Exodo 6:1-30
6 Kanian inkuan nen Jehova ed si Moises: “Nanengneng mo natan no antoy gawaen ko ed Faraon.+ Sakey a mabiskeg a lima so mamuersa ed sikato pian ibulos to ra, tan sakey a mabiskeg a lima so mamuersa ed sikato pian pataynanen to ra ed dalin to.”+
2 Insan inkuan na Dios ed si Moises: “Siak si Jehova.
3 Tan nampanengneng ak nensaman ed si Abraham, Isaac, tan Jacob bilang Makapanyarin-amin a Dios,+ balet nipaakar ed ngaran kon Jehova+ et agko sigpot ya imparungtal ed sikara.+
4 Akisipanan ak met ed sikara ya iter kod sikara so dalin na Canaan, say dalin a nanayaman da bilang dayo.+
5 Nadngel kon mismo so akis na saray totoo na Israel, ya aaripenen na saray Ehipsio, tan ninonot ko so impisipanan ko.+
6 “Kanian ibagam ed saray Israelita: ‘Siak si Jehova, tan ipaway ta kayo ed panamairap na saray Ehipsio tan iliktar ta kayo ed panangaripen da,+ tan bawien ta kayo diad panamegley na akaunat* a taklay tan baleg iran panangukom.+
7 Tan awaten ta kayo bilang totook, tan magmaliw ak a Dios yo,+ tan naamtaan yo a siak si Jehova a Dios yo a mangipaway ed sikayo ed panamairap na Ehipto.
8 Tan iyakar ta kayo ed dalin a sinambaan ko* ya iter ed si Abraham, Isaac, tan Jacob; tan iter ko itan ed sikayo pian nakayarian yo.+ Siak si Jehova.’”+
9 Diad saginonor et impasabi nen Moises iyan mensahe ed saray Israelita, balet ag-ira dinmengel ed sikato lapud impakadismaya ra tan lapud maruksan pangaaripen ed sikara.+
10 Insan oniay inkuan nen Jehova ed si Moises:
11 “La ka tan ibagam ed Faraon, say ari na Ehipto, a nepeg ton ibulos iray Israelita ed dalin to.”
12 Balet inkuan nen Moises ed si Jehova: “Agdinmengel ed siak iray Israelita;+ panon sirin so idengel na Faraon ed siak, ta nanairapan ak a mansalita?”*+
13 Balet imbaga lamet nen Jehova ed si Moises tan Aaron no anto ray ganggan ya iter dad saray Israelita tan ed Faraon, say ari na Ehipto, pian nipaway iray Israelita ed dalin na Ehipto.
14 Saraya so ulo ed sankaabungan na saray ama ra: Saray ananak nen Ruben a panguloan nen Israel+ et si Hanoc, Palu, Hezron, tan Carmi.+ Saraya so pamilya ed tribu nen Ruben.
15 Saray ananak nen Simeon et si Jemuel, Jamin, Ohad, Jakin, Zohar, tan Shaul ya anak na biin Canaanita.+ Saraya so pamilya ed tribu nen Simeon.
16 Saraya so kangaranan na ananak nen Levi,+ unong ed poli na pamilya ra: si Gerson, Kohat, tan Merari.+ Say karukey na impanbilay nen Levi et 137 taon.
17 Saray ananak nen Gerson et si Libni tan Simei, unong ed saray pamilya.+
18 Saray ananak nen Kohat et si Amram, Izhar, Hebron, tan Uziel.+ Say karukey na impanbilay nen Kohat et 133 taon.
19 Saray ananak nen Merari et si Mali tan Musi.
Saraya so pamilya ed tribu na saray Levita, unong ed poli na pamilya ra.+
20 Natan et inasawa nen Amram si Jocabed ya agi nen ama to.+ Inyanak tod sikato si Aaron tan Moises.+ Say karukey na impanbilay nen Amram et 137 taon.
21 Saray ananak nen Izhar et si Kora,+ Nefeg, tan Zicri.
22 Saray ananak nen Uziel et si Misael, Elzafan,+ tan Sitri.
23 Natan et inasawa nen Aaron si Eliseba, ya anak nen Aminadab, say agi nen Naason.+ Inyanak tod sikato si Nadab, Abihu, Eleazar, tan Itamar.+
24 Saray ananak nen Kora et si Asir, Elkana, tan Abiasaf.+ Saraya so pamilya ed tribu na saray Korahita.+
25 Inasawa nen Eleazar+ ya anak nen Aaron so sakey ed saray anak nen Putiel. Inyanak tod sikato si Finehas.+
Saraya so lider na saray pamilya na Levita, unong ed saray pamilya ra.+
26 Saya imay Aaron tan Moises ya angibagaan nen Jehova na: “Ipaway mo ray ananak na Israel ed dalin na Ehipto, unong ed saray grupo ra.”*+
27 Sikara imay akitongtong ed Faraon ya ari na Ehipto, pian nipaway iray totoo na Israel ed Ehipto. Saya imay Moises tan Aaron.+
28 Diad saman ya agew sanen akitongtong si Jehova ed si Moises diad dalin na Ehipto,
29 imbaga nen Jehova ed si Moises: “Siak si Jehova. Ibagam ed Faraon ya ari na Ehipto so amin ya ibabagak ed sika.”
30 Insan inkuan nen Moises ed si Jehova: “Nanairapan ak a mansalita,* kanian panon sirin so idengel na Faraon ed siak?”+
Paimanod leksab
^ Odino “makapanyari.”
^ Literal, “ya intagey koy limak.”
^ Literal, “ag-asegat iray bibil ko.”
^ Literal, “unong ed saray armada ra.”
^ Literal, “Ag-asegat iray bibil ko.”
