Si Tatay et elder na United Church of Canada diad lugar mi, kanian sinimba kamin oonla nen agik diad Sunday school. Insan kayari to, ibaan mi si Tatay ed misa diad alas-11 na kabuasan. No ngarem balet, miaral kamid Kingdom Hall kaibay Nanay. Sankanengneng mi nen agik so pandumaan na relihyon nen Nanay tan Tatay.

Pinulongan nen Nanay so abaybayag lan kaaro da ya si Bob tan Marion Hutcheson, tan inawat da so katuaan. Nen 1958, impila ak na sayan sanasawa kaibay taloran ananak dan lalaki ed waloran agew ya Divine Will International Assembly ed New York. No nanonotan ko man, nari-realize ko ya grabe so impansagpot da pian naipila da ak. Agko man nalinglingwanan ya assembly.

Nen tinedyer ak, diad alog so kulaan na abung mi. Labalabay koy man-alaga na saray ayayep kanian pangarap koy man-beterinaryo. Nen naamtaan iya nen Nanay, inistorya da ed sakey ya elder. Maar-aron akitongtong ed siak imay elder, tan impanonot to ya manbibilay tayo lad “kaunoran iran agew.” Tinepetan da ak no anto kasi magmaliw ya epekto ed espiritualidad ko no mankolehyo ak. (2 Tim. 3:1) Apaisip ak ed tepet da kanian nandesisyon ak ya agak la mankolehyo.

Ka-graduate kod high school, anggapo ni malinew ya planok. Tua, lanang ak ya ompapaway kada Sabado tan Simba, pero aminen ko ya agko nai-enjoy so pampupulong ko tan anggapo balot so planok ya manpayunir. Lapud aliwan Tasi si Tatay tan amay Uncle ko, ibabaga dan lanang ed siak ya mantrabaho ak ya full-time ed sakey ya baleg ya insurance company ed Toronto. Atagey so posisyon nen Uncle ko diman, kanian inawat ko iman ya trabaho.

Diad Toronto, overtime ak lan overtime. Aliwan Tasi iray nakakaibak kanian agak la regular ya  makakapiaral tan makakapanpulong. Diad gapo, akiayam ak ed si lakik ya aliwan Tasi, pero nen inatey la ra, kaukolan ko lay mananap na arum ya napanayaman.

Amay sanasawan Hutcheson ya angipila ed siak diad kombension nen 1958 et inturing da ak lan singa anak da. Imbaga dad siak ya diman ak la manayam ed abung da, tan tinulongan da ak ya onaligwas ed espiritual. Nen 1960, sabay kamin abautismoan nen John, sakey ed saray anak da. Nampayunir ya tampol si John. Apaseseg ak ed alimbawa to kanian lanang ak met lan manpupulong. Anengneng na saray elder so iyaaligwas ko, kanian ag-abayag et aturo ak bilang Theocratic Ministry School servant. a

Walay akabat kon payunir, si Randi Berge. Masetseseg tan akaparaan ya manlingkor ed lugar ya daiset so Tasi. Nankasal kami nen 1966. Kinaaro kami na circuit overseer mi, tan pinaseseg to kami ya ontulong ed sakey ya kongregasyon diad Orillia, Ontario. Kanian nandesisyon kami ya manboluntaryo diman.

Kasabi mid Orillia, nampayunir ak met la kaibay Randi. Makaalis so seseg tod ministeryo! Amasya ak ed pampapayunir ko! Lanang kon uusaren so Biblia kanian malikeliket ak, lalo la no nanenengneng kon natatalosan na totoo so katuaan. Makapaliket nen walay atulongan mi ya sanasawa ya inuman day kabibilay da tan nandesisyon ira ya manlingkor ed si Jehova.

Nen pinmasyar kamid Toronto, akabat mi Brother Arnold MacNamara, ya sakey ya Bethelite. Tinepetan to kami no labay mi naasain bilang espisyal payunir. Say kuan kon tampol: “On! Labalabay mi basta puerad Quebec!” Onman so imbagak ta naimpluensyaan ak na saray English-speaking ya Canadian ta abebbeba so pakanengneng da ed saray French-speaking ya Canadian  ya manaayam ed Quebec. Diad saman et manproprotesta iray totoo tan labay da ya onsian ed Canada so probinsya na Quebec.

Oniay imbaga nen Arnold ed siak: “Diad Quebec labat balet so pangibabakian ed saray espisyal payunir.” Kanian pinmayag ak la. Amtak ya labalabay nen Randi so ontulong diman. Kalabas na panaon, a-realize ko ya duga imay desisyon ya ginawa mi!

