Unonan Samuel 8:1-66
8 Diad saman et tinipon nen Solomon+ iray mamatatken na Israel, amin ya ulo na saray tribu tan saray pangulo na saray pamilya na kaamaan ed Israel.+ Linma rad si Arin Solomon diad Jerusalem pian itatdang so kaban na sipanan nen Jehova manlapud Syudad nen David,+ say Sion.+
2 Et nantitipon so amin a lalaki na Israel diad arapan nen Arin Solomon legan na piesta* diad bulan na Etanim,* say komapiton bulan.+
3 Kanian sinmabi so amin a mamatatken na Israel, tan say Kaban et sinakbat na saray saserdote.+
4 Intatdang day Kaban nen Jehova, say tolda a pantitiponan,+ tan amin a masanton kagawaan a walad tolda. Saray saserdote tan saray Levita so angitatdang ed saratan.
5 Si Arin Solomon tan amin ya Israelitan impatawag to a mitipon ed sikato et wala rad arapan na Kaban. Amayamay so imbagat a karnero tan baka,+ ya agnabilang ed karakel.
6 Insan inyakar na saray saserdote so kaban na sipanan nen Jehova diad pasen to,+ diad loob na sankadaleman a kuarto na abung, say Sankasantosan, diad silong na saray payak na saray kerubin.+
7 Saray payak na saray kerubin et akabuskag ed kawalaan na Kaban, kanian nasasaniban na saray kerubin so Kaban tan saray panagsakbatan na satan.+
8 Andukdukey iray panagsakbatan+ kanian say nguro na saratan et sankanengneng diman ed Masanto diad arap na sankadaleman a kuarto, balet ag-iratan nanengneng ed paway. Tan wadman iratan ya anggad sayan agew.
9 Anggapoy arum a walad Kaban noag samay duaran tapyas na bato+ ya inyan ditan nen Moises+ diad Horeb, sanen akisipanan si Jehova+ ed saray totoo na Israel nen pinmaway irad dalin na Ehipto.+
10 Sanen pinmaway iray saserdote ed masanton pasen, say abung nen Jehova et apano na lurem.+
11 Agla nituloy na saray saserdote so panlilingkor da lapud samay lurem, ta say abung nen Jehova et apano na gloria nen Jehova.+
12 Diad saman et inkuan nen Solomon: “Sikan mismo so angibaga, O Jehova, a manayam ka ed makapal a lurem.+
13 Et impaalageyan ta ka na makapadinayew ya abung, sakey ya akaletneg a pasen a panayaman mo ya anggad angga.”+
14 Insan inmarap so ari ed interon kongregasyon na Israel tan benendisyonan to ra legan iran akaalagey.+
15 Inkuan to: “Narayew komon si Jehova a Dios na Israel, samay diad mismon sangi to et angisipan ed si David ya amak, tan diad panamegley na lima to et tinoor to itan, a kuan to,
16 ‘Manlapud samay agew ya impaway koy Israel a totook ed Ehipto et agak amili na sakey a syudad diad amin a tribu na Israel a pangipaalageyan na abung a ditan mansiansia so ngaran ko,+ balet pinilik si David a manuley ed Israel a totook.’
17 Tan pirpirawat na puso nen David ya amak so mangipaalagey na abung parad ngaran nen Jehova a Dios na Israel.+
18 Balet inkuan nen Jehova ed si David ya amak, ‘Pirpirawat na pusom so mangipaalagey na abung parad ngaran ko, tan maabig a pinirawat mo itan.
19 Ingen ta aliwan sika so mangipaalagey na abung, noagta say dilin anak mo* so mangipaalagey na abung parad ngaran ko.’+
20 Et sinumpal nen Jehova imay insipan to, ta nanuley ak a kasalat nen David ya amak tan yinmurong ak ed trono na Israel, unong ya insipan nen Jehova. Tan angipaalagey ak na abung parad ngaran nen Jehova a Dios na Israel+
21 tan angigana ak ditan na pasen parad Kaban a nankargay sipanan+ ya inter nen Jehova ed saray inmuunan atateng tayo sanen impaway to ra ed dalin na Ehipto.”
