Job 2:1-13
2 Insan sinmabi so agew a linma iray ananak na tuan Dios*+ pian onarap ed si Jehova,+ tan si Satanas et linma met a kaiba ra pian onarap ed si Jehova.+
2 Inkuan nen Jehova ed si Satanas: “Iner so nilam?” Et inmebat si Satanas ed si Jehova: “Nanliberliber ak diad dalin tan nanakar-akar ak diman.”+
3 Tan inkuan nen Jehova ed si Satanas: “Naimanom tay* lingkor kon si Job? Anggapoy miparad sikato diad dalin. Sikatoy maptek a too a walaay integridad,*+ tatakotan toy Dios tan aarawian toy kaugsan. Siansia nin agto ikbanan so integridad to,+ anggan insugsog mon sikatoy deralen* ko+ ya anggapoy makasengeg.”
4 Balet inmebat si Satanas ed si Jehova: “Baog parad baog. Say too et iter toy amin a walad sikato parad bilay* to.
5 Balet, salim pan iyunat so limam tan pasakitan moy pukel tan laman to, seguradon mudmoraen to ka ya arap-arapan.”+
6 Diad saman et inkuan nen Jehova ed si Satanas: “Sikatoy walad limam!* Basta agmo aalaen so bilay* to!”
7 Kanian tinmaynan si Satanas ed arapan* nen Jehova tan angidapo ed si Job na manotot iran pelsa*+ manlapud dapan ya anggad toktok na ulo to.
8 Et angalay Job na langa a panggogo to, tan sikatoy akalespak ed dapol.+
9 Diad kaunoran et inkuan ed sikato na asawa to: “Siansia nin agmo ikbanan so integridad mo? Mudmoram so Dios pian ompatey ka la!”
10 Balet inmebat si Job: “Singa ka biin makulangkulang ed satay panagsalitam. Say maong labat kasi so awaten tayo manlapud tuan Dios tan agtayo awaten so mauges?”+ Diad sayan amin et agnankasalanan si Job ed panagsalita to.+
11 Abalitaan na taloran kakaaro* nen Job so amin a mauges ya agawad sikato, tan sikatoy nila ra, a balang sakey et nanlapud dilin lugar to—si Elifaz+ a Temanita, si Bildad+ a Suhita,+ tan si Zofar+ a Naamatita. Nampapakna ran onla pian miambegya ed si Job tan ligliwaen da.
12 Sanen sikatoy abantag da, agda abidbir. Et sanen abidbir da la, nanugaog ira tan pinilat da ray kawes da, tan angisabuyag iray dabok ed tagey tan diad ulo ra.+
13 Insan linmespak irad dalin diad abay to ed loob na pitoy agew tan pitoy labi. Anggapoy anggan sakey a salitan imbaga rad sikato, ta anengneng day pinasyan sakit a nalilikna to.+
Paimanod leksab
^ Sakey a balikas ed Hebreo ya ontutukoy ed saray anghel ya ananak na Dios.
^ Literal, “Inteen mo tay pusom ed.”
^ Odino “Sikatoy andiay pakabalawan tan maptek a too.”
^ Literal, “akmonen.”
^ Odino “kamarerwa.”
^ Odino “walad pakayarim.”
^ Odino “kamarerwa.”
^ Literal, “lupa.”
^ Odino “grabe iran giri.”
^ Odino “kabat.”
