Inorganisa na Dios so poli nen Abraham pian magmaliw iran sakey a bansa tan inikdan to ray ganggan. Sayan bansa et tinawag ton “Israel” tan imbangat to ra no panon so pandayew ed sikato. Inter to met ed sikara so salita to. (Salmo 147:19, 20) Kanian nabendisyonan so amin ya bansa lapud Israel.​—Basaen so Genesis 22:18.

Pinili na Dios iray Israelita pian magmaliw iran tasi to. Ipapanengneng na saray agawa nensaman ed sayan bansa no panon tayon minabang no unoren tayo ray ganggan na Dios. (Deuteronomio 4:6) Kanian lapud saray Israelita et nakabat na arum so tuan Dios.​—Basaen so Isaias 43:10, 12.

Sinmabi panaon ya agla uunoren na bansan Israel so Dios, tan say insalat nen Jehova ed sikara et say Kristianon kongregasyon. (Mateo 21:43; 23:37, 38) Bilang kasalat na saray Israelita, saray tuan Kristiano la natan so manlilingkor bilang tasi nen Jehova.​—Basaen so Gawa 15:14, 17.

Inorganisa nen Jesus iray papatumbok to pian manpulong ed amin ya bansa tan manbangat ed totoo pian magmaliw iran disipulo to. (Mateo 10:7, 11; 24:14; 28:19, 20) Pasyaan la iyan kimey diad sayan kaunoran a parte na sistema na mundo. Natan, pankakasakeyen nen Jehova so minilyon a totoo ed amin a bansa parad dugan panagdayew. (Apocalipsis 7:9, 10) Naorganisa iray tuan Kristiano pian pabiskegen tan tulongan so sakey tan sakey. Diad interon mundo, parehon impormasyon so aaralen na amin a kongregasyon diad pantitipon o aral da.​—Basaen so Hebreo 10:24, 25.

Nen 1870’s, saray katuaan ya abayag lan niyamot et ginapoan ya diskobrien na melag a grupo na saray estudyante na Biblia. Amta ran inorganisa nen Jesus so Kristianon kongregasyon parad panagpulong a kimey, kanian inggapo ran impulong so Panarian diad dakel a bansa. Nen 1931, nandesisyon ira ya say tawag ed sikara et Saray Tasi nen Jehova.​—Basaen so Gawa 1:8; 2:1, 4; 5:42.

Nen inmunan siglo, walay grupo na saray eksperiensyadon lalaki ya angasikaso ed amin ya Kristianon kongregasyon ed nanduruman bansa. Bibidbiren da ya si Jesus so Ulo na kongregasyon. (Gawa 16:4, 5) Ontan met natan, walay tatawagen ya Mananguley ya Ulop ya mangaasikaso ed amin a kongregasyon na Saray Tasi nen Jehova ed interon mundo. Saya so mangaasikaso ed saray branch office ya mangipapatalos, mangiimprinta, tan mangibubunog na saray publikasyon ya base ed Biblia diad masulok ya 700 a lenguahe. Kanian makapantatarya so Mananguley ya Ulop na panamaseseg tan instruksion ya base ed Biblia parad masulok ya 100,000 a kongregasyon ed interon mundo. Diad kada kongregasyon, wala ray kualipikadon lalaki ya manlilingkor bilang elder, odino manangasikaso. Maaro dan aasikasoen so pulok na Dios.​—Basaen so 1 Pedro 5:2, 3.

Naoorganisa kami pian ipulong so maong a balita tan bangatan iray totoo. Singa saray apostol, manpupulong kami ed kaabungan. (Gawa 20:20) Manoopresi kami met na panagaral na Biblia ed saramay labay dan naamtaan so katuaan. Balet, saray Tasi nen Jehova et aliwa labat ya organisasyon, sakey kami met ya pamilya tan maaro so Ama mi. Ituturing min sanaagi kami tan manaaroan kami. (2 Tesalonica 1:3) Naorganisa iray lingkor nen Jehova pian gawaen so labay na Dios tan tulongan so arum, kanian sikara so sankaliketan ya pamilya ed interon mundo.​—Basaen so Salmo 33:12; Gawa 20:35.