Inyaplika na minilyon ya totoo iray prinsipyo ya walad saray akaunan artikulo tan nansagpot iran maong pian naekal ed puso ra so panangidumaduma odino diskriminasyon. Balet, diad tua, agtayon talaga nasarag ya ekalen so amin a klase na panangidumaduma odino diskriminasyon. Labay to kasin ibaga ya anggapo lay solusyon ed saya?

Anggapoy agawaan na gobierno na too pian naekal so panangidumaduma odino diskriminasyon na saray totoo. Balet, labay to kasin ibaga ya anggapo lay gobiernon makapangekal ed satan?

Pian natambal so sakit ya panangidumaduma odino diskriminasyon, kaukolan ya say sakey ya gobierno et nagawaan to iraya:

1. 1. Napakiwas to iray totoo ya umanen so paraan na panagnonot tan nalilikna da ed arum

2. 2. Ekalen to so liknaan ya mamapairap ed sakey pian tratoen so arum ya patas

3. 3. Napantiwalaan iray manuley na satan tan papablien da so amin ya walad sakop da

4. 4. Napankakasakey na satan so amin ya totoo ed interon mundo

Ipapaseguro na Biblia ya walay ontan a gobierno ya ginawa na Dios. Tatawagen itan ya “Panarian na Dios.”​—Lucas 4:43.

Imanoen irayan bendisyon ya iter na satan a gobierno.

“Naaralan na saray manaayam ed sayan dalin so inkatunong.”​—ISAIAS 26:9.

“Say resulta na tuan inkatunong et kareenan, tan say bunga na tuan inkatunong et agmanganggan deen tan kaligenan.”​—ISAIAS 32:17.

Antoy labay ya ibaga na satan? Ibangat na Panarian na Dios ed saray totoo no antoy duga. No amta na totoo ya ibiig so duga ed aliwa, nauman so nononoten tan panagtrato da ed sakey tan sakey. Naamtaan na kada sakey ya importantin aroen so amin a klase na totoo.

‘Punasen na Dios so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.’​—APOCALIPSIS 21:4.

Antoy labay ya ibaga na satan? Ekalen na Dios so amin ya ansakisakit ya epekto na ag-inkahustisya. Saramay datin biktima na ag-inkahustisya et naandi la ed puso ra so pambusol tan sakit na linawa ed saramay mamubusol ed sikara.

“Agto mangukom a base labat ed nanengneng to, odino mangipetek a base labat ed narengelan to. Patas so pangukom to ed saray pobri, tan sikatoy mangipetek parad pakagunggonaan na saray mauyamo ed dalin.”​—ISAIAS 11:3, 4.

Antoy labay ya ibaga na satan? Si Jesu-Kristo, say Ari ed Panarian na Dios diad tawen, et patas tan anggapoy panangidumaduma na pananguley to diad interon dalin. Anggapoy papaboran nen Jesus ya bansa odino lahi tan seguroen to ya natumbok ed interon mundo iray matunong ya ganggan to.

Ibabangat na Panarian na Dios iray totoo ya nawalaan na ‘parehon kanonotan tan parehon panangaro, a sigpot iran mankakasakey, a saksakey so nononoten da.’​—FILIPOS 2:2.

Antoy labay ya ibaga na satan? Mankakasakey iray totoon manpapasakop ed Panarian na Dios aliwan pian labat ipanengneng ya walay pankakasakey da, noagta ‘sigpot iran mankakasakey’ lapud aaroen da so sakey tan sakey.