1, 2. Antoy panmoria na arum ed trabaho ra?

SAY pangipapasen na arum ed sarili da et base ed trabaho odino posisyon da. Satan so basiyan da no kasin importante ira odino andi. Diad arum a kultura, no walay first time dan nakabat, say sakey ed saray unonan itetepet da et, “Antoy trabahom?”

² No maminsan, idedeskribe na Biblia so totoo panamegley na trabaho ra. Abitla si “Mateo a managsingil na buis”; “Simon, a managkurti na katat”; tan si “Lucas ya inad-aron doktor.” (Mat. 10:3; Gawa 10:6; Col. 4:14) Nakakabat met iray totoo panamegley na saray espiritual ya asainmin odino pribilehyo da. Nabasa tayo so nipaakar ed si Arin David, propeta Elias, tan apostol Pablo. Importante ed sarayan lalaki so inter na Dios ya asainmin da. No wala ray pribilehyo tayo, kaukolan ya pablien tayo met iratan.

3. Akin et kaukolan ya ipasal na saray maedad la iray mas ugaw ni? (Nengnengen so litratod gapo na artikulo.)

³ Maslak ed sikatayo et labalabay tayoy trabaho tayo tan no nayari et mansiansia itan. Makapaermen balet ta manlapu lad panaon nen Adan, ontatatken so amin tan nasasalatan na sananey ya  henerasyon. (Ecl. 1:4) Diad apalabas iran taon, nagmaliw iyan subok ed saray tuan Kristiano. Linmaknab tan nagmaliw ya komplikado so kimey na saray totoo nen Jehova. Lapud saray balon proyekto, wala met iray balon proseso na pankimey ed saratan—mabetbet ya kaibad satan so pangusar na teknolohiyan maples ya manguuman. Nayarin nairapan iray maedad la ya mibansag ed sarayan pananguman. (Luc. 5:39) Anggano ag-ira bilang nairapan, siansia nin mas mabiskeg tan mapaot iray mas ugaw ni. (Pro. 20:29) Kanian panangipanengneng na panangaro tan mas praktikal parad saray maedad la no iparaan da ray mas ugaw ni parad kaaruman iran responsabilidad.—Basaen so Salmo 71:18.

4. Akin ya mairap parad arum so mangiter na responsabilidad? (Nengnengen so kahon ya “ No Akin ya Naiirapan so Arum ya Mangiter na Responsabilidad.”)

⁴ Nayarin aliwan mainomay parad saray walaan na pribilehyo tan autoridad so mangiter na responsabilidad ed saray mas ugaw ni. Ompan natatakot so arum ya naandi ed sikara so papablien dan pribilehyo. Posiblin napapagaan so arum ya naandi so autoridad da, tan iisipen dan agnasarag na saray mas ugaw ni so kimey da. Nayarin irason na arum ya anggapoy panaon dan mangipasal. Saray mas ugaw ni balet et nepeg iran manalwar ta ompan agla ra makaanos no agni ra naikdan na responsabilidad.

5. Anto ran tepet so pantongtongan tayod sayan artikulo?

⁵ Aralen tayoy nipaakar ed pangiter na responsabilidad diad duaran anggulo. Unona, panon ya natulongan na saray maedad la iray mas ugaw ni ya nawalaan na kaaruman a responsabilidad, tan akin ya importante itan? (2 Tim. 2:2) Komadua, akin ya importantin pansiansiaen na saray mas ugaw ni so maong ya ugali legan dan aasistian tan makakaaral ed saray mas eksperiensyadon agagi? Bilang pangigapo, nengnengen tayo no panon ya tinulongan nen Arin David so anak to pian nagawaay importantin responsabilidad.