Limaran simba kamin nanaral na French, insan kami la linmad Rimouski, sakey ya syudad ed Quebec ya manga 540 ya kilometro so kaarawi to ed Montreal, tan walay kaiba min sanasawa. Agmi ni kabisadon maong so French. Nahalata itan no ibabasak la ray anunsio diad aral. Aminsan, nen in-announce kod aral mi ya walay nagawan kombension, imbagak ya amayamay so onsabin “ostrich delegates” imbes ya “Austrian delegates.”

Diad Rimouski, likud ed samay kaiba min sanasawa, walay apatiran masetseseg ya single iran sister ya akilad sikami. Kaiba mi met so pamilyan Huberdeau ya walay duaran anak da. Walay baleg ya abung ya nirentaan nen Brother tan Sister Huberdeau. Amin min payunir et manaayam diman tan panaapagan mi so renta. Tinawag mi yan White House. Manga 12 anggad 14 kami ya manaayam diman. Lapud espisyal payunir kami nen Randi, manpupulong kami kada kabuasan, ngarem, tan anggad labi. Kanian misatsalamat kami no wala ray milad sikamin manpulong—lalo la no labi tan mani-snow.

Aka-close mi irayan payunir ya kaiba mi ed abung tan inturing mi la ran kapamilya. No maminsan, man-bonfire kami odino walay iplano min agew ya manluto kamin amin tan bansag kamin mangan. Walay kaiba min brother ya marunong ya mantogtog, kanian lanang kamin mankakansionan tan onsasayaw kada Sabadoy labi.

Diad Rimouski, amayamay so interesado! Diad loob na limaran taon, makapaliket ya nanengneng so inyaligwas na saray Bible study ya anggad nampabautismo ra, tan nagmaliw lan 35 so publisher ed kongregasyon mi.

Nipasal kamin maong ed Quebec ya manpulong. Anengneng min mismo so intulong nen Jehova ed ministeryo mi tan ed saray pankaukolan mi. Sakey ni, naaralan min aroen iray totoo ya mansasalita na French, pati say mismon lenguahe tan kultura da, ya anggad naaro mi met lay arum ya kultura.—2 Cor. 6:13.

Agmi ilaloan, imbaga na branch ya onla kami ed Tracadie, New Brunswick. Ngalngali agmi awaten ta diad saman et walay pinirmaan min kontrata ed rerentaan min apartment tan aka-kontrata ak met ya manbangat ya part-time ed sakey ya eskuelaan. Sakey ni, wala la ray Bible study mi ya balon unbaptized publisher tan kaplesan mi met ya ipapaalagey so Kingdom Hall mi.

Legay weekend, impikasi min maong itan ed si Jehova tan pinmasyar kamin agano ed Tracadie. Anengneng mi ya baleg so pandumaan tod Rimouski. Pero say inisip mi la, kailangan mi onla ta dia kami labay ya ibaki nen Jehova. Sinubok mi Jehova, tan anengneng mi ya sansasakey ton inekal iray makaamper ed iyalis mi. (Mal. 3:10) Maong labat ta mabisbiskeg so espiritualidad nen Randi, masakripisyo, tan iyeelek to labat anggano wala ray subok, kanian agkami nairapan ed inyalis mi.

 Diad balon kongregasyon mi, saksakey labat so elder, si Brother Robert Ross. Kaiba ton manpapayunir so asawa ton si Linda. Anggano nen wala lay anak da, ag-ira inmalis diman. Apaseseg kami ed alimbawa ra ta anggano pamilyado ra, maparawes tan masetseseg ni ran siansia.

Kayari duay taon ya impanpayunir mi ed Tracadie, walay naawat mi lamet ya balon asainmin—naimbitaan kamin manlingkor ed kimey ed sirkito. Pitoy taon kamin naasain ed saray sirkiton mansasalitay English, insan say sinmublay ya asainmin mi et diad sirkito ya mansasalita na French diad Quebec. Diad saray paliwawak, lanang ak ya kokomendaan nen Brother Léonce Crépeault, say district overseer mi ed Quebec. Insan kayari da ak ya komendaan, tepetan da ak: “Na-improve mo ni kasi pian mas praktikal?” b Akatulong itan ya maar-aron panonot da pian gawaen kon mas simpli tan mainomay ya natalosan iray paliwawak.

