NO ASALIM lay inateyan na inad-aro, ompan nanduruma met so aliknam: nagogonigon, maermen, tan onkapuy ka. Ompan aliknam met so pasnok, pakakakonsiensia, tan takot. Nayarin anggapo lay ganam ya manbilay.

Tandaan mo ya no maneermen ka, agto labay ya ibagan makapuy ka. Ipapanengneng labat na satan ya inar-arom imay inatey. Balet, posible kasin anggan panon et nabawasay ermen mo?

Anggano singa agla ontunda so sakit ya naliliknam, nayarin makatulong ed sika irayan suhestion:

IKDAN MOY PANAON SO SARILIM YA MANERMEN

Aliwan parepareho so paraan tan karukey na paneermen na kada too. Balet siansian makatulong so iyakis pian nainawaan so liknaan. Oniay imbaga nen Vanessa ya abitlad gapo: “Basta iyakis ko labat; kaukolan kon ipaway so sakit ya naliliknak.” Oniay imbaga nen Sofía nen biglan inatey so agi ton bii: “Ansakisakit no nonoten koy agawa, singa sugat ya lulukasan tan lilinisan lapud naimpeksion. Ngalngali agko nasarag so sakit ya naliliknak, balet makakatulong no arapen ko itan pian onabig so sugat.”

IBAGAM ED ARUM SO IISIPEN TAN NALILIKNAM

Tua, no maminsan et labay moy manbukbukor. Balet nabelatan ka no soloen moy ermen. Oniay  nanonotan nen Jared ya mantaon na 17 sanen inatey so tatay to: “Ibabagak ed arum so naliliknak. Agko amta no natatalosan da ak, pero balibali liknaan no nibagam itan ed arum.” Si Janice, ya abitlad unonan artikulo, et onia ni inyarum ton balibalin epekto na satan: “Talagan nalemewan so liknaan mo no itongtong mo itan ed arum. Pakaliknak et natatalosan day naliliknak tan agko bukbukor.”

PATULONGAN KA

Oniay imbaga na sakey a doktor: “No tampol ya patulongan iramay maneermen ed saray kakaaro tan kakanayon da, mas mainomay dan naanosan tan nasarag so paneermen da.” Ibagam ed saray kakaarom no panon da kan natulongan; seguradon labay da kan tulongan balet ompan agda amta no panon.​—Proverbio 17:17.

ONASINGGER KAD DIOS

Imbaga nen Tina: “Nen biglan inatey so asawak lapud cancer, agko la nibaga ed sikato iray naliliknak, kanian diad Dios la so pangibabagaan kon amin! Kada kabangon ko, kekerewen kod Sikato ya tulongan to ak ya nasarag koy sanagew ya onlabas. Agko la nabilang so karakel na intulong na Dios ed siak.” Oniay imbaga nen Tarsha, ya mantaon na 22 nen inatey so nanay to: “Naliligliwa ak na inagew-agew ya pambabasak na Biblia. Lapud satan, saray makapabiskeg a bengatla so sankanonot ko.”

IMADYINEN SO KIOLI

Onia ni intuloy nen Tina: “Diad gapo, singa agak naliligliwa na ilalon kioli ta kakkaukolan koy asawak​—kakkaukolan met na saray ana’ko so ama da—​natan la. Balet kayari na apat taon, atan la so paniilaloan ko. Makakatulong itan ed siak pian agak onikban. No iimadyinen ko ya nanengneng ko lamet so asawak, ondeen so liknaan ko tan maliket ak!”

Ompan agtampol nabawasan so paneermen mo. Balet makapaligliwa so eksperiensya nen Vanessa. Imbaga to, “Ompan pakaliknam et agmo nasarag, pero kalkalnan nabawasan lanlamang so ermen mo.”

Tua, seguradon nailiw mo so inad-arom, balet siansian walay kana na bilay mo. Diad maaron tulong na Dios, siansian naliknam so panangaro na saray kakaarom tan magmaliw kan maliket. Tan magano lan bilayen na Dios iray inaatey. Labay ton nalakap mo lamet iray inad-arom. Diad satan et permanente lan naekal so amin ya sakit ya naliliknam!