Binmaleg ak ed Puerto Limón, syudad ya asingger ed dayat ya walad bandad bukig na Costa Rica. Walora kamin sanaagi, tan siak so komapito. Inatey si tatay ko nen waloy taon ko, kanian si nanay ko la so amabaleg ed sikami.

Paboritok so baseball. Ugaw ak ni, labalabay ko la ’tan. Nen asingger ak lan man-20, akila ak ed amateur league team. Legan ak ya manggagalaw parad satan ya team nen 20 ak la, walay talent scout ya akadiskobre ed siak, tan tinepet to no labay koy manggalaw ed professional team ed Nicaragua. Balet mansasakit ed saman si nanay ko tan siak so mangaasikaso, kanian agko labay so onlad Nicaragua. Agko inawat so offer to. Ag-abayag, walay sananey ya angimbitad siak ya manggalaw ed national baseball team na Costa Rica, ya saray membro et amateur league players ya pinilin maong. Inawat ko itan. Kaiba ak ed national team manlapud 1949 anggad 1952, tan aminpiga ak ya nanggalaw ed Cuba, Mexico, tan Nicaragua. Baseman ak tan nayaryari ak ed satan. Sarag koy 17 ya dirediretson game ya agak balot onmintis. Malikeliket ak no narerengel kon iyeeyag na saray fans so ngaran ko!

Balet imoral ak. Anggano saksakey so girlfriend ko, mabii ak. Grabe met so kakainum ko. Aminsan et abuanges ak ya maong kanian kabangon ko et agko natandaan no panon ak ya akasempet! Mansusugal ak met na domino tan ontataya ak ed lotto.

Legan ya ontan so kabibilay ko, nagmaliw ya Tasi nen Jehova si nanay ko. Sinali to ak ya pulongan, balet anggapoy agawaan to ta akapokus ak ya maong ed baseball. No manti-training kami, anggano oras lay panangan et agko naliknay eras! Galaw labat so kargay ulok. Inar-arok ya maong so baseball!

Balet nen 29 ko, na-injured ak na grabe legan kon sasampaten so bola. Nen inmabig ak la, agak la pinmawil ed professional team. Balet mimila ak nin siansia ed pangipapasal  na saray player diad amateur league team ya asingger ed abung ko.

Nen 1957, inmatendi ak ed kombension na Saray Tasi nen Jehova diad stadium ya datin nanggalawan koy baseball. Diad yurongan, apansin ko ya talagan marespeto iray Tasi, aliwan singa saray magugulon fans na baseball. Lapud satan ya naobserbaan ko ed kombension, nampaiyaral ak na Biblia ed saray Tasi tan inmatendi ak met lad saray aral da.

Pambiliban ko ray nanaaralan kod Biblia. Singa bilang, imbaga nen Jesus ya diad kaunoran iran agew et ipulong na saray disipulo to so maong a balita na Panarian ed interon mundo. (Mateo 24:14) Naaralan ko met ya gagawaen itan na saray tuan Kristiano aliwan pian nakuartaan ira. Imbaga nen Jesus: “Inawat yon anggapoy bayar, iter yon anggapoy bayar.”—Mateo 10:8.

Legan ak ya manaaral na Biblia, ikokomparak so nanaaralan ko ed nanenengneng ko ed saray Tasi nen Jehova. Bilib ak ed inkakuli da ya ipulong so maong a balita na Panarian ed interon mundo. Anengneng ko ya uunoren da imay ingganggan nen Jesus ed saray Kristiano ya nepeg a mabulos iran mangiter. Kanian nen abasak so imbitasyon nen Jesus ya walad Marcos 10:21 ya “Gala, magmaliw kan patumbok ko,” labay ko met lay magmaliw ya Tasi.

Balet abayag ni antis ak ya talagan anguman. Singa bilang, dakel a taon ya sinimbak nin tatayaan imay “lucky number” kod lotto. Balet naaralan kod Biblia ya ag-awaten na Dios iray mandadayew ed “dios na Suerte,” pati saray maagum. (Isaias 65:11; Colosas 3:5) Kanian nandesisyon ak ya ontunda ak lan mansugal. Diad samay unonan Simba ya agak tinmaya ed lotto, analo so “lucky number” ko! Kakantiawan ak na arum ta agak tinmaya, tan pipiliten da ak ya mansugal lamet, balet agko lan talaga labay. Agak lan balot nansugal.

Asubok met so “balon personalidad” ko diad samay mismon agew ya nampabautismo ak diad kombension na Saray Tasi nen Jehova. (Efeso 4:24) Diad saman a labi, pinmawil ak ed hotel ya tutuloyan ko tan asabian kon manaalagar ed paway na kuartok imay datin girlfriend ko. “Sige la, Sammy,” so kuan tod siak. “Man-good time ta met!” Balet inmebat ak ya tampol, “Andi!” Imbagak ed sikato ya uunoren ko la natan so estandarte na Biblia ed moral. (1 Corinto 6:18) “Anto?” so kuan to. Insan to binalawbalaw so ibabaga na Biblia ed seksual ya imoralidad tan pinilit to ak ya manpawilan kami. Balet linmoob ak lad kuartok tan intalak koy puerta. Natan et proud ak ya mangibagan manlapu nen nan-Tasi ak nen 1958, apansiansiak ya malinis so kabibilay ko.

No isulat ko labat so amin ya balibalin resulta na impangunor kod simbawa na Biblia, ompan makagawa ak na sakey ya libro! Kaibad satan so impakawalaan koy dakel ya tuan kakaaro, wala lay direksion na bilay ko, tan malikeliket ak.

Labalabay ko nin siansiay baseball, balet aliwa lan satan so manuna ed bilay ko. Nen player ak nid baseball, sinmikat tan akuartaan ak, balet agbinmayag iratan. Say relasyon ko balet ed Dios tan saray kaagian ko et mansiansia ed anggad angga. Ibabaga na Biblia: “Say mundo tan say pilalek na satan et naandi, balet samay manggagawa na linawa na Dios et mansiansia ya anggad angga.” (1 Juan 2:17) Natan, say inar-arok lan maong et si Jehova tan saray mandadayew ed sikato!