Unonan Samuel 27:1-12
-
Inter na saray Filisteo ed si David so Ziklag (1-12)
27 Balet, oniay inkuan nen David ed sarili to: “Onsabi panaon et pateyen ak nen Saul. Say sankaabigan a gawaen ko et ontakas+ ed dalin na saray Filisteo; insan ontunda lay Saul a mananap ed siak diad interon teritorya na Israel,+ tan makaliktar ak ed sikato.”
2 Kanian linmay David pati say 600 a totoo+ to ed si Akis+ ya anak nen Maoc, say ari na Gat.
3 Akiayam si David ed si Akis diad Gat, sikato tan saray totoo to, a kaiba na balang sakey so sankaabungan to. Kaiba nen David so duaran asawa to, si Ahinoam+ a taga Jezreel tan si Abigail+ a Carmelita, a datin asawa nen Nabal.
4 Sanen nipaamta ed si Saul a batik ed Gat si David, intunda to lay panaanap tod sikato.+
5 Insan inkuan nen David ed si Akis: “No agamoran koy panangabobon mo, ikdan da ak komon na pasen ed sakey ed saray angkelag a syudad, pian makapanayam ak ditan. Akin et kaukolan a kaibam a manayam ed syudad na ari so lingkor mo?”
6 Kanian diad saman ya agew et inter ed sikato nen Akis so Ziklag.+ Satan so rason no akin a say Ziklag et kayarian na saray arari na Juda anggad sayan agew.
7 Sakey taon tan apat bulan so kabayag* na impanayam nen David diad sakey ed saray melag a syudad na saray Filisteo.+
8 Ontatatdang si David tan saray totoo to pian lusoben da iray Gesurita,+ Girzita, tan saray Amalekita,+ ta manaayam iraya ed dalin ya onnatnat manlapud Telam ya anggad Sur+ tan mamaleksab ed dalin na Ehipto.
9 Sano lusoben nen David itan a dalin, anggapoy ikera ton mabilay a laki odino bii,+ balet alaen to iray karnero, baka, asno, kamelyo, tan saray kawes, insan ompawil ed si Akis.
10 Insan itepet nen Akis: “Iner so nilusoban mo natan?” Oniay iyebat nen David: “Diad abalaten* na Juda”+ odino “Diad abalaten na saray Jerameelita”+ odino “Diad abalaten na saray Keneo.”+
11 Anggapoy inkera nen David a mabilay a laki odino bii pian awiten tod Gat, ta inkuan ton: “Pian agda itayo nidalem ed sikara tan ikuan dan, ‘Onia so ginawa nen David.’” (Tan ontan so gagawaen to legan a sikatoy manaayam ed sakey ed saray melag a syudad na saray Filisteo.)
12 Kanian anisia si Akis ed si David, tan inkuan tod inkasikato: ‘Sikatoy nagmaliw lan kabkabusol na saray kabaleyan tod Israel; kanian sikatoy mansiansia lan lingkor ko ed anggad angga.’
