Josue 6:1-27
6 Natan et malet a nikapot iray puerta na Jerico lapud saray Israelita; anggapoy ompapaway tan onloloob.+
2 Insan inkuan nen Jehova ed si Josue: “Nia, inyawat ko lad limam so Jerico tan say ari to tan saray mabibiskeg a sundalo to.+
3 Liber yoy syudad, amin yon sundalo, liber yo itan a maminsan. Anem agew ya ontan so gawaen yo.
4 Paawit mod pitoran saserdote so pitoran tambuyog* diad unaan na Kaban. Balet diad komapiton agew et liber yon maminpito so syudad tan paknolen na saray saserdote iray tambuyog.+
5 Sano paknolen day tambuyog—tan narengel yoy tanol* na tambuyog—amin a totoo et nepeg a mangikelyaw na maksil ya eyag parad guerra. Insan nageba so padir na syudad,+ tan ontatdang iray totoo, balang sakey et diretson onlusob.”
6 Kanian tinawag nen Josue ya anak nen Nun iray saserdote tan inkuan tod sikara: “Sakbat yo so kaban na sipanan, tan pitoran saserdote so nepeg a mangawit ed pitoran tambuyog diad unaan na Kaban nen Jehova.”+
7 Insan oniay inkuan tod saray totoo: “La kayo la tan liber yoy syudad, tan nepeg ya onlad unaan na Kaban nen Jehova iray armadon lalaki.”+
8 Unong ya imbaga nen Josue ed saray totoo, linmad arapan nen Jehova iray pitoran saserdote a mangaawit na pitoran tambuyog tan pinaknol da ray tambuyog, tan manumtumbok ed sikara so kaban na sipanan nen Jehova.
9 Tan saray armadon lalaki et linmad unaan na saray saserdoten mamapaknol ed saray tambuyog, tan saray bantay ed beneg et manumtumbok ed Kaban legan a papaknolen iray tambuyog.
10 Natan et ingganggan nen Josue iray totoo, ya inkuan to: “Agkayo oneeyag tan agyo ipaparengel so boses yo. Agkayon balot onsasalita anggad samay agew ya ibagak ed sikayon, ‘Eyag kayo!’ Insan kayo la oneyag.”
11 Impailiber tod syudad so Kaban nen Jehova, inliber da itan ya aminsan, tan kayari na satan et pinmawil irad kampo tan nansanlabi ra ditan.
12 Kaimbuasan to et asakbay a binmangon si Josue, tan sinakbat na saray saserdote so Kaban+ nen Jehova,
13 tan nanakar iramay pitoran saserdote a mangaawit ed pitoran tambuyog diad unaan na Kaban nen Jehova, a papaknolen da ray tambuyog. Nanakar ed unaan da iramay armadon lalaki, tan saray bantay ed beneg et manumtumbok ed Kaban nen Jehova legan a papaknolen iray tambuyog.
14 Diad komaduan agew et niliber dan aminsan so syudad, insan pinmawil ira ed kampo. Anem agew ya ontan so ginawa ra.+
15 Diad komapiton agew et binmangon iran asakbay, diad palbangon, tan aminpito ran niliber so syudad ed parehon paraan. Satan labat so agew ya aminpito ran niliber so syudad.+
16 Tan diad komapiton danay et pinaknol na saray saserdote iray tambuyog, tan oniay inkuan nen Josue ed saray totoo: “Eyag kayo,+ ta inter la nen Jehova ed sikayo so syudad!
17 Say syudad tan say amin a wadtan et nigana ed kadederal;+ kien itan ya amin nen Jehova. Si Rahab+ a paabang a bii labat so mansiansian mabilay, sikato tan say amin a kaiba tod loob na abung, ta inyamot to ray mensahero ya imbaki tayo.+
18 Balet arawian yo so antokaman a nepeg a deralen,+ ta ompan pilaleken tan alaen yoy arum ed saratan,+ tan pansengegan na kadederal na kampo na Israel tan niyakar yo ditan so desyang.*+
19 Balet amin a pilak tan balitok tan saray kagawaan a gansa tan balatyang et masanto parad si Jehova.+ Nepeg iratan ya iyakar diad pasen a pangiinay kayamanan nen Jehova.”+
20 Katanol na saray tambuyog et inmeyag iray totoo.+ Sanen nadngel na saray totoo so tanol na tambuyog tan inmeyag ira na maksil parad guerra, ageba so padir.+ Kayari na satan et linmoob ed syudad iray totoo, a balang sakey et diretson linmusob, tan sinakop da so syudad.
21 Pinatey da ed panamegley na espada so amin a walad syudad, laki tan bii, ugaw tan matatken, baka, karnero, tan asno.+
22 Oniay inkuan nen Josue ed saramay duaran lalaki a nan-espiya ed dalin: “La kayod abung na samay paabang a bii tan ipaway yo imay bii tan amin a kaiba to, unong ya insamba yod sikato.”+
23 Kanian linmoob irayan kalangweran a lalakin espiya tan impaway day Rahab, pati say ama to, ina to, saray agagi to, tan amin a walad sikato; on, impaway da so interon pamilya to,+ tan inyakar da rad maligen a pasen diad paway na kampo na Israel.
24 Insan pinoolan da so syudad tan amin a wadtan. Balet say pilak, balitok, tan saray kagawaan a gansa tan balatyang labat so inter da ed pasen a pangiinay kayamanan diad abung nen Jehova.+
25 Say inliktar labat nen Josue et si Rahab a paabang a bii tan say sankaabungan nen ama to tan amin a walad sikato;+ tan sikatoy nanayam ed Israel anggad sayan agew,+ lapud inyamot to ray mensahero ya ingganggan nen Josue a man-espiya ed Jerico.+
26 Diad saman a panaon, si Josue et inyabawag to iyan samba:* “Naayew ed arapan nen Jehova so too a mangipaalagey lamet ed sayan syudad na Jerico. Iletneg toy pundasyon na satan bilang kasalat na bilay na panguloan ya anak to, tan iyan to ray puerta na satan bilang kasalat na bilay na bolirek ya anak to.”+
27 Kanian si Jehova et walad si Josue,+ tan sikatoy nagmaliw a bantog ed interon dalin.+
Paimanod leksab
^ Literal, “saklor na saray kalakian a karnero.”
^ Odino “andukey a tanol.”
^ Odino “gulo; sumpa.”
^ Odino posiblin, “impaisamba tod saray totoo iyan samba.”