22 Insan inmalagey si Solomon ed arap na altar nen Jehova diad arapan na interon kongregasyon na Israel, tan inyunat to ray lima to ed tawen,+
23 tan inkuan to: “O Jehova a Dios na Israel, anggapo so Dios a miparad sika+ diad tawen odino diad dalin, a manusumpal na sipanan tan mangipapatnag na matoor a panangaro+ ed saramay manlilingkor ed sika* diad interon puso ra.+
24 Tinoor mo imay insipan mo ed lingkor mon si David ya amak. Diad mismon sangim et angisipan ka, tan diad panamegley na limam et sinumpal mo itan ed sayan agew.+
25 Tan natan, O Jehova a Dios na Israel, toor mo komon imay insipan mod lingkor mon si David ya amak sanen inkuan mo: ‘Diad arapan ko et agbalot naandian so pamilyam na anak a laki ya onyurong ed trono na Israel, daput no imanoen na saray ananak mo so dalan da diad panakar da ed arapan ko, a singa impanakar mo ed arapan ko.’+
26 Et natan, O Dios na Israel, komon ta napanmatalkan imay insipan mo ed lingkor mon si David ya amak.
27 “Balet talaga kasin manayam so Dios diad dalin?+ Say tawen, on, say tawen na saray katawenan et agto ka nakarga;+ nagkalalo la sirin ed sayan abung ya impaalagey ko!+
28 Natan, imanom komon so pikakasi na lingkor mo tan say ikekerew toy panangasi, O Jehova a Dios ko, tan dengel moy ikekerew toy tulong tan say ipipikasi ed sika na lingkor mo natan.
29 Komon ta saray matam et akanengneng ed sayan abung diad labi tan agew, say pasen ya imbagam a, ‘Mansiansia ditan so ngaran ko,’+ pian dengelen so pikakasi na lingkor mo a manpipikasin akaarap ed sayan pasen.+
30 Tan dengel mo komon so ikekerew na panangasi na lingkor mo tan say Israel a totoom ya ipipikasi ra legan iran akaarap ed sayan pasen, tan ondengel ka komon diad pasen a panaayaman mo ed tawen;+ on, ondengel ka komon tan mamerdona ka.+
31 “Sano say sakey a too et nankasalanan ed kapara ton too, tan sikatoy impansamba* tan paebatan ed sikato itan a samba,* tan kayari ton nansamba et sikatoy onlad altar mo diad sayan abung,+
32 komon ta ondengel ka diad tawen tan onkiwas ka bilang ukom ed saray lingkor mo diad pangiyabawag mon nankasalanan* so sakey a mauges tan gawam ed sikato so unong ed ginawa to, tan diad pangiyabawag mon andiay kasalanan* so sakey a matunong tan tumangan mo so inkatunong to.+
33 “Sano say Israel a totoom et natalo na kabusol lapud naynay iran mankakasalanan ed sika,+ balet ompawil irad sika tan igloria day ngaran mo,+ manpikasi ra tan onkerew irad sika na panangasi diad sayan abung,+
34 komon ta ondengel ka diad tawen tan perdonam so kasalanan na Israel a totoom tan ipawil mo ra ed samay dalin ya inter mod saray inmuunan atateng da.+
35 “Sano say tawen et nasaraan tan agmangipelag na uran+ lapud naynay iran mankakasalanan ed sika,+ balet manpikasi ran akaarap ed sayan pasen tan igloria day ngaran mo tan magbabawi rad kasalanan da lapud inyabebam* ira,+
36 komon ta ondengel ka diad tawen tan perdonam so kasalanan na saray lingkor mo, say Israel a totoom, ta ibangat mod sikara+ so maabig a dalan a nepeg dan panakaran; tan pauran mo komon diad dalin+ ya inter mod saray totoom bilang tawir da.
