1. Akin et inar-arom so katuaan?

 INAR-ARO na saray lingkor nen Jehova so katuaan ya walad Biblia. Ditan akabase so pananisia tayo. (Roma 10:17) Manisia tayo ya uusaren nen Jehova so kongregasyon bilang “lusek tan seklang [o pundasyon] na katuaan.” (1 Tim. 3:15) Mabulos tayo met ya manpapasakop ed saray mangidadaulo ta amta tayon saray ibabangat dad sikatayo et katuaan ya nanlapud Biblia, tan saray instruksion ya iiter da et ibabase rad panlabayan nen Jehova.​—Heb. 13:17.

2. Base ed Santiago 5:​19, antoy nayarin nagawa ed sikatayo anggano amta tayo lay katuaan?

² Pero anggano amta tayo lay katuaan tan tutumboken tayo ray instruksion na organisasyon nen Jehova, agtayo mankakampante ta dakel so uusaren nen Satanas pian naibalang to tayo. (Basaen so Santiago 5:19.) Gagawaen ton amin pian onkapuy so tiwala tayod Biblia tan ed organisasyon nen Jehova.​—Efe. 4:14.

3. Akin et importante ya amta tayon ibiig so katuaan ed katilaan? (Efeso 6:​13, 14)

³ Basaen so Efeso 6:13, 14. Diad baleg ya kairapan, mangikayat so Diablo na saray katilaan pian naloko to ray bansa tan lapud satan et kalabanen day Jehova. (Apo. 16:13, 14) Seguradon mamasya met lad satan si Satanas pian nibalang to ray lingkor nen Jehova. (Apo. 12:9) Kanian importante ya natan ni labat et amta tayo lan ibiig so katuaan ed katilaan tan ipasal tayo lay sarili tayo ya magmaliw ya ‘matulok ed katuaan.’ (1 Ped. 1:22; Roma 6:17) Ditan akadepende no kasin makaliktar tayo ed baleg a kairapan!

4. Anto ray pantongtongan tayo ed sayan artikulo?

⁴ Pantongtongan tayo ed sayan artikulo so duaran kualidad ya makatulong pian nibiig tayoy katuaan tan ombiskeg so tiwala  tayo ed organisasyon na Dios. Pantongtongan tayo met so talora ya nepeg tayon gawaen pian nabembenan tayon malet so katuaan.

SARAY KUALIDAD YA MAKATULONG PIAN NIBIIG TAYOY KATUAAN

5. Akin et napakiwas tayon ibiig so katuaan ed katilaan no walay takot tayo ed si Jehova?

⁵ Takot ed si Jehova. Antoy labay ya ibaga na itakot ed si Jehova? Atan may klase na takot ya agtayo labay ya napaermen si Jehova ta inar-aro tayo. Nipanengneng tayo ya walay takot tayo ed si Jehova no amtaen tayo ray labay to tan agto labay, tan no amta tayon ibiig so katuaan ed katilaan. (Pro. 2:3-6; Heb. 5:14) Normal met labat ya no maminsan et ontakot tayod too. Pero no agtayo itan labanan, ompan makapanggawa tayo laingen na agpanlabayan nen Jehova. Pabiskeg mo sirin so panangarom ed Dios pian agka nadaeg na takot ed too.

