Kaslakan et ibabagan “Maong a Samaritano” so sakey a toon ontutulong ed saray mankaukolan. Satan ya termino et inalad istorya odino parabolo nen Jesus ya inistorya to pian ipanengneng ya say maong ya too et mapangasi ton tutulongan so arum antokaman so lahi odino kipapasen da.

Diad sayan artikulo

•  Anto so parabolo na “Maong a Samaritano”?

•  Akin et inistorya nen Jesus iyan parabolo?

•  Antoy naaralan ed sayan parabolo?

•  Siopa ray Samaritano?

•  Tua kasin agawa so istorya na “Maong a Samaritano”?

Niay antikey ya sumaryo na samay inistorya nen Jesus: Walay Judion laki ya manbiabiahe manlapud Jerusalem ya paonlad Jerico. Diad dalan, sikatoy sinabat na saray matakew, pinepekpek da, tan intilak dan patey-pateyan.

Adalanan na sakey ya Judion saserdote tan sakey nin Judion lider na relihyon iyan asugatan ya laki balet pinaliisan da. Anggano kalahi da iyan too, pareho iran agtinmunda pian tulongan imay laki.

Insan walay dinmalan ya laki ya tagad arum ya bansa. Samaritano iyan laki. (Lucas 10:33; 17:16-18) Akasian na sayan Samaritano imay laki kanian tinambal to ray sugat to. Insan to inawit imay laki ed panagpundoan. Diman to sanlabin inasikaso imay laki. Kaimbuasan to, binayaran to imay akanggaway panagpundoan pian asikasoen imay laki tan imbaga ton bayaran toy arum nin nagastos.—Lucas 10:30-35.

Inistorya iya nen Jesus ed sakey ya lakin maniisip ya saray kalahi tan karelihyon to labat so nepeg ton ituring ya kaparan too. Labay nen Jesus ya ibangat ed satan ya laki so sakey ya importantin leksion—kaukolan ton natalosan ya say ‘kapara ton too’ et aliwa labat ya saramay kapara ton Judio. (Lucas 10:36, 37) Akasulat ed Biblia iyan salaysay pian makaaral so amin ya malabay ya mamaliket ed Dios.—2 Timoteo 3:16, 17.

Naaralan ed sayan istorya ya say maong ya too et nipanengneng ton mapangasi diad saray gagawaen to. Manggaway paraan pian natulongan to so sakey ya maniirap—antokaman so kipapasen, lahi, o bansan nanlapuan to. Say maong ya too et gawaen tod arum no antoy labay ton gawaen na arum ed sikato.—Mateo 7:12.

Saray Samaritano et manaayam ed dalin ya walad bandad norte na Judea. Kaibad sikara iray ilalak ya nanlapud poli na saramay Judion angasawa na aliwan Judio.

Kasabi unonan siglo C.E., nanggawa iray Samaritano na sarili dan relihyon. Inawat day unonan limaran libro na Hebreon Kasulatan balet say arum ya libro et impulisay na maslak ed sikara.

Diad panaon nen Jesus, kabusol na dakel ya Judio iray Samaritano tan agda labay so mitongtong ed sikara. (Juan 4:9) Bibitlaen na arum ya Judio so terminon “Samaritano” bilang panag-insulto.—Juan 8:48.

Ag-ibabaga na Biblia no kasin tuan agawa so parabolo na Samaritano. Balet mabetbet ya manguusar si Jesus na saray kabkabat ya kustombre tan lugar no manbabangat pian mainomay ya natalosan na saray ondedengel so punto ya labay ton naaralan da.

Dakel ed saray detalye na istorya et susto no ikomparad history. Singa bilang:

• Say karsadan manlapud Jerusalem a paarap ed Jerico, ya masulok ya 20 kilometro so karukey to, et walay palasur to ya manga 1 kilometro. Susto so imbaga na salaysay ya saray manbiabiahen paarap ed Jerico et “onlalasur manlapud Jerusalem.”—Lucas 10:30.

• Mabetbet ya ondadalan ed sayan karsada iray saserdote tan Levita ya manaayam ed Jerico no paonla rad Jerusalem.

• Mabetbet ya wala ray matakew ya akaamot ed sayan nisulinek ya karsada ya mantatalaran na natakewan da—kaslakan et saramay bukbukor day manbiabiahe.