1, 2. (a) Antoy agawad si Jonas tan ed saray marino lapud ginawa ton lingo? (b) Panon itayon natulongan na istorya nen Jonas?

NO NAPATUNDA labat komon nen Jonas so amin ya narerengel to. Manbanesbes so dagem kanian ngalngali la napultot so lubir na layag na barko; manateet met so barko ta angkakabaleg so ombabasig ya daluyon. Balet say talagan panaaburidoan nen Jonas et say eyag na saramay marino​—say kapitan tan saray tripulante. Gagawaen da lay anggaay nayarian da pian ag-onlereg so barko. Amta nen Jonas a manatalaran lay patey ed sarayan lalaki​—tan sikatoy natetel!

² Akin et walad ontan ya situasyon si Jonas? Walay ginawa ton baleg ya lingo​—agto tinulok so Dios ton Jehova. Anto tay agto tinulok? Perdonaen ni kasi nen Jehova? Dakel so naaralan tayod ebat ed saratan a tepet. Alimbawa, nanengneng tayod istorya nen Jonas ya anggan saramay mabiskeg so pananisia ra et nayarin makagawa nin siansiay lingo, balet sarag dan ipetek iratan.

3-5. (a) Antoy tampol ya nanonotan na arum no nabitlay ngaran ya Jonas? (b) Antoy amta tayo nipaakar ed si Jonas? (Nengnengen met so footnote.) (c) Akin et aliwan mainomay so kimey nen Jonas bilang propeta?

³ No nabitla tay ngaran ya Jonas, say tampol ya nanonotan na arum et samay propetan agtinmulok tan anawet so ulo to. Balet diad tua, dakel iray maong ya agawaan nen Jonas. Tandaan, si Jehova so amili ed sikato pian magmaliw a propeta. No agmatoor odino agmatunong si Jonas, seguradon ag-imatalek nen Jehova ed sikato itan ya responsabilidad.

⁴ Dagdaiset so nabasad Biblia nipaakar ed si Jonas. (Basaen so 2 Arari 14:25.) Sikatoy taga Gat-efer​—syudad ya apatiran kilometro  labat so kaarawi tod Nazaret, say baley a balegan nen Jesu-Kristo manga walon lasus a taon diad saginonor. * Nanlingkor ya propeta si Jonas legay uley nen Arin Jeroboam II ed samploran-tribu ya panarian na Israel. Abayag lan inatey ed saman si Elias, tan inatey met lay Eliseo legay uley na ama nen Jeroboam. Inusar nen Jehova irayan lalaki pian ekalen ed Israel so panagdayew ed Baal, balet inulit la lamet na saray Israelita so kasalanan da. Say tutuloken da et say ari ran ‘manggagaway mauges ed pakanengneng nen Jehova.’ (2 Ara. 14:24) Kanian seguradon aliwan mainomay so kimey nen Jonas bilang propeta, balet matoor ton ginawa itan.

⁵ Balet aminsan, walay baleg ya desisyon ya nepeg a gawaen nen Jonas. Walay ipapagawa nen Jehova ed sikato ya isipen ton agto nayarian. Anto itan?

6. Antoy ipapagawa nen Jehova ed si Jonas, tan akin et singa mairap itan ya gawaen?

⁶ Oniay inkuan nen Jehova: “Onalagey ka, onla ka ed Ninive, ed syudad a baleg, tan iyakis mo so sumpa ed sikato; ta say karelmengan to sinmabi ed arap ko.” (Jon. 1:2) Natalosan tayoy Jonas no akin ya isipen ton agto nayarian iyan pagagawa nen Jehova. Say Ninive et manga 800 kilometro ni diad mamabukig, nayarin manga sakey bulan ya akaren. On, mairap so biahe, balet mas mairap imay mismon sabien tod Ninive. Say pangipasabian toy mensahe na panangukom nen Jehova et saray Asiryano​—sarayan totoo et bayolenti tan marukruksa. No diad Israel et ngalngali anggapo lay ondengel, sarayan pagano ni kasi? Ompan agla makapaway a mabilay iyan lingkor nen Jehova diad sayan baleg a syudad ya adeskribin “syudad a marala”!​—Nah. 3:1, 7.

7, 8. (a) Akin et nibaga tayon pursigido si Jonas ya ibatikan imay pagagawa nen Jehova? (b) Akin et agtayo nepeg ya isipen ya payakot si Jonas?

