KAUKOLAN NA TOTOO SO PANANGARO. No anggapo itan, ag-onaligwas so relasyon na sanasawa, sankapamilya, tan sankakaaro. Malinew sirin ya say panangaro et importante pian maong so kondisyon na isip tayo tan magmaliw tayon maliket. Anto balet so kabaliksan na “panangaro”?

Say tutukoyen dia ya panangaro et aliwan romantikon aro, ya importante met. Imbes, aya may sankatageyan ya klase na panangaro ya mamapakiwas ed sakey pian ipanengneng so tuan malasakit ed arum, ya mas iyuuna to ni ra ingen nen say sarili to. Sayan panangaro et igigiya na prinsipyo na Dios pero kaiba met ed satan so maapit ya liknaan tan panamabli.

Oniay balibalin impangideskribe ed panangaro: “Say aro et maanos tan maomaong. Say aro et aliwan maimon. Agmanlalastog, agmanpapaatagey, ag-onkikiwas a mabanday, agto aanapey dilin pankaabigan to, agmainomay a manpasnok. Agmanbibilang na impakasakitan. Agto panliliketan so ag-inkatunong, noagta panliliketan toy katuaan. Itetepel toy amin a bengatla, . . . maniilalo ed amin a bengatla, mansusungdo ed amin a bengatla. Say aro et agbalot mangangga.”​—1 Corinto 13:4-8.

Say ontan ya panangaro “et agbalot mangangga” odino onsaew. Kanian, mas ombiskeg itan diad ilabas na panaon. Tan lapud say aro et maanos, maomaong, tan akaparaan ya mamerdona, satan et “perpekton bedber na pankakasakey.” (Colosas 3:14) Kanian, no say relasyon et walaan na ontan ya panangaro, malet tan maliket itan anggan aliwan perpekto iray totoo. Singa bilang, nengnengen tayoy relasyon na sanasawa.

Imbangat nen Jesus iray importantin prinsipyo parad sanasawa. Singa bilang, imbaga to: “‘Taynan na laki so ama tan ina to tan iyamong toy asawa to, tan sikaran dua et magmaliw a sakey a laman’ . . . Sirin, say impankasakey na Dios et agnepeg a pansianen na too.” (Mateo 19:5, 6) Walay duaran importantin prinsipyo ed saya.

“SIKARAN DUA ET MAGMALIW A SAKEY A LAMAN.” Say panangasawa so sankaapitan ya pankasakey na totoo, tan say panangaro so manprotekta ed satan ed pikalugoran​—ya say asawan laki o asawan bii et “magmaliw ya sakey a laman” ed arum likud ed asawa to. (1 Corinto 6:16; Hebreo 13:4) Say agpanmatoor et deralen toy talek tan relasyon na sanasawa. No wala ray ananak, nayarin mas grabe ni epekto tod emosyon da, nalikna ra ya ag-ira aaroen, anggapoy kompiyansa dad sarili da, o walay eem-eman dan sakit na linawa.

“SAY IMPANKASAKEY NA DIOS.” Say panangasawa et sagradon pankasakey na duaran too. Saray sanasawan rerespetoen da itan ya uksoyan et pansasagpotan dan paeleten so relasyon da bilang sanasawa. Ag-ira manaanap na paraan pian misian no wala ray problema. Say panangaro ra et mabiskeg tan matibay. Say ontan ya panangaro et “itetepel toy amin a bengatla,” ya ontulong pian naayos iray problema tan mansiansia so deen tan balibalin ulopan na sanasawa.

No walay masakripisyon aro na saray ateng, balibali epekto na satan ed saray ananak. Oniay naobserbaan na kabataan ya si Jessica: “Talagan manaaroan tan manrerespetoan si tatay tan nanay ko. No nanenengneng kon rerespetoen nen nanay si tatay, lalo la no akaarap kami ya ananak, labalabay ko ya aligen si nanay ko.”

Say panangaro so manunan kualidad na Dios. Diad tua, ibabaga na Biblia: “Say Dios et aro.” (1 Juan 4:8) Agsirin pankelawan ya si Jehova et tinawag met ya “maliket a Dios.” (1 Timoteo 1:11) Magmaliw itayo met ya maliket no pansasagpotan tayon aligen iray kualidad na Amalsa​—lalo lad panangaro to. Ibabaga na Efeso 5:1, 2: “Alig yoy Dios, bilang inad-aro ton ananak, tan mantultuloy kayon manbilay diad aro.”