6. Antoy epekto na takot ed too ed saramay samploran papangulo na Israel?

⁶ No mas antakot tayoy too nen say Dios, ompan agtayo la napambiigan no antoy tua tan tila. Mas natalosan tayo itan no imanoen tayoy alimbawa na labinduan papangulo ya nan-espiya ed Canaan, say dalin ya insipan nen Jehova ya iter to ed saray Israelita. Ataktakot may samploran espiya nen anengneng da ray Canaanita. Oniay imbalita da ed saray kapara dan Israelita: “Agtayo nayarian a labanan iraman a totoo, lapud mabiskeg ira nen say sikatayo.” (Num. 13:27-31) Tua met ya diad pakanengneng na too, mas mabiskeg iray Canaanita nen saray Israelita. Pero say alingwanan da, kaiba day Jehova ya milaban tan sarasarag ton taloen iray Canaanita. Inisip da komon ya talagan linawa nen Jehova ya nasakop da so Insipan ya Dalin, tan dinalepdep da met komon no anto la ray ginawa to parad sikara. No atan so nampokusan da, ag-ira komon tinmakot ta aga makakiking iray Canaanita ed si Jehova. Mapatpatnag ya aliwan mabiskeg so panangaro na samay samploran espiya ed si Jehova. Diad kabaliktaran balet,  mapatpatnag ya inar-aro nen Josue tan Caleb si Jehova ta desidido ran gawaen so panlabayan to. Oniay imbaga ra ed saray kapara dan Israelita: “No naliliketan si Jehova ed sikatayo, seguradon iyakar to itayod saman a dalin tan iter to iman ed sikatayo.”​—Num. 14:6-9.

7. Antoy gawaen mo pian lalom ya nipanengneng so takot ed si Jehova? (Nengnengen met so litrato.)

⁷ Antoy gawaen mo pian lalom ya nipanengneng so takot ed si Jehova? Nonot mo no antoy panlabayan to kada no mandedesisyon ka. (Sal. 16:8) No babasaen mo iray salaysay ed Biblia, tepetan moy sarilim: ‘Anto kasi gawaen ko no siak so walad situasyon da?’ Singa bilang, imadyin mo pa ya wadman ka nen imbaga na samay samploran espiya ya agnasarag ya sakopen na saray Israelita so Canaan. Anto kasi reaksion mo? Kasin manisia kad sikara tan ontakot ka met la, odino agka manisia lapud inar-arom si Jehova tan sankanonot moy panlabayan to? Makapaermen ta dakel so anisia ed samay samploran espiya, tan agda atebek ya si Josue tan Caleb so mangibabagay tua. Lapud satan, sakey ya henerasyon na saray Israelita so ag-akaloob ed Insipan ya Dalin.​—Num. 14:10, 22, 23.

8. Anton kualidad so tuloytuloy tayon ipanengneng, tan akin?

⁸ Inkamapaabeba. Saray mapaabeban totoo labat so pangipapaamtaan nen Jehova na katuaan. (Mat. 11:25) Impanengneng tayo itan ya kualidad nen nampatulong tayon aralen so Biblia pian naamtaan tayoy katuaan. (Gawa 8:30, 31) Pero no agtayo manalwar, ompan magmaliw tayon mapaatagey. No ontan so nagawa, ompan mandepende tayo lad sarili tayon opinyon tan ibaliwala tayo la ray prinsipyo na Biblia tan saray instruksion na organisasyon tayo.

9. Antoy gawaen tayo pian mansiansia tayon mapaabeba?

⁹ Mansiansia tayon mapaabeba no tandaan tayo ya melmelag tayo labat no ikomparad kabaleg na pakayari nen Jehova. (Sal. 8:​3, 4) Ipikasi tayo met ed si Jehova ya tulongan to tayon magmaliw ya mapaabeba tan mainomay ya paibangat. No ontan so ipikasi tayo, tulongan to tayo pian niyaplika tayo ray prinsipyo ed Biblia tan naunor tayo iray instruksion na organisasyon to, imbes ya unaen tayoy panlabayan tayo. Legan kan manbabasay Biblia, imanom iray detalye ya pakanengnengan ya inar-aro nen Jehova iray mapaabeba tan kakkabusol to ray mapaatagey tan malastog. Tan no akaawat kay asainmin odino pribilehyo ya lapud satan et mas dakel so makaimano ed sika, importante ya diman mo mas lalon ipanengneng so kapaabebaan.

PANON TAYON NABEMBENAN YA MALET SO KATUAAN?