6. Antoy labay nen Arin David ya gawaen, tan antoy ebat nen Jehova?

⁶ Kalabas na pigaran taon ya nanamot-amot  si David, sikatoy nagmaliw ya ari tan nanayam ed balibalin abung. Naeermenan ta anggapoy “abung” odino templo ya parad si Jehova, kanian labay toy mangipaalagey. Oniay imbaga tod si Natan ya propeta: “Manaayam ak ed abung a gawad sedro, balet say kaban na sipanan nen Jehova et walad saray abel a tolda.” Inmebat si Natan: “Gawam so antokaman a walad pusom, ta walad sika so tuan Dios.” Balet, duma so ebat nen Jehova. Oniay impaibaga tod si David: “Aliwan sika so mangipaalagey na abung a panayaman ko.” Anggano maaron pinaseguroan nen Jehova si David ya siansia nin sikatoy bendisyonan To, si Solomon ya anak nen David so labay na Dios ya mangipaalagey na templo. Antoy reaksion nen David?—1 Awa. 17:1-4, 8, 11, 12; 29:1.

7. Antoy reaksion nen David ed instruksion nen Jehova?

⁷ Agbinmarong si David, tan sinuportaan to nin siansiay pangipaalagey ed templo anggano aliwan sikatoy mangidaulo ed satan. Diad tua, tinawag itan ya templo nen Solomon, aliwan templo nen David. Anggano posiblin adismaya si David ta agto agawaay pirawat na puso to, sinuportaan toy proyekto. Maliket ya angorganisa na saray grupon nankimey tan nantipon na balatyang, gansa, pilak, tan balitok, pati saray troso na sedro. Niarum ni, pinaseseg toy Solomon: “Natan, ana’ko, komon ta si Jehova et walad sika, tan komon ta ontalona ka tan ipaalagey moy abung nen Jehova a Dios mo, unong a sinalita to nipaakar ed sika.”—1 Awa. 22:11, 14-16.

8. Akin ya nayarin naisip nen David ya aliwan kualipikado si Solomon, balet antoy ginawa to?

⁸ Basaen so 1 Awaran 22:5. Nayarin naisip nen David ya aliwan kualipikado si Solomon ya mangidaulo ed satan a balbaleg ya proyekto. Say templo et “makapadinayew a maong,” tan diad saman et “ugaw ni tan anggapo ni eksperiensya” nen Solomon. Balet, amta nen David ya tulongan nen Jehova si Solomon pian nagawaan toy responsabilidad to. Kanian nampokus si David ed no antoy nitulong to, say panipon na dakdakel ya materyales.

9. Akin ya naliliketan iray maedad la no ipasa da ray responsabilidad da? Mangiter na ilustrasyon.

⁹ Agnepeg ya nadismaya iray maedad lan brother no kaukolan da lan ipasa ed saray mas ugaw ya brother iray responsabilidad da. Imbes, nepeg dan isipen ya parad pankaabigan na organisasyon nen Jehova no nipasal iray mas ugaw ni ya manggawad saray kimey. Kaukolan ya maliket iray aturon lalaki no magmaliw lan kualipikado iray mas ugaw ni ya impasal dad saray kimey. Bilang ilustrasyon, imadyin yo pay sakey ya tatay ya ibabangat toy anak ton manmaneho. Nen melag ni so anak, oobserbaan to labat si tatay to. Nen baleg la, ipapaliwawa la nen tatay to no panoy manmaneho. Insan nen wala lad suston edad, pinanmaneho la nen tatay to, balet siansia nin ibabangat tan ipapasal to. Ompan no maminsan et mansublayan iran manmaneho, balet agmanbayag, say  anak la so naynay ya manmaneho, odino sikato lan diretso ta masiken lay tatay to. Naliliketan so marunong ya tatay ta makapanmaneho lay anak to tan agmaermen ya aliwa lan sikatoy manmamaneho. Ontan met, naliliketan iray maedad la no nipasal da ray mas ugaw ni ya mangawat na saray teokratikon responsabilidad.

