UNONG ed Mosaikon Ganggan, wala labat so manepeg ya pangusaran na samba. Balet, niyugali la na saray totoo ed panaon nen Jesus ya amin lawarin ibaga da et walay kaiba ton samba. Gagawaen da iya pian mas panisiaan so ibabaga ra; balet, amiduan kinondena itan nen Jesus. Say imbangat to: “Komon ta say imbaga yon ‘On’ et on, tan say ‘Andi’ yo et andi.”​—Mat. 5:33-37; 23:16-22.

Base ed Theological Dictionary of the New Testament, talagan “niyugali la na saray Judio ya sambaan so amin lawarin ibabaga ra.” Napatnagan itan ed saray akasulat ed Talmud, ya ditan et detalyadon nabasa no anto ran samba so nepeg ya tooren tan agnepeg ya tooren.

Aliwan si Jesus labat so angondena ed sayan makapuy ya kagagawa. Singa bilang, oniay imbaga na Judion historian ya si Flavius Josephus nipaakar ed sakey ya Judion sekta: “Iiwasan day mansamba ta ipapasen dan mas mauges itan nen say panagtila, tan ibabaga ra ya no agnapanisiaan so sakey no agmansamba ed arap na Dios, sikatoy akondena la.” Onia met so nabasa ed apokripal ya sulsulat na saray Judio a kabkabat ya Wisdom of Sirach, odino Ecclesiasticus, (23:11): “Say too ya ugali to lay mansamba et talagan mauges.” Kanian kinondena nen Jesus iramay agda ipapasen ya seryoso so pansamba. No lanang tayon ibabagay tua, agtayo la kaukolan so mansamba pian mas napanisiaan so ibabaga tayo.