Kasin Inusar na Dios so Ebolusyon Pian Mamalsa na Nanduruman Klase na Bilay?

I-PLAY

Say ebat na Biblia

Andi. Malinew ya ibabaga na Biblia ya pinalsa na Dios so totoo tan saray nanduruman “klase” na ayayep tan tanaman. a (Genesis 1:12, 21, 25, 27; Apocalipsis 4:11) Ibabaga met na satan ya say interon pamilya na too et nanlapud si Adan tan Eva, say inmunan atateng tayo. (Genesis 3:20; 4:1) Ag-susuportaan na Biblia so teorya ya mangibabagan inusar na Dios so ebolusyon nen pinalsa to iray nanduruman klase na bilay, ya no maminsan et tatawagen itan ya theistic evolution. Balet, diad tua et agkokontraen na Biblia so ibabaga na science ya wala ray pandurumaan ed kada klase na bilay. b

Kasin inusar na Dios so ebolusyon?

Say terminon “theistic evolution” et ontutukoy ed nanduruman ideya. Base ed Encyclopædia Britannica, ipapasabi na satan ya termino so ideyan “say natural selection et sakey ed saray inusar na Dios pian mamalsa na nanduruman klase na bilay.”

Kaiba met ed theistic evolution so ideyan:

Amin ya mabilay ya organismo et nanlapud parehon organismo nensaman nin maong.
Say sakey a klase na bilay et nayarin man-evolve ed duman klase na bilay, satan ya ideya et tatawagen met ya macroevolution.
Say Dios lanlamang so mangokontrol ed saratan ya proseso.

Kasin say ebolusyon et mitunosan ed saray ibabangat na Biblia?

Papapawayen na theistic evolution ya say salaysay na Biblia diad Genesis nipaakar ed impamalsa et aliwan susto tan walay kulang ed satan. Balet, tinukoy nen Jesus so salaysay na Genesis ya susto tan talagan agawa itan nensaman. (Genesis 1:26, 27; 2:18-24; Mateo 19:4-6) Ibabaga na Biblia ya antis a linmad dalin si Jesus, sikatoy nanayam ya kaiba na Dios diad tawen tan kaiba ton nankimey sanen pinalsa na Dios so “amin a bengatla.” (Juan 1:3) Kanian, say ideya ya inusar na Dios so ebolusyon pian mamalsa na nanduruman klase na bilay et agmitunosan ed saray ibabangat na Biblia.

Kasin say abilidad na saray tanaman tan ayayep ya onadapta ed kaliberliber da et alimbawa na ebolusyon?

Ag-ibabaga na Biblia no panon kalaknab so pandurumaan ed sakey a klase na bilay. Agmet kokontraen na satan so katuaan ya saray nanduruman klase na ayayep tan tanaman ya pinalsa na Dios et nayarin mamawala na pandurumaan lapud panag-breed odino lapud onaadapta ira ed balon kaliberliber. Anggaman iisipen na arum ya say ontan ya iyaadapta et sakey a nengneng na ebolusyon, anggapoy napapawala ya balon klase na bilay.

a Uusaren na Biblia so salitan “klase,” ya mas malaknab so kabaliksan to nen say salitan “species” ya uusaren na saray scientist. Kaslakan ya ibabaga na saray scientist ya walay nan-evolve ya balon species, anta diad tua et wala labat so pandurumaan ed kada klase, ya singa samay salitan inusar ed salaysay na Genesis.

b Sayan ideya et tatawagen met ya microevolution.