10. Antoy panmoria nen Moises ed galang tan autoridad?

¹⁰ Nepeg ya manalwar iray maedad la pian ag-ira mangimon. Imanoen pay reaksion nen Moises nen wala ray walad kampo na Israel ya kinmiwas a singa propeta. (Basaen so Numeros 11:24-29.) Labay iran banoen nen Josue ya lingkor nen Moises. Nayarin inisip to ya labay dan samsamen so posisyon tan autoridad nen Moises. Balet oniay imbaga nen Moises: “Mangiimon ka ta parad siak? Aleg, labay ko ingen ya amin a totoo nen Jehova et magmaliw a propeta, tan iyan nen Jehova so espiritu tod sikara!” Atalosan nen Moises ya atan so panlabayan nen Jehova. Kanian imbes ya pirawaten nen Moises so galang, imbaga ton labay to ya makaawat met na espiritu nen Jehova so amin ya lingkor To. Singa si Moises, agta maliket tayo no wala ray makaawat na pribilehyo ya labay tayo met ya naawat?

11. Antoy imbaga na sakey ya brother nen niiter ed arum so datin responsabilidad to?

¹¹ Diad panaon tayo, dakdakel ya brother so pigay dekadan nansagpot ya maong tan angipasal ed arum ya mangawat na kaaruman iran responsabilidad. Singa bilang, si Brother Peter et masulok ya 74 taon ed full time ya panaglingkor, tan say 35 taon ed satan et diad branch office ed Europe. Abayag ya sikato so overseer ed Service Department. Balet diad agano ni, niiter itan ya responsabilidad ed si Paul ya mas ugaw tan pigay taon ya katrabaho to. Nen tinepetan si Peter no antoy nalilikna tod impanguman na asainmin to, oniay inyebat to: “Malikeliket ak ta wala ray nipasal a brother ya mangawat na mas ambelat iran responsabilidad tan aasikasoen dan maong iray kimey da.”

12. Antoy naaralan tayod ibabaga na Biblia nipaakar ed si Rehoboam?

¹² Nen inatey lay Solomon, si Rehoboam ya anak to so sinmublay ya ari. Nen kaukolan nen Rehoboam so simbawa no panon ton gawaen iray responsabilidad to, kinonsulta to nin unona iray mamasiken. Balet agto dinengel so simbawa ra! Imbes, say dinengel to et saray kalangweran a lalakin kaugawan to tan manlilingkor lad sikato. Mauges so nansumpalan na desisyon to. (2 Awa. 10:6-11, 19) Antoy naaralan tayod satan? Makabat no konsultaen tan dengelen tayoy simbawa na saray mas maedad tan eksperiensyado. Anggano agmet kaukolan ya eksakton aligen na saray mas ugaw so paraan na saray maedad la, agda nepeg ya basta ibaliwala iray simbawa ra.

13. Panoy nepeg ya pikimey na saray mas ugaw ed saray maedad la?

¹³ Nayarin wala ray mas ugaw ya sikara la natan so mangidadaulo tan kaiba ed saray idadaulo da iray maedad lan brother. Anggano saray mas ugaw la so mangidadaulo, siansia nin makaaral irad karunongan tan eksperiensya na saray maedad la antis iran mandesisyon. Si Paul ya abitla niman ya sinmalat ed si Peter bilang overseer ed sakey ya departamento ed Bethel et oniay imbaga to: “Lanang kon kekerewen so simbawa nen kuya Peter, tan papasesegen ko ray kaibak ed departamento ya ontan met so gawaen da.”

14. Antoy naaralan tayod ulopan nen Timoteo tan apostol Pablo?

¹⁴ Say kalangweran ya si Timoteo et pigay taon ya kaiba nen apostol Pablo. (Basaen so Filipos 2:20-22.) Oniay insulat nen Pablo ed saray taga Corinto: “Ibakik ed sikayo si  Timoteo, ta sikatoy inad-arok tan matoor ya ana’ko ed Katawan. Ipanonot tod sikayo iray paraan ko nipaakar ed si Kristo Jesus, a singa ibabangat ko ed amin a pasen diad kada kongregasyon.” (1 Cor. 4:17) Nanengneng ed satan so maapit ya ulopan nen Pablo tan Timoteo. Impanaon nen Pablo ya ibangat ed si Timoteo ‘iray paraan to nipaakar ed si Kristo.’ Akaaral ya maong si Timoteo tan sikatoy inad-aro nen Pablo, tan matalek si Pablo ya sarag nen Timoteo ya itarya so espiritual ya pankaukolan na saray taga Corinto. Talagan maabig ya alimbawa si Pablo ed saray elder natan ya mangipapasal ed arum a brother ya mangidaulo ed kongregasyon!

