“Si Jehova so Maomaong ed Siak!”

DIAD sakey ya alay abig a labi nen Marso 1985, saray lalaki tan bibii diad Writing Department ed hedkuarter na Tastasi nen Jehova diad New York, U.S.A., so akaimaton ed makatantandan agawa. Diad saman et akapanserbi la si Karl F. Klein na 60 taon ed sigpot-panon a ministeryo. Alay ligsan inkuan nen Brother Klein: “Si Jehova so maomaong ed siak!” Inkuanto a say Salmo 37:4 so labalabay ton teksto ed Biblia. Saginonor, aliketan so amin diad impantogtog toy cello to.

Diad tinmumbok nin 15 taon, intuloy nen Brother Klein so nankimey bilang membro na writing staff tan nanserbin kabiangay Mananguley ya Ulop na Tastasi nen Jehova. Insan, nen Enero 3, 2001, diad edad ton 95, matoor ya asumpal nen Karl Klein so mangaraldalin a kurso to.

Si Karl so nianak diad Alemanya. Say pamilya to so inmalis ed Estados Unidos, tan binmaleg si Karl ed sakey a melag a komunidad ed Chicago, Illinois. Sanen ugaw ni, si Karl tan say yugtan ton si Ted so interesadon maong ed Biblia. Abautismoan si Karl nen 1918, tan saray makapaliket a nadngel to diad kombension na saray Estudyante na Biblia nen 1922 so angiliing ed sikato na legay-bilay a panamabli ed lawak na ministeryo. Pilalek toy sinimban pakapibiang ed panagpulong, a ginawa to itan anggad unor iran simba na bilay to.

Nagmaliw a membro na staff na hedkuarter si Karl nen 1925, a diad pilimero et nankimey ed panag-imprintaan. Talagan labalabay toy musika, tan diad loob na pigaran taon sikatoy nantogtog na cello diad sakey ya orchestra a kabiangan ed saray Makristianon panagbrodkas ed radyo. Kayari na saman, sikatoy nanlingkor diad Service Department, nagkalautlan nanggayagaan toy impilimog to ed manangasikaso na satan, a si T. J. Sullivan. Diad saman met, angasawa si Ted tan kaiba toy asawa ton si Doris ed panagmisionaryo diad Puerto Rico.

Diad loob na kapalduay siglo, nankimey si Karl Klein diad Writing Department, a sikatoy akatulong na baleg lapud labalabay toy mansukimat tan aralem so pikakabat to ed Biblia. Nen 1963, inasawa nen Karl si Margareta, sakey ya Aleman a misionaryo a manlilingkor ed saman diad Bolivia. Lapud maaron suporta nen Margareta, nagkalalo la sanen asagmak nen Karl iray problema ed bunigas, ayarian to ni magmaliw a produktibo ed kimey anggaman alampasan to lan maong so edad a panag-retiro. Say sipor ya inkasimoon nen Karl, ya atekepan na pirmin panlabay to ed musika, so akapangiter na makatantanda iran paliwawa ed saray kongregasyon tan diad saray kombension. Agni abayag sakbay na impatey to, sikatoy angidaulo diad impaningbat ed teksto ed kabuasan diad baleg a pamilya na Bethel diad New York, a nanggayagaan tan akagunggonaan na amin.

Nanodnonotan na dakel a maparanay a managbasa na Say Panag-Bantayan so istorya ed bilay nen Brother Klein, sakey a makapasagyat a salaysay na saray eksperiensia to a nipalapag diad paway na Oktubre 1, 1984. Panggayagaan yoy pambasa odino pambasa lamet ed satan a salaysay, a lawas nonoten a say nansulat ed satan so akapangusar ni na sakey tan kapalduan dekada bilang matoor tan debosyonadon Kristiano.

Bilang sakey ed nilanaan na Katawan, impapuson pirawat nen Brother Klein so manuley a kaiba nen Kristo diad tawen. Walaan itayo na amin a rason a manisia a tinoor la natan nen Jehova itan a pilalek to.​—Lucas 22:28-30.

[Litrato ed pahina 31]

Si Karl nen 1943 a kaiba toy T. J. Sullivan tan si Ted tan Doris

[Litrato ed pahina 31]

Si Karl tan si Margareta, nen Oktubre 2000