manpasnok tan manem-em na sakit na linawa, magmaliw kan kalmado, ontulong itan ed laman mo, tan mas maliket ka. (Uliran 14:30; Mateo 5:9) Balet say mas importante, no perdonaen moy arum et perdonaen ka met na Dios ed saray kasalanan mo.​—Mateo 6:​14, 15.

3.   Iyan moy sarilim ed situasyon na arum. Amin tayo et aliwan perpekto. (Santiago 3:2) No panon ya labay tayoy naperdona, nepeg tayo met ya perdonaen so arum.​—Mateo 7:12.

4.   Magmaliw ya makatunongan. Anggano walay rason tayon manreklamo, sarag tayon gawaen so ibabaga na Biblia: “Mantultuloy kayon manaanosan.”​—Colosas 3:13.

5.   Kiwas kan tampol. Gawam so anggaay nayarian mo ya mamerdonan tampol pian ag-onloor so pasnok mo.​—Efeso 4:26, 27.