Kabintaan​—Kualidad a Mangiyalibansa na Deen

Agaylay dakep na mundo no amin so mangipatnag na kabintaan. Ta agla maanap iray sinansakey, saray kapamilyaan so agla makolkol, agla manlalaslasan iray korporasyon, tan saray nasyon so agla manbabakal. Kasin labay mo so manayam ed ontan a mundo?

MANPAPARAAN laray tuan lingkor nen Jehova a Dios parad insipan a balon mundo to, a ditan et sigpot lan ipasen so kabintaan, ya aliwan sakey a kakapuyan noagta sakey a biskeg tan maabig ya ugali. (2 Pedro 3:13) Diad tua et anggan natan et babayuboan da la so pagmaliw a mabinta. Akin? On, ta saya so nagkalalo lan kakaukolanen ed sikara nen Jehova. Oniay insulat nen propeta ton Miqueas: “Impatnag to ed sika, O too, so maong: et anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”​—Miqueas 6:8.

Say kabintaan so nayarin mankabaliksan na pigaran bengatla, a singa say agpanlastog, odino agmakinon, tan agpanpasirayew na sakey ed saray abilidad, agawaan, tan kaykayarian to. Unong ed sakey a palapagan, kabaliksan met na kabintaan so “pansiansia unong  ed saray limitasyon.” Mansiansian mabinta so too unong ed saray limitasyon na maong a walna to. Bibidbiren to met a walaray limitasyon ed saray nepeg ton gawaen tan ed nayarian ton gawaen. Amta to a walaray bengatlan agto kanepegan. Maseguron napaapit itayo ed mabintan totoo. “Anggapo lay lalon makaroyroyo nen say tuan kabintaan,” insulat na taga-Inglatera a manag-anlong a si Joseph Addison.

Agnisipor ya ugali so kabintaan ed ag-ayadyarin totoo. Nepeg tayon panggunaetan a bayuboan iyan kualidad. Pian napaseseg itayo, dedeskribien na Salitay Dios so pigaran inkagawan mangiyilustra ed nanduruman nengneng na kabintaan.

Duaran Mabintan Arari

Sakey ed matoor a tuloy iran lingkor nen Jehova et si David, a walad kalangweran sanen sikatoy nilanaan bilang magmaliw ya ari na Israel. Nanlapula’d saman, ginetman pateyen nen manuuley ya Arin Saul si David tan pinuersa ton manbilay bilang puganti.​—1 Samuel 16:1, 11-13; 19:9, 10; 26:2, 3.

Anggaman onman iray kipapasen, amta nen David a walaray limitasyon ed nepeg ton gawaen diad panalimbeng to’d bilay to. Diad sakey ya inkagawa diad kalawakan, ag-inabuloyan nen David a pateyen nen Abisai so akaugip ya Arin Saul, a nankuan: “[“Unong ed panmoria nen,” NW] Jehova et insebel to a yunat ko so limak sumpa ed nilanaan nen Jehova”! (1 Samuel 26:8-11) Amta nen David ya anggapoy debir ton mangekal ed si Saul ed posisyon to bilang ari. Diad ontan et nipanengneng nen David so kabintaan ed sayan okasyon diad impansiansia to unong ed manepeg a walna. Ontan met, amta na saray lingkor na Dios natan ya unong ed “panmoria nen Jehova,” walaray bengatlan agda nagawaan, anggano niiyan ni ed kaatapan so bilay na too.​—Gawa 15:28, 29; 21:25.

Angipatnag met na kabintaan so ilalak nen Arin David a si Solomon, sanen walad kalangweran, balet diad medyo duman paraan. Sanen nitrono si Solomon, liknaen ton agto sarag a sumpalen so ambelat a responsabilidad ed pagmaliw a sakey ya ari. Sikatoy nampikasi: “O Jehova a Dios ko, ginawam so aripen mo ya ari a kasalat nen David ya amak: et siak lambengat ni melag ya ugaw; agko amta so ompaway odino onloob.” Mapatnag, binidbir nen Solomon so kakulangan ton mismo ed abilidad tan eksperiensia. Sikato ed saman so mabinta ni, andian na lastog, odino kinon. Kinmerew na pakatebek si Solomon ed si Jehova, tan nipagamor ed sikato so kerew to.​—1 Arari 3:4-12.

Say Mesias tan say Akadkaunan Imbaki nen say Sikato

Masulok a 1,000 taon kayari panaon nen Solomon, sinumpal nen Juan a Managbautismo so pangitarya ed dalan parad say Mesias. Bilang akadkaunan imbaki na Alanaan a Sakey, susumpalen nen Juan so propesiya ed Biblia. Sarag to komon ya ilastog so pribilihyo to. Nayarian komon met nen Juan a pagalangan so inkasikato lapud ta kanayon to so Mesias. Ingen, imbaga nen Juan ed arum a sikatoy ag-anggan makana a mangukbar ed sandalyas nen Jesus. Tan sanen impresenta nen Jesus so inkasikato a manpabautismo ed Ilog Jordan, inkuan nen Juan: “Siak so mankaukolan a pabinyagan ed sika, et onla ka dia ed siak?” Ipapabitar na saya a si Juan so aliwan malastog a too. Sikatoy mabinta.​—Mateo 3:14; Malaquias 4:5, 6; Lucas 1:13-17; Juan 1:26, 27.

