Manaayam so pamilya mi ed Tellancourt, diad northeastern France. Say tatay ko et French, tan say nanay ko et Italian. Nen waloy taon ko, inmalis kami ed melag a komunidad na saray mairap-bilay tan miuupan trabahador diad Rome, Italy. Maproblema so bilay na pamilya mi. Mabetbet ya mankokolkol iray ateng ko lapud problemad kuarta.

Nen 15 años ko, imbaga nen nanay ko ya ompaway-paway ak met tan mikaaro ak. Kanian onaakar ak tan mabetbet ak ya anggapod abung. Ag-abayag et abarkada ak. Aminsan, walay lakin inmasingger ed siak ya singa makaaro. Inikdan to ak na druga, inawat ko ta labay kon paneknekan ya baleg ak la. Akapila ak ya tampol ed grupo na saray managdruga tan imoral. Aminpiga ak ya naabuso ed sekso. Nagmaliw ak a patapon; anggapo lay pibabalik ed bilay ko. Maer-ermen ak. Nen 16 ko, sinalik so manbikkel. Inminum ak na sakey bote na alak tan tinmaboy ak ed ilog. Taloy agew ya agda ak nabangon.

Kayari na saman, labay ko lay manbilay, balet ta nagmaliw ak ya bayolenti tan managloko. Lalagyaten ko ray totoo ya mi-sex, mandruga ed abung da, insan ko ra takewan. Uusaren ak na saray angkabaleg ya sindikato ya manlakoy druga diad Italy. Naynay kon nakaka-enkuentro ray pulis. Singa anggapo lay kana tan direksion na bilay ko. Balet amtak a walay rason no akin ya mabilay ak ni. Nampikasi ak ed Dios, kinerew kon ikdan to ak na sakey taon labat ya deen tan liket.

Nen 24 años ko, nandesisyon ak ya manayam ed England. Lapud koneksion kod saray drug dealer, walad peligro so bilay ko. Antis ak ya onalis, binisitak si nanay ko tan abigla ak ta mitotongtong ed sikato nipaakar ed Biblia so sakey a lakin si Annunziato Lugarà. * Lapud amtak ya datin kriminal, ataktakot ak tan tinepet ko no akin ya wadman. Inistorya tod siak ya inuman toy kabibilay to pian magmaliw ya Tasi nen Jehova, tan impanpromisa  to ak ya mitongtong ak ed saray Tasi kasabik ed England. Inmesel ak. Balet kasabik diman, pinawil kon tampol so datin kabibilay ko.

Sakey ya agew, diad matoon karsada ed London, walay nabet kon Tasi ya mangiiter na magasin ya Panag-bantayan tan Onliing! Anonotan ko may impormisak ed si Annunziato, kanian tinepet kod samay Tasi no sarag to ak ya iyaralan na Biblia.

Manbilib ak ed saray nanaaralan kod Biblia. Singa bilang, tinmalos ed pusok imay akasulat ed 1 Juan 1:9 ya oniay kuan to nipaakar ed Dios: “No ipatua tayo iray kasalanan tayo, sikatayoy perdonaen to tan linisan to ed amin ya ag-inkatunong lapud sikatoy matoor tan matunong.” Balbaleg so epekto na satan a bersikulo ed siak ta marutdutak so kabibilay ko. Akiaral ak a tampol diad Kingdom Hall na Saray Tasi nen Jehova. Impalikna dan welcome ak. Nen naobserbaan koy maapit ya pankakaaro da​—ya abayag ko lan pipirawaten—​labay koy magmaliw ya kabiangan na singa pamilyan kongregasyon da.

Agak masyadon nairapan ya taynanan so druga tan imoral a kabibilay. Mas nairapan ak ya umanen so ugalik. Kaukolan kon respetoen tan ipanengneng so konsiderasyon ed totoo. Diad tua, anggad natan et wala ni ray makapuy ya ugali ya lalabanan ko. Balet diad tulong nen Jehova, wala met la ray angumanan ko. Kayari anem bulan ya panaaral koy Biblia, abautismoan ak bilang Tasi nen Jehova nen 1997.

Kayarik ya abautismoan, nankasal kami nen Barbara ya agano met nin Tasi nen Jehova. Nen naimano na sakey ed saray abayag lan kakaarok so baleg ya impanguman ko, nanaral met na Biblia. Nagmaliw ya Tasi, ontan met ed si atsi to. Nanaral met na Biblia so atsi nen baik, ya masulok da lan 80, tan abautismoan antis ya inatey.

Natan et elder ak la ed kongregasyon mi, tan sikami nen asawak et full-time ya ministro, ontutulong kamin manbangat na Biblia ed totoon Italian so lenguahe da diad London. No maminsan et naeermenan ak no nanonotan koy datin kabibilay ko, balet balbaleg a tulong ed siak si Barbara. Awalaan ak a siansia na maliket a pamilya ya abayag ko lan pirawat, tan sakey ya maaron Ama ya abayag ko lan aanapen. Kinerew kod Dios ya ikdan to ak na sakey taon labat ya deen tan liket, balet mas ni so inter to!