⁷ Naisip kasi iratan nen Jonas? Agtayo amta. Basta say amta tayo, imbatikan toy asainmin to. Anta ibabaki nen Jehova ed bukig, say inarap to balet diad sagur, say sankaarawian ya nasabi tod sagur! Sikatoy linmad daongan na syudad na Joppe, tan linmugan ed barkon mamaarap ed Tarsis. Ibabaga na arum ya iskolar a say Tarsis et walad España. No ontan sirin, say pamapaarapan to et manga 3,500 a kilometro so kaarawi tod Ninive. Sayan biahe paarap ed basil  na Baleg a Dayat et sabien toy sakey taon! Talagan pursigido sirin si Jonas ya ibatikan so pagagawa nen Jehova!​—Basaen so Jonas 1:3.

⁸ Labay kasin ibaga na saya ya payakot si Jonas? Agtayo komon huhusgaan a tampol. Wala ray nabasa tayod Biblia ya pakapatnagan ya makpel si Jonas. Balet singa sikatayon amin, imperpekto met si Jonas, tan dakel so lalabanan ton kakapuyan. (Sal. 51:5) Siopad sikatayo so agto nin balot asali tinmakot?

9. No maminsan, antoy iisipen tayod saray pagagawa nen Jehova, tan antoy agtayo nepeg ya lingwanan?

⁹ No maminsan, ompan isipen tayon mair-irap odino imposible ni ingen so pagagawa na Dios ed sikatayo. Ompan nanairapan tayon unoren so ganggan na Dios ed saray Kristiano ya ipulong so maong a balita nipaakar ed Panarian to. (Mat. 24:14) No maminsan et nalilingwanan tayo imay imbaga nen Jesus ya: “Amin a bengatla et posible ed Dios.” (Mar. 10:27) Anggan sikatayon mismo et nalilingwanan tayo itan, kanian natalosan tayoy situasyon nen Jonas. Anto kasi nansumpalay ginawa to?

10, 11. (a) Anto kasi naisip nen Jonas legan ya onaalis imay barkon niluganan to? (b) Antoy agawa sanen wala la rad pegley na dayat?

¹⁰ Imadyin mo pay Jonas ya ililira to lay sarili to diman ed barko​—ompan sakey ya barkon pankargamento ya nanlapud Fenicia. Batbantayan toy kapitan tan saray tripulante a mangimamaneobra ed barko paarawi ed daongan. Legan dan manarawi ed baybay, anganko et inisip nen Jonas ya atakasan to lay pakatatakotan ton maong. Balet, biglan anguman so tiempo.

¹¹ Sinmabi maksil ya dagem kanian angkakabaleg so daluyon ed dayat, mas angkabaleg ni nen saray barko natan. Seguradon samay barkon niluganan nen Jonas ya gawa labat ed kiew et nagmaliw ya singa melmelag a gakgalaw ya pampapasaan na saray higanten daluyon. Amta la kasi nen Jonas ed saman ya ‘si Jehova so amaragem na mabiskeg a bagyo ed dayat,’ unong ya insulat to ed saginonor? Agtayo amta. Balet, anengneng ton nagsipikasi iramay marino ed saray dios da, et amta ton anggapo met so nitulong na saratan. (Lev. 19:4) Unong ed salaysay to et ngalngali la “nabagbag” imay barko. (Jon. 1:4) Sikato balet ey, wala tay kasil na liknaan ton manpikasi ed Dios ya imbatikan to?

12. (a) Akin et agtayo nepeg ya isipen ya anggapoy pibabali nen Jonas lapud inyugip to anggano kaplesay bagyo? (Nengnengen met so footnote.) (b) Panon ya impaamta nen Jehova no siopay sengegan na sayan kalamidad?

¹² Inisip nen Jonas ya anggapo met lanlamang so nagawaan to kanian linmad daledalem na barko tan dinmukol ya anggad akaugip  a maong. * Sanen anengneng na kapitan, binangon to, tan binagaan ton manpikasi met ed dios to. Segsegurado irayan marino ya aliwa yan ordinaryon bagyo, kanian nampapalaranan ira pian naamtaan no siopad saray akalugan ed barko so sengegan na sayan kalamidad. Seguradon mankebet lay Jonas sanen nalilikas ton sikatoy napugta na impanpapalaranan da. On, inmaneobra itan nen Jehova, kanian naamtaan dan siansia no siopa. Si Jonas so sengegan na sayan bagyo!​—Basaen so Jonas 1:5-7.

13. (a) Antoy impatua nen Jonas ed saramay marino? (b) Antoy imbaga nen Jonas ya gawaen na saramay marino, tan akin?

