Unona ed Saray Taga Corinto 1:1-24
1 Siak, si Pablo, ya apostol nen Kristo Jesus diad linawa na Dios, tan si Timoteo+ ya agi tayo, et nansulat ak ed kongregasyon na Dios ed Corinto, kaibay amin a masanto a walad interon Acaya:+
2 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo.
3 Narayew komon so Dios tan Ama na Katawan tayon Jesu-Kristo,+ say Ama na maaron panangasi+ tan say Dios na amin a ligliwa,+
4 a manliligliwa* ed sikatayo diad amin a subok* a dadalanen tayo,+ pian naligliwa tayo iramay makakaeksperiensya+ na antokaman a klase na subok* diad panamegley na ligliwa a naaawat tayod Dios.+
5 Ta no panon a makakasagmak tayoy dakel ya irap parad Kristo,+ dakel met so naaawat tayon ligliwa diad panamegley na Kristo.
6 Natan, no nipapaarap kamid subok,* pakaligliwaan tan pakaliktaran yo iya; no liligliwaen kami, pakaligliwaan yo met iya a makatulong pian nasungdoan yo ray parehon irap a nasasagmak mi met.
7 Tan say iilaloan mi nipaakar ed sikayo et agmanguman, lapud amta mi a no panon a kaiba mi kayon maniirap, kaiba mi kayo met a naligliwa.+
8 Ta agmi labay, agagi, ya anggapoy amta yo ed irap a naeksperiensya mi diad probinsya na Asia.+ Nabebelatan kamin maong ya agmi nasarag ed dilin biskeg mi, kanian agkami segurado no antoy nagawad bilay mi.+
9 Diad tua, say pakalikna mi et asentensiaan kami lay patey. Balet agawa iya pian manmatalek kami, aliwan diad sarili mi, noagta diad Dios+ a mamapaoli ed saray inaatey.
10 Diad ontan a mapeligron situasyon et inliktar to kami tan iliktar to kami, tan maniilalo kamid sikato a naynay to kamin iliktar.+
11 Natulongan yo kami met no masimoon yo kamin ipikasi,+ pian dakel so misalamat parad sikami lapud kaabigan ya impatnag ed sikami, a saya so ebat ed pikakasi na dakel.*+
12 Ta saya so ipapasirayew mi: Malinis so konsiensia mi ta diad sayan mundo tan nagkalalo la diad sikayo et impatnag mi inkasanto tan inkasimoon a manlalapud Dios, ya agkami nandepende ed karunongan na sayan mundo,+ noagta diad agnaparaan a kaabigan na Dios.
13 Ta diad tua, say isusulat mi labat et samay nabasa* tan natalosan yo, tan iilaloan ko ya itultuloy yon talosan a maong iraya,
14 no panon ya atalosan na arum ed sikayo a nagmaliw kamin rason na pampasirayew yo, ontan met a magmaliw kayon rason na pampasirayew mi diad agew na Katawan tayon Jesus.
15 Kanian lapud sayan panagmatalek, ninonot koy onla nin unona ed sikayo, pian naliketan kayo ed komaduan pankanawnawa;*
16 tan ninonot koy onsamar ed sikayo diad iyakar kod Macedonia, tan ompawil ak ed sikayo manlapud Macedonia, insan yo ak ipatnubang diad pambiahek paonlad Judea.+
17 Et sanen ontan so nononoten ko, kasin impasen kon aliwan importante itan? Odino kasin namplano ak unong ed laman, kanian ibabagak ya “On, on” insan “Andi, andi”?
18 Balet napanmatalkan so Dios a say ibabaga mid sikayo et aliwan “on” insan “andi.”
19 Ta say Anak na Dios, si Jesu-Kristo, ya impulong mid sikayo a kaibak ira di Silvano* tan Timoteo,+ et agnagmaliw ya “on” insan “andi,” noagta say “on” et nagmaliw ya “on” ed sikato.
20 Ta anggan panon karakel iray sipan na Dios, nagmaliw iratan ya “on” diad panamegley to.+ Kanian dia met ed panamegley to et ibabagad Dios so “Amen,”+ pian sikatoy nigloria tayo.
21 Balet samay mangagarantiya a sikayo tan sikami et kayarian nen Kristo tan samay anuro* ed sikatayo et say Dios.+
22 Inyan to met ed sikatayo so tatak to+ tan inyan tod kapusoan tayo so garantiya nipaakar ed samay onsabi,* salanti, say espiritu.+
23 Natan, say Dios so mantasi sumpad siak,* ya agak ni linma ditan ed Corinto ta agko labay a lalo kayon onermen.
24 Agko ibabagan katawan kami na pananisia yo,+ noagta kakimeyan yo kami pian manliket kayo, ta akapansiansia kayo lapud pananisia yo.
Paimanod leksab
^ Odino “irap.”
^ Odino “irap.”
^ Odino “mamapaseseg.”
^ Odino “irap.”
^ Odino “lapud karakel na mapikasin totoo.”
^ Odino posiblin, “samay amta yo la.”
^ Odino posiblin, “pian mamidua kayon nagunggonaan.”
^ Tinawag met a Silas.
^ Literal, “nanlana.”
^ Odino “so paunan bayar (patinga).”
^ Odino “kamarerwak.”
