Josue 11:1-23
11 Sanen nadngelan iya nen Jabin ya ari na Hazor, sikatoy angibakin tampol na saray mensahero ed si Jobab ya ari na Madon,+ ed ari na Simron, tan ed ari na Acsaf,+
2 ed saray arari diad bandad amianen a mapalandey a rehyon, ed saramay walad patar* diad abalaten na Kineret, ed saramay walad Sefela tan saray niyatagey a dalin na Dor+ diad sagur,
3 ed saray Canaanita+ diad bukig tan sagur, ed saray Amoreo,+ Heteo, Perizeo, ed saray Jebuseo diad mapalandey a rehyon, tan ed saray Heveo+ diad leksab na Hermon+ ed dalin na Mizpa.
4 Kanian linma ra a kaiba so amin ya armada ra, a singa karakel na saray buer ed gilig na dayat, pati dakerakel a kabayo tan karwahen pan-guerra.
5 Apampaknaan na sarayan amin ya arari a manbabana ra, tan nankakasakey iran nankampo ed abay na danum na Merom pian milaban ed Israel.
6 Diad saya et inkuan nen Jehova ed si Josue: “Agka ontatakot lapud sikara,+ ta nabuas ed onian oras et iyawat ko ran amin ed Israel pian ompatey ira. Pileyen mo ray kabayo ra,+ tan poolan mo ray karwahe ra.”
7 Insan biglan inmataki ed sikara si Josue tan amin a kaiba ton sundalo diad abay na danum na Merom.
8 Inyawat ira nen Jehova ed lima na Israel,+ tan tinalo da ra tan inusilan da ra ya anggad say baleg a syudad na Sidon+ tan Misrefot-maim+ tan diad Lawak na Mizpa diad bukig, tan pinapatey da ra anggad anggapoy akeran mabilay.+
9 Insan ginawa nen Josue ed sikara so imbaga nen Jehova ed sikato; piniley to ray kabayo ra tan pinoolan to ray karwahe ra.+
10 Insan pinmawil si Josue tan sinakop to so Hazor tan pinatey tod espada so ari ditan,+ ta say Hazor so datin manuna ed sarayan amin a panarian.
11 Pinatey dad espada so amin* a wadtan, ya inggana da rad kadederal.+ Anggapoy akeran onlilinawa.+ Insan pinoolan to so Hazor.
12 Sinakop nen Josue so amin a syudad na sarayan arari tan tinalo to so amin ya arari ra ed panamegley na espada.+ Sigpot to ran dineral,+ unong ya ingganggan nen Moises a lingkor nen Jehova.
13 Balet agpinoolan na Israel so anggan dinan ed saray syudad a niletneg ed saray pukdol, nilikud ed Hazor; satan labat so pinoolan nen Josue.
14 Inala na saray Israelita so amin a samsam ed sarayan syudad tan saray ayayep da.+ Balet pinatey dad espada so amin a totoo ya anggad naupot ira.+ Anggapoy inkera dan onlilinawa.+
15 No antoy ingganggan nen Jehova ed si Moises a lingkor to, ontan met so ingganggan nen Moises ed si Josue,+ tan ontan so ginawa nen Josue. Ginawa ton amin so ingganggan nen Jehova ed si Moises.+
16 Asakop nen Josue iyan amin a dalin, say mapalandey a rehyon, say interon Negeb,+ say interon dalin na Gosen, Sefela,+ Araba,+ tan say mapalandey a rehyon na Israel tan say Sefela* na satan,
17 manlapud Palandey Halak, a patatdang ed Seir, ya anggad Baal-gad+ diad Lawak na Lebanon ed leksab na Palandey Hermon,+ tan inerel to so amin ya arari ra, tan tinalo to ra tan pinatey to ra.
18 Andukey a panaon so impiguerra nen Josue ed sarayan amin ya arari.
19 Anggapoy syudad ya akikareenan ed saray Israelita nilikud ed saray Heveo a manaayam ed Gibeon.+ Asakop dan amin iray arum diad guerra.+
20 Inabuloyan nen Jehova a magmaliw a benger so kapusoan da+ kanian akiguerra ra ed Israel, ta pian naderal to ra ya anggapoy rason a nakasian ira.+ Nepeg da ran upoten, unong ya ingganggan nen Jehova ed si Moises.+
21 Diad saman a panaon et inupot nen Josue iray Anakim+ a walad mapalandey a rehyon, manlapud Hebron, Debir, Anab, tan amin a mapalandey a rehyon na Juda tan amin a mapalandey a rehyon na Israel. Dineral ira nen Josue pati saray syudad da.+
22 Anggapoy akeran Anakim ed dalin na saray Israelita; dia labat ed Gaza,+ Gat,+ tan Asdod+ so pasen a walay akera.+
23 Kanian inuleyan nen Josue so interon dalin, unong ya insipan nen Jehova ed si Moises,+ insan inter itan nen Josue ed Israel bilang tawir ya apagen unong ed saray tribu ra.+ Tan tinmunda lay guerra ed dalin.+
