Josue 10:1-43
10 Sanen nadngelan nen Arin Adoni-zedek na Jerusalem a sinakop nen Josue so Ai tan dineral to itan, a ginawa tod Ai tan ed ari to+ so singa ginawa tod Jerico tan ed ari to,+ tan no panon ya akikareenan ed Israel iray manaayam ed Gibeon+ tan nansiansia ra ed limog da,
2 sikatoy apagaan a maong,+ ta say Gibeon et baleg a syudad, singa sakey ed saray syudad ya uuleyan na ari. Babaleg itan nen say Ai,+ tan amin a lalaki ditan et sundalo.
3 Kanian oniay mensahe ya impasabi nen Adoni-zedek ya ari na Jerusalem ed si Hoham ya ari na Hebron,+ si Piram ya ari na Jarmut, si Jafia ya ari na Lakis, tan ed si Debir ya ari na Eglon:+
4 “Gali dia tan tulongan yo ak, ta lusoben tayoy Gibeon, lapud akikareenan ira ed si Josue tan ed saray Israelita.”+
5 Diad saman et nantitipon so limaran arari na saray Amoreo+—say ari na Jerusalem, ari na Hebron, ari na Jarmut, ari na Lakis, tan ari na Eglon—kaiba so armada ra, tan nanmartsa ra tan nankampo ra pian milaban ed Gibeon.
6 Diad saman et oniay impasabi na saray lalaki ed Gibeon ed si Josue diad kampo ed Gilgal:+ “Agmo papaulyanan iray* ariripen mo.+ La ka dian tampol! Iliktar mo kami tan tulongan mo kami! Nankakasakey a sinmumpad sikami so amin ya arari na saray Amoreo ed mapalandey a rehyon.”
7 Kanian tinmatdang si Josue manlapud Gilgal a kaiba toy amin a sundalo tan saray mabibiskeg a lalaki.+
8 Insan inkuan nen Jehova ed si Josue: “Agka ontatakot ed sikara,+ ta inyawat ko la ra ed limam.+ Anggapod sikara so makatalo ed sika.”+
9 Inataki ira nen Josue kayari na sanlabin impanakar da manlapud Gilgal, kanian abigla ra.
10 Winetwet ira nen Jehova tan dakdakel ed sikara so pinatey na Israel+ diad Gibeon, ya inuusilan da ra diad dalan ya ontatdang ed Bet-horon tan pinapatey da ra ya anggad Azeca tan Makeda.
11 Sanen ibabatikan da so Israel tan palasur la rad Bet-horon, impelag nen Jehova ed sikara iray angkakabaleg ya uran a kristal manlapud tawen ya anggad akasabi rad Azeca, tan inaatey ira. Diad tua, mas dakel ni so inatey lapud uran a kristal nen say inatey ed panamegley na espada na saray Israelita.
12 Diad saman ya agew a tinalo nen Jehova iray Amoreo ed pakanengneng na saray Israelita, oniay inkuan nen Josue ed si Jehova ed arapan na Israel:
“Agew, tunda kad+ petek na Gibeon,+Tan bulan, diad petek na Lawak* na Aijalon!”
13 Kanian tinmunda so agew tan ag-inmalis so bulan, anggad akabawi so nasyon na Israel ed saray kalaban to. Agta nisulat iya ed libro nen Jasar?+ Tinmunda so agew diad pegley na tawen tan agsinmelek a sanagew.
14 Anggapon balot so miparad saman ya agew, balanglan sakbay odino kayari na satan, a dinengel nen Jehova so too,+ ta si Jehova so milalaban parad Israel.+
15 Kayari na satan, si Josue tan say interon Israel et pinmawil diad kampo ed Gilgal.+
16 Kaleganan na satan et binmatik iramay limaran arari tan inmamot irad ungib na Makeda.+
17 Insan oniay nibalita ed si Josue: “Inmamot iramay limaran arari diad ungib na Makeda.”+
18 Kanian inkuan nen Josue: “Mangitulin kayo na angkakabaleg a bato diad sangab na ungib, tan manuro kayoy lalaki a manbantay ed sikara.
19 Balet agnepeg ya ontunda so arum ed sikayo. Usilan yo ray kalaban yo tan ataki yo rad benegan da.+ Agyo ra aabuloyan a makaloob ed saray syudad da, ta inyawat la ra nen Jehova a Dios yo ed lima yo.”
20 Kayari na impamatey nen Josue tan saray Israelita ed dakerakel ed sikara, anggad naupot ira nilikud ed saramay akatakas tan linmoob ed saray apadiran a syudad,
21 amin a totoo et maligen a pinmawil ed kampo, ed si Josue, diad Makeda. Anggapoy anggan sakey a makpel a nansalita* ed saray Israelita.