10. Siopa ray inusar nen Jehova ya mangipasabi na saray instruksion to ed saray lingkor to?

¹⁰ Mantiwala ka ed saray instruksion na organisasyon nen Jehova. Diad Israel nensaman, tinuro nen Jehova si Moises ya mangipasabi na saray instruksion to ed saray Israelita. Insan sinmabi panaon, tinuro to met si Josue ya onsalat ed si Moises. (Jos. 1:​16, 17) Benendisyonan nen Jehova iray Israelita nen nampasakop ira ed sarayan lalaki ya pinili to ya mangidaulo ed sikara. Kalabas na nilasus ya taon, nen wala lay Kristianon kongregasyon, say labinduan apostol la so mangipapasabi na saray instruksion nen Jehova. (Gawa 8:​14, 15) Insan sinmabi panaon, kaiba lan mangidadaulo so arum ya mamatatken ed Jerusalem. Nen inunor na saray agagi so instruksion na sarayan matoor ya lalaki, “nantultuloy a binmiskeg ed pananisia iray kongregasyon tan ondarakel so bilang da ed kada agew.” (Gawa 16:​4, 5) Diad panaon tayo, wala met iray lalakin tinuro nen Jehova ya mangidaulo ed sikatayo.  Bendisyonan to tayo met nen Jehova no unoren tayo ira. Anto balet so nalikna to no agtayo manpasakop ed sarayan brother? Pian naebatan itan, nengnengen tayo imay sakey nin agawa nen paarap ed Insipan ya Dalin iray Israelita.

11. Antoy agawa ed saramay Israelita ya nanrebelde tan kinuestion day pangidadaulo nen Moises? (Nengnengen met so litrato.)

¹¹ Nen paarap ed Insipan ya Dalin iray Israelita, wala tay inkagawa ya kinuestion na saray kabkabat ya lalaki so pangidadaulo nen Moises. Kuan da: “Masanto lay amin a totoo, tan walad pegley da si Jehova.” Singa da ibabagan aliwan si Moises labat so masanto, tan papapawayen dan iyaatagey toy sarili to. (Num. 16:​1-3) Tua met ya diad pakanengneng nen Jehova, masanto so amin ya Israelita. Pero, si Moises so pinili to pian mangidaulo ed sikara. (Num. 16:28) Kanian nen kinuestion na sarayan lalaki si Moises, say talagan kukuestionen tan panrerebeldean da et si Jehova. Agda inisip so panlabayan to, sarili da labat so inisip da. Diad tua, labay da labat so nawalaan na atagey ya posisyon pian walad sikara so atension na arum. Sinmanok si Jehova ed ginawa na sarayan rebelde, kanian pinatey to ra pati saramay libolibon Israelita ya sinmuporta ed sikara. (Num. 16:​30-35, 41, 49) Diad panaon tayo, seguradon ontan met so nalilikna nen Jehova ed saramay anggapoy respeto da ed saray uksoyan tan instruksion na organisasyon to.

12. Akin et makapantiwala tayo ed organisasyon nen Jehova anggano wala ray pananguman?

¹² No nanengneng na Mananguley ya Ulop ya walay kaukolan ya umanen ed pakatalos tayo ed Biblia odino ed saray uksoyan na organisasyon tayo, ag-ira manaalangan ya umanen iratan. (Pro. 4:18) Akin et makapantiwala tayo nin siansia ed organisasyon nen Jehova anggano wala ray pananguman? On ta amta tayon say sankanonot na sarayan mangidadaulo et say panlabayan nen Jehova. Segurado tayo met ya ibabase da iray desisyon da ed Biblia. Diad tua, ontan so labay nen Jehova ya gawaen tayon amin no mandedesisyon tayo.

13. Anto tay “pangaligan a maabig iran salita,” tan antoy gawaen tayod satan?

 ¹³ “Itultuloy mon tumboken so pangaligan a maabig iran salita.” (2 Tim. 1:13) Anto tay “pangaligan a maabig iran salita”? Ontutukoy itan ed saray bangat nen Jesus ya nabasad Biblia. (Juan 17:17) Ditan akabase so amin ya papanisiaan tayo. Ibabangat itayo na organisasyon nen Jehova pian natumbok tayo itan ya pangaligan. No gagawaen tayoy anggaay nayarian tayo ya tumboken itan, bendisyonan to tayo nen Jehova.