Kayarin abautismoan si Jesus, inggapo to so sigpot-panaon a ministeryo, diad impangipulong ed maong a balita na Panariay Dios. Anggaman si Jesus so ayadyarin too, imbaga ton: “Anggapo so nagawaan ko ed inkasiak . . . agko anapen so linawak a dili, noag say linawa na saman so angibaki dia ed siak.” Niarum ni, agnanggunaetan nen Jesus a pagalangan ed totoo, noagta inggloria to si Jehova ed amin a ginawa to. (Juan 5:30, 41-44) Agaylan inkabinta!

Malinlinew sirin a saray matoor a lingkor nen Jehova, a singa di David, Solomon, Juan a Managbautismo, tan anggan say ayadyarin toon Jesu-Kristo so angipanengneng na kabintaan. Sikaray agnanlastog, agmakinon, odino pabidbir, tan nansiansia ira unong ed saray limitasyon da. Saray ehemplo ra so makatunongan iran rason pian bayuboan tan ipanengneng met na saray modernon agew a lingkor nen Jehova so kabintaan. Ingen, wala niray arum a rason no akin a kaukolan a gawaen itan.

Diad sayan magulon panaon ed awaran na katooan, baleg so gungguna na kabintaan parad tuan Kristianos. Satan so makatulong ed sakey a makapikareenan ed si Jehova a Dios, ed kaparan totoo, tan diad inkasikatayon dili.

 Pikareenan ed si Jehova a Dios

Posibli so pikareenan ed si Jehova daput no sikatayoy onkiwas unong ed saray limitasyon ya inletneg to parad tuan panagdayew. Say inmunan atateng tayo, si Adan tan Eva, so linmampas ed saray limitasyon ya inyan na Dios ed sikara, tan nagmaliw a sikaray inmunan totoon abiktima na andiay kabintaan. Abalang da so maong a talindeg da ed arap nen Jehova, pati met lay ayaman da, say arapen da, tan say bilay da. (Genesis 3:1-5, 16-19) Agaylan abalbaleg ya inkaperdi ra!

Makaaral itayo manlapud intunganga di Adan tan Eva, ta walaray limitasyon na tuan panagdayew no panon so nepeg tayon ikiwas. Singa bilang, ibabaga na Biblia ya “anggan saray managlawan, anggan saray manangigalang ed talintao, anggan saray managsinger ed agda asawa, anggan saray binabai, anggan saray milawanan ed kapara ra a laki, anggan saray matakew, anggan saray maagum, anggan saray managbuanges anggan saray managpabanday, anggan saray managpatubo, agda natawir so panariay Dios.” (1 Corinto 6:9, 10) Makabat so impangiyan nen Jehova ed sarayan limitasyon parad pankaabiganan tayo, tan nipanengneng tayoy kakabatan sano mitunosan tayo ed sarayan limitasyon. (Isaias 48:17, 18) Ibabaga ed sikatayo na Uliran 11:2: “Saray mapaabeba wala so kakabatan.”

Balet panon to no walay relihyoson organisasyon a mangibabaga ed sikatayo a nayarian tayon palakbatan irayan limitasyon tan siansian makapikareenan tayo ed Dios? Sasalien itayon ibalang na satan ya organisasyon. Diad biek a dapag, ontulong ed sikatayo so kabintaan a bayuboan so maapit a relasyon ed si Jehova a Dios.

Pikareenan ed Kaparan Totoo

Iyaalibansa met na kabintaan so mareen iran relasyon ed arum. Singa bilang, sano alimbawa iray atateng ed pankontento ed saray kakaukolanen da tan iyuuna daray espiritual a pamaakaran, maseguron naalig na ananak so parehon awawey. Diad ontan et nainomayan iray ugugaw ni a magmaliw a kontento, anggaman agda lawas naalay labay da. Ontulong iya ed sikaran manbilay tekep na kabintaan, diad ontan et lalon mareen so bilay na pamilya.

Kaukolan ya agamiley nagkalautlan panalwar na saramay wala ed panangasikaso diad pagmaliw a mabinta tan agda aabusoen so autoridad da. Alimbawa, nabibilin iray Kristiano: “Agyo papalumbasan iray bengatlan nisulat.” (1 Corinto 4:6, NW) Kabat na mamatatken ed kongregasyon  ya agda nepeg ya ipilit ed arum iray personal a panlabayan da. Imbes usaren day Salita na Dios a basiyan ed pangipaseseg no anto so suston kurang nipaakar ed ugali, panangawes, tan panag-ayos, odino panligliwaan. (2 Timoteo 3:14-17) Sano naimatonan na saray membro ed kongregasyon ya onkikiwas iray mamatatken a mitukoyan ed Makasulatan iran limitasyon, sarayan lalaki so narespeto tan pawalaen toy ampetang, maaro, tan mareen ya espiritu ed loob na kongregasyon.