37 “No walay sinmabin eras diad dalin,+ odino salot, ampetapetang a dagem, boot,+ tan agaylay karakel a duron, odino masisiban duron; odino no kubkoben ira na kabusol da inerman so kawalaan dan syudad ed dalin da* odino no wala ni sinmabin arum a klase na salot odino sakit,+
38 antokaman a pikakasi tan ikerew na panangasi+ na siopaman a too odino say Israel a totoom (ta amta na balang sakey so paniirap na dilin puso to)+ sano iyunat da ray lima ra diad sayan abung,
39 komon ta ondengel ka diad tawen, say pasen ya ayaman mo,+ tan mamerdona ka komon+ tan onkiwas ka; tan tumangan mo so kada sakey unong ed amin a gagawaen to,+ ta kabat moy puso to (sika labat so talagan makapikabat ed puso na kada too),+
40 diad ontan et takotan da ka ed amin ya agew na pambibilay da diad dalin ya inter mod saray inmuunan atateng mi.
41 “Ontan met, say dayo ya agkabiangan na Israel a totoom, a nanlapud arawin dalin tan linma dia nisengeg ed ngaran* mo+
42 (ta narengelan day nipaakar ed bantog a ngaran mo+ tan say mabiskeg a limam tan say akaunat a taklay mo), tan sikatoy manpikasi ya akaarap ed sayan abung,
43 komon ta ondengel ka diad tawen, say pasen ya ayaman mo,+ tan gawam so amin a kekerewen ed sika na samay dayo, pian nakabat na amin a totoo ed dalin so ngaran mo tan takotan da ka,+ a singa gagawaen na Israel a totoom, tan naamtaan da a say ngaran mo et walad sayan abung ya impaalagey ko.
44 “No milaban so totoom ed kabusol da unong ed impangibakim ed sikara,+ tan manpikasi rad sika+ ya akaarap ed syudad a pinilim+ tan diad sayan abung ya impaalagey ko parad ngaran mo, O Jehova,+
45 komon ta dengelen mo diad tawen so pikakasi ra tan say ikekerew day panangasi tan gawam ed sikara no antoy matunong.
46 “No mankasalanan irad sika (ta anggapoy toon agmankakasalanan),+ tan onsanok kad sikara tan paulyanan mo ra ed kabusol, tan awiten ira na saray angerel ed sikara diad dalin na kabusol, arawi man itan odino asingger;+
47 tan namoria ray ginawa ra diad dalin ya angawitan ed sikara,+ tan ompawil irad sika+ tan onkerew iray panangasi ed sika diad dalin na saray angerel ed sikara,+ a kuan da, ‘Nankasalanan kami tan alingo kami; mauge-uges so ginawa mi,’+
48 tan ompawil irad sika ed interon puso ra+ tan ed interon kamarerwa* ra diad dalin na saray kakabusol da ya angerel ed sikara, tan manpikasi rad sika ya akaarap ed dalin da ya inter mod saray inmuunan atateng da tan ed syudad a pinilim tan ed abung ya impaalagey ko parad ngaran mo,+
49 komon ta dengelen mo diad tawen, say pasen ya ayaman mo,+ so pikakasi ra tan say ikekerew day panangasi, tan gawam ed sikara no antoy matunong
50 tan perdonam so totoom a nankasalanan ed sika, a perdonaen moy amin ya impakasumlang dad sika. Pakiwasen mo ray angerel ed sikara a kasian da ra+
51 (ta totoom ira tan tawir mo,+ ya impaway mo ed Ehipto,+ diad hurno a panagtunawan na balatyang).+
52 Komon ta akalukas iray matam ed ikekerew na panangasi na lingkor mo+ tan say ikekerew na panangasi na Israel a totoom, ya ondengel ka kapagno ontawag irad sika.*+
53 Ta imbiig mo ra bilang tawir mo manlapud amin a totood dalin,+ unong ya inyabawag mo diad panamegley nen Moises a lingkor mo sanen impaway mo ray inmuunan atateng mi ed Ehipto, O Soberanon Katawan a Jehova.”
