Unonan Samuel 5:1-12
5 Sanen asamsam na saray Filisteo so Kaban+ na tuan Dios, inyakar da itan ed Asdod manlapud Ebenezer.
2 Inala na saray Filisteo so Kaban na tuan Dios tan inyakar dad abung* nen Dagon tan inyan dad abay na estatua nen Dagon.+
3 Kaimbuasan to, sanen asakbay a binmangon iray Asdodita, akasubsob ed dalin so lupa nen Dagon diad arap na Kaban nen Jehova.+ Kanian inala day Dagon tan impawil dad pasen to.+
4 Sanen asakbay iran binmangon diad tinmumbok ya agew, akasubsob lamet ed dalin so lupa nen Dagon diad arap na kaban nen Jehova. Aputer so ulo tan saray lima to, tan wala iratan ed entrada na templo. Say singa siran parte na laman to labat* so ag-aderal.
5 Kanian anggad sayan agew et ag-onggagatin ed entrada na abung nen Dagon iray saserdote to tan amin iramay onloloob ed abung nen Dagon diad Asdod.
6 Dinusa nen Jehova iray Asdodita, tan pinairap to ra diad impangidapo toy almuranas ed Asdod tan saray teritorya to.+
7 Sanen anengneng na saray lalaki ed Asdod so nagagawa, inkuan da: “Agyo pansiasiansiaen ed sikatayo so Kaban na Dios na Israel, ta dudusaen to itayo tan si Dagon a dios tayo.”
8 Kanian impatawag da tan tinipon dan amin iray manuley na saray Filisteo tan tinepetan da ra: “Antoy gawaen tayod Kaban na Dios na Israel?” Inmebat ira: “Iyakar tayod Gat.”+ Kanian inyakar da diman so Kaban na Dios na Israel.
9 Sanen niyakar da la itan, dinusa nen Jehova so syudad a sengegay baleg a takot. Dinusa to iray totoo ed syudad, manlapud ugugaw anggad mamatatken, tan naalmuranas ira.+
10 Kanian impaiyakar dad Ekron+ so Kaban na tuan Dios, balet sanen akasabid Ekron so Kaban na tuan Dios, oniay inkelyaw na saray Ekronita: “Inyakar dad sikatayo so Kaban na Dios na Israel pian ompatey tayo tan saray kabaleyan tayo!”+
11 Diad saman et impatawag da tan tinipon dan amin iray manuley na saray Filisteo tan inkuan da: “Ekal yo dia so Kaban na Dios na Israel; ipawil yod nanlapuan ton pasen pian agkami ompatey pati saray kabaleyan mi.” Ta natatakot ya ompatey so amin a totoo ed syudad; dinusa ra na tuan Dios,+
12 tan naalmuranas iramay ag-inatey. Insan tinmangay ed tawen iray manaayam ed syudad pian onkerew na tulong.