Kareenan ed Inkasikatayon Dili

Saramay mangaagamil na kabintaan so natumangan na mareen ya awawey. Say mabintan too et aliwan maambisyon. Agto labay ya ibagan sikatoy andian na saray personal a kalat. Alimbawa, nayarin panpilalekan toy kaaruman iran pribilihyo ed serbisyo, balet ta sikatoy manalagar ed Dios, tan antokaman iran Kristianon pribilihyo a naawat to so diad kigalangan nen Jehova. Ag-itan moriaen a personal iran agawaan. Saya so mamaapit ed mabintan too ed si Jehova, “say Dios na kareenan.”​—Filipos 4:9.

Panon to no maminsan et liknaen tayon nibaliwala itayo na arum a too. Agta magmaong so nibaliwala lapud mabinta itayo nen say andiay kabintaan ya ipabidbir tayoy inkasikatayon dili? Andian iray mabinta na imposiblin naabot ya ambisyon. Diad ontan et wala so deen ed inkasikaran dili, a pankaabigan da diad kipapasen ed emosyon tan pisikal.

Pamayubo tan Pamasiansia ed Kabintaan

Atalonaan si Adan tan Eva na andiay kabintaan​—ugalin impasa ra ed ilalak da. Antoy nayarin ontulong ed sikatayo ta pian agtayo naalig so inkalingoan na inmunan atateng tayo? Panon tayon nabayuboan so maabig a kualidad na kabintaan?

Unona et, say suston pakatalos ed kipapasen tayo mitukoyan ed si Jehova, say Manamalsa na uniberso, so ontulong ed sikatayo. Antoran personal ya agawaan so nibaga tayo a nikompara ed saray agawaan na Dios? Tinepetan nen Jehova so matoor a lingkor ton Job: “Iner so kawalaan mo sanen inggaton ko so saray panangipaletnegan ed dalin? Ipaliwawam, no walaan ka na pakatalos.” (Job 38:4) Agmakasel si Job. Agta sikatayo met so limitado ed pikakabat, abilidad, tan eksperiensia? Agta pakagunggunaan tayo so pangaksobi ed saray limitasyon tayo?

Niarum ni, ibabaga na Biblia ed sikatayo: “Say dalin tan say lugan to kien ira nen Jehova; say mundo, tan saray manaayam ed sikato.” Laktipen na saya so “amin ya ayep na katakelan . . . , tan saray kaayepan ed tapew na nilibo a pukpukdol.” Sarag ya ibaga nen Jehova: “Say pilak kayarian ko, say balitok kayarian ko.” (Salmo 24:1; 50:10; Aggeo 2:8) Antoray niparayag tayon kayarian tan nikompara tayo ed saramay kayarian nen Jehova? Agayla, anggan say sankayamanan a too so andian na debir ya ilastog toray kayarian to! Kanian, makabat so panumbok ed apuyanan a simbawa nen apostol Pablo ed saray Kristiano diad Roma: “Lapu ed grasya a niiter ed siak, kuan ko sirin ed balang sakey a too ed sikayo, ya agto nonoten so inkasikaton dili ya atagtagey nen say kanepegan a nonoten.”​—Roma 12:3.

Bilang lingkor na Dios a manpilalek a mamayubo na kabintaan, nepeg tayon ipikasi so bunga na espiritu​—aro, gayaga, deen, andukey a panagtepel, kaabigan, kamaongan, pananisia, kabintaan, tan dangka. (Lucas 11:13; Galacia 5:22, 23) Akin? Lapud balang sakey ed sarayan kualidad so mamainomay ed sikatayon magmaliw a mabinta. Singa bilang, say aro parad kaparan totoo so ontulong ed sikatayon nalabanay tendensian panlastog odino pampasirayew. Tan amperen itayo na dangka a manisip ni sakbay ya onkiwas ya andiay kabintaan.

Manalwar itayo! Kaukolan itayon lawas manbantay sumpad saray pakapatitan na andiay kabintaan. Duara ed ararin abitla ed akadkauna so agnansiansian mabinta. Binaliwala nen Arin David so pasakbay ya agbibilangen iray Israelita, bengatlan agmitunosan ed linawa nen Jehova. Nagmaliw ya agmabinta si Arin Solomon ya anggad punton akibiang la ed palson panagdayew.​—2 Samuel 24:1-10; 1 Arari 11:1-13.

Anggad wadia ni iyan agmaridios a sistema na bengabengatla, kaukolan so tuloy-tuloy a pangasikaso ed pagmaliw a mabinta. Balet makagunggunan tuloy so pansagpot. Diad balon mundo na Dios, say sosyedad na too so tugyopen lambengat na saramay mabinta. Ipasen dan sakey a biskeg so kabintaan aliwan kaleteyan. Agaylan makapalikliket sano amin ya indibidual tan pamilya so nabendisionan na kareenan a papawalaen na kabintaan!

[Litrato ed pahina 23]

Tekep na kabintaan ya inggalang nen Jesus si Jehova ed amin a ginawa to