SAY nanduruma tan dakdakel ya lenguahe ed mundo—manga 7,000 la natan—et nayarin magmaliw a problema ed pambiahe, pannegosyo, edukasyon, tan gobierno. Manlapu la nensaman et onia lay situasyon. Alimbawa, manga 2,500 ya taon lay apalabas, diad uley nen Arin Ahasuero (nayarin si Xerxes I), impawit na saray Persiano so opisyal iran ganggan diad sakop da, “manlapud India anggad Etiopia, a 127 probinsya, unong ed panagsulat na kada probinsya tan unong ed sarilin lenguahe na kada baley.” *

Natan, maslak ya organisasyon—anggan saray gobierno—et agda salien ya gawaen so ontan kairap ya kimey. Balet walay sakey ya organisasyon ya ontan so gagawaen to. Saray Tasi nen Jehova et manpa-publish na saray magasin, audio tan video, tan dakdakel a libro—kaiba lay Biblia—diad masulok ya 750 a lenguahe. Kaibad saya so manga 80 sign language. Manpa-publish met iray nanduruman bersion na Braille parad saray bulag.

Ontan met, ag-itan gagawaen na Saray Tasi nen Jehova pian makalmoy kuarta. Diad tua, boluntaryo so amin ya translator tan arum nin mankikimey ya kaiba ra. Akin et ontan lay pansasagpot da ya man-translate ed dakdakel ya lenguahe, tan panon dan gagawaen itan?