Sakey ed saray asainmin ya agko nalinglingwanan et amay 1978 “Victorious Faith” International Convention ed Montreal, Quebec. Naasain ak ed Food Service. Pakanen mi so 80,000 ya totoo, tan walay balon uksoyan no panon mi iran pakanen. Amin et balo: saray kagawaan, menu, tan no panon ya iparaan iray naakan. Wala met so manga 20 ya angkakabaleg ya ref. Pero no maminsan, wala ray aga onggana. Nen iparaan mi lay parad unonan agew, pegley labi kami la akaloob ed stadium ta pinasumpal mi ni agawan sports event. Diad saman ya palbangon, kailangan mi lay manluto na almusal. Mabanabanal kami, pero akaaral ak ya maong ed alimbawa na saray kaibak ya volunteer. Makulikuli ra, maespiritual, tan masamsamit so elekan da anggano mairap so trabaho. Nagmaliw kamin malet ya sankakaaro anggad natan. Graben isusumpa so inarap na saray agagi ed Quebec nen 1940 anggad 1960, kanian agkon balot nalingwanan iyan kombension!

Dakel met so naaralan ko ed saray kaibak ya overseer diad saray kombension ed Montreal. Say sakey ed sikara et si David Splane, ya manlilingkor la natan bilang membro na Mananguley ya Ulop. Wala may taon ya sikato so convention overseer. Diad tinmumbok ya kombension, nen  siak lay niyasain ya convention overseer, mapappaabeban akikoopera si David.

Nen 2011, kayari na 36 ya taon ya impanlingkor mi ed sirkito, naimbitaan ak ya manlingkor bilang instructor ed School for Congregation Elders. Diad loob na duay taon, 75 ya nanduruman dukolan so naugipan mi nen Randi. Kaukolay sakripisyo pero sulit. Malikeliket ak kada no nasumpal so sakey ya klase, ta sankaliknak so liket na saray elder. Misatsalamat iran maong ta sankanonot na Mananguley ya Ulop so espiritualidad da.

Kayari duay taon, nambangat ak ed School for Kingdom Evangelizers. Busy ya maong iray estudyante: manga pitoran oras so klase da kada agew, taloran oras iran manggaway homework kada labi, tan manga apatira o limara so ipaparaan dan asainmin diad loob na sakey simba. Ipapanonot ko tan say kaibak ya instructor ya agda itan nagawaan no anggapoy tulong nen Jehova. Agkon balot nalingwanan so ekspresyon na lupa ra kada no na-realize da ya agawaan da imay iisipen dan imposible, ta nantiwala ira ed si Jehova.

Dakel ed saray Bible study nen Nanay so inmaligwas ta alikna day personal ya interes nen Nanay ed sikara. Atan ya ugali nen Nanay ko so nampalemek ed puso nen Tatay. Taloy agew kayari na impatey nen Nanay, abigla kami ta akiaral si Tatay ko, tan aglan balot inmabsent diad loob na 26 ya taon. Anggano ag-abautismoan si Tatay, ibabagad siak na saray elder ya sakey ira ed saray masaksakbay ya onsasabi ed Kingdom Hall.

Say maong ya alimbawa nen Nanay et baleg so epekto to ed sikami ran sanaagi. Matoor ya manlilingkor ed si Jehova so taloran agagik ya bibii kaibay kaasawaan da. Duara ed sikara so manlilingkor ed Bethel—say sakey et diad Portugal tan amay sakey et diad Haiti.

Espisyal payunir kami la nen Randi ed Hamilton, Ontario. Nen wala kamid kimey ed sirkito, nai-enjoy min ibaan iray agagi ed saray RV tan Bible study da. Pero natan, agkami labat la mimila. Wala la ray Bible study min mismon, tan naliliketan kami no nanenengneng mi so iyaaligwas da ed espiritual. Napapaseseg kami met ed saray agagi ed balon kongregasyon mi. Nandurumay situasyon da, pero nanenengneng mi ya ag-ira papaulyanan nen Jehova.

No pawilen mi iray agawa ed apalabas iran dekada, misatsalamat kamin maong ta dakel so angipanengneng na personal ya interes ed sikami. Kanian gagawaen mi met so anggaay nayarian mi pian nipalikna mi so “masimoon a panangiyansakit” ed arum tan napaseseg mi ran iter ed si Jehova so ‘the best’ da. (2 Cor. 7:6, 7) Singa bilang, walay pamilya ya payunir so asawan bii tan duaran anak da. Tinepetan ko may asawan laki no plano to met so manpayunir. Say kuan to, suportaan to la kuno so pampapayunir na saray kapamilya to. Kuan ko: “Akin a, mas nasuportaan mo ira nen say si Jehova?” Imbagak ya salien to pian nalikna toy liket ya nalilikna na saray kapamilya to. Kayari anem bulan, nampayunir la.

Desidido kami nen Randi ya ‘ipaamta ed onsublay ya henerasyon iray makapakelaw ya ginawa’ nen Jehova, tan iilaloan mi ya nalikna da met so liket ya alikna mi.—Sal. 71:17, 18.