Unonan Samuel 17:1-24
17 Diad saman, si Elias*+ a Tisbita a manaayam ed Gilead+ et inkuan tod si Ahab: “Unong a mabilay si Jehova a Dios na Israel a panlilingkoran ko,* diad sarayan taon et anggapoy ompelag a linaew odino uran likud labat no ibagak!”+
2 Et oniay mensahe nen Jehova ed sikato:
3 “Taynan ka dia, mamaarap kad bukig tan amot kad Lawak na Carit* a walad bukig na Jordan.
4 Inum ka ed kulos, tan iganggan ko ray wawak a suplayan da kay naakan mo ditan.”+
5 Et sikatoy inmalis a tampol tan ginawa toy imbaga nen Jehova; sikatoy linma tan nanayam diad Lawak na Carit* a walad bukig na Jordan.
6 Tan saray wawak so mangaawit ed sikato na tinapay tan karne diad kabuasan tan labi, tan diad kulos oniinum.+
7 Balet kayari pigaran agew et nakatan imay kulos+ lapud ag-inmuran ed dalin.
8 Et oniay mensahe nen Jehova ed sikato:
9 “Alagey ka, la kad Zarepat, a sakop na Sidon, tan mansiansia kad man. Iganggan ko so sakey a balon bii diman ya ikdan to kay naakan.”+
10 Kanian sikatoy inmalagey tan linmad Zarepat. Kasabi tod lolooban na syudad, walay sakey a balon bii a mantitipon na itutungo. Et inkuan tod samay bii: “Iyalaan mo ak pay daiset a danum ya inumen ko.”+
11 Sanen oonla la pian mangalay danum, inkuan nen Elias ed sikato: “Iyalaan mo ak pa met na tinapay.”
12 Diad saya et inkuan to: “Unong a mabilay si Jehova a Dios mo, anggapoy tinapay ko, say wala labat ed siak et sankaakop ya arina ed baleg a pasig tan daiset a larak ed melag a pasig.+ Natan et mantitipon ak na pigaran kiew ya itungok, insan ak la onsempet pian mangiparaan na kanen mi nen ana’ko. Kayari min mangan et ompatey kami la.”
13 Et inkuan nen Elias ed sikato: “Agka mapaga. Sempet ka tan gawam so imbagam. Balet igawaan mo ak ni na melag a tinapay ed samay wadman ya arinam, insan awit mod siak. Kayari to et makapanggawa ka met na parad sikayo nen anak mo.
14 Ta oniay inkuan nen Jehova a Dios na Israel: ‘Say baleg a pasig na arina et agnaupotan, tan say melag a pasig na larak et agnaandian anggad samay agew a mangipelag na uran si Jehova ed dalin.’”+
15 Kanian sikatoy sinmempet tan ginawa toy imbaga nen Elias, tan sikato, si Elias, tan say pamilya to, et agnaandiay naakan diad loob na dakel ya agew.+
16 Samay baleg a pasig na arina et agnaupotan, tan samay melag a pasig na larak et agnaandian, unong ya imbaga nen Jehova diad panamegley nen Elias.
17 Et kayari na saraya, samay anak a laki na biin akanggaway abung et nansakit, tan linmoor itan ya anggad inatey.+
18 Lapud saya et imbaga tod si Elias: “Antoy kasalanan kod sika,* O too na tuan Dios? Kasin linma ka dia pian ipanonot so ginawak a lingo tan pateyen so ana’ko?”+
19 Balet inkuan nen Elias ed sikato: “Andia ’tay anak mo.” Insan inala to so ugaw ed kinen ina to tan inawit tod kuarto ed tagey, dimad tutuloyan to, insan imparukol tod mismon dukolan to.+
20 Tan sikatoy tinmawag ed si Jehova: “O Jehova a Dios ko,+ pairapen mo met kasi iyan balo a piaayaman ko diad impangiyabuloy mon ompatey so anak to?”
21 Insan amitlo ton nilakap so ugaw tan tinmawag ed si Jehova: “O Jehova a Dios ko, panangasim, ipawil mo komon so bilay na sayan ugaw.”
22 Et dinengel nen Jehova so kerew nen Elias,+ kanian pinmawil so bilay* na samay ugaw tan abilay lamet.*+
23 Insan inala nen Elias so ugaw tan inyepas to manlapud tagey a kuarto tan inyakar tod si ina to; tan inkuan nen Elias: “Nengneng mo, mabilay so anak mo.”+
24 Diad ontan et inkuan na samay bii ed si Elias: “Amtak la natan a talagan sakey kan too na Dios+ tan say salita nen Jehova ya imbagam et katuaan.”
Paimanod leksab
^ Kabaliksan toy “Si Jehova so Dios Ko.”
^ Literal, “a diad arapan to et akaalagey ak.”
^ Odino “Kulos na Carit.”
^ Odino “Kulos na Carit.”
^ Odino “Antoy pibabalik ed sika, . . .?”
^ Odino “abilay.”