22 Insan inkuan nen Josue: “Lukasan yoy sangab na ungib tan ipaway yo iramay limaran arari tan iyakar yo rad siak.”
23 Kanian manlapud ungib et inyakar dad sikato iramay limaran arari: say ari na Jerusalem, ari na Hebron, ari na Jarmut, ari na Lakis, tan ari na Eglon.+
24 Sanen niyakar dad si Josue irayan arari, tinawag toy amin a lalaki ed Israel tan oniay inkuan tod saray komandante na saray sundalo ya akila ed sikato: “Singger kayo. Gatinan yod tenger irayan arari.” Kanian sinmingger ira tan ginatinan da rad tenger.+
25 Insan inkuan nen Josue ed sikara: “Agkayo natatakot odino nakekebbiew.+ Manpakpel tan manpabiskeg kayo, ta oniay gawaen nen Jehova ed amin a kakabusol yo a pilabanan yo.”+
26 Insan kinabil tan pinatey ira nen Josue tan imbitay to rad limaran poste,* tan akabitay ira ed saray poste ya anggad onlalabi la.
27 Sanen onselek lay agew, ingganggan nen Josue ya iyepas da ra ed saray poste+ tan ibantak da rad ungib a nanamotan da. Insan angiyan ira na angkakabaleg a bato ed sangab na ungib, tan nansiansia iratan anggad sayan agew.
28 Diad saman ya agew et asakop nen Josue so Makeda+ tan kinabil to itan ed espada. Pinatey to so ari tan say amin* a wadtan, ya anggapoy inkera ton mabilay.+ Ginawa to ed ari na Makeda+ so singa ginawa to ed ari na Jerico.
29 Insan manlapud Makeda et linmad Libna si Josue tan say interon Israel tan akiguerra rad Libna.+
30 Inyawat met nen Jehova ed Israel so Libna tan say ari to,+ tan nilusob da itan tan say amin* a wadtan ed panamegley na espada, ya anggapoy inkera dan mabilay. Ginawa ra ed ari to so singa ginawa ra ed ari na Jerico.+
31 Insan manlapud Libna et linmad Lakis+ si Josue tan say interon Israel tan nankampo ra diman tan akiguerra ra ed satan.
32 Inyawat nen Jehova ed Israel so Lakis tan asakop dad komaduan agew. Nilusob da itan tan say amin* a wadtan ed panamegley na espada,+ a singa ginawa rad Libna.
33 Insan tinmatdang si Horam ya ari na Gezer+ pian ontulong ed Lakis, balet sikato tan saray totoo to et pinatey nen Josue ya anggad anggapoy akeran mabilay.
34 Insan manlapud Lakis et linmad Eglon+ si Josue tan say interon Israel tan nankampo ra ditan tan akiguerra ra ed satan.
35 Asakop da itan ed saman ya agew tan kinabil da itan ed espada. Pinatey da so amin* a wadtan diad saman ya agew, a singa ginawa ra ed Lakis.+
36 Insan manlapud Eglon et tinmatdang ed Hebron+ si Josue tan say interon Israel tan akiguerra ra ed satan.
37 Sinakop da itan tan pinatey dad espada so ari to, saray totoo ed baley to, tan amin* a wadtan, ya anggapoy inkera dan mabilay. Dineral to itan tan say amin* a wadtan, a singa ginawa tod Eglon.
38 Insan amaarap ed Debir+ si Josue tan say interon Israel tan akiguerra rad satan.
39 Sinakop to itan, tan pinatey dad espada so ari to, saray totoo ed amin a baley to, tan amin* a wadtan,+ ya anggapoy inkera dan mabilay.+ Ginawa tod Debir tan say ari to so singa ginawa tod Hebron tan ed Libna tan say ari to.
40 Asakop nen Josue so amin a dalin ed mapalandey a rehyon, say Negeb, Sefela,+ tan saray walad gilig na kapalandeyan tan amin ya arari ra, ya anggapoy inkera ton mabilay; pinatey to so amin ya onlilinawa,+ unong ya ingganggan nen Jehova a Dios na Israel.+
41 Sinakop iratan nen Josue manlapud Kades-barnea+ ya anggad Gaza+ tan say interon dalin na Gosen+ ya anggad Gibeon.+
42 Aminpinsan a sinakop nen Josue irayan amin ya arari tan say dalin da, ta si Jehova a Dios na Israel so milalaban parad Israel.+
43 Insan pinmawil si Josue tan say interon Israel diad kampo ed Gilgal.+
Paimanod leksab
^ Literal, “aabuloyan ya ompelag so limam manlapud.”
^ Odino “Abeban Patar.”
^ Literal, “pinatarem toy dila to.”
^ Odino “kiew.”
^ Odino “amin a kamarerwa.”
^ Odino “amin a kamarerwa.”
^ Odino “amin a kamarerwa.”
^ Odino “amin a kamarerwa.”
^ Odino “amin a kamarerwa.”
^ Odino “amin a kamarerwa.”
^ Odino “amin a kamarerwa.”