15. Lapud saray pananguman, panon a makatulong ed sikatayo so simbawa nen Pablo ed saray Kristiano ed Roma?

¹⁵ Manbibilay tayod nikadkaduman panaon. Say kabiangan na organisasyon nen Jehova ed dalin et onaaligwas, balet lapud satan et kaukolan iray pananguman. Apektado itayo na pananguman, kanian mapaabeba tayo komon ya imanoen so panlabayan nen Jehova, aliwan say sarili tayo. No ontan so gawaen tayo, napansiansia tayoy pankakasakey. Oniay insulat nen Pablo ed saray Kristiano ed Roma: “Ibagak ed balang sakey ed sikayo ditan ya agkayo maniisip na alabas ed sarili yo nen say manepeg yon isipen, noagta kada sakey et manisip diad paraan a pakapatnagan na limpion kanonotan unong ed pananisia ya inter na Dios ed sikato. Ta no panon a say sakey a laman et walaan na dakel a kabiangan, balet agnampapara so usar na saratan, sikatayo met, anggaman dakel itayo, et saksakey itayon laman a nikasakey ed si Kristo.”—Roma 12:3-5.

16. Antoy kaukolan ya gawaen na saray maedad la tan mas ugaw ni, ontan met ed saray asawan bibii, pian napansiansiay kareenan tan pankakasakey ed organisasyon nen Jehova?

¹⁶ Anggan antoy sirkumstansya tayo sirin, komon ta mansagpot itayon amin pian suportaan so makapadinayew ya Panarian nen Jehova. Sikayo ran maedad la, ibangat yo ray mas ugaw ni no panon yon gagawaen iray responsabilidad yo. Sikayo ran mas ugaw nin brother, awat yo ray responsabilidad, magmaliw kayon mapaabeba, tan respeto yon lanang iray maedad la. Tan sikayo ran asawan bibii, alig yoy asawa nen Aquila ya si Priscila. Inibaan tan matoor ton sinuportaay asawa to anggano anguman iray sirkumstansya da.—Gawa 18:2.

17. Antoy imbaga nen Jesus ya nagawaan na saray disipulo to, tan anton kimey so imbangat tod sikara?

¹⁷ No nipaakar ed pangipasal ed arum parad kaaruman iran responsabilidad, say sankaabigan ya alimbawa et si Jesus. Amta to ya manampot so ministeryo to diad dalin tan ituloy itan na arum. Anggano aliwan perpekto iray disipulo to, walay talek tod sikara tan imbaga to ya mas baleg iray kimey ya gawaen da nen saray agawaan to. (Juan 14:12) Impasal to ran maong, tan impulong day maong a balita ed amin diad saman a panaon.—Col. 1:23.

18. Antoy ilalo tayod arapen, tan antoy importantin gawaen tayo natan?

¹⁸ Kayari na impatey nen Jesus, sikatoy apaoli tan naikdan na mas dakel ya kimey tan autoridad ya “mas atagey ni nen say amin a gobierno tan autoridad tan pakayari tan pakauley.” (Efe. 1:19-21) No ompatey tayon matoor antis na Armagedon, napaoli tayod balon mundo, tan dakel so makapaliket ya kimey tayo diman. Balet diad panaon tayo, wala met so importantin kimey ya kaukolan tayon pibiangan ya amin—say pangipulong ed maong a balita tan panggaway babangatan. Komon ta amin tayo, ugaw man o matatken, et ‘dakel so gawaen tayod kimey na Katawan.’—1 Cor. 15:58.