54 Sanen asumpal nen Solomon so pikakasi to tan say ikekerew toy panangasi ed si Jehova, sikatoy inmalagey diad arap na altar nen Jehova, a diman akatalimukor ya akaunat iray lima to ed tawen.+
55 Insan diad maksil a boses et benendisyonan toy interon kongregasyon na Israel, a kuan to:
56 “Narayew komon si Jehova, ya angiter na painawaan ed Israel a totoo to unong ya insipan to.+ Anggapoy anggan sakey a salitan ag-asumpal diad amin a maabig a sipan ya inter to ed panamegley nen Moises a lingkor to.+
57 Komon ta walad sikatayo si Jehova a Dios tayo a singa ed saray inmuunan atateng tayo.+ Komon ta agto itayo taynan tan agto itayo paulyan.+
58 Komon ta iyasingger tod sikato so puso tayo,+ pian manakar tayo ed amin a dalan to tan unoren tayo ray ganggan, totontonen, tan panangukom to, ya ingganggan ton tumboken na saray inmuunan atateng tayo.
59 Tan komon ta sayan ikekerew koy panangasi ed si Jehova et agew-labi a nonoten nen Jehova a Dios tayo, a gawaen to komon no antoy matunong parad lingkor to tan parad Israel a totoo to unong a nakaukolan ed kada agew,
60 diad ontan et naamtaan na amin a totoo ed dalin a si Jehova so tuan Dios.+ Anggapo lay arum!+
61 Kanian komon ta magmaliw a matoor* so puso yo+ ed si Jehova a Dios tayo diad panakar yo unong ed saray inter ton totontonen tan diad pangunor yo ed saray ganggan to a singa ed sayan agew.”
62 Diad saman, say ari tan say interon Israel a kaiba to et angiyapay na dakdakel a bagat ed si Jehova.+
63 Si Solomon et angiyapay ed si Jehova na saray bagat a pandurungoan:+ Sikatoy angiyapay na 22,000 baka tan 120,000 karnero. Kanian sinelebraan na ari tan amin ya Israelita so inagurasyon na abung nen Jehova.+
64 Diad satan ya agew et pinasanto na ari so pegley na sular a walad arapan na abung nen Jehova, ta ditan so pangiyapayan to na saray bagat a popoolan, apay a kakanen, tan taba na saray bagat a pandurungoan, lapud melmelag imay gansan altar+ a walad arapan na abung nen Jehova kanian agnakarga na satan iray bagat a popoolan, apay a kakanen, tan taba+ na saray bagat a pandurungoan.
65 Diad saman, si Solomon a kaibay interon Israel, sakey a baleg a kongregasyon manlapud Lebo-hamat* anggad Kulos* na Ehipto,+ et sinelebraan day piesta+ diad arapan nen Jehova a Dios tayo a 7 agew tan kaaruman nin 7 agew, 14 agew ya amin.
66 Diad tinmumbok* ya agew et pinasempet to ray totoo, tan imbaga ran nabendisyonan komon so ari insan sinmempet iran maliket tan magayaga ed saray ayaman da lapud kamaongan+ ya impatnag nen Jehova ed si David a lingkor to tan ed Israel a totoo to.
Paimanod leksab
^ Salanti, Piesta na Saray Alolong.
^ Nengnengen so Apendise B15.
^ Literal, “say anak mon laki, samay ompaway ed saray tapim.”
^ Literal, “saray lingkor mo a manaakar ed arapan mo.”
^ Odino “tan samay nankasalananan to so mangidapo na ayew ed sikato.” Salanti, sakey a samba a walay kaiba ton ayew a saya so magmaliw a dusa to no palso imay insamba to odino no sinumlang to itan.
^ Literal, “ayew.”
^ Literal, “mauges.”
^ Literal, “matunong.”
^ Odino “pinairap mo.”
^ Literal, “diad dalin na saray puerta to.”
^ Odino “reputasyon.”
^ Odino “a dengelen mo ra antokaman so kerewen dad sika.”
^ Odino “nawalaay sigpot a debosyon.”
^ Odino “lolooban na Hamat.”
^ Literal, “komawalo,” samay agew kayari na komaduan pitoran agew a selebrasyon.