14. Akin et ag-atumbok na arum ya Kristiano nen inmunan siglo so “pangaligan a maabig iran salita”?

¹⁴ Antoy nagawa no agtayo tumboken so “pangaligan a maabig iran salita”? Pian naebatan itan, nengnengen tayoy agawa ed arum ya Kristiano nen inmunan siglo. Akaawat iray agagi na sulat ya say amta ra et nanlapud si apostol Pablo, tan nabasad satan ya sulat ya sinmabi la kunoy agew nen Jehova. Makapaermen ta wala ray Kristiano ed Tesalonica ya anisia ed satan ya katilaan, tan inkayat da ni ingen itan anta agda sinegurado no kasin tua itan ya impormasyon o andi. Ag-ira komon aloko no sankanonot da may imbangat tan impasakbay ed sikara nen Pablo nen kaiba da ni. (2 Tes. 2:​1-5) Lapud satan ya agawa, binilin ira nen Pablo ya agda bastabasta papanisiaan so amin ya narerengel da. Pian ag-ira naloko lamet, oniay imbaga nen Pablo ed sampot na komaduan sulat to ed saray agagid Tesalonica: “Awat yoy panangumustak. Siak, si Pablo, et insulat ko yan mismo, a pakabidbiran ed amin a sulat ko; oniay panagsulat ko.”​—2 Tes. 3:17.

15. Antoy gawaen tayo pian agtayo naloko ed saray katilaan anggano papawayen na saray kalaban ya singa tua itan? Mangiter na alimbawa. (Nengnengen met so litrato.)

¹⁵ Antoy naaralan tayo ed samay bilin nen Pablo ed saray agagi ed Tesalonica? No walay naamtaan tayon impormasyon ya kontra ed ibabaga na Biblia o walay narengel tayon makapabiglan balita, agtayo bastabasta manisia ed saratan. Usaren tayoy pakatebek tayo. Diad datin Soviet Union, wala tay agawa ya akaawat iray kongregasyon na sulat ya nanlapud saray kalaban pero pinapaway dan nanlapud world headquarters. Ipapaseseg na satan  ya sulat ya manggawa la ray agagi na sarili dan organisasyon. Amay mismon sulat et singa nanlapu met ed world headquarters. Pero amay karga to ey? Ag-aloko iray matoor ya agagi. Atebek da ya say karga na satan ya sulat et kontra ed katuaan ya ibabaga na Biblia. Kaukolan tayo met so manalwar natan ta uusaren na saray kalaban so Internet tan social media pian deralen so pankakasakey tayo tan agtayo la napambiigan so tua tan tila. Antoy gawaen tayo pian agda tayo naloko? Kaukolan tayon usaren so pakatebek tayo tan seguradoen tayo no kasin say sakey ya impormasyon et talagan akabase ed katuaan ya naaralan tayo.—2 Tes. 2:2; 1 Juan 4:1.

16. Base ed Roma 16:​17, 18, antoy gawaen tayo no walay agi ya mangikayat na impormasyon ya kontra ed katuaan?

¹⁶ Mansiansian maapit ed saramay matoor ed si Jehova. Labay na Dios ya walay pankakasakey na saray lingkor to. Mansiansiay pankakasakey tayo basta akabemben tayon malet ed katuaan. No walay anggan sakey ya agi ya mangikayat na impormasyon ya kontra ed katuaan, naapag-apag so kongregasyon. Kanian papasakbayan to tayo nen Jehova ya ‘paliisan tayo’ so ontan ya too, ta no andi, ompan makaarawi tayo met la ed katuaan.—Basaen so Roma 16:​17, 18.

17. Anto ray maabig ya resulta no amta tayon ibiig so katuaan tan bembenan tayo itan ya malet?

¹⁷ No amta tayon ibiig so katuaan tan bembenan tayo itan ya malet, mansiansia tayon mabiskeg ed espiritual. (Efe. 4:​15, 16) Anggano wala ray ikayat nen Satanas ya palson bangat o impormasyon, agto tayo naloko. Tan no baleg ya kairapan la, makasegurado tayo ya protektaan to tayo nen Jehova. Itultuloy mo sirin ya bembenan ya malet so katuaan tan ‘niwala ed sika so Dios na kareenan.’​—Fil. 4:​8, 9.