“Singa makapa-boring so manbasa na Biblia,” so imbaga na tinedyer ya si Will, “no agmo amta so dugan pambasa ed satan.”

 Labay mon naamtaan so sekreto pian na-enjoy moy pambasam na Biblia? Makatulong ed sika iyan artikulo.

•  Imadyin moy babasaen mo

•  Man-research!

•  No antoy ibabaga na arum ya kabataan

 Isip mo ya wadman ka ed mismon eksena ya babasaen mo. Niay sarag mon gawaen:

1.   Manpili kay salaysay ed Biblia ya labay mon aralen. Nayarin say pilien mo et sakey ya agawa ya akarekord ed Biblia odino pigaran bersikulo diad Ebanghelyo, odino manpili kad saramay salaysay ya kaibad saray dramatikon panagbasa na Biblia ya walad jw.org.

2.   Basam so salaysay. Sarag mon basaen ya bukor odino ipilam iray kakaarom o kapamilyam insan basa yon maksil. Walay sakey ya manbasa na narration tan say arum et basaen da iramay imbaga na nanduruman karakter.

3.   Salim ya gawaen iraya:

   •   I-drowing mo iramay agawa ed samay salaysay. Odino manggawa kay storyboard​—simpli labat iran drowing ya mangipanengneng no anto ray nantutumbokan ya agawa. Diad gilig et isulat moy antikey ya deskripsion no antoy nagagawa ed kada eksena.

   •   Manggawa kay diagram. Alimbawa, no say babasaen mo et tungkol ed karakter ya matoor ed Dios, isulat mo ed diagram iray ugali tan ginawa to insan mo ikonekta ed saray bendisyon ya inawat to.

   •   Gawam ya news report iray abasam ed salaysay. I-report mo ray agawa base ed nanduruman anggulo, tan kunwari et interbyuen mo iramay manunan karakter tan saray akanengneng ed agawa.

   •   No walay sakey ya karakter diad salaysay ya aliway ginawa to, isip mo no antoy resulta no duga komon so ginawa to. Alimbawa, amay salaysay ya ag-inamin nen Pedro ya kabat toy Jesus. (Marcos 14:66-​72) Anto komon so ginawa nen Pedro pian ag-ontakot ed too?

   •   No iisipen mo ya balibalin i-dramatize so sakey ya salaysay ed Biblia, manggawa kay script base ed satan! Papaway mo ed drama iray nanduruman leksion ya naaralan ed satan ya salaysay.​—Roma 15:4.

 No aralen mon maong iray detalye, nakotkot mo iray akaamot ya kayamanan ed satan ya salaysay. Diad tua, no maminsan et walay importantin naaralan mo ed anggan sakey o duara labat ya salita.

 Alimbawa, ikomparam pay Mateo 28:7 ed Marcos 16:7.

•    Akin kasi et impila nen Marcos so detalye ya si Jesus et asingger lan manpanengneng ed saray disipulo “tan ed si Pedro”?

•  Clue: Ag-anengneng ya mismo nen Marcos iyan agawa; nayarin naamtaan to iyan impormasyon ed si Pedro.

•  Say akaamot ya kayamanan: Akin et segurado ya linmemew so liknaan nen Pedro nen naamtaan ton sikatoy labay ya nanengneng lamet nen Jesus? (Marcos 14:66-​72) Panon mon nibaga ya talagan kaaro so turing nen Jesus ed si Pedro? Panon mon naalig si Jesus diad pantratom ed saray kakaarom?

 No imadyinen moy babasaen mo tan man-research ka, mas na-enjoy moy pambasam na Biblia!