¹³ Impatua nen Jonas so amin ya detalye ed saramay marino. Sikatoy sakey a lingkor na makapanyarin-amin a Dios, si Jehova. Imbatikan tan apasanok to iyan Dios to, kanian amin da natan et napepeligron maong. Sankanengneng nen Jonas ya manputi busaleg na sarayan lalaki lapud takot da. Tinepetan day Jonas no antoy gawaen dad sikato pian ag-onlereg so barko tan ag-ira ompatey. Anto kasi ibaga to? Anganko, iisipen to ni labat so sarili ton nalelener ed saman a dayat et agaylay pannerbiyos to la. Balet, nitepel to kasin ompatey irayan totoo anta sarag to met iran iliktar? Kanian inkuan to: “Alaen yo ak tan ibantak yo ak ed dayat, dia ed ontan say dayat ondeen naani ed sikayo; ta amtak a nisengeg ed siak sinmabi ed sikayo so saya a baleg a bagyo.”​—Jon. 1:12.

14, 15. (a) Panon tayon naalig so baleg a pananisia nen Jonas? (b) Antoy reaksion na saramay marino ed samay imbaga nen Jonas ya gawaen dad sikato?

¹⁴ Nibaga kasi ’tan nen Jonas no bilang payakot? Diad sayan makapataktakot ya situasyon, seguradon aliketan si Jehova ed anengneng ton pakpel tan panagsakripisyo nen Jonas. Dia tayo nanengneng ya talagan baleg so pananisia to. Naalig tayo itan natan no iyuna tayoy pankaabigan na arum. (Juan 13:34, 35) No walay nanengneng tayon mankaukolan na tulong, dia man ed pisikal, emosyonal, odino espiritual, sarag tayo kasi mansakripisyo pian natulongan ira? Napaliket tayon maong si Jehova no ontay gawaen tayo!

¹⁵ Anganko et nakakasian na saraman a marino si Jonas, ta diad primero et agda labay a gawaen so imbaga to. Imbes, ginawa da nin siansiay amin ya nayarian da pian naliktaran da imay bagyo, balet anggapo lanlamang so agawaan da. Lalo ni ingen ya kinmasil. Diad  kaunoran, amoria ran anggapo lay arum a remedyo. Tinmawag ira ed Dios nen Jonas a si Jehova, ya kasian to ra komon, insan da imbuntok si Jonas ed dayat.​—Jon. 1:13-15.

16, 17. Deskribien so agawad si Jonas sanen nibuntok lad dayat. (Nengnengen met iray litrato.)

¹⁶ Imadyin mo pay Jonas ya sankanengneng ton maples lan onaarawi imay barko. Sasalien toy onimwas tan manpaletaw diad dayat. Balet sikatoy ibabasig-basig tan iyaanor na sipwak na danum tan angkabaleg a daluyon kanian anggan antoy pankulipaspas to, linmereg met lanlamang. Inisip ton anggapo lan talagay ilalo to.

¹⁷ Diad saginonor, indeskribe nen Jonas so alikna to ed sayan bekta. Nambabangil so linmad nonot to. Maer-ermen ta naisip ton agto lan balot nanengneng so marakdakep ya templo nen Jehova ed Jerusalem. Nalilikas ton araldalem lay kawalaan to, asingger lad kalekleksaban na saray palandey, tan asagorsagor ed saray dika diad dayat. On, amta ton ditan lay pateyan to tan magmaliw ya lubok to.​—Basaen so Jonas 2:2-6.

18, 19. Antoy agawad si Jonas sanen wala lad sankaaraleman na dayat, anton klase na pinalsa so angakmon ed sikato, tan siopay angibaki ed satan? (Nengnengen met so footnote.)

 ¹⁸ Balet magano pa. Walay nitan lan singa balbaleg ya anino! Manasingger lan manasingger ed si Jonas. Kabebekta et wala lad abay toy balbaleg ya sangi, ya bigbiglan angakmon ed sikato!

¹⁹ Saya la seguroy anggaan nen Jonas. Balet, walay makapakelaw ya agawa. Mabilay ni Jonas! Say amta to et ompatey la diad eges na sayan sira. Balet ta kompleto ni laman to tan oneengas ni! Agmakapanisiad sayan agawa. Seguradon si Jehova ya Dios to so angibaki ed samay ‘baleg a sira ya angakmon ed sikato.’ *​—Jon. 1:17.

20. Antoy naaralan tayo nipaakar ed si Jonas base ed samay pikakasi to sanen walad dalem na baleg a sira?

²⁰ Linmabas so pigapigaran oras. Diad satan ya ambilbilunget ya kawalaan nen Jonas, walay pankanawnawa ton mandalepdep tan manpikasi ed Dios a Jehova. Dakel so naaralan tayo nipaakar ed si Jonas diad sayan pikakasi to ya nirekord ed komaduan kapitulo na Jonas. Nanengneng tayod satan ya pikakasi ya aralem so kakabatan tod Kasulatan, ta aminpiga ton tinukoy iray balikas ed Salmos. Nanengneng met ditan ya si Jonas et maapresyan too. Oniay sampot na samay pikakasi to: “Manbagat ak naani ed sika a tekepay boses na pisasalamat. Bayaran ko naani so insipan ko. Say panangilaban manlapu ed kinen Jehova.”​—Jon. 2:9.

21. Antoy apaneknekan nen Jonas nipaakar ed panangiliktar nen Jehova, tan anton importantin leksion so nepeg tayon tandaan?

²¹ Diad sayan agawa, apaneknekan nen Jonas ya sarag nen Jehova ya isalba so anggan siopa, anggan kapigan, tan anggan iner so kawalaan to. Anggan diad “eges na sira” et insalba to iyan nagogonigon ya lingkor to. (Jon. 1:17) On, sarag nen Jehova ya iliktar tan pansiansiaen ya mabilay so too diad eges na baleg a sira diad taloran agew tan labi​—sikato labat so makagawad satan! Tandaan ya ‘walad lima  na Dios so panlinawam.’ (Dan. 5:23) Utang tayo ed sikato so kada panlinawa tayo, say mismon bilay tayo. Aapresyaen tayo kasi itan? Agta manepeg labat sirin ya ontulok tayod sikato?

22, 23. (a) Panon ya asubok no kasin talagan amta nen Jonas so misalamat? (b) Antoy naaralan tayod si Jonas no makakagawa tayoy lingo?

²² Si Jonas ey? Naaralan to kasi ontulok pian nipanengneng toy pisasalamat tod si Jehova? On. Kayari taloran agew tan taloran labi, sikatoy inyula na sira ed ‘amagan dalin.’ (Jon. 2:10) Isipen pa​—anggano onmay ginawa nen Jonas, si Jehova ni nanggaway paraan pian makasakbit! Siempre, sikato met lay makauley ya mananap ed laen to. Balet ag-abayag, asubok si Jonas no kasin talagan amta toy misalamat. Inkuan na Jonas 3:1, 2: “Say salita nen Jehova sinmabi ed Jonas ed komadua a danay, ya inkuan to: “Onalagey ka, onla ka ed Ninive, saman so baleg a syudad, et ipulong mo naani ed sikato so pulong ya ibilin ko ed sika.” Anto kasi gawaen nen Jonas?

²³ Agla nampaleen si Jonas. Oniay nabasa tayo: “Dia ed ontan inmalagey si Jonas, tan linma ed Ninive unong na imbilin nen Jehova.” (Jon. 3:3) On, sikatoy tinmulok. Malinew sirin ya sikatoy akaaral ed saray lingo to. Nepeg tayo met ya aligen so pananisian impanengneng nen Jonas. Amin tayo et makasalanan tan nalilingo. (Roma 3:23) Balet, onsuko tayo la kasi, odino makaaral tayod saray lingo tayo tan pansagpotan ya tuloken so Dios?

24, 25. (a) Anton tumang so agamoran la nen Jonas? (b) Anto ran tumang so awaten nen Jonas diad arapen?

²⁴ Tinumangan kasi nen Jehova si Jonas lapud intulok to? On. Say sakey a tumang to et akabatan ton akaliktar iramay marino. Tinmundan tampol imay bagyo sanen imbuntok dad dayat si Jonas, tan saraman ya marino et ‘tinmakot ed si Jehova’ tan nambagat ed Sikato imbes a diad saray palson dirios da.​—Jon. 1:15, 16.

²⁵ Diad saginonor, mas baleg nin tumang so sinmabi. Tinukoy nen Jesus imay impanayam nen Jonas ed eges na sira pian ipropesiya so panayam to ed lubok, odino Sheol. (Basaen so Mateo 12:38-40.) Seguradon naliketan ya maong si Jonas no naamtaan to itan sano sikatoy bilayen lamet diad dalin! (Juan 5:28, 29) Labay met nen Jehova ya bendisyonan ka. Singa si Jonas, makaaral ka met kasi ed saray lingom, tan magmaliw kan matulok tan masakripisyo?